Esti ye’l tecláu pa Llingua Asturiana n’Android (en fase beta)

Al camín qu’entá-yos queda por andar a les nueses lletres más queríes, la ḥ y la ḷḷ (lletra y dígrafu respectivamente), ya-y queda un pocoñín menos p’acabase. Pero aínda ye abegoso pa un usuariu, poder usar estes lletres dende un tecláu. Podría resumilo diciendo que, si la llingua asturiana tuviere’l mesmu respaldu que’l restu de les llingües esto nun pasaba. Y toi falando dende’l nivel institucional… nel que llevamos 30 años perdíos. La cosa ta cambiando, y agora, adulces, el mundu (teunolóxicu) decátase de que nun requexu del mundu hai una llingua qu’esiste, que tien “presencia” na rede, y que necesita ferramientes como’l restu de les llingües (cuesta imaxinar al Català ensin la so “ç“). Asturies ye un ‘rara avis‘ nesti casu, de les nueses lletres, nin mú. ¿Crees que’l gobiernu asturianu, al que-y tas pagando, esmolezse por esti fechu?

Asina que los asturfalantes vense nuna cruciada escontra gobiernos y teunoloxía: El mundu nun sabe qu’esistimos, y el gobiernu quier que’l mundu siga ensin saber qu’esistimos. Esto traduzse en que teunolóxicamente ye difícil facese oyir ente tantes llingües “qu’esisten”, cuando la nuestra “nun esiste” y el gobiernu namás da subvenciones pa facer “La Oreja Verde”. Y nun digamos lo difícil que ye pegase sólo a nivel “d’Asociación pro-llingua” escontra multinacionales del Software.

EL PROBLEMA DE LA VISIBILIDÁ
Si cuando escribo Ḥ ḥ Ḷ y ḷ ves bien les nueses lletres, eso ye bona noticia y quier dicir que les coses tán cambiando pa bien. Si pol contrariu, ves cuadraos o cares riéndose, (toi falando de PC’s, non de Smartphones) sabrás de lo que toi falando. El navegador llibre Firefox, amuesa correutamente les nueses lletres. Nel casu de los Smartphones, queda camín por recorrer, y en munchos casos el resultáu depende d’una multinacional, non sólo del navegador, pero al tiempu.

EL PROBLEMA DE LA ESCRITURA
Ta mui bien que (yá) puedas ver correutamente la ḷḷ y la ḥ , pero… ¿cómo faes pa escribiles? ¿Copy+paste? La llingua asturiana usa un alfabetu con signos diacríticos QUE TIENEN que poder escribise con facilidá dende un tecláu. Copy+paste ó ‘U+1E25’ – ‘U+1E37’ nun son soluciones. Esti ye’l siguiente pasu: un tecláu adautáu a les carauterístiques del usuariu asturfalante. Hai cientos de teclaos distintos: pal Chinu, pal Bosniu, pal Feroés…  etc

Ubuntu foi el primer sistema operativu qu’incluyó les nueses lletres nun tecláu. 😀 Una vuelta más, demuéstrase que’l Software llibre ta pa sirvir a la xente y non a los intereses económicos de les empreses qu’aten a la xente.

Y nel casu de los Smartphones, yá veis nel videu del entamu que paez que la cosa muévese. A ver si pasu ente pasu, facemos ente toos normal lo que tien que ser normal.

Saludos a toos, (menos a los políticos cazurriles, que son el cáncer d’esti pueblu)

NOTA: El tutorial ta fechu pa un Galaxy S versión 2.2 (Froyo).

Bones a toos. Nesti tutorial vamos deprender cómo se pue personalizar el nuesu Android. Nós, non sólo vamos personalizalu, sinón tamién asturianizalu. Partimos d’un Escritoriu clásicu d’Android, como pue ser ésti (click pa ver grande):

y vamos llegar a ésti:

Equí vense meyor les diferencies: Los testos tán en llingua asturiana. 😀 Los iconos son personalizaos; el Dock (la barra d’abaxo) cambia d’aspeutu y pasa de 4 aplicaciones a 5… L’efeutu “planu” pasa a ser un cubu (hai munchos más efeutos pa escoyer), etc. 😀

Si quies tener esti “escritoriu”, sigui lleendo. Lo primero ye descarganos les aplicaciones dende’l market:

1. GO LAUNCHER EX (esiste en castellanu) y…
2. HOME SWITCHER (for Froyo). (Si tienes otra versión, valdrá cualquier HOME SWITCHER xenéricu)

Un LAUNCHER, ye un LLANZADOR d’aplicaciones. Android tien uno por defeutu, que nun se pue cambiar, y por eso vamos a instalar el GO LAUNCHER EX. Ésti va dexanos editar los iconos, los testos, y dar efeutos gráficos al nuesu escritoriu. ¿Pa qué ye el HOME SWITCHER? Pues pa cambiar de LLANZADOR cuando cansemos d’esti… o cenciellamente, volver al orixinal. Cuando tengamos les dos aplicaciones instalaes.

ENTAMANDO LA “PERSONALIZACIÓN”:

Executamos GO LAUNCHER EX. Lo normal ye que “perdamos” los accesos direutos (Siempre vamos poder recuperalos con Home Switcher), asina que vamos poner los nuevos personalizaos 😉 Abaxo, nel Dock, dámos-y al iconu de “Aplicaciones” y entraremos al sitiu au tán les nueses aplicaciones 😀

Y vamos llevando les nueses aplicaciones al escritoriu principal. ¿Cómo? Bien cenciello. Fixáivos nel iconu “Reloj”. Tocamos y caltenémoslu primíu, arrastrámoslu abaxo (onde l’iconu de la casa) y pasa lo siguiente:

Podemos llevalu a cualquiera de les pantalles que tengamos definíes. D’esta miente, vamos faciéndolo con toles aplicaciones que queramos hasta tener un bon númberu d’elles.

Pa RENOMAR los iconos a Llingua Asturiana. Calcamos sobre cualquier de los iconos (calteniendo), y saldrános la opción “Renombrar” 😀 Y pa camudar un iconu por otru más prestosu: Facemos lo mesmo pero na opción “Reemplazar” 😀

EFEUTU CUBU

Agora vamos a personalizar la PRESENTACIÓN, y el DOCK. Pa la presentación vamos a poner el “Efeutu Cubu” Calcamos na tecla “Menú” del nuesu smartphone, “Preferencias–>Presentación“. Y ponemos esta configuración:

IMPORTANTE. Un “cubu” tien 4 cares 😀 Ye por ello, que tienes qu’asegurate de que tienes “4 pantalles” d’escritoriu. ¿Cómo? Botón “Menú”–>”Edit” y ehí amiestes o quites pantalles hasta tener 4 😀

El DOCK. Ye la barra d’abaxo con 5 iconos. Pa tenela como yo calcamos na tecla “Menú” del nuesu smartphone, “Preferencias–>Dock“. Y ponemos esta configuración:

Y pista. Lo demás, déxovos a vosotros que probéis les muuuuuunches opciones y efeutos. Si me dexé daqué importante o nun s’entiende dalgún puntu, yá sabes, a los comentarios 😉

P.D. El Home Switcher, ye por si quies desfacer los cambeos, y dexar el Smartphone como al principiu. Vete a él, execútalu, y seleiciona’l Launcher predetermináu que teníes (Android) 😉

Pa los que nun lo sepáis, Escuela 2.0 ye un proyeutu d’innovación educativa que tien por oxetivu l’usu cotidianu de les TIC nes aules, según la propia Alministración.

Ente les midíes incluyíes nel proyeutu ta la entrega a los escolinos en quintu cursu de Miniportátiles como’l de la imaxe.

Estos miniportátiles traen arranque dual con Windows XP y Ubuntu 9.10 (Karmic Koala). La bona noticia vien porque según informa SUATEA na so web, la Conseyería ta acabante aceutar que Ubuntu venga yá cola llingua asturiana instalada nel ordenador (cosa qu’hasta agora nun pasaba).

Nós nun podemos más que felicitanos por ello y agradece-y a SUATEA la so iniciativa.

Y pa los que tais trabayando colos entregaos l’añu pasáu, equí tenéis un videu de cómo ponelos n’asturianu.

Fonte de les Imáxenes: Xarxa Tic

Toos sabemos vaciar los ficheros de la papelera n’Ubuntu. Pero de xemes en cuandu, hai ficheros que desaniciamos, y llueu “dannos problemes” cuando queremos Vaciar la papelera.

Estos “problemes”, nun son fallos del sistema, sinón tolo contrario. Ubuntu tien un sistema de permisos y xestión de seguridá tan grande, que cuando unviamos a la papelera un ficheru que tea protexíu o nun perteneza al mesmu grupu de permisos nel que ta el nuesu usuariu, da “problemes”. Y entós ¿como vaciar la papelera?. Pues usando l’Alministrador, coño, que pa eso esiste, y amás funciona, non como en Windows…. 😉

Entramos na papelera como superusuariu, y a desaniciar! La papelera ta en:

/home/nome-de-usuariu/.local/share/Trash

…o tamién pues tirar de Terminal, escribir:

sudo rm -rf /home/nome.de.usuariu/.local/share/Trash

…y pista! 😀

Tarás pensando: “vaya rollu, nel mio Windows nun tenía que facer eso“.

……Yá, nun te ḥode…. Alcuérdate de los virus. La seguridá ye lo primero.

Ubuntu fácil

Amestar una imprentadora a un equipu ye mui cenciello: Ubuntu deteuta automáticamente la imprentadora y nun da problemes. Pero, ¿qué pasa cuando la imprentadora ta coneutada a un equipu (un sobremesa, por exemplu) y queremos imprentar dende’l nuesu portátil usando la nuesa rede llocal?

Esti ye l’esquema que vos propongo:

Si los dos PC’s son Ubuntu, ye too más fácil, pero vamos “complicalo” suponiendo que’l sobremesa ye un PC con Windows. Lo que queremos ye imprentar un documentu dende’l nuesu portátil con Ubuntu a la imprentadora, entós lo primero que hai que facer ye instalar SAMBA nel portátil, que va permitinos la compartición tanto de carpetes, como d’imprentadores. Nuna terminal escribimos:

sudo apt-get install samba

Fecho esto, asegurámonos de tener prendíu el PC con Windows y la Imprentadora. 😉

• Y agora, nel portátil con Ubuntu vamos a Sistema–>Alministración—>Imprentadores y facemos estos pasos:

1.- Click en Amestar

2.- Imprentadora de rede—> Imprentadora de Windows vía Samba—>Esplorar

3.- INICIOMS —> DESKTOP —> (Esbillamos la nuesa imprentadora, nel mio casu: HP Deskjet F300 Series) —> Aceutar

4.- Nesti pasu, abriráse un encontu/asistente pa instalar el controlador de la marca d’imprentadora. Nel mio casu, la marca ye HP, y calcamos Alantre

5.- Agora especificamos el modelu, que ye Deskjet F380, y aceutamos.

6.- L’asistente ufrirános la posibilidá d’imprentar una páxina de prueba. Y automáticamente, yá tendremos la imprentadora configurada. Dende esti momentu, podemos imprentar direutamente dende’l nuesu portátil, y ensin necesidá de tener que pasar los documentos d’un PC al otru.

NOTA: Cuando’l PC de sobremesa tien Ubuntu, hai qu’instalar samba tamién n’él, y el restu de los pasos son iguales. 😉

Ún de los problemes fundamentales colos que s’atopa un traductor a la hora de correxir un términu ye la Identificación de la plantía a la que correspuende la cadena o términu que quier correxir. Lo meyor ye poner un exemplu:

Imaxinamos qu’atopamos un fallu d’ortografía, por exemplu, Feramientes , y queremos correxilo por Ferramientes. A veces, si sabemos a qué aplicación pertenez (Totem, Rhythmbox, aMule, etc), vamos directamente a la plantía, y solucionámoslo. Pero otres veces, nun sabemos a qué plantía pertenez el términu incorreutu que tamos viendo. Pa eso, pa identificar esa plantía, podemos usar esti script

Simplemente, descargái el script nuna carpeta. Fecho eso, abrimos la terminal y escribimos:

sudo sh guetar.sh 'testu que queremos atopar'

pedirános la contraseña, y xusto dempués, el script diznos la plantía o plantíes que concasen col testu que queremos atopar.

Mui util pa toos aquellos que se pasen hores y hores revisando fallos d’ortografía p’ameyorar la calidá d’Ubuntu.

Gracies a Timo Jyrinki <timo.jyrinki@iki.fi>

NOTA: Esti script, sólo mira ente los ficheros .mo que tengamos nel nuesu equipu, poro, namás sirve p’atopar cadenes n’asturianu.

WinFF ye una interfaz gráfica pal conversor de videos dende llinia de comandos FFmpeg. WinFF ye llibre con llicencia GPL
En realidá, WinFF nun fai la conversión del ficheru de videu, namái executa FFmpeg. Polo que, namái pue convertir ficheros de videu pa los que FFmpeg tenga sofitu téunicu, y que son toos estos. Pa descargalu facemos como siempre: Aplicaciones–>Centru de Software d’Ubuntu—>WinFF . Hai que tener instaláu tamién ffmpeg. Si nun ta instaláu, facéislo del mesmu mou 😉

La interfaz ye mui intuitiva, y evita tener que recordar toles opciones que remana FFmpeg al facelo too de mou gráficu y nun facer usu de la terminal. Como dixi, podemos cambiar ente munchos formatos de videu, pero nesti post, vamos a ver cómo pasar un videu de Youtube a MP3

Lo primero vamos a la páxina de Youtube au s’alcuentra’l videu que nos presta.

Los usuarios d’Ubuntu, sabemos que mientres vemos el videu, esti ta descargándose al mesmu tiempu na carpeta /tmp Si vamos a esa carpeta, veremos un ficheru FlashXXyyZZ descargándose. Cuando termine de descargase, y como somos xente que nos presten les coses acuriosaes, copiamos el ficheru FlashXXyyZZ y pegámoslu na nuesa carpeta Videos . (De pasu, dámos-y un nome lóxicu, nel mio casu voi llamalu Xera-Tierra)

Agora abrimos WinFF (sí, el míu ta n’asturianu y el vuestru non… WinFF nun ta tovía preparáu pa les 3 lletres del códigu ast, y hai que facéi trampa. Si queréis tenelu n’asturianu, dexái un comentariu nel post). Calcamos na tecla Add/Amestar, y nos desplegables d’abaxo, indicamos:

• Convert to: Audio
• Device Preset: MP3
• Output Folder: /home/nome_usuariu/Música

Calcamos en Convert/Convertir, y abriráse una ventana del terminal onde vamos viendo’l procesu. Al finar, calcamos Enter et voilà, tendremos na nuesa carpeta, el ficheru .mp3 que correspuende al videu.

Esta ye sólo una utilidá, pero de xuru que-y alcontráis más 😉

Anque hai una versión pa GNU/Linux en prebes d’esti albuertu de reproductor musical, namás que val pa versiones de pago… pero si quies usar una cuenta gratuita puedes facelo con wine…

Lo primero ye dir a “Aplicaciones/Centru de software d’Ubuntu” y nel caxellu de busca ponemos “Wine”… y calcamos n’instalar na primer opción que nos apaez

Agora vamos a “Aplicaciones/Wine/Configure wine”, la primer vez tardará un puquiñín, en cuantes abra vamos a “Audio” y calcamos en “Test Sound”, si sentís el soníu ye que yá ta configuráu calcáis “Apply” y llisto, si da un mensaxe d’error configuramos:

1. Marcamos la caxella “ALSA Driver” (esti “ALSA” nun tien que ver colos Cosmen)
2. Dientru de “DirectSound” marcamos “Hardware Acceleration” como “Emulation”
3. Dientru de “DirectSound” marcamos “Default Sample Rate” col valor “44.100”
4. Dientru de “DirectSound” marcamos “Default Bits Per Sample” col valor “16”

Quedaría finalmente como na imaxe que vien darréu (“Apply” depués de facer cambeos):

(más…)

A vegaes, cuando nun sabes per ónde van los tiros, les coses más cencielles son les que más problemes dan…. Resulta que quería grabar el soníu d’un videu qu’alcontré restolando per Internet….. y nun sabía cómo facelo. Bono, pues foi que la tontería ésta llevóme un bon cachu hasta que dí con ello. Equí vos pongo cómo lo igüé (o cómo me funciona a mí)

Lo primero instalamos el programa PulseAudio Volume Control. Abrimos una terminal y escribimos:

sudo apt-get install pavucontrol

Fecho esto, vamos por partes:

• Abrimos el videu o película de la que queremos grabar el soníu.

• Abrimos PulseAudio, qu’alcontraremos en Aplicaciones–>Soníu y Vídeu:

Vamos a la llingüeta Configuration (llegaos a esti puntu, dicivos que entá nun hai traducción d’esti programa n’asturianu. ¿Quién s’anima?). Nella dexamos los valores como veis na imaxe, asegurándonos de que na llista de Audio internu, apaeza dalgún de los dos valores que vos pongo: Analog Stereo Duplex ó  Analog Stereo Output (a mí funcióname colos dos)

• Ensin zarrar esti programa, abrimos el Grabador de soníu de Gnome: (en Aplicaciones–>Soníu y Vídeu)

Agora ponemos a reproducir el vídeu del que queremos grabar el soníu, y nel momentu que queramos qu’empiece la grabación, dámos-y al botón de grabar (l’iconu ye’l círculu bermeyu, como casi siempres)

Si l’indicador de nivel se mueve, ye bona señal 😀  Por si acasu, (o nel casu que nun se vos mueva’l nivel), na otra aplicación, vais a la llingüeta Recording que debiera tar funcionando, y calcáis en “Record Stream from” y aseguráisvos d’escoyer: “Monitor of Audio internu Analog Stereo“. L’indicador entamará a movese

Cuando queráis que dexe de grabar lo que tais reproduciendo, dais al botón de Stop del grabador de soníu y llisto! Namás nos falta guardar lo qu’acabamos de grabar. Vais a Ficheru—>Guardar como, y escoyéis el destín.

NOTES:

1. siempres ye meyor guardar en formatu .ogg que n’otru cualquiera 😉
2. Por si te lo tabes entrugando, el videu del exemplu ye ésti.

Que lo grabéis bien…

A los centros educativos asturianos tán llegando pizarres dixitales d’estremaes marques. Darréu qu’esti mercáu ye mui nuevu, los fabricantes tenten vender ya inclusive regalar el so software rápidamente pa convertilu nun estándar de facto y dempués zarrar al másimu les condiciones d’usu del so programa (a lo llargo de la curtia historia de la informática tenemos abondos exemplos d’esto).
Por exemplu, les condiciones d’usu del software de Promethean (ActivInspire) camudaron recientemente pa que los materiales ellaboraos por marques pa la so pizarra nun puedan ser esportaos y emplegaos n’otra, o lo que ye lo mesmo que les clases preparaes pa esta pizarra nun se pueden emplegar na Smart Board o Interwrite y pueden facelo yá que les condiciones d’una llicencia de software puen cambiar cuando’l so dueñu quiera.
Anque prefiriríamos emplegar software llibre esclusivamente (garantizaríamos l’accesu futuru a les clases que podemos preparar) nesti momentu nun atopé nengún proyeutu abondo desendolcáu, asina que vamos enseñavos cómo poner esti software nos ordenadores pa poder usar les pizarres n’Ubuntu y n’asturianu.

Promethean
Entamamos pola pizarra de la marca Promethean que ye una de les que tán de moda y la más fácil d’instalar yá que tienen un repositoriu propiu pa Ubuntu. De momentu namás tienen versiones preparaes pa Ubuntu 9.04 y 9.10, suponemos que nun tardando muncho tendrán pa Ubuntu 10.04 y podremos velo nel Promethean Planet (tenéis que rexistravos).

N’Ubuntu 9.10 Karmic Koala namás tenemos qu’arrancar el Xestor de paquetes de Synaptic nel menú Sistema – Alministración.

Calcáis n’Axustes – Repositorios y escoyéis la llingüeta Otru software. Escoyéis la opción Amestar na parte d’abaxo a la izquierda y escribís esto:

deb http://activsoftware.co.uk/linux/repos/ubuntu karmic oss non-oss

Agora namás vos queda zarrar esa ventana y calcar nel botón Recargar del Xestor de paquetes de Synaptic. Va apaecer una alvertencia de claves que tenemos qu’aceutar (esto pasa porque falten robles dixitales pero nun tien mayor importancia).

Yá tamos terminando. Agora seleicionamos pa instalar los paquetes activaid, activdriver, activinspire, activhwr-es, activinspire-help-es, activ-meta-es, activresources-core-es y activtools.

Si vos atrevéis cola terminal podéis usar esti comandu:

sudo apt-get install activaid activdriver activinspire activhwr-es activinspire-help-es activ-meta-es activresources-core-es activtools