Pocu a pocu, vamos descubriendo más coses nueves na versión d’Edubuntu que ta a piques de salir.

Güei toca falar de Ktouch, un programa de mecanografía, col que podremos prauticar la nuesa dixitación coles tecles.

Con Ktouch, vamos exercitando los nuesos deos, con cencielles repeticiones al entamu ( asdf, asdf, asdf… jklñ, jklñ, jklñ….) y llueu va aumentando’l nivel de dificultá. Podemos repetir tantes vegaes como queramos, y xubir/baxar nós mesmos el nivel. Avísanos cuando tenemos un fallu (véislo na imaxe.. ponlo en color bermeyu), diznos les pulsaciones per minutu y déxanos escoyer ente dellos teclaos, pa prauticar colos distintos acentos esistentes, o signos de puntuación  ( ^, ö, è, ì… etc), y cunta con un monitor de progresu.

Perfeutu pa dir garrando habilidá nos deos.

Yá sabeis que ta disponible na versión d’Edubuntu, pero si usais Ubuntu, podéis instalalu dende Aplicaciones–>Amestar/Quitar.   😉

Imprescindible ensayu de Eric Raymond p’atalantar la diferencia nel desarrollu del software llibre y el privativu.

Esti llibrín propició que Netscape lliberase’l so códigu allá pel añu 1998, lo que xeneraría Mozilla, encargada de la mayor revelación del software llibre fasta agora: el restolador web Firefox, primer software tornáu al asturianu 🙂

Pa lleelu calca nel iconu:

Si tienes un ordenador con Bluetooth furrulando y un móvil que soporte Java (la mayoría de los móviles modernos) y tamién tenga bluetooth, pues emplegar el teléfonu como un mandu a distancia.
Un bon exemplu de lo que’l Software Llibre pue algamar.

Lo primero que tenemos de facer ye dir a la web del programa, agospiada en SourceForge, http://bluepad.sourceforge.net/ y ñavegar hasta la seición downloads.

Ellí vamos descargar dos ficheros:

BluePad v0.4 empaquetáu pa distribuciones Debian
BluePad v0.4 pa Java

Encuantes tengamos los dos ficheros descargaos, faemos doble click nel que se llama bluepad_0.4_all.deb y calcamos n’instalar el paquete. Al venir empaquetáu podemos depués desinstalalu fácilmente dende Synaptic.

Agora tócanos instalar nel móvil el so programa. Descomprimimos el ficheru bluepad_0.4_mobile.tar.gz y atopámonos con dos carpetes, una col nome BluePad y otra col BluePad_alternative. Nós vamos emplegar el BluePad pero si lu probáis y el móvil nun tira per él, podéis intentalo col alternative. Entráis na carpeta BluePad y calcáis col botón drechu nel ficheru BluePad.jar y escoyéis la opción Unviar.

Nel ventanu que vos apaez buscáis el vuestru móvil y escoyéis Unviar.

Agora toca dir al móvil ya instalar el programa, esto depende del modelu vuestru móvil pero suel ser bien cenciello.

Cuando lo tengamos arrancamos el programa primero nel ordenador, ta allugáu en Aplicaciones – Soníu y Vídeu. En cuantes s’entame va apaecenos l’iconu na parte drecha del panel superior en Gnome. Calcamos col botón drechu y seleicionamos la opción coneutase.

Agora calcamos en Guetar, cuando fine escoyemos na llista desplegable’l nuestru móvil y calcamos en Coneutase.

Va apaecenos el mensaxe de que BluePad ta esperando pol móvil.

Esto quier dicir que toca coneutase dende’l móvil, asina qu’arrancamos l’aplicación nel móvil, escoyemos l’idioma, na pantalla primera calcamos el númberu 5. Importante: Agora escoyemos la opción Amestar dispositivu (“Choose device”) y coneutamos el móvil col ordenador. Agora toca decidir pa qué vamos usar el móvil, les opciones son les que vienen darréu:
* Controlar una presentación de diapositives d’OpenOffice.
* Una película o Música n’Amarok.
* Los típicos Xuegos que trai Ubuntu yá instalaos.
* Mover el ratón pela pantalla (ye difícil facelo con soltura porque nun respuende del too bien), anque con práutica puen facese coses.

Les tecles a emplegar en cada casu apaécennos na pantalla del móvil y hasta que nun calquemos nuna d’elles BluePad va a siguir informando de que nun ta conectáu, nesi momentu l’iconu va pasar a un colorín más azuláu.

Que vos preste…

Cuando tengo decenes de llingüetes de Firefox y toi baxando ficheros cada poco, la notificación de Descargues Completaes notase llenta.

Si quies desactivala, pones esta direición nel restolador Firefox:
about:config

Y afites a false la entrada:
browser.download.manager.showAlertOnComplete

Vía: Chris Ilias’ Blog

Edición 14 Setiembre 2010: Firefox ya ta n’asturianu oficialmente pa tolos sistemes operativos 😉 + info.

Una vez instalao Firefox (en inglés, castellanu o cualesquier idioma) y dende el propiu Firefox calcai l’enllaz de descarga:

• Firefox 3.0.8 n’asturianu
• Xulrunner 1.9.0.5 n’asturianu

Estos enllaces abrirá una páxina de descarga en sourceforge.net, y vereis un mensaxe que vos entrugará si dais permisu pa instalar, calcar “Allow” (si ta n’inglés)…

y saldrávos entos un ventanu onde (depués d’unos segundinos) vos dexará instalar la traducción…

Cuando acabé de copiar los ficheros vos pedirá reaniciar el restolador pa cargar la traducción…

El procesu ye’l mesmu pa colos dos ficheros, al acabar tendréis Firefox n’asturianu.

Usuarios de Windows y Mac OSX:

Estos sistemes nun reconocen l’asturianu, y tendréis de dicir a Firefox que arranque n’asturianu.

Pa facelu entrái en “about:config” (teneis de ponelu onde les urls) pedirávos confirmación, una vez dentru en “filtro” poneis “general.useragent.locale” calcái dos veces na columna “Valor” onde pon “es” (o “en” “en_GB” etc…) y cambialu por “ast” acepta y reanicia’l Firefox. Yá lo tendrás n’asturianu.

Si nun te funciona con “ast” pon entos “ast_ES”.

Otra opción ye qu’instales la estensión “Locale Switcher”
https://addons.mozilla.org/es-ES/firefox/addon/356?id=356&vid=1103
que val pa escoyer la llingua que quies usar dende’l propiu menu de ferramientes de Firefox.

Según el nuestro hardware igual necesitase instalar un driver privativu d’un adaptador usb pa tener wifi.
Lo que puede llegar a ser complicao, y n’espera a que’l fabricante abra los drivers (pasín a pasu van viendo que ganen usuarios), podemos usar l’aplicación ndiswrapper 🙂 qu’emulará’l driver de Windows 🙂

Garramos el driver del CD que trayía l’hardware, o baxámoslu de la web del fabricante: Será un ficheru con estensión .inf.

Abrimos una terminal:
Instalamos ndiswrapper:
sudo apt-get install ndiswrapper

Instalamos el driver:
sudo ndiswrapper -i Nome_ficheru_driver.inf

Miramos que s’instaló:
ndiswrapper -l
Devuelve daqué asina:
prisma02 : driver installed
device (1740:1000) present

Escribimos la configuración nel modprobe:
sudo ndiswrapper -m

Devuelve daqué asina:
adding “alias wlan0 ndiswrapper” to /etc/modprobe.d/ndiswrapper …

Cargamos el módulu ndiswrapper nel aniciu:
sudo modprobe ndiswrapper

Calcamos nel monitor del área de notificación, y ya debiera atopanos les redes wifi disponibles.

Vía: Emete

KStars, ye un planetariu nel nuesu ordenador.

Atalantar el movimientu de les estrelles, el xiru de la Tierra, la eclíptica, etc… ye cosa abegosa si ún nun tien un bon mayestru d’Astronomía. Yo tuve siempres afición a columbrar estrelles nel cielu, o a adicar el movimientu de los planetes dende bien neñu, y llueu tuve la suerte de tener una asignatura d’Astronomía…., pero agora aporta KStars

Con KStars, esto ye percenciello. Permítete escoyer una ubicación o allugamientu na Tierra, bien seya pol nome de la to ciudá (inclúi Xixón y Uviéu) o poles coordenaes de to casa (llatitú y llonxitú), y ver nel to PC cómo ta el cielu esautamente a esa hora. O el día anterior, o como tará mañana…   …o cuál yera la estrella polar de los exipcios. Sí, porque magar que la estrella polar de los exipcios tamién apuntaba al Norte, nun yera la mesma que la nuesa. ¡¡Oh sospresa!! La estrella Polar de los exipcios yera Thuban (α Draconis). Y tamién podremos ver cual será la estrella que conseñará el Norte dientro de 10.000 años…. que ¡¡Oh, sospresa!! nun será la mesma que tenemos agora: yá vos adelanto que sedrá Deneb (α Cygni).

KStars ensama parte del conxuntu de programes educativos d’Edubuntu. Cuido que son importantes esti tipu de ferramientes nes escueles, y por eso hai de dedicayos atención. Con KStars, podremos ver el movimientu real de los planetes de cualesquier añu. Inclúi más de 130.000 estrelles 13.000 oxetos del espaciu profundu,  podremos ver les nueses constelaciones, el Sietestrellu, el Carrellín, Saxitariu, El Pexe, El Cisne, La Rapiega, El Carreru de Santiago, milenta cometes y asteroides, asina como los ocho planetes del Sistema Solar, el Sol y la Lluna.

Tamién, y esto ye lo bono, si tenemos un Telescopiu de montura ecuatorial podemos remanalu dende’l propiu programa. La interface ye bien cenciella, y amuésanos el nome de tolos oxetos celestes, tamién nos avisa de los eventos más notables del día, o ver tamién la famosa “Estrella de Belén“ fai 2.000 años.

Qué más dicivos, que ye un perguapu programa pa descargar, y que, cómo non, yá ta disponible en Llingua Asturiana, topónimos terrestres y nomes d’estrelles incluyíos 😀

… qu’esfrutéis.

A vegaes nun nos cabe una peli o archivos grandes en un llápiz, CD, ¿disquete? xD y necesitamos dixebralu en varios más pequeños (daqué como Hacha en Windows).

Dende la terminal:
split -b100m peli.avi peli_cachu

Esto crianos cachinos de 100MB col nome peli_cachu, qué dempués xuntamos con esti otru comandu:
cat peli_cachu* > peli_xuntada.avi

Anque Chromium, el proyeutu que usa Google Chrome, ta en fase alpha pa linux y nun ye mui funcional. Yá puedes instalalu si necesites comprobar el renderizáu de les toos webs (lluéu fallará’l explorer :P), o simplemente si te presta caciplar.

Lo primero vamos añadir nuevos repositorios

$ sudo /etc/apt/sources.list

o dende synaptic si nun vos presta usar la terminal… y amestamos dos llinies

deb http://ppa.launchpad.net/chromium-daily/ppa/ubuntu intrepid main
deb-src http://ppa.launchpad.net/chromium-daily/ppa/ubuntu intrepid main

amestamos la clave pa los repositorios

sudo apt-key adv –recv-keys –keyserver keyserver.ubuntu.com 5A9BF3BB4E5E17B5

anovamos…

$ sudo aptitude update

y instalamos…

$ sudo aptitude install chromium-browser

Yá podréis probalu dende “Aplicaciones > Internet > Chromium”

Mañana sábadu 21 de marzu del 2009, a les 12.15 de la mañana, el programa Nós de la TPA presentáu por Próspero Morán, presentará la primer Install Party n’asturianu en Candás fecha por Softastur 🙂

Editáu’l 21 marzu 2009, 16:30 hores: Como bien nos diz Rieḷḷu ta xubíu a Youtube 🙂 Dexóvos el videu.