http://asturiaslodicetodoelmundo.com

Va una selmana que The Document Foundation llanzó la campaña pa recoyer 50.000€ que sirviríen como fondu permanente de la Fundación. Güei ¡yá ta cubiertu l’oxetivu!

Munches gracies a tolos que contribuyereis p’algamar l’oxetivu; si entá nun vos dio tiempu, podéis collaborar pa llegar al siguiente finxu de la Fundación: 100.000€ que sirvirán pa publicidá, participación en conferencies o disponer d’una cadarma de hardware propia (güei les páxines de TDF tan corriendo n’ordenadores emprestaos por brOffice…)

Tamién hai bones noticies tocante a LibreOffice. El día 23 apaeció una nueva versión de LibreOffice, la 3.3.1 que pue descargase nesta páxina. Con esta versión apaecen delles novedaes, ente elles una meyor integración colos temes del escritoriu (incluyendo iconos en color). Los usuarios d’Ubuntu entá tendremos d’esperar dellos díes pa qu’apaeza nos repositorios.

De xuro que yá conocéis LibreOffice, la suite d’ofimática derivada d’OpenOffice.org.

Dende’l mesmu entamu, la xente que s’encargó de llevar alantre esta xera tenía l’envís de que’l gobiernu d’esta aplicación tuviere nes manes de los propios usuarios y pa ello se creó The Document Foundation, una fundación ensin porgüeyu que s’encarga de facilitar la evolución de LibreOffice.

Dende setiembre la Xunta Direutiva de la Fundación tuvieron valorando les opciones de constitución llegal de la Fundación y decidieron acoyer The Document Foundation a les lleis alemanes de fundaciones.

Pa facelo ye necesario tener un fondu de 50.000€, polo que la Xunta Direutiva de TDF fai un llamáu a que los usuarios sofiten la creación de la Fundación col so donativu. Na páxina de la campaña espliquen meyor cómo y por qué collaborar, incluyendo un enllaz pa facelo vía PayPal. Si prefieres facelo nel to bancu, estos son los datos de la cuenta:

Titular: OpenOffice.org Deutschland e.V.
Asuntu: The Document Foundation
Númberu de cuenta: 3497390
Códigu de bancu: 66690000
Bancu: Volksbank Pforzheim
IBAN: DE12666900000003497390
BIC: VBPFDE66


El llímite pa collaborar ye’l 21 de marzu y de momentu yá lleven recoyíos 34.000€; si se recibieren más de 50.000€ el sobrante ta previsto destinalo a los gastos de funcionamientu corriente de The Document Foundation.

Si uses LibreOffice, echa un gabitu pa sofitalu; sinón, ¡prebalu!… ¡Va prestate!

Esta entrada va dedicada p’astur y pa la so muyer por aguantalu/nos.
¡FELICIDAES pola nueva futura linuxera! 😛

Equí teneis la presentación de Firefox 4 (abrela con OpenOffice) que presentamos nel del III Sidra&Blogues 😉

Recapitulando:

• ¿Qué ye MeeGo? Ye un sistema operativu destináu a Netbooks, Sistemes de navegación pa vehículos, Tablets, y Tefnos Móviles (handsets y smartphones), diseñáu pa competir con iOS y Android, por exemplu.
• ¿Quién ta tres d’esti proyeutu? Básicamente, Nokia, Intel y la Linux Foundation.
• ¿Qué compañíes sofiten a MeeGo? Acer, Asus, BMWGroup, CS2C, EA Mobile, Linpus, Mandriva, Miracle, Novell, ST-Ericsson, Telefónica, WTC, y XandrOs…. ente otres.
• ¿Qué más coses t’interesen saber de MeeGo? Pues que ye un sistema llibre, y ta n’asturianu.

Recordemos, qu’hasta agora, el sistema operativu qu’usaba Nokia yera Symbian. Pero’l mercáu de los móviles taben llevándoselu iOS y Android básicamente. Nokia taba quedando atrás col so vieyu Symbian, y fai una selmana fizo una allianza con Micro$oft, cola que pretenden “tresformar” los 200 millones d’usuarios de Symbian en clientes de Windows Phone 7. (Ai mamina!)

Esto quier dicir que los teléfonos Nokia, llevarán la marca de “Ventanes” una temporada. Entós ¿qué pasa con MeeGo? ¿Abandónase? Pues non: Nokia nun abandona’l proyeutu (que yá empezó fai un par d’años), y sigui apostando por él. “MeeGo tien futuru y munchu” asina dixo’l CEO de la compañía Stephen Elop. Ye más: el compromisu confírmase cola anuncia de que Nokia asoleyará un terminal MeeGo pa esti añu. O dicho d’otru mou: Nokia va xugar a dos bandes.

Nun se sabe qué modelu de smartphone va sacar Nokia, pero lo que sí sabemos ye la posibilidá de qu’esi teléfonu podamos tenelu en llingua asturiana esti añu. Si tas pensando en mercar un móvil, igual t’interesa esperar un poco. 😉

Al final, ye’l software llibre el que vuelvi a facer dalgo pola to llingua, y non los sistemes privativos. Güei mesmo, lleíamos un mail de Margie Foster faciendo referencia al compromisu de Imad Sousou (de Intel) col proyeutu. Puedes instalar y probar MeeGo descargándolu dende la so páxina web

Acabo ver na rede un tweet que me llamó muncho l’atención. Dicía:

“¿Twitter n’asturianu? píde-yoslo nesti formulariu http://acurti.es/72n #ast ISO-639-2-AST“. (Realmente, el tweet dicía ISO-639-3… pero equí corríxolo pa nun siguir cola confusión)

Prestóme muncho’l tuit, de verdá. Munchísimo. Pero agora vais entrugame:

– ¿Tu a favor de Twitter n’asturianu?. Pero si ye privativu!!

– Pues si, coño. ¿Qué tendrá que ver que me preste’l software llibre pa que lo quiera too en llingua asturiana, tanto lo llibre como lo privativo?. Yo quiero n’asturianu tanto los ingredientes del choped, como les instrucciones del microondes, como’l bandu’l pueblu. Lo que pasa ye que hai que tener los pies nel suelu, y si too tuviere na nuesa llingua, como pasa en Catalunya o Euskadi, yá diba dicivos yo cómo escoyer lo meyor: y lo meyor siempre ye’l software llibre.

Pues como dicía… esi tuit fai un llamamientu a tolos asturfalantes pa que la presencia del asturianu na rede seya cada vegada mayor. Sinceramente, dubio que los de Twitter vayan ceder y/o considerar poner Twitter n’asturianu, pero dalgo ye dalgo, y a ver si la iniciativa da frutos. Mientres tantu, l’asturianu na rede va faciéndose un sitiu pasu ente pasu, y eso ye siempre bona noticia.

Agora mesmo, nun tenemos Twitter n’asturianu, pero sí una rede social con integración nel twitter: Ximielga.me . Ye un bon entamu, ye software llibre, y dempués d’un añu, yá cuenta con 2.000 soscripciones. Si nun tuviésemos nada, taríemos quexándonos…

Pero non too acaba equí, tamién tenemos otres opciones en cuantu a Redes Sociales: Gwibber. Un cliente pa Twitter percenciellu. Ye’l que yo uso, y sí: ye llibre, y n’asturianu. Toma esa!! 😀

Non sólo val pa Twitter, sinón tamién sirve pa Identi.ca, Facebook, Flickr, Digg, Qaiku, Buzz y Friendfeed. Y too, na to llingua.

¿Ye necesario too esto? Sí. Y entá ye poco. Queremos muncho más. Querémoslo too. La Sociedá Civil n’Asturies fai muncho más pola llingua que la clase política que nos gobierna, con MubAreces a la cabeza. Ye por eso qu’esta mena de llamamientos son deseables, y necesarios, y el puxu de toos a la llarga, dará’l resultáu merecíu…… pero mientres tantu, facéivos ver y que vos vean usando ferramientes na vuesa llingua: usái Gwibber

….. da-yos un ZAS! en tola boca.

Dende fai 1 añu, esfrutamos d’OpenOffice n’asturianu.

Esta torna supunxo un fitu, cola primer office multiplataforma (ya existía la GNOME Office pa Linux) íntegramente n’asturianu.

Tamos mui contentos de les estadístiques: 1.250 descargues nel primer añu 😀
L’usu según sistema operativu ye:

Queremos puntualizar qu’OpenOffice yá vien instalada n’asturianu en Linux (hai que baxala si quies la cabera versión), colo que serán munchos más usuarios na nuestra llingua.

Y si tovía nun la uses, equí la tienes 😉

Toos sabemos vaciar los ficheros de la papelera n’Ubuntu. Pero de xemes en cuandu, hai ficheros que desaniciamos, y llueu “dannos problemes” cuando queremos Vaciar la papelera.

Estos “problemes”, nun son fallos del sistema, sinón tolo contrario. Ubuntu tien un sistema de permisos y xestión de seguridá tan grande, que cuando unviamos a la papelera un ficheru que tea protexíu o nun perteneza al mesmu grupu de permisos nel que ta el nuesu usuariu, da “problemes”. Y entós ¿como vaciar la papelera?. Pues usando l’Alministrador, coño, que pa eso esiste, y amás funciona, non como en Windows…. 😉

Entramos na papelera como superusuariu, y a desaniciar! La papelera ta en:

/home/nome-de-usuariu/.local/share/Trash

…o tamién pues tirar de Terminal, escribir:

sudo rm -rf /home/nome.de.usuariu/.local/share/Trash

…y pista! 😀

Tarás pensando: “vaya rollu, nel mio Windows nun tenía que facer eso“.

……Yá, nun te ḥode…. Alcuérdate de los virus. La seguridá ye lo primero.

El sábadu 12 de febreru a partir de les 17:00 hores, na Casa de Cultura de Pola Siero, va tar de lo más prestoso:

• Charres:

• Presentación de Firefox 4, por Softastur.
• Un añu na rede de Ximiélga.me, por Mikel González
• Biblioteca virtual Mª Xosefa de Canellada, por Mar Martín

• Entrega de los premios a Blogues n’asturianu

• Meyor blogue por conteníu (según autores de blogues)
• Meyor blogue por diseñu (según autores de blogues)
• Meyor blogue (según llectores de blogues)

• Espicha nel Abre Cesar a partir de les 19.00 hores.

Fonte: Meyor Blogue n’asturianu 2010.