Gufw, ye la ferramienta pa xestionar el tornafueos d’Ubuntu… pero sorpresa… si pones como regla la pallabra “asturianu” ¿qué ye lo que sal…?

ye lo que tien que’l desendolcador principal de Gufw seya asturianu…

¡¡Acaba d’espublizase Ubuntu 9.10, nomatu Karmic Koala!!

Lo Nuevo

Esta nueva versión da un saltu mui grande n’usabilidá y vistosidá.

Les principales meyores respeuto la versión anterior son:

• Nuevu tema d’escritoriu (el naranxa da pasu al marrón) ya iconos, con bootscreen nuevu. Mui sobrio y elegante. Resaltar la posibilidá d’usar fondos d’escritoriu que van camudando automáticamente.

• L’asturianu como llingua pa la instalación. Tamién revisáu abondo tol asturianu del sistema, siempre siguiendo la norma de l’Academia 🙂

• Ubuntu One instaláu por defeuto, con 2 GB de baldre pa sincronizar los tos ficheros na ñube.

• Nueva aplicación p’alministrar discos.

• Centru de Software d’Ubuntu , la estrella d’esta versión, cola qu’instalar/desinstalar programes más fácil tovía.

• Nueva interface pa remanar el soníu, muncho más cenciella y seleutor pa cada aplicación abierta.

• Cambéu de Pidgin por Empathy, como cliente de mensaxería nel intre. Y les caberes versiones pa programes cómo Gnome 2.28.1, Firefox 3.5.3, Rhythmbox 12.5, y munchos más.

• Sofitu pa USB 3.0.
• Grub 2, col que poder tener un arranque gráficu.
• Anicia y apaga muncho más rápido.
• Instalación en 15/20 minutos.
• Posibilidá d’encriptación de los direutorios d’usuariu al completu.
• Páxina d’entamu de Firefox n’asturianu.

Instálalu

Pa baxar el ficheru .iso y quemalu nun CD, puedes facelo dende equí.

Si quies pedir un CD orixinal de baldre, puedes facelo dende equí.

Si ya uses Ubuntu, puedes anovar la to versión de baldre, tema que ya tratamos 🙂 Aunque si nun t’atreves, puedes venir el día 21 de payares al taller d’instalación n’Uviéu y anovamóstelu de baldre 🙂

¡¿Qué faes que nun lu tas baxando ya??!!! 😉 ¡Esfruta d’ún de los meyores sistemes operativos, de baldre, ensin virus y además n’asturianu! 😀

Agradecimientos

Tener un sistema operativu n’asturianu ye gracies al trabayu altruista de too esti equipu de Softastur, si quies formar parte ¡anímate!

albacoru, alea, AluminiuM, bertuku, Dangerous Piper, Dani, Daviz, Dinamiteru, Esbardu, Heinrich, Iñigo Varela, Jesusito, Marcos, nelo, rieḷḷu, traveseu, Vity, xa, Xandru Martino, Xandru, Xuacu y Yagüe.

¡Milenta gracies! 😀

Otros análisis equí, equí, equí y equí. Tamién tienes una perbona guía visual de les novedaes na páxina web oficial.

Incidencies

Yo mesmu m’atopé qu’anovando nun s’anovó’l Grub al nuevu kernel d’Ubuntu 9.10, apuntando al anterior kernel d’Ubuntu 9.04. L’aida de la comunidá ye la que fae a esti sistema operativu el meyor 😀

Si vos pasa que tras anovar Ubuntu 9.10 nun anicia, o va perllentu o inestable, casi de xuro que t’apuntando a un kernel que nun-y correspuende. Pa igüalo sigui-y estos pasos:

Comprobar que ye esti’l fallu:
Pa sabelo, nel arranque aparez el menú de Grub, calca “e” y entrarás na edición del Grub (esta edición perdérase nel siguiente arranque). Ehí tienes qu’apuntar al nuevu kernel, camudando’l númberu de 4 cifres dixebraes por “.” por esti númberu: “2.6.31-14”. Resumiendo ye onde veas esto:
/boot/vmlinuz-2.6.31-14
/boot/initrd.img-2.6.31-14-generic
Onde tendrás otru númberu que nun seya 2.6.31-14, y será’l que tengas que camudar por 2.6.31-14 😉
Agora arranque calcando Ctrl+B p’aniciar Ubuntu 9.10, pero apuntando al nuevu Grub.
Si too te furrula, ya sabemos onde ta’l fallu 😀 Y agora hai que facelo persistente, ye dicir, configuralu pa los siguientes arranques.

Configurar l’arranque pa siempre:
Una vegada aniciemos Ubuntu, calcamos Alt+F2, salnos una ventana y escribimos el comandu:
gksu nautilus
Nos pedirá la clave del nuestru usuariu.
Lluéu vamos al direutoriu /boot/grub y calcamos col botón drechu del mur nel ficheru “grub.cnf”, vamos a la llingüeta Permisos y dicimos que’l propietariu y el grupu puede lleer y escribir n’esti ficheru. Tamién taría bien copialu, pa tener una copia de seguridá d’esti ficheru que ye mui importante.
Agora calcamos 2 vegaes nesi ficheru p’abrilu (nos lo abrirá col Gedit), y camudamos el kernel vieyu (remembra apuntar el númberu pa sabelu agora) pol nuevu (el 2.6.31-14) en toles entraes que veamos. Grabamos y reaniciamos. Ya too debería tar perfeuto 🙂

Güei apaez Ubuntu 9.10 que tien el nome de Karmic Koala y con ella lleguen toles meyores nes que la comunidá tuvo trabayando nestos últimos meses y ente eses meyores tán les traducciones feches pol coleutivu Softastur.

Tornar aplicaciones informátiques nun ye fácil, per un llau encariamos un contestu al que la llingua asturiana nun tuvo accesu hasta va poco y hai que probar soluciones terminolóxiques qu’enanchen los significaos de les pallabres emplegaes y, per otru, les traducciones faensen na mayor parte de los casos ensin conocer bien el contestu nel que se van aplicar.

Si a estes dos dificultaes sumamos que nós equivocámonos como persones que somos (namás ruempen platos los que los frieguen) atopamos que delles veces hai errores nes tornes o ensin haber errores, hai meyores soluciones. Lo que güei vos propongo a los qu’usáis Ubuntu y los demás programes que tornamos pero nun tais en Softastur nos echéis un gabitu p’atopar esos errores y camudalos pa siguir meyorando la calidá de la traducción.

Pa eso abrimos un foru específicu al que pues acceder dende equí. Eso sí, pa que la información seya útil contestualízala lo másimo posible: la fras que ta mal, el llugar onde apaez (programa, menú, opción, llingüeta, etc.) y la to propuesta y nós interamos arreglala lo primero posible. En casu de que nun fueres a criar un cuenta pa unvianos la información, faelo pola páxina de contautu.

Nel últimu númberu de la revista d’analís de la actualidá El Jueves, atopámonos con esta alusión a lo asocedíu na guapa aldea de Sietes esti día. Vese que na revista tan mui informaos, ḥuas, ḥuas

UNA fizo declaraciones sofitando l’usu d’Ubuntu pa los portátiles de primaria, tema ya faláu abondo equí:
https://tapaponga.altuxa.net/pa-echase-a-tremar.html
https://tapaponga.altuxa.net/la-escuela-20-de-zp-tien-trampa.html
https://tapaponga.altuxa.net/portatiles-pa-los-nenos-en-primaria-con-windows-linux.html

Ta perbien que los partidos políticos lo pidan publicamente 😀

¡Otru gallifante pa UNA! ¿De xuro que naide más quier ún?

Guetando la frase del títulu en Google, atopé perinteresantes esperiencies d’usuarios nes sos primeres 24 hores con un sistema operativu al que nun tan avezaos 🙂

• BBC (Inglés).
• Una hoja de papel (Castellanu).
• Criando cuervos (Castellanu).

Y en 2 díes… ¡nueva versión d’Ubuntu! 😀

Más información equí.

Por si los koalas y la llingua nun basten pa qu’Ubuntu 9.10 seya un Asturalia-Linux, la versión de sirvidor que ta a piques de salir va venir con Eucalyptus.

Eucalyptus

Ello ye un desarrollu abiertu de la computación na ñube, pero que al ser modular podrá nel futuru adautase a otres arquitectures (Google, Microsoft…)

Polo que cuenten nesta páxina, instalar una ñube propia ye más fácil de lo que podría pensase. Pa una organización o empresa que necesite “tar nes ñubes” ye una alternativa afayadiza a los servicios de pagu.

Y yá que tamos, qué prestoso diba ser si de la universidá d’Asturalia salieren proyeutos como esti, fechu na Universidá de California de Santa Bárbara

Chris Schlaeger, un de los miembros del equipu directivu de The Linux Foundation fizo la semeya a Linus Torvalds (criador del kernel de Linux) al salir de la Japan Linux Symposium y el Linux Kernel Summit en Tokio.

Ya que Microsoft trató de torpedear l’ésitu de la Japan Linux Symposium asoleyando el so Windows 7 esi mesmu día xusto cruzando la cai, decidimos reínos un poco d’ellos. Unviamos a Linus a la so gran caseta promocional. A un de los comerciales solo-y llevó un minutu convencer a Linus, como podéis ver na semeya. Al menos eso ye lo que él camentaba. Obviamente, nun sabía a quién-y taba falando. Al final Linus nun mercó una copia…

Y ye que los linuxeros esfrutamos de too, incluso del asoleyamientu d’un Window$ 🙂 Seya en Sietes o en Tokio 😛