Cuando yes un usuariu nuevu d’Ubuntu (de cualesquier sistema GNU/Linux, en xeneral) hai dos coses que dan una migaya de medrana: frañar “daqué” ensin ser a igualo, y meter comandos nún terminal.

P’ayudar mientres pierdes esi mieu, el collaciu Georgi Karavasilev vien de sacar la versión 0.2.4-1 del so programa Mechanig que, darréu, va tar disponible n’asturianu.

Mechanig ye lo que se llama un «frontend» (esto ye, un envoltoriu) pa los comandos de mantenimientu del sistema que d’otra manera tendríes qu’escribir nún terminal. Si te gusta lo que ves y quies probalo, tienes qu’instalalo dende un «ppa» o archivu personal del autor, porque entá nun ta disponible nos repositorios oficiales d’Ubuntu. Pa ello vas tener qu’abrir un terminal 😉 y escribir estos comandos (teclea la to contraseña si la pide):
sudo add-apt-repository ppa:kokoto-java/usu-extras
sudo apt-get update
sudo apt-get install mechanig

Pero ¿qué ye lo que fai Mechanig? Ente otres coses val pa:

• Anovar les llistes de paquetes instalables
• Anovar los programes instalaos
• Quitar de les llistes los paquetes que yá nun son instalables
• Desaniciar de la caché los paquetes *.deb descargaos con apt
• Optimizar l’usu de la memoria…

Y, como curiosidá, el nome d’esta versión de Mechanig ye Agnetha, que ye una referencia a… una persona que sal nesti videu

Mozilla espubliza güei la versión 5 de Firefox, el restolador web más usáu n’Europa y emblema del software llibre nel mundu.

Les meyores que destaquen na nueva versión son:

• Ferramienta “Do Not Track”, cola qu’evitar el siguimientu d’usuarios por parte d’anunciantes (Permite refugar la publicidá personalizada)
• Sofitu p’animaciones CSS.
• Ameyorada la integración pa Linux.
• Posibilidá de camudar ente les distintes versiones disponibles nos canales de desendolcu de Firefox dentro del propiu restolador.
• Meyores nel rendimientu del motor JavaScript y nel sofitu HTML 5, XHR, MathML y SMIL.

Yá puede baxase de baldre pa tolos sistemes operativos y llingües
dende la direición oficial: http://www.mozilla.com/ast/firefox/

La comunidá del software llibre tién el vezu antiguu de pone-y nomes recursivos al software desendolcáu. Asina, GNU quier dicir GNU not Unix; pero hai munchos más exemplos d’esta triba de nomes humorísticos, como PHP, LAME o Wine.

Nel casu del llibru The Art of Community, de Jono Bacon, la recursividá va un pasu más lloñe.

Jono Bacon

L’autor, que ye l’encargáu de la Comunidá d’Ubuntu, esbilla nel llibru les claves pa construyir una bona comunidá, el distintu tratamientu que se-yos tién que dar a les distintes tribes de comunidáes, les claves pa facer una comunidá fuerte, les ferramientes afayadices pa que la información circule… o les maneres d’enfrentase a los problemes cuando estos apaecen.

Otru puntu perinteresante ye la manera d’evitar el queme de les persones cabezaleres d’una comunidá: deteutar les primeres señales y cómo actuar cuando apaecen.

Sicasí, lo más interesante del llibru ye que quier ser recursivu: ta escritu por una persona encargada d’una comunidá y estudia les comunidáes… pero ta fechu col envís de que la comunidá siga realimentando el llibru que, como diz el mesmu Jono, nun ye una obra finada. Pa ello The Art of Community véndese como un llibru cualquiera (en Amazon, por exemplu, de verdá paga la pena tener una copia pa consulta), pero O’Reilly tuvo d’acuerdu en qu’el llibru tuviera una llicencia Creative Commons que permite descargalu de baldre y contribuyir a meyoralu, por exemplu na web de la comunidá del llibru.

Pola parte mala, de momentu ta namái que n’Inglés. Pero cualquiera sabe, tornar 300 y pico páxines ye un momentín si se fai en comunidá 😉 Y ye una erbía igual d’afayadiza pa construyir una comunidá de sofitu a un sistema operativu como pa lliberar de pilancos una comunidá de sofitu a una llingua.

Por si los koalas y la llingua nun basten pa qu’Ubuntu 9.10 seya un Asturalia-Linux, la versión de sirvidor que ta a piques de salir va venir con Eucalyptus.

Eucalyptus

Ello ye un desarrollu abiertu de la computación na ñube, pero que al ser modular podrá nel futuru adautase a otres arquitectures (Google, Microsoft…)

Polo que cuenten nesta páxina, instalar una ñube propia ye más fácil de lo que podría pensase. Pa una organización o empresa que necesite “tar nes ñubes” ye una alternativa afayadiza a los servicios de pagu.

Y yá que tamos, qué prestoso diba ser si de la universidá d’Asturalia salieren proyeutos como esti, fechu na Universidá de California de Santa Bárbara

Vengo d’atopame nel Planet col enllaz a un artículu de Computerworld UK nel que nos cuenten que la Bolsa de Londres (LSE), xunto cola so filial Borsa Italiana y la noruega Oslo Børs van camudar el sistema d’esplotación que veníen usando o que taben a piques d’usar.

Anguaño veníen usando’l software TradElect, basáu en Microsoft .Net, pol software MilleniumIT que funciona con GNU/Linux y Solaris. Millenium IT ta desendolcáu por una empresa desllocalizada en llocal de Sri Lanka a la que va mercar LSE por 30 millones de dólares, mientres que’l sistema d’anguaño costaba 65 millones de dólares.

Darréu d’esto, LSE va aforrase añalmente 10 millones de libres esterlines entamando dende l’exerciciu 2011/2012. Rescampla que la Bolsa de Londres nun ta n’Asturies…

(Iguao colo que nos cuenta ayalgueru)

Jono Bacon remémbranos nel so blogue que’l 16 de xunetu fina’l plazu pa participar na Amuesa de Cultura Llibre d’Ubuntu

La cosa consiste en facer una esbilla d’arte llibre nes categoríes de semeyes/imaxes, soníu y vidiu que va incluyise nel siguiente llanzamientu d’Ubuntu (9.10 o Karmic Koala). Almítense obres embaxo llicencies Creative Commons Attribution-ShareAlike, Attribution o, cuando’l remitente ye’l mesmu autor, obres con llicencia cero

La manera de participar ye xubir la obra a un agospiamientu d’Internet afayadizu y poner l’enllaz nel apartáu correspondiente de la wiki del concursu. Na mesma wiki pueden vese los ganadores d’anteriores llanzamientos. ¿Daquién s’anima a amosar l’arte asturianu del s. XXI?

¡Por fin llega la esperadísima versión final d’Ubuntu Intrepid Ibex ya puede descargase! 😀

Ente les novedaes más destacaes, caben señalar les siguientes:

• Soporte pa ḥ y ḷḷ de manera nativa 😀 Y munches más aplicaciones tornaes al asturianu 😉
• Nautilus estrena pestañes.
• Directoriu priváu encriptáu pa cada usuariu.
• Nuevu tema visual oscuru (nun va por defeutu, pero sí pa poder escoyelu fácilmente).
• Nueva sesión d’invitáu con accesu llimitáu al sistema.
• Nel Grub aparez arrancar cola “Cabera sesión exitosa”.
• Nuevu xestor de redes (con soporte pa 3G).
• System Cleaner pa llimpiar paquetes que nun faen falta.
• Meyor soporte de Flash con Firefox.
• Istalador pa poder crear con Ubuntu un LiveUSB, y istalalu en PCs ensín reproductor de CD.
• DKMS: Recostrucción automática de los módulos cuando heba autualizaciones del kernel.
• Arranca muncho más rápido (nel mio caso calculo qu’aforra 1/4 parte del tiempu que lleva entamar a Hardy).

Y….. ¿qué faes que nun lo tás baxando ya? 😉 😀 (Recomendación: Usa torrent, qu’igual tan saturaos los sirvidores).

PD: Nos prosimos díes diremos poniendo captures y videos de les novedaes 😉

¿Tovía duldes n’apuntate? 😉 ¡Animate! 😀

Restolando pela web, chocame qu’izquierda xunida ye un sitiu web peligrosu…

Por contra, la versión castellana… non.

Si llegamos a tar en tiempu d’elecciones, pensaría mal…

La Fundación Linux estimó qu’implementar el sistema operativu Fedora (el cual ye GNU/Linux) dende cero, supondría unos 10.800 millones de dólares. ¡Ehí ye nada!!! :S

Esta distribución ta formada por 204,5 millones de llinees de códigu, componiendo 2.547 paquetes.

L’estimación del trabayu pal desarrollu del software necesariu pa facer dalgo igual ye un total de 60.000 años home, onde unos 7.500 corresponderíen al desarrollu del kernel namái.

… Y esta estupenda distro puedes istalala pol módicu preciu de 0 € 😉