Asoleyosé una nueva web oficial de tormenta d’idegues pa Ubuntu 😉
http://brainstorm.ubuntu.com

Equí podeis aportar idegues pa meyorar a Ubuntu 😀

Ye pa nos un presto anunciar de que yá hai un sistema operativu n’asturianu, depués de munchu trabayu de tola comunidá y cuando tamos premarando’l sitiu web nuevu de Softastur porfin podemos disfrutar d’un sistema operativu na nuesa llingua. Y ye que na última actualización de los paquetes de les llingues d’Ubuntu porfin incluyen soporte al asturianu.

Ye mui tarde y tocame madrugar polo que nun puedo estendeme munchu (prometo un tutorial pa tener Ubuntu n’asturianu) vos dexo una captura de pantalla que fice del mio pc.

Tenemos munchu trabayu que facer, munches coses qu’iguar pero el trabayu va dando frutos.

Quería dar el mi agradecimientu personal a tolos que collabarais tanto con launchpad, como con otru tipo de proyeutos como Mozilla o la propia Uiquipedia el esfuerzu fechu… estes coses son les que ropen “la brecha dixital” de verdá… güei toi como un guaḥe con calcetos nuevos 😀

Lleendo’l perinteresante artículu sobre seguridá de “Lo híce y lo entendí“. Voi facer un repasu personal de como protexer el login al ordenador dende Ubuntu.

Siempre remembro Windows 98 cuando na pantalla de login calcabes-y al botón Cancelar y acedíes a Windows, dandote los servicios de que disponía.

N’Ubuntu sorprendíome cuando entamaba a ‘xugar’ con el, que si selecionabes nel menu Grub (al entamar l’ordenador) “Recovery Mode”, llevabate a un promt cola consola… mirando per ehí, si faes startx ¡alehop! L’entornu gráficu! Con acesu de root a too Ubuntu :S
Nun hai que da-y muncho al maxín pa ver al guaḥe que too revuelve, descubriendo esta funcionalidá y desaniciando tol sistema. O al maríu/muyer celosonos acediendo al home de la pareya ensín el menor impedimentu…

Les ventaxes del códigu llibre vense clares dende’l primer momentu 🙂 Y esti ye’l trucu 🙂

1.- La pantalla de login de Ubuntu podemos considerala segura.

2.- Convien que los ficheros/carpetes que nun queramos qu’otros usuarios nos cotilleen, los protexamos, poniendo-yos sólo permisu de llectura/escritura pal propietariu, y nun permitiendo na pa los otros.

3.- Modificamos la BIOS para que l’ordenador nun pueda arrancar dende CD (Ya que sinon con un LiveCD puede modificase l’archivu /boot/grub/menu.lst del discu duru y retornar los drechos d’alministrador que vamos a quitar nel siguiente puntu). Tamién protexer la BIOS pa que nun se pueda camudar pa configurala con arranque dende CD.

4.- Configuramos el login del Grub. Pa ello (Anantes llee dalgun artículu d’edición de grub)

Abrimos una terminal.
sudo grub update
md5crypt
Introduz la to futura clave.
Copia’l valor que te devuelve na consola. Na que esa retafila de carácteres referiremolos como la_clave_encriptada_copiada_anantes.
quit
Peslla la ventana de la Terminal.

Calca Alt+F2
gksudo gedit
Mete la to clave d’alministrador si te la pide.

Abre’l ficheru /boot/grub/menu.lst
Aprovecha pa facer una copia nel to home d’esti archivu, por si saliere dalgo mal 😉
Busca la llínea
#password topsecret
y ponla como
password --md5 la_clave_encriptada_copiada_anantes
(Con esto conseguimos que faiga falta esa clave pa modificar la llínea del grub, y como ta encriptada, nun puede facese mirando’l ficheru dende un editor d’un LiveCD ;)).

Quédanos restrinxir l’acesu a la consola que pueda otorgar privilexos d’alministrador, pa ello buscamos tamién dalgo asemeyao a estes 2 llínees:
title Ubuntu 7.10, kernel 2.6.22-14-generic (recovery mode)
title Ubuntu 7.10, memtest86+
Ponemos EMBAXO DE CADA UNA, esta llínea:
password --md5 la_clave_encriptada_copiada_anantes
Guarda y sal del editor.

Con esto, debieremos conseguir una seguridá suficiente a nivel ‘caseru’ 😉 Obviamente, protexer la información d’un ordenador ye casi qu’imposible, y sería ya recurir a encriptaciones y sistemes más sofisticaos de proteción.
Pero a un nivel de nuestru llar, y pa la nuestra privacidá esto debiera ser suficiente 😀

Intrepid Ibex ye’l nomatu final pa la versión 8.10 d’Ubuntu que saldrá n’Ochobre del 2008, según anunció Mark Shuttleworth.
¡Bienveníu seya! 😀

Ye verdá que cuasi toles aplicaciones tienen sustitutu llibre, pero tamién ye verdá que determinaos programes (mui especificos) privativos nun tienen alternativa (o polo menos alternativa funcional). Pero podemos llegar a solucionar esti problema con Wine, una aplicación cola que podemos executar aplicaciones Win16 y Win32 en sistemes GNU/Linux y en sistemes Unix. Comenten que ye compatible con más aplicaciones que Windows Vista.

Güei probé a instalar Reason de Propellerhead, que ye un software pa producción músical, puede usase como estudiu virtual o pa virtualizar instrumentos (vamos coses rares). Tien versión pa Mac O$ X y Window$ 2000 y XP, usarémos esta última pa instalar en Wine.

Lo primero… instalar wine…

$ sudo aptitude install wine

mui complicáu, cuando te fechu vamos configurar l’audio.

Vamos a “Aplicaciones/Wine/Configure Wine” y na pestaña audio configuramos según el nuesu hardware. Yo entá nun probé con nengún dispositivu midi, namás que dispongo d’una tarxeta M-audio que va por firewire, y nel pc nun tengo d’eso… de modo que en “DirectSound” marqué “Emulación del Manejador”. Aplicar y aceptar.

Fechu, agora metemos el cd1 de Reason y calcamos dos veces nel ficheru Autorun.exe y seguimos el procesu d’instalación que podeis ver nel videu siguiente (la música ye la canción d’amuesa cola que abre Reason) .

– Neo: ¿Qué verdad?
– Morfeo: Que eres un esclavo Neo (…)
Ésta es tu última oportunidad. Después, ya no podrás echarte atrás. Si tomas la pastilla azul; fin de la historia. Despertarás en tu cama y creerás lo que quieras creerte. Si tomas la roja, te quedas en el País de las Maravillas y yo te enseñaré hasta dónde llega la madriguera de conejos.
Recuerda: lo único que te ofrezco en la verdad. Nada más.

Agora, tocate a ti llector escoyer 😉

El navegador web Firefox 2, consume bastante memoria RAM.
Un bon trucu pa menorgar esa cantidá ye facer lo siguiente:

– Como direción ponemos
about:config
– Buscamos esta cadena:
browser.sessionhistory.max_total_viewers
– Y ponemosla a 0.

Con esto evitamos que cachee en memoria les webs, lliberando RAM.
Con -1 (por defectu) calcula el númberu de fueyes a cachear dependiendo de la cantidad de memoria, según el siguiente esquema:
32MB 0
64MB 1
128MB 2
256MB 3
512MB 5
1GB 8
2GB 8
4GB 8
Colo que’l consumu de memoria ye grande col valor -1.

Poniendolo a 0, facemos que nun dexe nenguna na RAM 😉 Yendo más sueltu.

Güei simplemente quiero amosar otra de les bondaes del Software Llibre en base a una esperiencia personal. Y ye que embaxu papa Ubuntu escondense bien de versiones dende la educativa o dende la que escribo, pero güei quiero falar de Xubuntu.

Y ye que soi d’esos maniaticos que prolonguen la vida de los ordenadores tolo que pueden, el que uso normalmente como pc d’escritoriu tien 5 años y usa componentes reciclaos d’otros equipos (la disquetera tien 11 años). Tengo la costumbre de da-y otros usos a equipos vieyos como servidor o lo que se me ocurra nel momentu. Y así reciclando material, que los collacios o familiares tiren, xunté un Pentium III con 128 Mb de ram, 10 Gb de disco duru, tarxeta soníu, tarxeta de rede, monitor y ratón, faltome el tecláu (tenia 4 tecles que nun furrulaben). Pos bien montelu y quixe meter un sistema d’escritoriu pero claro Ubuntu con Gnome yera mui pesáu pa un equipu tan vieyu, entos diome por probar Ubuntu con xfce (o Xubuntu), evidentemente hai otros escritorios llixeros, pero quedé ablucáu. Un equipu que rescate de la basura completamente operativu, negún problema col hardware, instalé plugin de flash, codecs, etc y funcionaba perfeutamente. La única pega yera que ‘l monitor yera demasiáu vieyu pal refrescu necesariu en dalgunos videos, nel mio monitor nengún problema…

Agora que tenía l’equipu montáu bien el otru problema, 50 m² de casa y demasiáu cacharru… tenia que desfaceme del equipu que acababa de revivir, pero siempres apaez alguien… una muyer que va entamar unos cursos d’informática pa xubilaos y que nun tenía ordenador… vamos un novatu… l’usuariu ideal pal mio equipín modestu…

Y ye que a veces pongome malu col consumismu electrónicu que sufrimos y que quiciabes seya bono pa la economia, pero falamos d’equipos mui dificiles de descontaminar y que suelen acabar en vertederos illegales (eso si bien alloñaos de les conexiones a internet)

Por eso quisiera pidivos qu’enantes de tirar un equipu miraseis si teneis manera de da-y otru usu, entos si que podríemos dicir… yo nun soi tontu…

Atopete nun día amarronau de seronda,
cansau de buscar peles ventanes
esperiencies distintes.

Fue un amor a primera vista,
tanto, que voi diciendo a incluso
desconocíos lo entusiasmau que toi contigo.

Y nun ye amor efímeru de branu…
demuestresme día a día que puedo confiar en tí,
que nunca me vas dexar colgáu.
Me encanta la seguridá y vocación
que me demuestres fasta nes coses más pequeñes,

¿Que más dicir que nun seya un TQ! 😉

Les maneres más afayaíces de intercambiar música/pelis/documentos n’Ubuntu, pa mi son les siguientes:

1.- Amule. Atopeslu nos repositorios. ¿Qué dicir del emule linuxeru? 😀

2.- Si prefieres el torrent, yo quedome con Deluge (Tamién nos repositorios). Aunque na versión 8.04 sedrá Transmission el xestor por defectu. Imprescindible pa les búsquedes YouTorrent 😉

Aunque nun seyan P2P, nun puedo dexar de mencionar estes 2 opciones:
3.- Web: Per bonos enllaces de descarga directa en Vagos.

4.- Google? Sí! Google tamién nos ufierta esta posibilidá, de descarga directa d’archivos indexaos pol fámosu motor de búsqueda. Pa ello busques esto en Google:
-inurl:(htm|html|php) intitle:”index of” +”last modified” +”parent directory” +description +size +(wma|mp3) “sting”

Onde sting ye lo que busques 😉