Archivu 31 de Xineru de 2009

Tapaponga cumple un añu

31 de Xineru de 2009

Güei fai un añu qu’entamó Ta pa Ponga, un añu con bien de novedaes pa los asturfalantes n’Ubuntu, y nel Software Llibre en xeneral. El 31 de xineru del 2008 dos frikis entamaron esta comunidá pa intentar esparder l’usu d’Ubuntu y aidar a la xente con dubies o problemes… un añu dempués, más d’ún cayó nes redes de GNU/Linux y nel blogue yá escriben cuatro frikis, hubo dos Install Party y la comunidá de Launchpad (proyeutu de traducción) aumento y meyoró enforma, recuperándose l’actividá de Softastur.

Amás l’Academia de la Llingua saco un cartafueyu vital pal trabayu que facemos, y ye d’agradecer tol sofitu que mos presten coles dubies que-yos plantegamos.

Pa rematar, la Xunta pola defensa de la llingua premió a tolos collaboradores de Softastur col Andrés Solar 2008 lo que ye una gran motivación pa siguir siendo geeks n’asturianu… 😛

Esperemos que pal 2009 podamos siguir medrando y meyorando ente toos, porque tamien yes parte 🙂

¡01000111 01110010 01100001 01100011 01101001 01100101 01110011! 😉

Primer procesador de testos n’asturianu

30 de Xineru de 2009

Mientres se torna la pergrande cantidá de frases d’OpenOffice, podemos esfrutar del primer procesador de testos tornáu al asturianu (incluyendo obviamente, al igual que’l sistema enteru n’Ubuntu, la ḷḷ y la ḥ): ¡Abiword!

Pero esistía un problemín na primer versión que sofita l’asturianu que ye la 2.6.4 (y ésta ye la que tenemos n’Intrepid, a esperes que l’actualicen en Jaunty): que nun salíen los iconos. Tres el correspondiente bug qu’igüaron nunos díes (¡Bien polos desarrolladores d’Abiword y el software llibre!), tuvimos disponibles la versión 2.6.5 y agora la 2.6.6. Too ello xenial, pero pa tenela bien, había que baxar los fontes y instalala dende ellos, cosa nun tan cenciella.

Güei GetDeb asoleya la versión 2.6.6 en .deb, colo qu’instalala (a esperes que salga nos repositorios oficiales d’Ubuntu) son 2 simples clicks (ún por cada .deb), atopaos equí:
Abiword
Abiword-common

¡Ya nun hai xida pa escribir N’ASTurianu DENDE l’ASTurianu! 😉

¿Cuántes perres nos cuesta Microsoft?

29 de Xineru de 2009

Perinteresante estudiu de Bulma, onde sabremos los costes que supón el monopoliu de Micro$oft.

Mac vs PC

24 de Xineru de 2009

Nun ye lo que tienes. Ye como lo uses 😉

Ver el vídeu en Youtube

Mapa de radar

20 de Xineru de 2009

Siempres m’entrugué qué yera eso de Mapa de radar… Tengo un applet de esos prestosos de meteoroloxía que vienen con Ubuntu por defeutu. Pa ponelu, calcamos col Botón drechu enriba del Panel Superior, Amestar al Panel…, escoyemos Informe Meteorolóxicu, y volvemos a da-y a Amestar.

Esta utilidá dizte la temperatura y pon un iconu prestosu del tiempu que va a facer. Pero cuando calques enriba d’ello, sal una ventana con una llingüeta que pon: Mapa de radar …y nada más.

Pues bien, yá se pa que ye, y non, nun ye pa saber au s’alluguen los de la Menetérica. Si calcamos col botón drechu enriba del iconu que tenemos nel panel, y llueu Preferencies ábrese una ventana con dos llingüetes. Vamos a la que trai “Xeneral“, activamos les caxelles “Activar mapa de radar” y “Usar direición personalizada pal mapa de radar“, y na caxa de embaxo ponemos esti enllaz:

 

Zarramos y llisto.

Agora yá sabremos lo que ye el famosu Mapa de radar.

Saludos. (quien sepa de más enllaces, que los ponga en comentarios 😉 )

NOTA: Póngovos equí dalgún enllaz más, puestu que paez que’l d’arriba ta obsoletu:

Semeyes Install Party de Sama

18 de Xineru de 2009

Equí tan delles semeyes del entamu 🙂 ¡Gracies Chus por elles!

Dalguna semeya más equí.

Crónica Install Party de Sama

17 de Xineru de 2009

Son la 1:30 la madrugada y acabo llegar de Sama, pero esto hai qu’escribílo en caliente 😛 así que quiero dar la mio opinión personal de la segunda Install Party 🙂

Lo primero ye agradecer tol sofitu que nos dió l’Ayuntamientu de Llangréu (gracies Eloy y Maite 😉 ) nos medios como na publicidá. Ensín ello nun hubiera sido nin asemeyao.

Y la sensación final ye perbona, quedándome na mente sobre too les cares de satisfación de les persones que s’animaron a tener un sistema operativu n’asturianu. Eses espresiones d’ablucamientu, de nerviosismu, de deseyu por tener dalgo na so llingua, danme una sensación perbona: La del pueblu asturianu que despierta del letargu, creyendo na so llingua. Onde les vuestres ganes son les nuestres, nos dais puxu y afirmaisnos no que facemos 😀 ¡Gracies! 😉

L’afluencia fue bona y la xente marchó contento. Aunque tuvimos un fallu pergrande, ya qu’al nun avisar llegó xente col discu duru ensín espaciu, con errores que Windows nun quier detectar nel usu diariu, ensín desfragmentar el discu… lo que provocó problemes nel particionáu, con retrasos esaxeraos y que dalgunos/es marcharen ensín Ubuntu dempués d’esperar abondo (¡perdonai!).
Llegamos a bromear qu’había qu’entamar el día anantes una Desfragmentation Party xD Tuvimos camentando nel casu y tenemos una solución 😀 ¡Sí, sí! Igual hai un camín perfácil qu’hai que probar pa instalar Ubuntu nun ordenador col Windows frayáu, unviar un corréu electrónicu o llamainos 😉 pa guiavos na igüa, que ye namás y na menos que Wubi 😉
A los nuevos usuarios d’Ubuntu, remembravos que somos más qu’usuarios: somos comunidá 😉 y tamos p’aidanos ente toos. Tapaponga ye un bon exemplu d’ello. Asina qu’ante dubies o problemes que veais nes vuestres nueves instalaciones, avisanos escribiendo los problemes o incidencies que tengais nos comentarios d’esti post 🙂

Polo demás tamién vino La Nueva España, así que tal vez salgamos nel periódicu un dia d’estos.

Bieveníu/a a quien s’atrevió/animó a instalar un sistema operativu n’asturianu, tienes delantre un saltu de sieglu pa la nuestra llingua y la to llibertá na informática 😀 ¡Gracies y un abrazu!

PD: Más alantre, semeyes 🙂

Softastuning

16 de Xineru de 2009

Güei tuve caciplando con temes pa gdm, metacity y GTK, y al final salió un set completu pa tener un estilu Softastur nel ordenador, esplico el procesu y pongo imaxenes pa que veais como queda.

Primero vamos “tunear” la pantalla de conexón (gdm) que quedará así:

baxamos el tema dende Sourceforge y vamos a “Sistema>Alministración>Login Window” pediranos la clave d’usuariu y vamos a la pestalla “Llocal” veremos un llistáu colos temes instalaos y a mandrecha un botón que diz “Amestar”, calcamos y escoyemos el tema que tamos acabantes de baxar. Cuando te instalao marcamos el tema escoyíu y, opcionalmente, cambiamos el “color de fondu” por un naranxa asemeyáu al que veis na imaxen anterior. Calcamos “Zarrar” y cuando coneutemos otra vuelta yá saldra el nuevu tema.

Agora vamos col tema pa Gnome, quedará así:

Pa esto tenemos que baxar el tema pa les ventanes y iconos, y el fondu de pantalla. (resoluciones superiores a 1024×768)

Agora vamos a “Sistema>Preferencies>Aspeutu” y calcamos el botón instalar pa escoyer el ficheru pal tema que tamos acabantes de baxar, cuando acabe de copialu marcamos de tolos temes que tenemos instalaos el que pon “Softastur”, y llistu. Ensin zarrar les “Preferencies d’aspeutu” calcamos na pestaña “Fondu de Pantalla”, amestamos el fondu que baxamos de Flickr y escoyemos un color sólidu asemeyáu al del fondu.

Y yá tendremos Gnome con montera… espero que vos preste.

Last.fm

15 de Xineru de 2009

Tengo un collaciu, que me pidió que-y punxese nel so Pc el Sistema Operativu Ubuntu. ¿Porqué? Porque ta n’asturianu. Entrugué-y que si taba seguru, y él que sí. El mio collaciu ye de Candás y ye mui neciu. Si ta n’asturianu, prefierlo y nun hai más que falar. Ser neciu ta mui bien, y éstos de Candás son bien necios, (non más necios que ún de la Cuenca). Entrugóme si podía usar Last.fm n’Ubuntu, y díxe-y que sí. ¿Y n’asturianu?…. Hmmm eso vamos dexalo pa dempués 😉 (pero el qu’escribe, ye neciu de la Cuenca 😀 )

Estos son los pasos percenciellos de cómo instalalu nel nuesu Ubuntu. Dende la terminal escribimos

sudo apt-get install lastfm

dempués d’unos segundinos yá lu tendremos. Agora vamos a rexistranos nel sistema, pa tener un nome d’usuariu. Pa ello vamos a esti enllaz

Agora podremos executalu nel nuesu PC. Pa ello, vamos a Aplicaciones–>Soníu y Vídeu–>Last.fm

Llisto! Como nos sale n’inglés, vamos a ponelu nuna llingua más cercana. Vamos a Ferramientes (tools), Opciones (Options) y nel cuadru que se nos abre, escoyemos la llingua “Español”. Zarrar el programa pa ver los cambeos y cuando lu abráis otra vegada, yá tara n’Español

Sí… Español. Tenéis que poder entender l’español, colla bandarras. Ah!! que vos prestaría más nuna llingua entá más cercana? Pues desgraciadamente, last.fm nun vien n’asturianu. Estes son les males noticies.

Les bones noticies, ye que vamos facelo nós mesmos, porque el que vos fala, ye mui neciu.

Vamos a esti enllaz y ehí descargamos nel nuesu Escritoriu el ficheru lastfm_es.qm

Agora abrimos el terminal, escribimos

sudo nautilus

y na ventana que se abre vamos a esti direutoriu:
/usr/share/lastfm/i18n

garráis el ficheru lastfm_es.qm que descargásteis y arrastráislu a esa carpeta, trocando el que yá esiste.

Llisto!! Last.fm n’asturianu !!! 😀

Esti post, va pa tolos necios, n’especial candasinos, que cuerren per tolos llaos y llares, y que lleven l’asturianu ehí per onde pasen.
Esfrutái

Install Party en Sama esti vienres 16

15 de Xineru de 2009

Remembrate que mañana vienres 16 Xineru ente les 17.00 a 21.00 hores, nes Escueles Dorado de Sama, Softastur col sofitu del Ayuntamientu de Llangréu organizará la segunda Install Party d’Ubuntu n’asturianu 😀

L’envís ye instalar a tolos y toles interesaos/es un sistema operativu que-yos permita remanar un ordenador n’asturianu.

Col sistema operativu Ubuntu puedes facer cualesquier xera, como restolar per Internet, ver videos, oyir música, escribir documentos, unviar/recibir emails, ver/editarsemeyes, descargar música/películes, chatear… y too ello n’asturianu, ensin virus y de baldre. Tamién puedes dexar instaláu Windows.
La sesión ye abierta y de baldre y tamién se convida a asistir a tola xente interesao en conocer Ubuntu.

Esta vegada nun fae falta que t’apuntes, con que nos traigas el to ordenador val 😉 ¡Animate! 😀