Mechanig, ferramienta de mantenimientu

21 d'Ochobre de 2011

Cuando yes un usuariu nuevu d’Ubuntu (de cualesquier sistema GNU/Linux, en xeneral) hai dos coses que dan una migaya de medrana: frañar “daqué” ensin ser a igualo, y meter comandos nún terminal.

P’ayudar mientres pierdes esi mieu, el collaciu Georgi Karavasilev vien de sacar la versión 0.2.4-1 del so programa Mechanig que, darréu, va tar disponible n’asturianu.

Pantalla principal de Mechanig

Mechanig ye lo que se llama un «frontend» (esto ye, un envoltoriu) pa los comandos de mantenimientu del sistema que d’otra manera tendríes qu’escribir nún terminal. Si te gusta lo que ves y quies probalo, tienes qu’instalalo dende un «ppa» o archivu personal del autor, porque entá nun ta disponible nos repositorios oficiales d’Ubuntu. Pa ello vas tener qu’abrir un terminal 😉 y escribir estos comandos (teclea la to contraseña si la pide):
sudo add-apt-repository ppa:kokoto-java/usu-extras
sudo apt-get update
sudo apt-get install mechanig

Pero ¿qué ye lo que fai Mechanig? Ente otres coses val pa:

  • Anovar les llistes de paquetes instalables
  • Anovar los programes instalaos
  • Quitar de les llistes los paquetes que yá nun son instalables
  • Desaniciar de la caché los paquetes *.deb descargaos con apt
  • Optimizar l’usu de la memoria…

Y, como curiosidá, el nome d’esta versión de Mechanig ye Agnetha, que ye una referencia a… una persona que sal nesti videu

Fundando la Fundación

22 de Febreru de 2011

De xuro que yá conocéis LibreOffice, la suite d’ofimática derivada d’OpenOffice.org.

Dende’l mesmu entamu, la xente que s’encargó de llevar alantre esta xera tenía l’envís de que’l gobiernu d’esta aplicación tuviere nes manes de los propios usuarios y pa ello se creó The Document Foundation, una fundación ensin porgüeyu que s’encarga de facilitar la evolución de LibreOffice.

Dende setiembre la Xunta Direutiva de la Fundación tuvieron valorando les opciones de constitución llegal de la Fundación y decidieron acoyer The Document Foundation a les lleis alemanes de fundaciones.

Pa facelo ye necesario tener un fondu de 50.000€, polo que la Xunta Direutiva de TDF fai un llamáu a que los usuarios sofiten la creación de la Fundación col so donativu. Na páxina de la campaña espliquen meyor cómo y por qué collaborar, incluyendo un enllaz pa facelo vía PayPal. Si prefieres facelo nel to bancu, estos son los datos de la cuenta:

Titular: OpenOffice.org Deutschland e.V.
Asuntu: The Document Foundation
Númberu de cuenta: 3497390
Códigu de bancu: 66690000
Bancu: Volksbank Pforzheim
IBAN: DE12666900000003497390
BIC: VBPFDE66

El llímite pa collaborar ye’l 21 de marzu y de momentu yá lleven recoyíos 34.000€; si se recibieren más de 50.000€ el sobrante ta previsto destinalo a los gastos de funcionamientu corriente de The Document Foundation.

Si uses LibreOffice, echa un gabitu pa sofitalu; sinón, ¡prebalu!… ¡Va prestate!

¿Queréis dir al cine?

1 d'Ochobre de 2010

Ver el vídeu en Youtube

O, si queréis facer cine, equí ta el programa que permite facer estes coses.

¡Que se vean los artistes asturianos! 😀

Nota: Si quies baxar la película a meyor calidá, tienesla nel sitiu oficial del proyeutu: Sintel.

Aplicaciones portables de Linux

7 d'Agostu de 2010

¿Qué son les aplicaciones portables? Pues aplicaciones que puedes llevar nun pendrive, y usales en cualesquier ordenador Linux al que te coneutes, d’esti mou trabayarás siempres coles ferramientes que más te presten.

Si camientes que hai poques aplicaciones portables, equí te dexo una amuesa gráfica de lo que puedes alcontrar nesta web: http://portablelinuxapps.org/

Munches aplicaciones yá tán disponibles n’asturianu, VLC, Inkscape, Liferea, aMule, emesene, Pidgin, OpenOffice, Transmission, X-Chat, GIMP, Arora, Firefox, … pero otres entá non, ¿anímeste? 😉

La páxina sigui y sigui xorreciendo con más aplicaciones…. Gloobus, Blender, Audacity,… etc, esperemos que’l ritmu nun pare 😀

Ubuntu y la discapacidá

14 de Xunetu de 2010

Va un tiempu qu’Ubuntu (y otres distribuciones de Linux) vienen faciendo un esfuerzu p’averar el sistema operativu a les persones con discapacidaes. El nuesu sistema operativu cuenta con delles aplicaciones d’asistencia como Orca (testu a voz; nun ta disponible n’asturianu), aides a la escritura (tecles lentes, configuración especial del mur o Dasher) o delles posibilidaes d’aumentu del escritoriu.

Sicasí, esto nun ye bastante. Esiste un equipu, l’Ubuntu Accesibility Team que ta dedicáu a diseñar la meyor manera en que los usuarios discapacitaos pueden usar Ubuntu. Y p’algamar el so oxetivu, piden la collaboración pa crear lo que llamen (nel mundu del diseñu) «Personas», esto ye delles persones imaxinaries col mayor grau de detalle y que representen a la mayor cantidá posible de persones reales.

Si yes una persona con discapacidá y quies collaborar, l’Ubuntu Accesibility Team ta faciendo una encuesta (anónima si se quier) na páxina http://access.libertus.co.uk/ tocante a les necesidaes especiales pal usu d’ordenadores.

La encuesta ta n’inglés; si tienes problemes cola llingua, en Softastur podemos encarganos de tornala a l’asturianu o al castellanu y llueu unviala al Equipu d’Accesibilidá.

Munches gracies por adelantáu 🙂

¡Da-y fuerte!

11 d'Avientu de 2009

Entós ¿dices que toques un instrumentu? ¿Quies facer la to propia música (¡pero con llicencia llibre, ho!)?

Nun dexes de facelo par falta d’acompañamientu. Güei quiero presentate Hydrogen, una gayaspera caxa de ritmos.

Caxa de ritmos Hydrogen

Caxa de ritmos Hydrogen

Equí puedes ver un pantallazu del programa, que ye percenciellu d’usar aunque (como yo) nun tengas muncha idega de lo que tas faciendo.

Pa instalalu, baxa de los repositorios hydrogen ya hydrogen-drumkits (los samples de soníu) y… ¡chumba, chumba, chumba…! 🙂

Ocalitos, ocalitos…

24 d'Ochobre de 2009

Por si los koalas y la llingua nun basten pa qu’Ubuntu 9.10 seya un Asturalia-Linux, la versión de sirvidor que ta a piques de salir va venir con Eucalyptus.

Eucalyptus

Eucalyptus

Ello ye un desarrollu abiertu de la computación na ñube, pero que al ser modular podrá nel futuru adautase a otres arquitectures (Google, Microsoft…)

Polo que cuenten nesta páxina, instalar una ñube propia ye más fácil de lo que podría pensase. Pa una organización o empresa que necesite “tar nes ñubes” ye una alternativa afayadiza a los servicios de pagu.

Y yá que tamos, qué prestoso diba ser si de la universidá d’Asturalia salieren proyeutos como esti, fechu na Universidá de California de Santa Bárbara

Mentanto, nos paises avanzaos…

15 d'Ochobre de 2009

Vengo d’atopame nel Planet col enllaz a un artículu de Computerworld UK nel que nos cuenten que la Bolsa de Londres (LSE), xunto cola so filial Borsa Italiana y la noruega Oslo Børs van camudar el sistema d’esplotación que veníen usando o que taben a piques d’usar.

Anguaño veníen usando’l software TradElect, basáu en Microsoft .Net, pol software MilleniumIT que funciona con GNU/Linux y Solaris. Millenium IT ta desendolcáu por una empresa desllocalizada en llocal de Sri Lanka a la que va mercar LSE por 30 millones de dólares, mientres que’l sistema d’anguaño costaba 65 millones de dólares.

Darréu d’esto, LSE va aforrase añalmente 10 millones de libres esterlines entamando dende l’exerciciu 2011/2012. Rescampla que la Bolsa de Londres nun ta n’Asturies…

(Iguao colo que nos cuenta ayalgueru)

¡Perdí el mio portátil!

28 de Xunetu de 2009

No, nun ye de verdá. Pero el día menos pensáu podemos alcontranos diciendo eso…

Pa estos casos, lléganos dende Chile el programa Prey, que funciona como un serviciu nel entamu, anubríu de los usuarios. Lo que fai ye restolar na rede la esistencia de una páxina que’l dueñu del portátil cria en casu que-y desapaeza l’ordenador. Si la páxina esiste unvía un corréu que contién los datos de la conexón que ta usándose, la llista de programes n’execución, una semeya del escritoriu y, si l’ordenador tién activada la webcam, una semeya de la persona que ta… hmmm… tentando devolver l’ordenador. Si el dueñu nun conseña una páxina web na instalación, Prey executaráse cada ciertu tiempu.

Hai versiones pa Linux, Windows y Mac y ta embaxo la llicencia GPLv3+cerveza (o sea, si alcuentres l’ordenador, invites a una cerveza. Nun se si valdríen unos culinos de sidra)

Desaniciar ruíu de fondu con Audacity

11 de Marzu de 2009

Va unos díes comentóme Astur que al grabase col ordenador sentíase un ruíu de fondu mui molestu y que nun sabía como quitalu. Bono pos con Audacity ye mui fácil.

Audacity ye un cenciellu editor multipistes de soníu, por supuestu ye software llibre y tien la ventaxa de ser multiplataforma.

Lo primeru ye instalalu, usando Synaptic o el to métodu preferíu d’instalación… el mio…

$ sudo aptitude install audacity

Nun voi esplicavos como grabar o como cargar un ficheru d’audiu nel programa, cuido que todos sabemos que quier dicir el circulín bermeyu y el triangulín verde 😛

Fice un videu pa que seya más claru… (perdonai el inglés de Blimea…)

Ver el vídeu en Youtube