Ubuntu Open Week

Durante toa esta selmana van tener llugar una serie de charres en llinia tocante a dellos aspeutos d’Ubuntu (desendolcu, Ubuntu One, trabayu colos upstream, bugs,…)

Les charres van tener llugar nes canales #ubuntu-classroom y #ubuntu-classroom-chat de irc.freenode.net; sicasí, pa los que tengan instaláu Ubuntu, encamiento usar el programa Lernid, que permite ver al conferenciante nun cuadru y la charra de la clase n’otru:
sudo apt-get install lernid

Pa saber más, na wiki d’Ubuntu

Per otru lláu, tamién va haber (con otru horariu y programa) una Ubuntu Open Week en castellanu pa quienes nun s’afayen col inglés. Equí ta la información d’ello.

Enantes d’entamar, diré qu’esti tutorial ye percenciellu de realizar, pero críticu. Al menor fallu, puedes cargate’l grub, y el sistema operativu nun arrancará.

Nún principiu, dicir que’l to grub tien que ser la versión 1.97. Si la to versión ye esa, entós yá tienes GRUB2 😀 (ye daqué mosqueante, pero ye asina)

Si l’aspeutu del to grub ye como’l de la semeya d’arriba, entós podemos siguir.

Información previa básica: Hasta agora, editando’l ficheru grub.cfg con esti comandu:

gksu gedit /boot/grub/grub.cfg

podíemos facer coses como camudar el color del testu y el fondu:

y l’aspeutu qu’obteníemos podía ser ésti:

Pero agora trátase de personalizar un pocoñín más el grub, ñec, ñec, ñec… nesti tuto, vamos a poner un fondu de pantalla chulu. Pa ello, vamos garrar la imaxe que más nos preste, y convertila nuna imaxe 640×480 y formatu .tga . Esto fáise cenciellamente col GIMP. Yo voi facelo con 2 imáxenes: la que veis equí abaxo, llamaréla softastur.tga

y el resultáu final del nuesu GRUB va a ser ésti:

La otra imaxe que usé, llámase oficialida.tga, y el so resultáu, ésti:

Bien! Vamos al turrón!!  Dende la terminal escribimos:

Si yá ficimos eso, editamos el ficheru 05_debian_theme:

Zarramos l’editor guardando los cambeos, y agora abrimos una terminal y escribimos:

sudo update-grub2

Reaniciamos el sistema, y yá tendría que salinos el nuesu grub personalizáu.

Esfrutái 😉

[1] Tolos post que pongo, tán previamente probaos por mí. A diferencia d’otros blogs, que namás se dediquen a copiar+apegar testu ya imáxenes, yo pruebo les coses, y faigo les mios propies captures. Y ye por eso que nun vos pongo la fonte d’aú saco les coses: Primero siempres m’informo, pero por más que miré, tolos posts omiten el fechu de que hai que poner les imáxenes en /usr/share/images/desktop-base . Eso ye porque namás se llimitaron a copiase unos d’otros. Echando un güeyu a la cabera semeya, vese bien a les clares, que’l camín onde busca’l nuesu fondu ye ehí. Y por eso si lo facéis asina va a funcionavos. Los comentarios d’otros blogs tán llenos de xente que dicen: “A mí nun me funciona”… y el responsable del blog, (como nun lo probó él mesmu..), llimítase a dicí-yos que ficieron mal la imaxe 640×480 en tga. Por supuestu, nun tengo la verdá absoluta, namás vos digo cómo me funciona a mí. Lo que nun quier dicir qu’esistan otros métodos.

Resulta que tengo un portatil vieyu de sirvidor caseru pa compartir ficheros colos collacios y coses así. Nun tien entornu gráficu y alministrolo por SSH, por esto nun necesito monitor, pero claro nun puedo desenchufalu… Marquinos apurrióme la solución na llista de corréu de Softastur.

Namás que hai d’instalar el paquete vbetool, yo ficelo en Debian como root (n’Ubuntu ye igual pero poniendo “sudo” delantre de cada comandu).

Instalamos:

aptitude install vbetool

Y col comandu

vbetool dpms off

apagamos el monitor y con

vbetool dpms on

prendémoslo otra vuelta…

Esto ta mui bien pero los que somos vagos nun mos presta tener qu’escribir comandos cada vez que prendemos el ordenador, entos solucionélo faciendo un script de shell pa executalu nel arranque.

nano /etc/init.d/matarmonitor.sh

y escribimos:

#!/bin/sh
#
# description: mata’l monitor nel arranque
#

vbetool dpms off

Guardamos con “ctrl+o” y zarramos con “ctrl+x”

Damos-y permisu d’execución

chmod +x /etc/inti.d/matarmonitor.sh

y agora pa executalu nel aniciu del sisitema editamos el ficheru rc.local

nano /etc/rc.local

y siempres enriba de la llinia que diz “exit 0” ponemos

sh /etc/init.d/matarmonitor.sh

Guardamos con “ctrl+o” y zarramos con “ctrl+x”

Así cada vez que reaniciemos el equipu tendrá’l monitor apagáu.

Restolando pela rede, aporté a una páxina que pertenez al Ministeriu d’Educación, au s’ufre un Cursu de redes d’área llocal en Linux. Namás-y eché un güeyu perenriba, pero tien bona pinta.

Puede descargase en PDF (son 16 capítulos = 16 PDF’s). Como ye un coñazu descargalos de ún en ún, fícevos la xera más cenciella, y tenéislos equí toos nesti ficheru comprimíu 😉

Que vos preste.

A munches empreses y dalgunos gobiernos como el chinu , l’australianu o l’iraní, nun-yos gusta que los sos subditos puedan comunicase llibremente “nun vaya ser que nos pongan a parir nel twitter”. Y la solución qu’encuentren ye poner un proxy pa torgar l’accesu a determinaes páxines “non prestoses”.

Si trabayes nuna empresa onde tienes internet pero les páxines goches nun tiren, o nun puedes entrar nel twitter pa ver si’l vecín del quintu yá tomó’l café , yá sabes que de que toi falando. Con esti artículu trato d’esplicar lo más rápidamente posible como saltanos esi proxy usando el ordenador nuestru de casa.

Qué necesites:

1. Accesu a internet dende casa
2. Un ordenador con un sistema operativu (de los que funcionen, yo uso Debian pero val igual pa Ubuntu)
3. Un llápiz usb (nun ye imprescindible)

Cuido que a estes altures yá sabes instalar Ubuntu o Debian nel to equipu, sinon dexa de lleer de secute porque mal vamos…

Lo primero ye instalar SSH:

$ sudo aptitude install ssh

Y pa configuralo editaremos el ficheru /etc/ssh/sshd_config

$ sudo gedit /etc/ssh/sshd_config

Dientru d’esti ficheru hai dellos parámetros y tamien documentos, podemos cambiar el puertu pol que va escuchar el sirvidor ssh, si queremos coneutar usando claves públiques o por login, etc…

Cuando tengamos too configuráu como queremos, reaniciamos el serviciu:

/etc/init.d/ssh restart

Depués d’esto tenemos que dar pasu dende’l router al equipu por el puertu que nos interese, pa esto necesitamos dar una ip fixa dientru la nuesa rede llocal y asigna-y el puertu que configuremos nel ssh… esto depende del router que tengas, sicasí de xuru que yá lo ficisti pal amule o el torrent…

Si el to proveedor d’internet úfrete ip fixa, yá tienes el equipu preparáu, pero si yé dinámica necesites usar dalgún serviciu de dns dinámicu como no-ip.com o dyndns.com. Faes una cuenta y instales el software que t’ufren p’anovar automáticamente la ip, dalgunos routers-modem ADSL incluin soporte pa estos servicios polo que nun tendrás más que configuralu y aforres d’instalar nada.

Yá tienes el to ordenador configuráu (y prendíu), y el router configuráu… vamos a la rede torgada…

Por supuestu, alguien que tien una solución tan xenial como un proxy, usa Winbugs como no podía ser d’otra forma… entos vamos baxar dos programes PuTTY y Firefox, lo ideal ye baxar les versiones “portables” pa instalales nun llápiz usb y nun tocar les configuraciones de los equipos (amás de nun dexar rastru). PuTTY portable y Firefox portable.

En acabando d’instalaos, arrancamos PuTTy y onde diz “Host Name” ponemos la nuesa ip pública o el subdominiu dinámicu, y onde diz “Port” el puertu que configuremos pal SSH. Depués vamos a “Tunnels” na estaya “SSH” qu’apaez a manzorga, amestamos el puertu onde diz “Source port” y lo marcamos como “Auto” y “Dynamic” calcamos “Add” y coneutamos.

Agora abrimos el Firefox y vamos a “Editar>Preferencies>Avanzáu” y dientru de la llingüeta “Rede” na estaya “Conexón” calcamos “Configuración”, abrirános otra ventana y marcamos “Configuración manual del proxy” nel caxellu “Sirvidor SOCKS” ponemos “localhost” y en puertu el del SSH (los demás caxellos queden ermos). Calcamos en “Aceutar” y “Zarrar” y fechu… yá tendrás accesu a les páxines torgaes.

Lo que tamos faciendo ye un “tunel” col equipu que tenemos en casa y usando la conexón a internet de casa pa restolar.

Güei preséntovos pdftk, una ferramienta pa remanar documentos en formatu pdf. Como dicen na so web: ‘Si PDF ye’l papel electrónicu, entós pdftk ye’l quitagrapes electrónicu, la perforadora, la encuadernadora, el descodificador secretu y les gafes de rayos X’. Pues emplegalu pa (combinar documentos PDF, dixebrar les páxines d’un PDF nun documentu nuevu, descifrar un documentu, cifrar el documentu resultante como te pete, desfacer un documentu PDF en páxines sueltes, informar de les carauterístiques del PDF, descomprimir y volver a comprimir páxines, reparar un PDF corruptu.

Podéis instalalu dende Synaptic o na terminal con:

sudo apt-get install pdftk

El funcionamientu ye pentemedies de llinia de comandos, tenéis exemplos na so web o podéis ver les instrucciones tecleando na terminal:

man pdftk

(Pa salir de les instrucciones calca ‘q’)

Un exemplu útil, si tienes dos documentos que se llamen 1.pdf y 2.pdf, abre la terminal y vete a la carpeta onde tienes los ficheros, una vez ellí escribi na terminal.

pdftk 1.pdf 2.pdf cat output total.pdf

Esta orde va crear un documentu llamáu total.pdf nel mesmu directoriu que tán 1.pdf y 2.pdf y que contién dambos nesi orde.

Tien munches más opciones como poner marques d’agua a los documentos, etc. Namás tenéis qu’esploralu un poco.

Salú y software llibre.

Nun me presta tener más aplicaciones de la cuenta executandose al mesmu tiempu, y cuando va unes selmanes entamé a caciplar con identi.ca y twitter quería una forma d’anovar la mio cuenta n’estos servicios ensin tener que depender de la web, pero tamién ensin tener más preseos de los que yá taba usando nel escritoriu.

La solución foi amestar un plugin a pidgin col que puedo coneutame a estos servicios pa poder siguir y anovar dende esti cliente de mensaxería.

Vamos a “Sistema/Alministración/Oríxenes del software” y na pestaña “Software de terceros” calcamos en “amestar” y ponemos esta llinia:

deb http://ppa.launchpad.net/sugree/ppa/ubuntu jaunty main

Calcamos amestar otra vuelta y ponemos:

deb-src http://ppa.launchpad.net/sugree/ppa/ubuntu jaunty main

Agora vamos a “Aplicaciones/Accesorios/Terminal” y pegamos esta llinia:

sudo apt-key adv –recv-keys –keyserver keyserver.ubuntu.com 0CF459B8DF37ED8B

Calcamos enter y cuando acabe namás que queda instalar pidgin-microblog, buscandolu dende “Sistema/Alministración/Xestor de paquetes Synaptic” o dende la mesma terminal col comandu:

sudo aptitude install pidgin-microblog

Agora vamos a pidgin y dende “Cuentes/Xestionar cuente” calcamos en “Amestar” y en “Protocolu” escoyemos identi.ca twitter o el serviciu que mos preste y configuramos los nuesos datos como si fuera una cuenta de mensaxería instantanea.

Cuando acabemos, tendremos otru contautu na llista de collacios de pidgin pal serviciu que temos acabantes d’amestar.

Bono lo primero ye instalar Poedit, que a estes altures de la película yá tará más que instalao… ;P val tanto pa Winbugs como pa MacOs X como pa Ubuntu, sicasí nos dos primeros tendreis de baxar les traducciones d’Ubuntu y descomprimiles nuna carpeta que mos preste… N’Ubuntu facemos

(más…)

Yá son unes cuantes les veces que nos pregunten ¿como faigo pa tener un “accesu direutu” a la mio carpeta d’usuariu nel escritoriu?… y anque ye bien fácil, fice un screencast pa que seya más fácil comprendelu…

Si tienes un ordenador con Bluetooth furrulando y un móvil que soporte Java (la mayoría de los móviles modernos) y tamién tenga bluetooth, pues emplegar el teléfonu como un mandu a distancia.
Un bon exemplu de lo que’l Software Llibre pue algamar.

Lo primero que tenemos de facer ye dir a la web del programa, agospiada en SourceForge, http://bluepad.sourceforge.net/ y ñavegar hasta la seición downloads.

Ellí vamos descargar dos ficheros:

BluePad v0.4 empaquetáu pa distribuciones Debian
BluePad v0.4 pa Java

Encuantes tengamos los dos ficheros descargaos, faemos doble click nel que se llama bluepad_0.4_all.deb y calcamos n’instalar el paquete. Al venir empaquetáu podemos depués desinstalalu fácilmente dende Synaptic.

Agora tócanos instalar nel móvil el so programa. Descomprimimos el ficheru bluepad_0.4_mobile.tar.gz y atopámonos con dos carpetes, una col nome BluePad y otra col BluePad_alternative. Nós vamos emplegar el BluePad pero si lu probáis y el móvil nun tira per él, podéis intentalo col alternative. Entráis na carpeta BluePad y calcáis col botón drechu nel ficheru BluePad.jar y escoyéis la opción Unviar.

Nel ventanu que vos apaez buscáis el vuestru móvil y escoyéis Unviar.

Agora toca dir al móvil ya instalar el programa, esto depende del modelu vuestru móvil pero suel ser bien cenciello.

Cuando lo tengamos arrancamos el programa primero nel ordenador, ta allugáu en Aplicaciones – Soníu y Vídeu. En cuantes s’entame va apaecenos l’iconu na parte drecha del panel superior en Gnome. Calcamos col botón drechu y seleicionamos la opción coneutase.

Agora calcamos en Guetar, cuando fine escoyemos na llista desplegable’l nuestru móvil y calcamos en Coneutase.

Va apaecenos el mensaxe de que BluePad ta esperando pol móvil.

Esto quier dicir que toca coneutase dende’l móvil, asina qu’arrancamos l’aplicación nel móvil, escoyemos l’idioma, na pantalla primera calcamos el númberu 5. Importante: Agora escoyemos la opción Amestar dispositivu (“Choose device”) y coneutamos el móvil col ordenador. Agora toca decidir pa qué vamos usar el móvil, les opciones son les que vienen darréu:
* Controlar una presentación de diapositives d’OpenOffice.
* Una película o Música n’Amarok.
* Los típicos Xuegos que trai Ubuntu yá instalaos.
* Mover el ratón pela pantalla (ye difícil facelo con soltura porque nun respuende del too bien), anque con práutica puen facese coses.

Les tecles a emplegar en cada casu apaécennos na pantalla del móvil y hasta que nun calquemos nuna d’elles BluePad va a siguir informando de que nun ta conectáu, nesi momentu l’iconu va pasar a un colorín más azuláu.

Que vos preste…