Archivu 31 de Mayu de 2009

¿A quién votar?

31 de Mayu de 2009

Tamos cerca de les eleiciones europees, y aunque tienen la fama de ser secundaries, na más lloñe.

Tamos nun tiempu nel que los politicuchos de turno quieren poner valles al campu coaccionaos pola SGAE, quieren quitanos la nuestra llibertá na rede, quieren criminalizar unes descargues que la constitución pon claramente que son llegales, dan-y cancha a les llicencies privatives de Micro$oft pagándoles coles perres de toos, nun firmen el compromisu pol software llibre por una sociedá tecnolóxica xusta… ¡Simplemente asustante! Votar bien y saber a quien votar ye cada vegada más fundamental.

Agora mesmo les lleís anticonstitucionales de los países como España, Francia, Italia…  escontra de la llibertá de los ciudadanos na rede tan topando coles lleís europees que les prohíben, pero’l panorama ta camudando, los partidos mayoritarios n’Europa tan camentando modificar les lleís pa permitir les atrocidaes de los sos collacios en cada país.

¿A quién debería votar un asturianu/a pa que se protexan les sos llibertaes reales y dixitales??? La to opinión nos comentarios 😉

Nota: El Partido Pirata nun se presentará n’estes eleiciones. Por contra, en Suecia poles aiciones escontra The Pirate Bay convirtieronse en 3 selmanes na tercer fuerza política del país. Remembrar que sólo puedes votar a los partíos políticos del to país.

Instalar JAVA pa la web

28 de Mayu de 2009

Abre una terminal: Menú Aplicaciones / Accesorios / Terminal
Y escribe esto:
sudo apt-get install sun-java6-fonts sun-java6-jre sun-java6-plugin
Pedirate la clave, y ta! Si nun furrula, preba a reaniciar.

Otra forma de facer lo mesmo de manera gráfica ye dira a “Sistema / Alministración / Xestor paquetes Synaptic”, guetar los paquetes:
sun-java6-fonts
sun-java6-jre
sun-java6-plugin

Ya instalalos 😉

Sesión d’invitáu nel Login o ordenador pa sitios públicos

27 de Mayu de 2009

Quería poner Ubuntu nun ordenador d’un bar asturianista pal usu y disfrute de los veceros.
Si camentamos un poco, la situación ye percrítica pa Ubuntu n’esi ordenador: Xente con nada/normal/muncho conocimientu de GNU/Linux, manexándolo abondo, y dalgún intentando hackealu. Xente desanicando paneles, camudando fondos de pantalla, configurando páxines d’aniciu pa Firefox…

Tras camentar abondo nel tema, lo meyor ye una sesión d’invitáu, pero pa usala n’Ubuntu tienes qu’abrir una cuenta d’alministrador, pa lluéu dir al menú col to nome y calcar en Sesión d’invitáu.
Esto ye engorroso y yo quiero qu’anicie l’ordenador direutamente n’esa cuenta, y que pueda seleicionase dende la Pantalla de Login.
Esto cabero nun ta implementao por seguridá. Considerase que naide debe poder usar el to ordenador ensín el to permisu, ¿como da-ylu? Dende la to sesión d’alministrador

El circulu ta zarráu, quiero una sesión llimpia cada vegada que s’arranque, qu’entre direutamente y ensín privilexos y nun atopaba manera de facelo, pero too ye códigu llibre, y too puede amoldase o estudiase 😀

Tras camentar, llegué a esta solución, pa criar una sesión d’invitáu falsa, y digo falsa porque nun ye real, ye una cuenta normal ensin privilexos que llimpiamos en cada arranque. Cuntóvos:

  • Protexo l’arranque Grub, pa que nun se pueda entrar como alministrador a Ubuntu. Puedes facelo lleendo esto.
  • Criar un usuariu (por exemplu “invitau”) ensín privilexos, con una clave percenciella.
  • Afitar la entrada automática d’esi usuariu ensin privilexos.
  • Entrar a esa cuenta d’invitáu y configurala entera.
  • Volver a la sesión d’alministrador.
  • Comprimir tol home del usuariu /home/invitáu/* (incluyendo los anubríos) y comprimilu nun ficheru .tar. Guardar esti ficheru por exemplo en /etc/init.d/invitau.tar.
  • Criar esti ficheru /etc/init.d/invitau.sh, con esti conteníu:

#!/bin/sh
rm -rf /home/invitau
mkdir /home/invitau
chown invitau:invitau /home/invitau
tar -C /home/invitau -xvf /etc/init.d/invitau.tar

  • Na terminal, damos-y permisos d’execución y configuramos que s’execute en cada arranque:

sudo chmod +x /etc/init.d/invitau.sh
sudo update-rc.d invitau.sh defaults

Resumiendo, lo que facemos ye desanciar el home del usuariu “invitau” completamente en cada arranque. Con ello, Ubuntu criaría tola configuración por defeutu de nueves, pero interesanos que nos guarde la nuestra configuración por defeutu pal fondu de pantalla, la páxina d’aniciu de Firefox… Polo que descomprimimos en cada arranque’l ficheru .tar con esa configuración que criamos nel puntu 4 😉

Con ello, en cada arranque tendremos una sesión nueva, con too desaniciáu de sesiones anteriores (claves, baxaes, fondos d’escritoriu, hestorial de restolación…), cosa perútil pa ordenadores en llugares públicos como cybers, bares, biblioteques… Y ensin posibilidá de que l’usuariu fraye na 😀
Cuando’l dueñu quiera configurar o andar col so ordenador, zarra esa sesión y abre la suya 🙂

Edición 25 Xunetu 2009: Enterome qu’existen ferramientes pa restrinxir l’usu del ordenador a un usuariu 😀 Estes son LockDown Editor y Ubuntu Tweak.
Pa instalar LockDown Editor, dende terminal:
sudo apt-get install pessulus

Edición 16 Mayu 2011: Con Unity lo meyor ye restrinxir la sesión que nun queramos, pa ello esborramos los ficheros que veamos de /usr/share/xsessions/ y nel pasu 4 configurar: Tecla NumLock, curiapantalles, enerxía, llanzadores, fondu y Youtube.com/html5 y borrar l’historial de Firefox menos la caché pa que se caltenga lo de Youtube.

Pa echase a tremar

27 de Mayu de 2009

“Una buena inversión”

Estes son les pallabres de Bill Gates na reunión con Zapatero ayer.
¡Pa echase a tremar!!! :S

Rellacionaes:
Portátiles pa los neños en primaria… Con Windows? Linux?
La Escuela 2.0 de ZP tien trampa

¿Cómo nos vemos los usuarios de distintos sistemes operativos?

25 de Mayu de 2009

Los usuarios de Windows, Mac o Linux ¿veremonos unos a otros asina?

Vía: Tecnología diaria.
Gracies Chus pol enllaz 😉

Amosar la carpeta del usuariu nel escritoriu

23 de Mayu de 2009

Yá son unes cuantes les veces que nos pregunten ¿como faigo pa tener un “accesu direutu” a la mio carpeta d’usuariu nel escritoriu?… y anque ye bien fácil, fice un screencast pa que seya más fácil comprendelu…

Ver el vídeu en Youtube

Incidencies nos entamos d’Ubuntu dempués de la Install de Xixón

22 de Mayu de 2009

Dempués de la instalación d’Ubuntu na Install Party de Xixón, hai detalles qu’estrañen, s’esperen, o que simplemente fallen. Vamos ponevos les incidencies que nos fuimos atopando col usu d’Ubuntu polos/es que vinieron a la Install Party 😉

  • Ubuntu NON tien virus 😉 Los virus non existen por varios motivos. Puedes saber más n’esti artículu de Tapaponga.
  • La webcam: Tema peliagudu. Pigdin y emesene nun tienen sofitu pa webcam y si la xente nun tien una bona camara lo más seguro que den problemes los drivers… La xente quier usar la webcam nel messenger. Podeís instalar dende la llista d’Amestar/Quitar los programes empathy o aMSN que parecen dar sofitu a la webcam. Nun los probé porque nun tengo webcam ni me llama, si lo probais, unvianos el resultáu por favor 😀 Tamién si quereis xugar capturando cola webcam vos prestará abondo’l programa Cheese.
  • Too Ubuntu preinstaláu ta n’asturianu menos la OpenOffice, ya ta tornada, pero tamos trabayando pa qu’importen eses tornes, mientres tanto podríes poner la OpenOffice en castellanu, pa ello llee esti post de Tapaponga.
  • Nel netbook Amilo 3520Ui nun furrulen les tecles de control del brillu. Problema de drivers que parez tener la solución tocando un ficheru de configuración. Lo nuevo del portátil y el so hardware nun del too reconocíu por Ubuntu provoquen esti comportamientu.
  • Webs que van llentes o se colinga un poco Firefox: Cierto, Adobe nun acaba de facer un codec tan bonu de flash pa Ubuntu como pa Windows, colo que webs recargaes de videos flash colinguense un cachu. Habrá qu’esperar bien de tiempu a qu’Adobe meyore’l codec pa GNU/Linux.
  • Xuegos que van llentos: Dalgunes tarxetes gráfiques tienen codecs privativos, y son emulaos, colo que programes como xuegos que la esprimen nun tienen el rendimientu deseáu. Tamién puede ser que la tarxeta nun de más de si.
  • Al calcar el boton borrar, non retrocede a la páxina anterior Firefox. Cierto, esto queda como incidencia pa Softastur. Trabayaremos n’ello 😉
  • Los escritorios son formes d’organizar ventanes. Puedes pasar ventanes d’un a otru, y dexar dalgunes nos 2 escritorios, pa tener un manexu organizáu (por exemplu, tener toles aplicaciones d’internet nel escritoriu 1, y el restu n’otru).
  • Wine: Ye un emulador de programes de Windows. Instálase dende Amestar/Quitar y con el puedes executar aplicaciones de Windows. Equí podeís saber qu’aplicaciones son compatibles con Wine. P’abrir una aplicación con Wine, baxes el ficheru .exe y calcando botón drechu del mur sobro él, seleiciones “Wine emulador”.
  • Ver videos: Nun vos instalamos los drivers, intentamos dexar Ubuntu tal cual. Los drivers pa oyir MP3 o ver videos AVI son privativos, ya intentamos averavos a la llibertá del software 😉 Nun ye mayor problema, cuando intenteis abrir un archivu Ubuntu entrugaravos si quereis instalar los drivers, marcais tolos que vos aparezcan y ¡ta! Teneis una guía percenciella pa instalar los codecs equí.
  • Amestar/Quitar y Xestor de paquetes Synaptic: Tool software que necesites tan n’esos 2 xestores. Guetes por exemplu “messenger” y atoparás tolos messengers que tienes pa usar 😉 Nun necesites baxar nengún programa de la web.
  • Los formatos .doc, .xls, .pps… (osease, word, excel, powerpoint…) son privativos, eso quier dicir que nun se sabe como se componen. Nun podemos cola OpenOffice tener una compatibilidá al 100% cola Micro$oft Office. Por contra, si trabayamos cola OpenOffice tendremos siempre perfeutos documentos abiertos cola OpenOffice 😉 Se llibre, escaez la Microsoft Office. Conseyu: Pa documentos ente sistemes operativos usa PDF, dende OpenOffice puedes esportarlo perfácil 😉
  • Si notes que Firefox nun va bien, de xuro que’l router nun-y asigna los datos automáticamente. Camuda esta configuración: Editar / Preferencies -> Apartáu Avanzáu / Llingüeta Rede -> Conexón: Botón “Configuración” => Seleiciona “Autodetectar configuración del proxy pa esta rede” y Calca Aceutar. Debiere dir meyor.
  • Igual tampoco’l router tien sofitu pa IPV6, abre Firefox, introduz como direición “about:config”, y camuda el Valor de “network.dns.disableIPV6” a True calcando dos vegaes sobre “False” de la columna Valor.

Diremos ampliando esta llista según nos vayais reportando incidencies.

Visto esto parez qu’Ubuntu ye too problemes 😛 Pero tamién la xente ta contento, equí dalgunos comentarios de la mesma xente que reportó lo d’enrriba:

  • “el resto funciona muy bien”
  • “sigo enviciáu con esti viciu perguapu del Ubuntin”
  • “Por lo demas estoy comodo, no me presenta mayores problemas”
  • “Toi supercontenta, préstame abondo y voi garrándo-y el tran tran pocu a pocu” … “Ye sencillu d’usar, perintuitivu, guapu de aspeutu parez que merqué un ordenata d’última xeneración, simplifícame la vida, ta too organizadino, nun faen falta tres ferramientes estremaes pa facer coses parecíes, alucinante la capacidá que tien de facese compatible con tolo que tenía antes, ye rápidu y limpiu”

Un saludu a toos/es y gracies pol feedback 😉

Remembrando vieyos tiempos

21 de Mayu de 2009

Güei, restolando al debalu, cayí Nel Pozu la Pita, web agospiada en Geocities dende fae munchos años ya, y quedé señaldosu…

Echando-y un vistazu rápido, vienme a la mente los años nos que los internautes asturianistes reuníamonos nel #asturies-o-trabayes, sorrio remembrando como asturianicé les pantalles d’aniciu de Windows 98 o la primer vegada que ví’l Winamp cola interface n’asturianu 😛 O toles hores qu’eché programando l’aforcáu…

N’esa dómina, tamién ñacía la comunidá de Softastur col so enfotu nel software llibre, asoleyándonos la primer versión d’un restolador na nuestra llingua, demostrándonos que yera viable un ordenador n’asturianu 😉

Podemos dicir que ye la prehistoria de la informática n’asturianu. Veo cuanto avanzamos fasta l’actual sistema dafechu ya integru n’asturianu d’Ubuntu, la cantidá de xente que  collabora na torna y tola xente que vien a les Installs Parties, y llénome d’esperanza ante’l futuru ¡Esto marcha! 😉

¡Estamos que lo regalamos oiga!

20 de Mayu de 2009

Cuando merques un ordenador vien con Windows Vista. Nel preciu tas pagando la llicencia d’esi Windows (unos 50€ – 80€). Asina que si quiero mercar un portátil ensin sistema operativu pa instala-y Ubuntu, tengo que regala-y 50€ a Micro$oft (Esto pasome col mio HP).

Fae tiempu llegaron los miniportátiles, adaptándose a ellos como un guante GNU/Linux, polo bladre (si val 200€ pagar 50€: fastidia), la estabilidá, los pocos recursos que consume… Todo indicaba’l triunfu de GNU/Linux. Micro$oft sólo pudo facer frente d’un mou ¿Cuál? ¡Regalar Windows XP!
Windows Vista ye demasiáu pesáu pa esos ordenadores, y Windows XP (un sistema operativu caducáu y vieyu), arrasó a GNU/Linux nos miniportátiles, porque gracies al MONOPOLIU Micro$oft algamó convenios colos grandes fabricantes nos que-yos dexó tirada (llease de baldre)  la llicencia de Windows XP.

Nun te pierdas esti artículu d’un vendedor de tienda pequeña.

¡¡Pero nun te confundas, teniendo un Windows XP a preciu de risa nun tienes les llibertaes del software llibre!!

Manual percenciellu: Cómo tornar Ubuntu al asturianu

18 de Mayu de 2009

Muncha xente tien miéu de tornar Ubuntu, camentando que ye díficil, complicao o que nun sabe inglés. ¡Tornar Ubuntu ye perfácil! 😉 Nun ye díficil, ni complicao ni fae falta saber inglés.

Tener un sistema operativu n’asturianu ye sólo cuestión de voluntá de los sos falantes. Y la comunidá asturiana cada vegada demanda y puxa más pol software llibre n’asturianu. ¿Quies echanos un gabitu?

Ubuntu ufrénos una web percenciella onde poder tornar dende cualisquier llingua al asturianu, y dende cualquier sistema operativu, tanto Ubuntu, Windows, Mac… ¡Sólo necesites un restolador web!

Ye perimportante aclarate que naide obliga a tornar X frases, ni tienes un tiempu pa facer X frases: Puedes tornar dende 1 frase fasta les que quieras, nel momentu que quieras 😉
Softastur existe pa coordinar estes tornes, pa saber cuales son prioritaries.

Dexámosvos un manual en PDF nel que desplicámoste lo percenciello que ye tornar, dixebráu en 2 partes: L’alta del usuariu y como faeríes pa tornar nel día a día. Pa baxalu calca nel iconu d’embaxo o equí.

¡Animate! ¡Necesitamos del to sofitu! Cuantos más seamos más calidá de tornes y enantes finaremos Ubuntu dafechu 😀