Grabar soníos del to PC

20 de Xunetu de 2010

A vegaes, cuando nun sabes per ónde van los tiros, les coses más cencielles son les que más problemes dan…. Resulta que quería grabar el soníu d’un videu qu’alcontré restolando per Internet….. y nun sabía cómo facelo. Bono, pues foi que la tontería ésta llevóme un bon cachu hasta que dí con ello. Equí vos pongo cómo lo igüé (o cómo me funciona a mí)

Lo primero instalamos el programa PulseAudio Volume Control. Abrimos una terminal y escribimos:

sudo apt-get install pavucontrol

Fecho esto, vamos por partes:

  • Abrimos el videu o película de la que queremos grabar el soníu.
  • Abrimos PulseAudio, qu’alcontraremos en Aplicaciones–>Soníu y Vídeu:

Vamos a la llingüeta Configuration (llegaos a esti puntu, dicivos que entá nun hai traducción d’esti programa n’asturianu. ¿Quién s’anima?). Nella dexamos los valores como veis na imaxe, asegurándonos de que na llista de Audio internu, apaeza dalgún de los dos valores que vos pongo: Analog Stereo Duplex ó  Analog Stereo Output (a mí funcióname colos dos)

  • Ensin zarrar esti programa, abrimos el Grabador de soníu de Gnome: (en Aplicaciones–>Soníu y Vídeu)

Agora ponemos a reproducir el vídeu del que queremos grabar el soníu, y nel momentu que queramos qu’empiece la grabación, dámos-y al botón de grabar (l’iconu ye’l círculu bermeyu, como casi siempres)

Si l’indicador de nivel se mueve, ye bona señal 😀  Por si acasu, (o nel casu que nun se vos mueva’l nivel), na otra aplicación, vais a la llingüeta Recording que debiera tar funcionando, y calcáis en “Record Stream from” y aseguráisvos d’escoyer: “Monitor of Audio internu Analog Stereo“. L’indicador entamará a movese

Cuando queráis que dexe de grabar lo que tais reproduciendo, dais al botón de Stop del grabador de soníu y llisto! Namás nos falta guardar lo qu’acabamos de grabar. Vais a Ficheru—>Guardar como, y escoyéis el destín.

NOTES:

  1. siempres ye meyor guardar en formatu .ogg que n’otru cualquiera 😉
  2. Por si te lo tabes entrugando, el videu del exemplu ye ésti.

Que lo grabéis bien…

Internet nun será otra TV

7 d'Abril de 2010

Una obra d’arte de Miguel Brieva pa los políticos de la Xunión Europea. Y ye que ¡nun queremos qu’Internet seya otra TV!

Zarra Tapaponga – WTF!

4 d'Avientu de 2009

Fecha actual, 15 d’Ochobre 2011:

Sentimos abondo despedinos, pero la SS del Ministeriu de Cultura acúsanos de plaxiar 3 semeyes con drechu d’autor.

Qué nós usemos semeyes, videos, soníos con llicencia llibre (Creative Commons) nun foi suficiente pa que se nos colaren 3 semeyes con drechu d’autor, garraes del períodicu que nun vamos dicir equí. Nel plazu d’unos díes, al agospiador de la nuestra web llegarái un comunicáu pa que torgue Tapaponga al mundu.

Agora quédanos denunciar pola vía xudicial esti atropellu, seguramente nunos 3 años salga la resolución y podamos volver abrir.

Foi un placer tar con vosotros, fasta siempre.

Copia de la circular que recibimos:

Estimado señor asturḷḷale:

Le apercibimos de que tras la incoación del expediente administrativo 292/2011/kk abierto por esta comisión, hemos descubierto que en su blog recoge 3 fotografías sujetas a derechos de autor protegidas por este órgano, por lo que procederemos en el plazo de 15 días a partir de la recepción de la presente carta certificada a la supresión de su dominio y a la consecuente baja de todos sus contenidos de la red.

En vista de que su blog no tiene fines comerciales no hay asociada a este expediente sanción pecuniaria alguna.

Firmado: Comisión designada por el Ministero de Cultura de España.

Esto ye sólo una simulación de lo que pasará si s’aprueba la Llei d’Economía Sostenible (idega garrada de NetoRatón 3.0).
Aunque te pareza irreal, ¡ta a la vuelta la esquina! ¡Llucha! Güei concentración n’Uviéu. ¡Por una Internet Llibre!

Llei d’Economía Sostenible: La Gestapo d’Internet

4 d'Avientu de 2009

No se va a cerrar nada, ninguna página web ni ningún blog (…) ya digo que no, bajo ningún concepto.

Zapatero.

¿Entós? ¿¿Pa que vas criar una Gestapo d’Internet??? ¿Ye otra falacia de les tuyes como quitar los impuestos de l’Autopista del Güerna?

Güei, taré escontra tí y el to partíu coles sos polítiques de drecha na concentración d’Uviéu. ¡INTERNET LLIBRE!

Pa que nun vos engañeis tamién dexó cayer ayalgues como esta:

Hay que proteger la propiedad intelectual porque si no se hace, “se acabará”, al igual que la “fuerza intelectual”.

[Para autorizar el cierre] Tiene que tratarse de paginas donde se hacen descargas ilegales y pensadas sólo para hacer descargas ilegales

Zapatero.

Ye dicir, a los gobernantes molesta-yos la época na que la cultura ta al alcance de cualquiera de manera perfácil y de baldre.

Y remembravos qu’actualmente baxar películes y música ye llegal, quieren criminalizar una de les llibertaes más importantes qu’enxamás esistió: Internet. Además ¿Quién decidirá qué web/blogs/medios zarrar? Una comisión del propiu gobiernu de turnu, oseya una Gestapo, que si nun-y gusta la to web, tendría tolos drechos de zarrala ensin decisión xudicial.

Nes prósimes eleiciones, hai que dexá-yoslo bien claro.

PD: Asina se ríen de nos.

Torrent anónimu

15 de Xunu de 2009

Nos últimos meses dalgunos gobiernos europeos, ente ellos el d’España y especialmente Francia, tan xugando cola posibilidá de desconeutar d’internet a los usuarios de redes p2p.

Vamos que pretenden prohibite el usu d’una teunoloxía porque sí. Porque, pal que nun lo sepa, a parte de que nun tool mundu usa p2p pa baxar películes o música, ye completamente llegal siempres que nun saques probechu económicu.

Podíemos tar hores falando de porque se quexen cineastes que nun tienen pelicules na mula o el torrent pero bono, esi ye otru tema…

El casu ye que’l Software Llibre úfrenos otra vuelta más la lliberta teunolóxica tan necesaria anguaño, y yá disponemos del primer cliente pa Torrent que fai tresmisiones anónimes gracies a la encriptación de les conexones. Ye BitBlinder, inda ye una beta, pero yá disponen d’un deb pa Debian y Ubuntu (anque si prefieres compilar códigu ye cosa tuya…)

Repetidor caseru de Radio Sele

27 de Febreru de 2009

Avisu esti artículu puede ser demasiáu geek… avisaos quedais…

Toi mui tentáu a montame un repetidor caseru de Radio Sele. Suelo sentir esta emisora cuando voi en coche pero en casa recíbola mui mal y namás que soi a sentila por internet pero, anque nun lo creais, nun toi pegáu al ordenador tol día.

Entós la idea ye esplotar (un pocu más) un PentiumII que tengo de sirvidor pa compartir ficheros impresores etc… esti sirvidor tien tarxeta de soníu polo que namás que tengo de coneutar la tarxeta a un d’esos emisores FM que venden pa sentir el reproductor mp3 na radio del coche y enchufalu con un adapatador de 12V.

El sirvidor nun tien entornu gráficu entos necesitaremos instalar mplayer

sudo aptitude install mplayer

Y pa entamar a sentir la música namás que escribimos el comando mplayer y la url de la radio que queramos sentir, nesti casu la de radio sele.

mplayer http://bach.serveisweb.com/RA163

Pa paralu, por exemplu si queremos cambiar d’emisora o simplemente porque nun vamos sentila n’esi momentu

Control + C

Yá namás que mos queda sintonizar el nuesu “repetidor” nel transistor mientres tamos na ducha o preparando la cena.

Hestoria d’Internet

7 de Xineru de 2009

La hestoria d’Internet meyor contada fasta agora 🙂

Ver el vídeu en Vimeo