¡Ya llevamos con vosotros namás y na menos que 2 años! 😀

Ye inevitable echar la vista atrás nesti caberu añu…

• Un añu onde Softastur tuvo un bon emburrión gracies a que se xuntaron más persones con ganes de tornar software llibre (¿y tú? ¿apunteste? mira esti manual), consiguiendo tar ente les 25 llingües más tornaes nel mundu 😀 ¡Ehí ye nada! Y encima 4 asturianos ente los 20 traductores más activos.
• L’usu d’Ubuntu españó gracies al instalador y un sistema casi (quedaba la OpenOffice) n’asturianu. Algamando la meyor versión d’Ubuntu hasta’l momentu: la 9.10.
• Asoleyóse Edubuntu, pa que los escolinos puedan dar clas col ordenador 😀
• Tuvimos unos perprestosos Talleres d’Instalación d’Ubuntu n’Uviéu, Sietes, Turón, Ibias y  Xixón, nos que conocimos a muncha xente y vimos la espectación y alegría nes cares cuando per primer vegada ven dalgo tan ablucante como un sistema operativu que fala la nuestra llingua.
• Salimos na TV nel programa Nós.
• Tornamos un manga n’asturianu.
• Ñació Faiteconlinux.

• Tamién ñació’l Loco Team d’Asturies.

• Pudímos acurtiar los enllaces.
• Conseguimos tener la OpenOffice tornada.
• Demostramos les posibilidaes  del deprendimientu online na llingua asturiana con Dokeos, dando un cursín d’iniación a Ubuntu.
• Nun dexamos que Micro$oft-yos impusiera a los habitantes de Sietes el software privativu. Al menos que supieran les alternatives.
• El CAST desanició Ubuntu de los telecentros.
• Ñació Ximiélgame.
• L’añu nel que’l Gobiernu quier matar la nuestra llibertá cibernética ya Internet dixo-y ¡NON! Y tamién combayó con M$ pa los portátiles de primaria.
• Conseguimos la lletra ᵁ, pa que seyamos el 1ᵁ ḥeḥe.
• Onde dimos y seguiremos dando la nuestra cara pola oficialidá.
• Esfrutamos cola música llibre de Xera.
• Dende’l 25 de febreru del 2009 tuvimos 22.012 visites, nes que’l sistema operativu GNU/Linux usólu’l 43,60% de los llectores.
• Quedamos octavos como meyor blogue nel 2008.

Too esto demostrando que la llingua asturiana val pa cualisquier ámbitu 😀 Y enfotándonos en qu’algames la to llibertá informática 😉

¡Gracies por lleenos! ¡Y siguiremos puxando muncho más! 😉

Weave Sync ye un complementu fechu pola propia Mozilla pal restolador Firefox.

Vamos poner un exemplu: uses Firefox nel tayu y tamién nel sobremesa y portátil del to llar, y ye un coñazu tener distintos marcadores y claves en cada ordenador 😀 Con Weave Sync  puedes sincronizar ente varios ordenadores los tos marcadores, preferencies, historial, contraseñes… de manera tresparente, rápida, encriptada, de bladre y cencilla. Pa quien se preocupe de la privacidá abondo, tamién puede montar el so propiu sirvidor, y direicionar esti complementu escontra él.

Yo acabo de camudar el complementu Xmarks por Weave y toi sorprendíu de la velocidá de sincronización ya integración :O

Pa instalalu, vete a la web oficial y calca en Download 😉

La Free Software Fundation sigue lluchando dende fae décades pola nuestra llibertá na informática 😀 Nesta ocasión una campañanueva escontra’l DRM (Xestión Dixital de Restricciones) nomada DefectiveByDesing (Defectuosos por diseñu) col enfotu de desaniciar esi control d’accesu a medios dixitales.

Vía: Picando Código.

Mozilla acaba de rebelase escontra la intención de nun respetar los estándares HTML5 por parte d’Apple y Google. Vamos ver los motivos…

• La causa: Apple y Google sofiten el formatu H.264 nel HTML5, lo cual permite embeber videu. Y dambos usen esi formatu nos sos restoladores (Safari y Chrome).

• El problema: El formatu H.264 ye una tecnoloxía patentada que requier el pagu de tases prohibitives pa que pueda ser incluyíu nuna aplicación (5.000.000$ anuales). Aunque aceptasen pagar eses tases, enxamás cubriríen a los derivaos del restolador ni a les distribuciones Linux que lo lleven consigo. Amás, les condiciones pa obtener una llicencia d’usu podríen empeorar añu tres añu.

• L’estallíu: Google adoptólu pa Youtube, sabiendo toos el poder que tien Youtube ente la xente, y que puede marcar el futuru.

• La rebelión: Mozilla espublizó que nun amestará sofitu pal formatu H.264 agora nin nel futuru pal so restolador Firefox.

• La solución: La solución yes TÚ. Ente toos debemos lluchar y caltener los estándares: Nun uses restoladores web d’Apple nin Google, nun visites Youtube o webs que faigan usu d’esi formatu. Ente les alternatives a los restoladores de Google y Apple tienes Firefox, Arora, Epiphany… y toos ellos n’asturianu 😀

¿Quies más? Equí puedes lleer la esplicación oficial, y otru blogue.

Pues yo, dir a Ciañu 😀 ¡Vémonos!

Resulta que tengo un portatil vieyu de sirvidor caseru pa compartir ficheros colos collacios y coses así. Nun tien entornu gráficu y alministrolo por SSH, por esto nun necesito monitor, pero claro nun puedo desenchufalu… Marquinos apurrióme la solución na llista de corréu de Softastur.

Namás que hai d’instalar el paquete vbetool, yo ficelo en Debian como root (n’Ubuntu ye igual pero poniendo “sudo” delantre de cada comandu).

Instalamos:

aptitude install vbetool

Y col comandu

vbetool dpms off

apagamos el monitor y con

vbetool dpms on

prendémoslo otra vuelta…

Esto ta mui bien pero los que somos vagos nun mos presta tener qu’escribir comandos cada vez que prendemos el ordenador, entos solucionélo faciendo un script de shell pa executalu nel arranque.

nano /etc/init.d/matarmonitor.sh

y escribimos:

#!/bin/sh
#
# description: mata’l monitor nel arranque
#

vbetool dpms off

Guardamos con “ctrl+o” y zarramos con “ctrl+x”

Damos-y permisu d’execución

chmod +x /etc/inti.d/matarmonitor.sh

y agora pa executalu nel aniciu del sisitema editamos el ficheru rc.local

nano /etc/rc.local

y siempres enriba de la llinia que diz “exit 0” ponemos

sh /etc/init.d/matarmonitor.sh

Guardamos con “ctrl+o” y zarramos con “ctrl+x”

Así cada vez que reaniciemos el equipu tendrá’l monitor apagáu.

La llibertá y el saber escuchar son coses a agradecer nuna distribución tán bona como Ubuntu.

A Ubuntu prestaría-y saber qué pienses tocante a la inclusión/non inclusión de dalgunes aplicaciones. Ye por eso, qu’habiliten un cuestionariu, pa que, si tienes unos segundinos, dexes ehí la to opinión.

El formulariu tiéneslu en: http://www.surveymonkey.com/s/GFVQP62

Visto en: OMG

Güei vamos ver lo cenciello que ye disponer d’esti llanzador d’aplicaciones, que cunta con un estilu “docky”. Nun va facenos falta tener Compiz instaláu. (si lu tenéis, meyor). L’aspeutu final del nuesu llanzador, va a ser ésti:

Vamos a ello. Abrimos una terminal, y escribimos lo siguiente:

sudo add-apt-repository ppa:do-core

sudo aptitude update

sudo aptitude install gnome-do

Dende esti momentu, n’Aplicaciones–>Accesorios , yá podríemos executar Gnome-Do. (pero entá nun vamos facelo). Les posibilidaes son munchísimes, pero equí vamos ver cómo instalar el llanzador tipu Dock. Pa ello, fáinos falta habilitar Compositing de Metacity.  ( Nota: Si tienes instaláu Compiz, podrás saltate estos pasos d’activar Compositing )

P’activar Compositing, calcamos les tecles Alt+F2 y escribimos gconf-editor.

Dámos-y al botón de Executar, y abrirásenos l’editor de configuraciones. Vamos al camín apps–>metacity–>general , activamos la caxella compositing_manager y zarramos la ventana.

Yá tenemos compositing, y vamos a executar Gnome-do . Vamos a Aplicaciones–>Accesorios–>Gnome-Do apaecerá esta pantalla, y calcamos na flechina que vos marco (na imaxe) en color bermeyu, y escoyemos Preferences

Agora vamos a la llingüeta “Appearance“, y escoyemos na llista la opción “Docky”

Yá ta!  Qu’esfrutéis 😀

Nun hai muncho que dicir tocante a Youtube, tol mundu tien visitao el sitiu web de videos más afamáu de la rede.  La “pega” de Youtube, ye que’l sitiu tien más publicidá que la camiseta d’un pilotu de rallies. Si quies evitate toa esta publicidá, puedes facelo, usando Totem.

Nel panel allugáu a mandrecha, estenderexa la llista d’arriba, y esbilla “Youtube“. Agora, namás tienes qu’escribir na caxa de gueta, el términu que quies alcontrar. Bien cenciello, eh? 😉

Déxovos con una captura del trailer de Harry Potter con subt. n’asturianu.

Restolando pela rede, aporté a una páxina que pertenez al Ministeriu d’Educación, au s’ufre un Cursu de redes d’área llocal en Linux. Namás-y eché un güeyu perenriba, pero tien bona pinta.

Puede descargase en PDF (son 16 capítulos = 16 PDF’s). Como ye un coñazu descargalos de ún en ún, fícevos la xera más cenciella, y tenéislos equí toos nesti ficheru comprimíu 😉

Que vos preste.