Enxamás-y digas la verdá a daquellos que nun la merezan. Mark Twain.

Ye por eso que voi cuntavos la verdá… porque necesitáis sabela. 🙂

Hai dos coses poles que visites esti blog:
1- porque te presta’l software llibre
2- porque tas a favor de la llingua asturiana.

La verdá, ye que tendrá que ser más lo segundo que lo primero, porque blogues falando de software llibre hai abondos. Cientos, milenta d’ellos ya inclusu munchu meyores. O seya qu’albidro que lo que te presta d’esti blogue, son les noticies qu’alcuentres nél falando de software llibre n’asturianu. Ye más, diría qu’entres una y otra vegada diciendo: “a ver si la xente de Tapaponga me cunta dalgo d’esto o daquello, les caberes noticies de la xente de Softastur, el caberu programa que puedo usar en llingua asturiana, (l’emule, l’emesene, la openoffice,…etc)”

Too eso tiéneslo n’otros blogues. Entós, ¿Pa qué vienes a ésti? (Non… nun queremos echate, queremos que reflexones.) Repito: ¿Pa qué vienes a ésti blogue? Pa vivir una realidá nueva na to llingua. Pa ver que hai xente que s’esmolez pol futuru de la llingua nesta estaya de la informática. Pa comprobar que tán dándose los pasos correutos haza la escolarización y la normalización nuna llingua, (la nuesa), que los nuesos escolinos han reconocer como de so.
-¿Por qué?
–Porque YE NECESARIO.

La xente de Tapaponga, date anuncia de tolo qu’asocede nesti campu nuevu. L’espíritu d’esta xente nun escosa, nun asela, trabayen ensin aforfugu, porque les coses bien feches, faense sele y adulces. Lo mesmo que tola xente que trabaya en Softastur. Dalgunos d’ellos, son los que t’escribimos dende Tapaponga… mayestros, filólogos, traductores, informáticos,… Toa esta xente, lleva 20 años oyendo dicir: “¿pa cuándo windows en llingua asturiana?”. De xuru toos sentimos eso dalguna vegada. Pues la rempuesta ye: PA NUNCA.

Más de 20 años. Son munchos, sí. Y el trabayu que se fai ye pa tí. El mesmu trabayu desinteresáu que fai l’Academia, o la Xunta, o el CAO pola to llingua, nun se pidi res a cambiu, nun cuesta perres. Faise por tí: ufrímoste un Sistema Operativu, una suite ofimática y una descomanada variedá d’aplicaciones pa que vivas, remanes y faiga les tos xeres na to llingua. Cola mesma dignidá que’l restu. Cola mesma dignidá que quixeron arrebexanos. ¿Vas dexar que te lo quiten? LA PASIVIDÁ MÁTANOS.

Eso ye lo que-yos interesa: Un asturianu “pasivu”. Ellos quieren un animal de vezos, fácil de remanar, que se dexe apalear: un acomodáu. La xente acomodao avecen a esculpase con sides probes que tamos fartos d’oyir. Pues bien: NUN MOS ACOMODEMOS. Usa’l sistema operativu que te venga en gana. Pero, nun dexes de prebar ésti. Ta NA TO LLINGUA.  ..que ye la razón pela que llees esti blogue. Por supuestu hai munchísimes más razones…. nun tienes más que ver los nuesos artículos. Pero ésta ye la razón que te fai ser quien yes, que ye frutu del trabayu fechu primero por munchos otros dende fai 35 años. Acabóse’l vezu y la galbana. Nun escuches a los que te dicen que nun merez la pena. Esa xente son republicanos que griten “viva’l Rei” y trotamundos apalancaos nel so sofá.

• Téunicamente: usa’l software que meyor faiga lo que d’él esperes. Preba Ubuntu: nun va defraudate, al contrariu, sosprenderáte.

• Éticamente: el suañu fechu realidá: Un S.O. na to llingua. Ye’l nuesu mou de dicir equí tamos. (pernecesario nestos tiempos)

Parafraseando unes pallabres del escritor vascu Bernat Dechepare (1545), prestaríame facer usu de la so llingua y les sos pallabres, pa faceles nueses:

Berce gendec vste çuten
Ecin scriba çayteyen
Oray dute phorogatu
Enganatu cirela.
Asturiera,
Ialgui adi mundura.

Que quier dicir:

Otres xentes creíen
Que nun se te podía escribir
Agora tienen amosao
Que taben engañándose
Asturianu,
Sal al mundu.

Tú yes l’activista. Demuéstralo!! El futuru ye nuestru y yá pues tocalu colos deos…

UBUNTU FÁCIL

Vamos ver cómu poner un doble panel na ventana de Nautilus. Igual munchos de vosotros trabayáis coles llingüetes de Nautilus pa dir moviéndovos ente les carpetes del sistema. Esta ye una bona funcionalidá que permite movese bien rápido. Na semeya que vos pongo, puede vese un exemplu con 3 llingüetes:

Pero les llingüetes, nun dexen ver el conteníu d’otra carpeta al empar, y de xemes en cuandu lo que queremos ye tener varies carpetes vistes…. lo que vamos ver nesti post, ye cómo poner un doble panel, mui útil nestos casos. Toi falando d’esto:

Pa facelo, el métodu más rápidu ye’l siguiente. Abrimos una terminal (Aplicaciones—>Accesorios—>Terminal) y nella escribimos:

sudo add-apt-repository ppa:berndth/ppa

(esto yera p’amestar los repositorios que necesitamos) Agora, vamos a anovar y escribimos:

sudo aptitude update

y xusto dempués, escribimos esto pa instalar nautilus:

sudo aptitude install nautilus

Fecho!

P’activar el doble panel, vamos a Ver—>Extra Pane , como amuesa la imaxe.

Si nun se vos activó, ye porque nun s’anovó Nautilus dempués d’amestar los repositorios. ¿Qué facer? Fácil. Vamos a Sistema—>Alministración—>Xestor d’anovamientos y pente los anovamientos tendremos que ver esto:

Instalamos, y dempués, mandarános reaniciar l’equipu. Fecho esto, yá tendremos activa la función del doble panel. 😀

Qu’esfrutéis

Yá perpasamos les 10.000 semeyes. ¡A poles 20.000!

Un de los programes más interesantes qu’atopé, y que me ye perútil ye SubDownloader.

Tengo’l vezu de baxar per torrent series en versión orixinal, y baxar subtítulu a subtítulu pela web ye un poco coñazu. Asina qu’executo SubDownloader, reconoz tolos videos de la carpeta que-y diga, y baxa automáticamente tolos subtítulos na llingua que-y diga, renomando’l ficheru .srt si fai falta 😀 ¡Más rápido y cenciello imposible!

Pa instalalu gueta nel menú /Aplicaciones/Centru de Software d’Ubuntu l’aplicación: SubDownloader.

¡Da la cara pola oficialidá!

Mañana, 28 payares 2009, vémonos en La Pola Siero 😀

Sabíemos que pasaría… Firefox yá tien más cuota d’usu nel mundu de los restoladores web que’l restu de los sos competidores direutos n’Europa. Vamos, que ye’l que más s’usa, algamando casi’l 50% (la noticia tien yá unes selmanes… asina que viendo la tendencia, de xuru algamó yá más d’esi 50%)

Recordái que Firefox ye software llibre. Ehí vos dexo’l gráficu. 😀

Vía:Muycomputerpro

¿Tienes o camientes nuna empresa? Los costes de software puede ser pergrandes, polo que l’alternativa del software llibre ye más qu’interesante.

OpenPYME ye una web del Estáu qu’amosa un catálogu de software llibre enfocáu a la empresa 🙂 Agora sabrás de manera fácil y rápida si’l software llibre adaptase al to negociu 😀

Vía: BarraPunto.

Vía: The Daily What.

UBUNTU FÁCIL

Magar qu’Ubuntu yá trai en Karmic un fondu de pantalla rodante (con imáxenes del espaciu), güei vamos falavos de DRAPES.

DRAPES, ye un xestor d’imáxenes pal fondu d’escritoriu que fai que les nueses imáxenes vayan camudando cada ciertu tiempu. Namás hai qu’indicar la carpeta na que tenemos les imáxenes y el tiempu de duración de cada una y llisto! Ta integráu perfeutamente en GNOME, y la so instalación ye percenciella. Abrimos la terminal en Aplicaciones–>Accesorios–>Terminal y na ventana que se abre escribimos:

sudo apt-get install drapes

Y dempués del procesu d’instalación, alcontraremos l’aplicación en: Sistema–>Preferencies—>Desktop Drapes

Decatáivos qu’abriráse un iconu arriba a mandrecha, que vos indica que’l programa yá ta funcionando:

Calcando col botón esquierdu del mur enriba del iconu y escoyendo les preferencies, podemos axustar les opciones comu nos preste. 😀

Pel momentu, Canonical entá nun unvía les traducciones n’asturianu, y saldrános n’inglés. Si tais naguando por tenelu n’asturianu, descargái ésti ficheru: drapes.mo y tenéis que metelu dientro de la carpeta

/usr/share/locale-langpack/ast/LC_MESSAGES

…alcordáivos de facelo con permisos d’alministrador o root. A estes altures yá tendríeis que saber cómu se fai, pero por si acasu, y pa los que sois nuevinos voi desplicalo otra vegada:

CÓMO COPIAR UN FICHERU DIENTRO D’UNA CARPETA CON PERMISOS DE ROOT:

Abrimos una terminal en: Aplicaciones–>Accesorios–>Terminal

na ventana de la terminal que s’abre escribimos:     gksudo nautilus

y na nueva ventana que s’abre, vamos a la carpeta au queremos copiar el ficheru. Una vegada na carpeta que queremos, ye namás arrastrar el nuesu ficheru, a esa carpeta. Zarramos y llisto.

Qu’esfrutéis 😀

NOTA: pa desinstalar el programa DRAPES, facéis lo mesmo que pa instalalu, pero escribiendo:

sudo apt-get remove drapes

😉

Softastur foi criando y meyorando col pasu de los años les tornes al asturianu d’Ubuntu. L’usu d’Ubuntu n’asturianu medraba pasín a pasu de manera sele y constante 🙂 con un sistema operativu de calidá y n’asturianu.

El 29 d’ochobre salió Ubuntu 9.10 Karmic Koala, una perbona versión na que l’asturianu madura, pero dalgó camudó’l dende’l 29 d’ochobre…
… ¡l’instalador n’asturianu!: La facilidá d’instalación de la nuestra llingua dende’l CD d’instalación provocó que l’usu diariu d’Ubuntu n’asturianu españe de manera ablucante y constante:

Calca na semeya pa vela grande

Remembrar que’l númberu na estadística ye un porcentaxe (ye la xente que marcó unviar estadístiques voluntariamente n’orixenes del software) 😀 Y sigue medrando día a día 😀 ¡¡Esto nun hai quien lo pare!! 😀 Gracies por usar Ubuntu n’asturinu 😉

Puedes ver les estadístiques diariamente equí.