Dalgunes vegaes ye complicao esplicar por qué usar GNU/LiNUX en llugar d’otros sistemes operativos a xente que nun ta avezao a la informática.
Gracies a Iñigo, ya disponemos de la torna de GetGNULinux (Iniciativa de GNU/Linux matters) 😀

Con un llinguaxe lo más llano posible, onde traten d’esplicar los ¿qué?, ¿cómo? y ¿por qué? ye GNU/Linux (y polo tanto Ubuntu) de forma cenciella y lo menos téunica posible.
Asina que si tovia tas con duldes, llee y ¡Faite Con Linux! 😉

No, nun ye de verdá. Pero el día menos pensáu podemos alcontranos diciendo eso…

Pa estos casos, lléganos dende Chile el programa Prey, que funciona como un serviciu nel entamu, anubríu de los usuarios. Lo que fai ye restolar na rede la esistencia de una páxina que’l dueñu del portátil cria en casu que-y desapaeza l’ordenador. Si la páxina esiste unvía un corréu que contién los datos de la conexón que ta usándose, la llista de programes n’execución, una semeya del escritoriu y, si l’ordenador tién activada la webcam, una semeya de la persona que ta… hmmm… tentando devolver l’ordenador. Si el dueñu nun conseña una páxina web na instalación, Prey executaráse cada ciertu tiempu.

Hai versiones pa Linux, Windows y Mac y ta embaxo la llicencia GPLv3+cerveza (o sea, si alcuentres l’ordenador, invites a una cerveza. Nun se si valdríen unos culinos de sidra)

Perguapu el post anterior sobro animación. Equí vos pongo otru, ésti fechu en Venezuela por trés persones.

Los programes emplegaos pa ésti foron:

• La distribución Ubuntu Studio de Linux, basada en Ubuntu pero meyorada haza’l área multimedia.
• El software d’animación tridimensional Blender, una espectacular suite.
• Gimp, aplicación pa retoque fotográficu y de testures, equivalente a Photoshop
• Inkscape, aplicación de diseñu vectorial, equivalente a Corel Draw o Illustrator.
• Cinelerra, editor de videu non llinial.

La noticia sacóse de: http://www.radiomundial.com.ve/yvke/noticia.php?p=150142#150142

¿Yes de los que crees que GNU/Linux y el software llibre ye un pasatiempu de frikis y aficionaos mui entreteníu pero que nun val pa facer coses series y d’altor?
Pues mira esti curtiu cinematográficu fechu con software llibre y distribuyíu con llicencia creative commons
http://www.youtube.com/watch?v=7paen5lz6cc
Más info equí.
¿Cambiasti d’idea? 😉

Cóstome más de la cuenta pasar los videos en formatu avi a formatu mp4 pal móvil Nokia 5800 XpressMusic.

Ye fácil cola aplicación Avidemux (teneisla nos repositorios, n’Aplicaciones/Amestar y Quitar, pero’l móvil non quería reproducilos dando un fallu (seguramente nun yera’l codec que debería ser). El trucu ye escoyer la preconfiguración del codec pal iPod.

Dexóvos un videu de como convertir una peli (amestando-y un subtitulu de pasu) d’avi a mp4 con una resolución de 640×360 (nel mio casu pal Nokia) pa velo en reproductores pequeñinos. Tamién amestolu a “tarees a facer d’Avidemux” pa convertir toos d’una tacada y nun dir ún a ún (tarda un cachu).

Como prometió Canonical (empresa que desendolca Ubuntu), ¡¡güei llibera Launchpad!!

La pa mi meyor plataforma pa desendolcadores, tornadores y xestión de fallos, por fin ya ye llibre baxo llicencia GNU Affero GPLv3 😀

Esto implica qu’otros proyeutos de software pueden usar esti sistema percenciellu. Una noticia pola que munchos lleven años esperando 🙂

La marcha y xorrecimientu de programes en llingua Asturiana ye imparable, y si yá toos conocíemos el conocidísimu Brasero de GNOME, agora facemos anuncia de K3B: la interface gráfica pa grabación de CD’s y DVD’s, más afamada del mundu llibre y perteneciente a KDE

La xente de Softastur, (sí… esa xente que fai que puedas tener el to ordenador en llingua asturiana) nun dexa de sosprendenos, y acaben d’asoleyar la interfaz na nuesa llingua. Ésti ye un apueste más pola variedá: Si fai tiempu Softastur facía anuncia del asoleyamientu d’Ubuntu con tola suite de programes oficial del escritoriu GNOME, nun fai munchu repitieron llanzado Edubuntu, la versión educativa, y agora tán en plenu procesu d’espansión y tienen les mires puestes en Xubuntu (col escritoriu de Xfce) y Kubuntu, (col escritoriu de KDE). K3B ye ún d’esos programes que faen importante a KDE, y ye por eso que yá lu tenemos disponible.

Yá tienes una montonera de programes pa escoyer … y tú con Window$ en castellanu…

Ésto ye lo que t’ufre K3B:

Dalgunes de les carauterístiques de K3B inclúin:
* Grabáu de CD/DVD de datos
* Grabáu d’Audio CDs
* Sofitu de CD Text
* Sofitu pa DVD-R/DVD+R/DVD-RW/DVD+RW
* Sofitu pa CD-R/CD-RW
* Mixed Mode CD (Audio y Data nún discu)
* Multisesión CD
* Video CD/Video DVD authoring
* eMovix CD/eMovix DVD
* Copia Discu a Discu y  DVD
* Borráu de CD-RW/DVD-RW/DVD+RW
* Sofitu de Imaxe’ISO
* Ripéu d’Audio CDs, Video CDs, Video DVDs
K3B tamién puede grabar CD de datos que soporten SO basaos en Linux/Unix, Windows, DOS, un gran númberu de ficheros (UDF), Linux/Unix + Windows, Rock Ridge, Joliet.

K3B foi galardonada como la meyor aplicación multimedia por LinuxQuestions.org nel añu 2006 pol 70% de los participantes

Entá necesites más razones? Pásate a Ubuntu

P.D. Gracies fonderes a Xandru M. poles traducciones 😉

Güei preséntovos pdftk, una ferramienta pa remanar documentos en formatu pdf. Como dicen na so web: ‘Si PDF ye’l papel electrónicu, entós pdftk ye’l quitagrapes electrónicu, la perforadora, la encuadernadora, el descodificador secretu y les gafes de rayos X’. Pues emplegalu pa (combinar documentos PDF, dixebrar les páxines d’un PDF nun documentu nuevu, descifrar un documentu, cifrar el documentu resultante como te pete, desfacer un documentu PDF en páxines sueltes, informar de les carauterístiques del PDF, descomprimir y volver a comprimir páxines, reparar un PDF corruptu.

Podéis instalalu dende Synaptic o na terminal con:

sudo apt-get install pdftk

El funcionamientu ye pentemedies de llinia de comandos, tenéis exemplos na so web o podéis ver les instrucciones tecleando na terminal:

man pdftk

(Pa salir de les instrucciones calca ‘q’)

Un exemplu útil, si tienes dos documentos que se llamen 1.pdf y 2.pdf, abre la terminal y vete a la carpeta onde tienes los ficheros, una vez ellí escribi na terminal.

pdftk 1.pdf 2.pdf cat output total.pdf

Esta orde va crear un documentu llamáu total.pdf nel mesmu directoriu que tán 1.pdf y 2.pdf y que contién dambos nesi orde.

Tien munches más opciones como poner marques d’agua a los documentos, etc. Namás tenéis qu’esploralu un poco.

Salú y software llibre.

Si vos presta restolar cola terminal y dalguna vez vos topáis con que nun podéis movevos a un directoriu porque’l so nome tien espacios, probái a usar \, esta barra llógrase normalmente calcando ALT GR + la tecla cola que s’escribe º.
Por exemplu, si queréis cambiavos a un directoriu que se llama ‘Les mios semeyes’ tenéis qu’escribir:

cd Les\ mios\ semeyes

Ayer per primer vegada, Google confirma oficialmente que ta trabayando nun sistema operativu propiu: Google Chrome OS.

Será un sistema operativu basáu en GNU/Linux, con Chrome como restolador pa la rede, y perenfocáu a la computación na nube. Tamién ye diseñáu especificamente pa netbooks, aunque podrá usase en cualisquier x86.
Ya ta en charres con fabricantes pa ufiertalu a mediaos del añu que vien, y será llixeru y de códigu llibre.

Google ya ta arrasando nos móviles con Android, relegando a Apple (en parte polos elevados precios del iPhone y la falta de llibertá propia de tolos productos d’Apple), y parezme que Google arrasará a Microsoft nos sistemes operativos d’escritoriu con esti SO. La marca Google vende abondo, como toos sabemos a Google los fabricantes quirenlu muncho (Bug #1 d’Ubuntu).

La bona noticia ye que xunto con Ubuntu, sal una distribución que tien toles posibilidaes de poner a GNU/Linux como sistema operativu más usáu nel mundiu 😀 Eso llevaría ventaxes pergrandes, como que les compañíes se volcaren a criar software pa GNU/Linux (AutoCAD, xuegos…), y algamar por fin un sofitu completu pa drivers 😀

Señoras, señores, vienen nuevos tiempos pa GNU/Linux 😉

Vía: El Blog de Enrique Dans.