La selmana pasada veiamos nuna serie super sentai (si nun sabeis lo que ye eso entrugai equí) infantil xaponesa a los sos perxonases usar Ubuntu… lo qu’amuesa lo cool que ye esti sistema…

Vía: OMG! Ubuntu!

Yá tamos nel añu 4710, y anque los chinos nun son a alcanzar a los asturianos nesta competición amistosa que gasten los equipos de traductores d’Ubuntu (val qu’ellos tienen de facer la versión tradicional y la simplificada… pero tienen unos pocos más de falantes… ;P) dende Ta pa Ponga felicitamos l’añu nuevu chinu a los asturianos de La China a los chinos d’Asturies y a tolos chinos y asturianos en xeneral (pa celebrar siempre dispuestos) con esta versión web d’Ubuntu del nuevu equipu de desendolcadores web d’Ubuntu.com cola que podemos entever como ven esi sistema tan políglota los vecinos que saluden con 您好 (pronuciáu algo así como “ni ḥao”).

Va tiempu que Canonical, empresa que sofita’l desendolcu d’Ubuntu, llanzó una guía d’estilu tocante a la indentidá corporativa de la propia empresa y del so principal proyeutu. Nel equipu de traducción veníemos usando la indentidá corporativa vieya, pero dende güei yá tenemos disponibles los logos adaptaos a la nueva identidá. Déxolos equí pal que los necesite.

Si daquién los quier más grandes o en formatu vectorial que los pida con un comentariu.

¡Yá disponible Ubuntu 11.04! Col nuevu entornu Unity, preséntasenos la nueva versión coles novedaes siguientes como más importantes:

• Un instalador más simple tovía. ¿Yera posible? Parez que sí 😛
• Unity: Una nueva manera d’entender l’escritoriu. Nun uses aplicaciones pa facer la to xera, simplemente xestiona la to xera. Unity destaca por algamar un escritoriu usable ensin permitir interrupciones.
• Centru de Software d’Ubuntu: Faise social, con puntuaciones, recomendaciones y redes sociales.
• Firefox 4, ¿qué dicir que nun sepas? 🙂
• Banshee ye’l nuevu reproductor de música, con nueves tiendes de música.
• LibreOffice.
• Nuevu xestor de preferencies y del sistema, accesible dende un sólo menú.
• ¡100% N’asturianu!

Puedes descargalu direutamente dende equí, equí por torrent,  entender qué ye Unity equí y los sos atayos equí.
Y remembrate que si nun te atreves a instalar, anovar o simplemente tienes duldes, taremos p’ayudate tol sábadu día 30 d’abril en FNAC (Parque Principáu).

A finales d’abril del 2011 apaecerá la nueva versión d’Ubuntu, 11.04, Natty Narwhal

El sábadu 30 d’abril, AsturLiNUX, MouseTrap (Alumnos EII), Ubuntu-ast y Softastur van facer una presentación na FNAC sobre Ubuntu.

Dende les 11:00 de la mañana, y a cada hora, van amosase les novedaes más importantes de la distribución y solventarán les tos duldes. Simultáneamente van facer un taller d’instalación d’Ubuntu 11.04, que consiste n’instalar Ubuntu nel to ordenador y enseñate a remanalu, too ello de baldre. Si yá tienes Ubuntu pues anovalu nel momentu.

El programa previstu ye esti:

• Presentación: Cada hora enseñaráse qué ye Ubuntu y les novedaes más importantes de la nueva versión 11.04.

• Instalación (De 11:00 a 14:00 y 16:00 a 20:30): Instalación d’Ubuntu nel to ordenador y deprendimientu básicu, too ello totalmente de baldre. Si quies llevar el to ordenador pa instalar Ubuntu ye mui importante que sigas estos pasos.
• Party (De 14:00 a 16:00): Si ta un día soleyeru diremos a dalgún parque cercanu a xintar. Nós ponemos la bebida y tú traes dalgo pa picar y compartimos la comida ente toos.

Si quies saber los motivos de por qué usar Ubuntu, calca equí.

Dalgo que nun ye intuitivo, pero sí fácil 🙂

Abri una Terminal dende’l menú Aplicaciones/Accesorios, y copia y pega:

sudo add-apt-repository ppa:mozillateam/firefox-stable ; sudo apt-get update ; sudo apt-get upgrade

Ablucando cola potencia de WINE 😉 pero ¿qué quereis que vos diga? ¡Quédome con GIMP!

Y perfácil, sólo instalando WINE y baxando un Photoshop portable, nun fizo falta na más de lo que pon esti tutorial.

Y Photoshop ye sólo un exemplu de los miles de programes emulaos por WINE.

Casi na 😀 ¿Y tú? ¿Tovía nun yes llibre? 🙂

Vía: Ubuntu-ast (Calca pa velo en grande).

Anque hai una versión pa GNU/Linux en prebes d’esti albuertu de reproductor musical, namás que val pa versiones de pago… pero si quies usar una cuenta gratuita puedes facelo con wine…

Lo primero ye dir a “Aplicaciones/Centru de software d’Ubuntu” y nel caxellu de busca ponemos “Wine”… y calcamos n’instalar na primer opción que nos apaez

Agora vamos a “Aplicaciones/Wine/Configure wine”, la primer vez tardará un puquiñín, en cuantes abra vamos a “Audio” y calcamos en “Test Sound”, si sentís el soníu ye que yá ta configuráu calcáis “Apply” y llisto, si da un mensaxe d’error configuramos:

1. Marcamos la caxella “ALSA Driver” (esti “ALSA” nun tien que ver colos Cosmen)
2. Dientru de “DirectSound” marcamos “Hardware Acceleration” como “Emulation”
3. Dientru de “DirectSound” marcamos “Default Sample Rate” col valor “44.100”
4. Dientru de “DirectSound” marcamos “Default Bits Per Sample” col valor “16”

Quedaría finalmente como na imaxe que vien darréu (“Apply” depués de facer cambeos):

(más…)

Tornes d'Ubuntu 10.10

¡Faltó poco pal 10 perfeutu!

Fueron los collacios eslovenos los qu’algamaron quedar nel décimu llugar del mundu pol númberu de tornes de los programes básicos d’Ubuntu 10.10 (fai 6 meses taben nel puestu 24)

Pola nuesa parte, namái llegamos al 12ᵁ llugar del mundu (tábemos xusto detrás de los eslovenos, nel puestu 25); a ver si pa la siguiente llegamos al 11ᵁ 😉

Les estadístiques tan equí.