Anguaño la xera de grabar programes de TV fíxose de nueves desconocida pa muncha xente, yá sía pola mor de les nueves teunoloxíes ó por que los preseos que remanamos tolos díes tienen munches funciones.

Güei vamos deprender cómo grabar y tresformar ficheros a otru formatu col reproductor VLC. Darréu amosaránsevos los pasos y captures del procesu.

Pasu 1- Na parte superior de la ventana del programa, vamos a “Ver” y esbillamos la opción “Controles avanzaos”. Esto fadrá qu’enriba de los controles de reproducción mos apaezan más botones.

Pasu 2- Entamamos la reproducción de cualesquier videu, magar qu’esti procesu ye más afayadizu cuando vemos la TV pente medies d’esti programa. Darréu primimos nel botón que tien forma de círculu bermeyu y nel
intre, VLC aniciará la grabación d’esi videu atroxándolu na carpeta Descargues.

Pasu 3- Cuando queramos finar la grabación, dámos-y de nueves al círculu bermeyu.

El resultáu d’esta grabación arriendes d’atroxase na carpeta Descargues como se dixo enantes, va tar nun ficheru cola estensión “.ts”.

Podríemos dexar asina’l ficheru y finar esta xera, pero a nós nun mos interesa pola mor de qu’esisten formatos más afayadizos y qu’ocupen menos espaciu en discu.

Ensin usar otru programa nin colar de VLC, vamos facer la conversión del ficheru a otru formatu.

Pasu 1- De nueves na parte superior de la ventana, vamos a “Mediu” y llueu a “Convertir/Guardar”.

Pasu 2- Apaecerámos una ventana na que tenemos de primir n’Amestar, y darréu guetaremos el ficheru que mos prestaría tresformar. Cuando finemos dámos-y a Abrir.

Pasu 3- N’amestando’l ficheru primimos nel botón “Convertir/Guardar” y nel intre remanecerámos otra ventana. Equí tenemos d’escoyer un llugar u guardar el ficheru final, pa ello na estaya Destín primimos nel botón “Restolar” y guetamos la carpeta onde queramos guardar esi ficheru.

Pasu 4- Escoyíu’l llugar onde guardaremos el ficheru, primimos n’Aniciar, y llisto.

¡AVISU!

Recordái nun tener activada la opción de repitir conteníu multimedia indefinidamente, porque esto fairá que la conversión del ficheru nun fine enxamás.

HOW TO GENERATE A NEW LOCALE FOR ICU4C

ANTECEDENTES

La llingua asturiana nun tien locale válidu p’Android. Tien un locale, baxo códigu ‘ast‘, pero esti nun ye válidu por tener 3 lletres, yá qu’el funcionamientu d’Android namái-y permite funcionar con códigos de 2 lletres. Por ello de hai de trabayar baxo otru códigu válidu, pero hai que xeneralu: El locale escoyíu ye el es_XA, por razones varies, pero les fundamentales son que

1) Ye funcional.

2) al ser es_ , toles aplicaciones que nun tean n’asturianu, van salir en castellanu, faciendo más cenciella la vida al asturfalante que nun sepa inglés.

3) _XA ye un recursu válidu pa definir rexones nueves. Por poner un exemplu, Kosovo (non reconocíu entá por dellos estaos), usa el códigu de país _XK. El códigu _XA permite a la llingua asturiana identificase como rexón/país válidu.

Android usa los locales direutamente de la información qu’obtién de ICU. Al compilar Android, los ficheros .dat de los locale nun se compilen, sinón que s’usen como tán. Nel casu que ICU incluya el locale ‘ast’, ésti nun diba ser válidu polo desplicao más arriba. Ye por ello, qu’hai de xenerar un locale nuevu. Los ficheros nos que tán los locales son:

icudtXXl-all.dat

icudtXXl-default.dat

El más importante ye icudtXXl-default.dat

PROCEDURE

El ficheru README.txt en /icu4c/stubdata/desplica’l procesu de xeneración. Pa xenerar el locale es_XA hai de facer lo siguiente:

(más…)

Fai unos díes qu’acaba d’espublizase LibreOffice 4, con grandes meyores d’usabilidá. Ente les más importantes, la posibilidá d’introducir comentarios nos ficheros de testu, compatibilidá con formatos rtf y docx , cambeos visuales como l’usu de “Personas” de Firefox, pero la más prestosa de toes, ye la que voi tratar nesti post: la posibilidá de remanar una presentación de diapositives fecha en Impress, usando’l nuestru smartphone por control remotu. Sicasí, tengo que dicivos que magar que taba incluyida en LibreOffice 4, un cambéu de última hora fizo que namái dispongan d’ella los que usen la version DEV (desendolcadores). El restu, vais tener qu’esperar a la 4.0.1 😉

Equí vos va’l videu:

Güei vamos ver cómo instalar LINE n’Ubuntu. Lo primero ye desplicar qué ye LINE: ye una app de mensaxería nel intre pa móviles (smartphones), competidora direuta de Whatsapp, que tamién permite facer llamaes de vozIP y tien munches más funciones que la so rival. Lo meyor de too: ta disponible p’Android, iOS, y tamién pue usase dende’l ordenador de sobremesa: PC y Mac

(más…)

Qué habrás armao… 😀 😀

Pa los que sois culu inquietu y teáis tol día caciplando coles coses, y probando versiones nueves, betes, etc, etc… ye posible que con tol baruyu de versiones despistéis a los programes de lo que tienen que facer. Y una d’estes coses ye que vos pase (como a mín) que’l Thunderbird nun vos abra los enllaces nel navegador cuando pincháis nellos.

SOLUCIÓN 1:

Lo más normal, ye que nun tengas bien configurao l’aplicación predeterminanda pa cada tipu d’aición. Dende’l dash, escribi “Preferencies del sistema” o “Axustes del sistema” (dependiendo de la versión d’Ubuntu qu’uses, va ser una o otra). Na ventana que s’abre, vete a abaxo y seleiciona “Detalles”.

….o cenciellamente, nel ‘Dash’ o Tableru, escribes Detalles 😉

Vas a la Seición: “Aplicaciones predeterminaes”, y defines que p’abrir webs, seya Firefox. Tien que quedar como esto:

SOLUCIÓN 2:

En Thunderbird, vais a Ayuda–>Reaniciar colos complementos desactivaos. Na ventana que vos apaez, nun marcáis dengún caxellu y pista. Si funciona, ye que teníeis un complementu (que vete tu a saber porqué) taba dándovos fallu. Namás vos queda nesi casu, dir probando ún a ún (activando y desactivando) hasta dar con él. Ye lo qu’hai.

SOLUCIÓN 3:

Cuál ye la ruta al “executable” del Firefox que uses? Ye lo primero qu’hai que saber. Abri un terminal, y escribi:

whereis firefox

Lo normal ye que te diga:

firefox: /usr/bin/firefox /etc/firefox /usr/lib/firefox

Eso quier dicir que tienes el Firefox onde tien que tar, en /usr/bin/firefox  (que ye la ruta que nos importa). Pero yo por exemplu, nun lu tengo ehí, porque soi un cacipleru, y la versión que uso ye siempre la Nightly, y téngolu en /home/el_mio_usuariu/firefox/firefox  Seya una ruta o la otra, tendremos que facer esto:

1. Vete a la to carpeta personal. Calca Ctrl+h pa ver les carpetes ocultes. Verás una que tien un puntu delantre y que se llama .thunderbird Entra nella
2. Entra na carpeta que se llama XXXXX.default y abri’l ficheru denomáu prefs.js con un editor de testu.
3. Abaxo del too del ficheru, amiesta estes dos llinies:

user_pref("network.protocol-handler.app.http", "/usr/bin/firefox");
user_pref("network.protocol-handler.app.https", "/usr/bin/firefox");

NOTA: Si la ruta onde tienes el firefox nun ye /usr/bin/firefox , pues sustitúyesla pola tuya, lóxicamente. Nel mio casu, yo punxe: /home/el_mio_usuariu/firefox/firefox.

Guarda los cambeos y pista.

Cuando queremos facer pruebes de velocidá de la conexón a internet, hai sitios web enforma pa facelo. Pero si queremos medir la velocidá de tresmisión de datos ente equipos d’una rede llocal tendremos d’usar una aplicación propia. Y n’Ubuntu esto ye mui fácil, necesitamos Iperf.

Instalamos dende’l centru de software o dende terminal con:

$ sudo apt-get install iperf

Iperf tien un modo sirvidor y otru cliente pa facer les pruebes, nel equipu A (con ip xxx.xxx.xxx.xxx) aniciamos el sirvidor

$ iperf -s

Vamos al equipu B y llanzamos el cliente escontra el sirvidor A indicando la so ip

$ iperf -c xxx.xxx.xxx.xxx

Esperamos un ratín y al ratu nos dará la velocidá de la conexón.

Iperf tien más opciones, pero pa eso ta el manual. Tamién hai versión pa Window$ colo que tamién podeis medir la velocidá en redes insegures.

Tan mui de moda los servicios de sincronización de ficheros al travies de la ñube (forma “cool” de dicir sirvidores), ente otros tenemos Dropbox o Ubuntu One. Son servicios mui cómodos que val pa sincronizar equipos remotos facilmente gracies a internet, sicasí namás que valen pa pequeños ficheros o semeyes, porque cuando queremos sincronizar grandes cantidaes de datos (falamos de munchos GB o TB) internet nun ye’l meyor mediu pa facelu nun país con una coneutivida tan probe onde los que venden “ventayes de la fibra óptica” llévente a casa un cable coaxal…

Si los equipos a sincronizar tan nuna rede llocal Unison (y SSH) ye una solución, rápida y fácil.

Pa esplicar facilmente el procesu, vamos dicir que queremos sincronizar PC1 (dende onde llanzaremos les sincornizaciones) y PC2

Asumimos que los equipos tienen IP fixa (nun voi esplicar esto) y la sincronizción ye ente ficheros d’ún único usuariu.

Les IP ficticies que vamos usar son: PC1 -> 111.111.111.111. y PC2 -> 222.222.222.222

El usuariu llámase “usuariu” (orixinal)

Tendréis que cambiar estos datos polos vuesos.

(más…)

Como prometí, equí vos dexo’l plugin (realmente ye un script) pa poder facer los vuestros calendarios.

(más…)

Hai xente a la que nun-y presta Unity. Con tanta caxigalina y xirigoncia nun acaba de convencer esti escritoriu. Pue tar mui bien pa Equipos Personales, TeleCentros, Biblioteques,.. etc Pero necesitaría un toque daqué más seriu si quixéremos usalu nuna empresa, o n’Alministración, por exemplu. Vamos, que yo soi d’escritorios serios…  Nun sé cómu me da, que nun va quedame otra qu’adautame, pero mientres pueda, nun voi renunciar a los mios menús 😀 Esti post, ye tocante a cómo instalar un indicador de menú clásicu. (Clic na imaxe p’agrandar)

Dende una terminal escribimos:
sudo add-apt-repository ppa:diesch/testing
sudo apt-get update
sudo apt-get install classicmenu-indicator
Y pista. D’esti mou tendremos el nuesu escritoriu más funcional.

Tien d’apaecer na barra d’arriba. Si nun lu veis, zarráis sesión y volvéis a entrar 😉

Si uses Banshee, que ye’l reproductor de soníu que sustitúi agora a Rhythmbox, tiéneslo perfácil p’amestar una emisora de radio. Agora que nun podemos sentir Radio Sele nes ondes, podemos salir al pasu escuchándola pela rede. Esto ye cómo se fai:

Abrimos Banshee: (clic nes imáxenes p’agrandar)

Nel panel allugáu a manzorga, seleicionamos “Radio“. Entós, arriba a mandrecha, vamos ver un botón con forma de “más” ( + ) en color verde. Calcamos nél, y va abrísenos una ventana au tendremos que dar los datos de la nuesa emisora.

En Xéneru de la emisora, ponéis el que queráis (yo pongo Alternative pa teneles toes xuntes); Nome de la emisora: Radio Sele; …etc etc. En URL del fluxu ponéis:

mmsh://bach.serveisweb.com/RA163?MSWMExt=.asf
Guardáis. Apaecerávos la emisora, y con doble clic executáis pa sentila.

Y pista.

#RadioSeleSí