Pa quien nun lo sepa los ULPCs son portátiles de baxu coste, nos que’l fabricante (Asus, HP…) ufierta una tecnoloxía un poco antigua (pero de bona calidá) baxando abondo’l preciu y tamañu físicu d’un portátil.
Un exemplu ye qu’un portátil d’Asus (que tovía nun llegó a España) valdría unos 300€, mientres un portátil d’esi tamañu físicu val sobre 1200€.
Pa facer esto’l fabricante, como dicía, pon unos componentes que nun son la última moda. 1/2 Giga de RAM, 4 Gigas de discu duru internu, 800Mhz procesador… etc.
¿Llimitao? ¡Non! Calidá/preciu ye perinteresante. Y tema que nos interesa: Nun suelen ser máquines adecuaes pa correr un Windows XP al que-y Micro$oft ya-y puso fecha de retirada del mercáu por segunda vegada. Pero para un Linux, qu’esprime abondo l’hardware, ye más que de sobra. Encima, ante tan baxos costes, el fabricante ufierta la posibilidá d’escoyer sistema operativu preistaláu, pero claro, si quies Windows pagues la llicencia, que son unos 50€ más respecto a la versión con Linux. Falando de precios tan baxos 50€ jode gastalos 😉
Parez ser qu’esti ye un mercáu prometedor tanto pa los consumidores, los fabricantes, como pa nosotros, los usuarios de Linux. Los grandes ya tan metiendose de cabeza, y saldrán d’equí a poco abondos portátiles.
Pero claro, Micro$oft nun se duerme, y ta viendo peligrar un mercau n’espansión, y ya movió ficha. Más bien movió 2 fiches:
1.- Quier que los fabricantes aumenten el discu duru y memoria.
2.- Casi regalará Windows XP pa esos portátiles.
A mi nun me parez demasiao mal que Micro$oft espabile, al fin y al cabo, ye una empresa, y tien que mirar los sos intereses.
Pero nun me presten dos coses (respecto a esta noticia):
1.- Que dende’l so puestu monopolista, siga imponiendonos los sos programes, en base a estorsionar a los cagaines de fabricantes, nel que nengún atrevese seriamente a planta-y cara preistalando Linux de manera formal, a pesar de qu’arrasen cuando lo faen.
2.- Que tanto que llucha escontra la piratería, cobrando siempre a preciu d’oru los programes, agora que se-y escapa un mercáu emerxente, regalalu. Pero a ti, queríu/a llector/a, seguirá cobrandótelu percaru.
Resumiendo, Linux tien un camín perllargu per delantre. Ya nun sólo tien que saltar les zancadilles de Micro$oft, tamién les de los fabricantes por querer siempre llambe-y el culu a Micro$oft, como pol pésimu soporte de drivers.
