Firefox escuende un güevu pintu perprestosu, que dieron en llamar en dalgunos llaos “La Profecía”. Como vos desplicábemos n’otru post (unos díes atrás), basta con escribir about:mozilla na barra de navegación (talo y como se ve na imaxe) y yá podemos esfrutar d’esti güevu pintu en Firefox.

NOTA: Esti güevu pintu, pel momentu, namái podéis velu nes versiones en castellanu, frances, galego… etc. La pena ye que pa velo na versión n’asturianu vais tener qu’esperar hasta la versión 3.6.6.  (Pa los talibanes que percuerren Tapaponga: Yo puedo amosavos la pantalla porque uso Namoroka, la versión beta 3.6.6 de Firefox; en Tapaponga siempres vamos un pasu per delantre del restu 😀 , nun vaya ser que dalgún me diga que ye un mockup)

Como vos desplicaba, equí tenéis una amuesa de la profecía:

Pero… ¿qué significáu tien esto? ¿Qué ye el Llibru de Mozilla? Pues, realmente nun esiste un llibru tituláu The Book of Mozilla. Sicasí, les cites incluyíes en Netscape y Mozilla dan esa impresión al revelar pasaxes asemeyaos al Llibru del Apocalipsis de la Biblia. En total esisten seis pasaxes. Nesti últimu pasaxe, la desplicación ye la siguiente:

La fras “Mammon durmióse” fai referencia a que MS Internet Explorer quedó estrincada na versión 6.0 durante 5 años. “la bestia resurdió” fai referencia a que Netscape reñació na compañía AOL (al menos fasta’l 9.0.0.5). “enantándose sobro la Tierra y los sos siguidores fexeron lexones” a que llueu de reñacer Netscape, espardióse per tol mundu y los sos siguidores y usuarios foron millones bien aína. “y proclamaron nuevos tiempos” a que nel futuru los restoladores yá nun diben tar arreyaos a Internet Explorer, sinón qu’esistiríen nueves posibilidaes. “sacrificaron colleches nel fueu, cola astucia de les rapiegues” esto fai referencia (direutamente) a Firefox darréu que’l so logu ye una rapiega de fueu, d’ehí el nome “Firefox”. “Y construyeron un mundu nuevu a la so propia imaxe como prometíen les pallabres sagraes” refierse a que la Fundación Mozilla lliberó los códigos fonte de los sos productos. “Mammon esconsoñó” refierse al llanzamientu de la versión 7 de IE, “y de sópitu, namái yera un rezagáu” refierse a qu’Explorer, de ser un innovador, pasó a copiar carauterístiques de Firefox qu’Explorer nun tenía.

El númberu del pasaxe 11:9 ,  ye’l 9 de payares de 2004 . Esi día asoleyóse Mozilla Firefox 1.0. Tendría que ver col reñacer de la bestia en cuantes al fechu de crear el primer executable estable de lo que foi la Bestia y qu’anguaño ye Firefox.

Fice un artículu bien estensu d’ello na Uiquipedia, pa que sepáis la hestoria entera. Como vos digo, ésta ye la desplicación del últimu pasaxe, pero los demás nun tienen desperdiciu 😀

Vinux ye una metadistro, basada n’Ubuntu 10.04, orientada a ciegos y persones con problemes de visión. Incluye dellos preseos pa meyorar l’accesibilidá al sistema como conversosres de testu en voz, llupes dinámiques o soporte pa teclaos braille. Preseos que, anque tan disponibles pa Ubuntu, nun vienen col sistema base. Tien soporte pal asturianu y podeis baxala de baldre en formatu cd, dvd y usb dende http://vinux.org.uk/downloads.html

Artículu orixinal en González y González

Cuando falamos de Software Llibre frente al privativu tendemos a facer comparances téuniques, si Winbug$ ye una ponzoña, que si Mac O$ X ye mui “cool”, que si GNU ye o non dificil de remanar… pero solemos dexar de lláu (paezme que cada vez más) el sentíu éticu/ideolóxicu del movimientu.

Y ye precisamente esti aspeutu, al mio entender, l’interesante del Software Llibre, “ye qu’en Windows puedo xugar al Sims” ¿pero a qué preciu?, cuido que  ye importantísimu pal desenrrollu d’una sociedá crear una cultura del conocimientu y esto incluye  a la teunoloxía. Una vegada sentí a una moza dicir que “El software privativu ye a la sociedá del conocimientu, como el patriarcáu a la sociedá igualitaria”, y cuido que nun puede tar más acertada. El software privativu atesora el conocimientu y restrinxe les llibertaes de compartilu, d’estudialu y ameyoralu. Agora imaxina que’l inventor de la fabada nun compartiere la forma de preparala, y te prohibiere compartila col vecín porque namás que tienes permisu a tastiala, pero la fabada ye namái que del inventor y tú nun puedes modificala (adiós a les fabes con amasueles). Suena rídiculo ¿verdá? pues esto ye lo que pasa col software privativu.

Nun tamos falando de que quien desendolque software nun cobre por ello, sinon de que nun torgue l’accesu a “la receta”, a compartilu. El propiu Richard Stallman vivió de mercar copies d’Emacs.

Por eso anque téunicamente un software privativu seya meyor qu’ún llibre hai de refugar el so usu, porque falamos de llibertá y cuido que’l principiu de la llibertá ta (o debería tar) perriba la téunica.

Esti aspeutu de la llibertá ye mui claru con proyeutos de llocalización como l’asturianu, el tener accesu a una teunoloxía llibre permítenos modificala pa usala na llingua que nos pete. Hai unos meses coincidimos dalgunos miembros de Softastur con una académica de la Llingua, y mientres esplicávemos les distintes funcionalidaes d’Ubuntu interrumpiónos diciendo: “Nun me vender la moto, como si ye peor que lo que tengo, si ta n’asturianu ye lo que tengo d’usar por principios”, esti mesmu principiu éticu ye comparable al del Software Llibre. Tengo d’usalu porque ye éticu, y non porque seya meyor y/o de baldre.

Cuando falamos de Software Llibre falamos de sostenibilidá de verdá, munchos paises con pocos recursos tan consiguiendo informatizase y frayar la famosa “brecha dixital” gracies al Software Llibre, y ye que quiciabes esti movimientu -que xurde nos paises del primer mundu, principalmente colos proyeutos GNU n’EE.XX y Linux en Finlandia-, suponga la mayor tresferencia de propiedá intelectual de los grandes paises industrializaos al tercer mundu.

Otru aspeutu importante ye que nel Software Llibre munchos proyeutos apuesten por plataformes obsoletes (pa dalgunos) y minoritaries, colo que la llibertá yá nun ta namái que nel software, sinon nel hardware. Por poner un exemplu, toi escribiendo esti artículu dende un equipu que nun tien recursos suficientes pa correr Windows XP, esto implicaría que va años que o desfacíame d’él (normalmente pa la basura) o taría usando un Windows 98 ensin soporte nin aplicaciones nueves… pero gracies al Software Llibre (concretamente a Debian GNU/Linux) tengo un entornu  de trabayu agradable y modernu, puede que nun tenga “sombres espectaculares” nos iconos del escritoriu, pero puedo vivir ensin elles…

El poder estirar la vida de los equipos d’esta forma (aparte del aforru económicu) supón un amenorgue considerable de la basura que xeneramos, si tas a la escontra de que nos llanten una incineradora de basura n’Asturies… Software Llibre… ;P

Si esti sistema de reutilización (reutiliza enantes de reciclar) treslladamoslu a l’Alministración y organismos públicos, falamos de munchos millones d’euros… igual los suficientes como pa nun tener que facer recortes sociales nin a trabayadores, y nun ye una grandonada mia: La propia Microsoft, fala de que’l so volume de negociu n’España ye de 3.600 millones d’€uros, el principal cliente de Microsoft n’España ye l’Estáu y les comunidaes autónomes (sacante esceiciones como Extremadura y Andalucia), que pa comparar destinen un total de 3.209 millones a la educación… y con esto falamos namás que de software y non de tol hardware qu’hai que cambiar pa que pueda mover Windows 7…

Si crees que’l conocimientu tien de compartise pa progresar y ser una sociedá innovadora, si quies vivir n’asturianu, si yes verde o si te da perceguera’l consumismu nel que nos quieren meter les grandes multinacionales, usa Software Llibre, porque ye éticu.

Déxovos un videu d’una conferencia de Richard Stallman onde esplica los conceptos éticos del Software Llibre (castellanu):

Yá ta disponible la versión 2.26 de aMule. Pa instalala n’Ubuntu 10.04 namás tienes que dir a Aplicaciones / Centru de Software d’Ubuntu. La nueva versión inclúi munches nueves funcionalidaes y xestiona meyor les descargues. Tienes más información equí

aMule ta disponible en 28 llingües. Pa esfrutalu n’asturianu, vete a “Preferences“, y na caxa de “Language“, escueyi “Asturian“. Calca nel botón de Aceutar. Zarra’l programa, y llisto. Los cambeos fadrán efeutu la siguiente vegada que abras aMule. 😉

Como dicen nes meyores series: Comming soon! 😛

Yá sabemos la versión que tará n’asturianu pa toles plataformes . Será la versión 3.6.9, y pel momentu siguimos trabayando perduro pa construyir esti nuevu mundu, onde l’asturianu algame l’esplendor que merez, y sí, gracies al software llibre 😉

Cuando llegue’l momentu, podréis descargala dende equí: http://www.mozilla.com/ast/

Sí, promoción del 8 al 13 de xunu, onde suscribeste a 6 númberos de la revista online de Linux Magazine, al preciu que tú digas.

Y el 10% donáu a Hispalinux, GNOME o KDE 😀 ¡Perbona iniciativa!

Más información equí 😉

A los centros educativos asturianos tán llegando pizarres dixitales d’estremaes marques. Darréu qu’esti mercáu ye mui nuevu, los fabricantes tenten vender ya inclusive regalar el so software rápidamente pa convertilu nun estándar de facto y dempués zarrar al másimu les condiciones d’usu del so programa (a lo llargo de la curtia historia de la informática tenemos abondos exemplos d’esto).
Por exemplu, les condiciones d’usu del software de Promethean (ActivInspire) camudaron recientemente pa que los materiales ellaboraos por marques pa la so pizarra nun puedan ser esportaos y emplegaos n’otra, o lo que ye lo mesmo que les clases preparaes pa esta pizarra nun se pueden emplegar na Smart Board o Interwrite y pueden facelo yá que les condiciones d’una llicencia de software puen cambiar cuando’l so dueñu quiera.
Anque prefiriríamos emplegar software llibre esclusivamente (garantizaríamos l’accesu futuru a les clases que podemos preparar) nesti momentu nun atopé nengún proyeutu abondo desendolcáu, asina que vamos enseñavos cómo poner esti software nos ordenadores pa poder usar les pizarres n’Ubuntu y n’asturianu.

Promethean
Entamamos pola pizarra de la marca Promethean que ye una de les que tán de moda y la más fácil d’instalar yá que tienen un repositoriu propiu pa Ubuntu. De momentu namás tienen versiones preparaes pa Ubuntu 9.04 y 9.10, suponemos que nun tardando muncho tendrán pa Ubuntu 10.04 y podremos velo nel Promethean Planet (tenéis que rexistravos).

N’Ubuntu 9.10 Karmic Koala namás tenemos qu’arrancar el Xestor de paquetes de Synaptic nel menú Sistema – Alministración.

Calcáis n’Axustes – Repositorios y escoyéis la llingüeta Otru software. Escoyéis la opción Amestar na parte d’abaxo a la izquierda y escribís esto:

deb http://activsoftware.co.uk/linux/repos/ubuntu karmic oss non-oss

Agora namás vos queda zarrar esa ventana y calcar nel botón Recargar del Xestor de paquetes de Synaptic. Va apaecer una alvertencia de claves que tenemos qu’aceutar (esto pasa porque falten robles dixitales pero nun tien mayor importancia).

Yá tamos terminando. Agora seleicionamos pa instalar los paquetes activaid, activdriver, activinspire, activhwr-es, activinspire-help-es, activ-meta-es, activresources-core-es y activtools.

Si vos atrevéis cola terminal podéis usar esti comandu:

sudo apt-get install activaid activdriver activinspire activhwr-es activinspire-help-es activ-meta-es activresources-core-es activtools

Oracle ta acabantes d’asoleyar la nueva versión 3.2.1 de la suite ofimática llibre OpenOffice n’asturianu, que puede baxase dende http://ast.openoffice.org.

Esta nueva versión tien les siguientes meyores:

• Revisaes y meyoraes toles traducciones del asturianu.
• Arranque más rápidu.
• Mayor sofitu de ficheros.
• Meyor importación de tables de Microsoft Excel 2007.
• Meyores n’OpenOffice Calc.

Remembrar qu’OpenOffice ta pa baxar de baldre, ye llibre y tien procesador de testos, fueya de cálculu, xestor de presentaciones, xestor de bases de datos y programa de dibuxu, too ello n’asturianu pol trabayu altruista de l’asociación Softastur.

En Sistema/Alministración/Oríxenes del Software alcontramos una llingüeta que diz Estadístiques. Si nos da por mirar ehí, veremos que se nos ufre la posibilidá de participar nes estadístiques d’Ubuntu.

Nun tengas miéu… esto nun ye como n’otros sistemes operativos nos que recopilen los tos datos personales. Esto ye Software llibre y nun se faen esa triba de práutiques (que se faen n’otros sistemes operativos, y que por ciertu, son illegales ensin el consentimientu del usuariu). N’Ubuntu, tol mundu puede lleer el códigu y ver que nun hai trampa nin cartón.

Que sepan que la llingua asturiana entá alienda.

Marca la caxella. 😉