Dende fai 1 añu, esfrutamos d’OpenOffice n’asturianu.

Esta torna supunxo un fitu, cola primer office multiplataforma (ya existía la GNOME Office pa Linux) íntegramente n’asturianu.

Tamos mui contentos de les estadístiques: 1.250 descargues nel primer añu 😀
L’usu según sistema operativu ye:

Queremos puntualizar qu’OpenOffice yá vien instalada n’asturianu en Linux (hai que baxala si quies la cabera versión), colo que serán munchos más usuarios na nuestra llingua.

Y si tovía nun la uses, equí la tienes 😉

Les compañíes importantes, tienen por vezu inorar a los sos oponentes cuando estos son pequeños. Una especie de: “Pa qué vamos falar d’ellos cuando nun pueden facenos un res: eso ye da-yos importancia y notoriedá cuando nun la tienen” .

Pero cuando l’oponente yá nun ye pequeñu y significa una amenaza, empiecen los ataques y arrebexos. Les mentires (o medies verdaes), son claves nesti procesu, denomáu FUD (n’inglés Fear, Uncertainty and Doubt, n’asturianu medrana, incertidume y dubia )

El Software llibre, nun tien mentires nin medies verdaes. Cenciellamente, ye tresparente y por eso nun s’engaña a naide. Cuando una compañía o UN GOBIERNU ataca al Software llibre, ye porque tien-y llercia, y entós ye cuando se saquen a los perros a lladrar, p’axorizar al personal.

Na cuenta de YouTube de Microsoft Office, acaben de xubir esti videu atacando a OpenOffice. Onde otros ven una ofiensa, yo veo MUI bones noticies. Esto namás se desplica porque Microsoft y los sos productos, faen más agües que’l Titanic, y claro, l’agua ta frío y mete mieu pa la cabeza 😀

Oracle ta acabantes d’asoleyar la nueva versión 3.2.1 de la suite ofimática llibre OpenOffice n’asturianu, que puede baxase dende http://ast.openoffice.org.

Esta nueva versión tien les siguientes meyores:

• Revisaes y meyoraes toles traducciones del asturianu.
• Arranque más rápidu.
• Mayor sofitu de ficheros.
• Meyor importación de tables de Microsoft Excel 2007.
• Meyores n’OpenOffice Calc.

Remembrar qu’OpenOffice ta pa baxar de baldre, ye llibre y tien procesador de testos, fueya de cálculu, xestor de presentaciones, xestor de bases de datos y programa de dibuxu, too ello n’asturianu pol trabayu altruista de l’asociación Softastur.

El siguiente ficheru facilitarate tola instalación d’OpenOffice n’Ubuntu. Automáticamente descárgate los ficheros necesarios ya instálatelos nel to PC 😀

Pasos a siguir:

• Descarga l’autoinstalador calcando equí , y apégalu nel Escritoriu.
• Agora abre una terminal (menú Aplicaciones/Accesorios/Terminal)
• Escribi lo siguiente (respetando les mayúscules):

cd Escritoriu

• y agora escribes:

sudo bash ooo2ast.sh

• (pediráte la to contraseña, y empezará a executase’l programa)

Dempués d’un bon cachu (175 Mb de descarga + instalación) yá tendrás Openoffice instaláu. Espera a que t’avise’l programa. 😀

P’abrir OpenOffice, vete al menú Aplicaciones/Oficina y si t’aparez n’inglés, afita l’asturianu yendo al menú Tools/Options/Language Settings 😉

Si tienes tovía problemes o cualesquier dulda, escríbenos.

Encamentámoste a usar esti ficheru d’autoinstalación n’Ubuntu 9.10. Pa la siguiente versión d’Ubuntu yá vendrá preinstaláu n’asturianu 😉

PD: ¡Milenta gracies a Miguel Jañez pol script! 😉