El pasáu miércoles, los miembros d’Ubuntu recibieron un corréu de Jorge O. Castro diciéndo-yos que yá taba disponible la nueva fonte d’Ubuntu. La fonte, ta en fase beta, y namás pueden disponer d’ella los miembros d’Ubuntu, que cuenten con permisos pa la descarga nos repositorios privaos. Esti pequeñu privilexu, ye’l que me permite amosávosla (que non pasávosla). Ye guapa y bien cuidada. Pel momentu namás hai versión regular (nin negrina o cursiva), y tendréis qu’esperar hasta agostu pa qu’Ubuntu abra’l repositoriu.
Si vos presta, tamién podéis ver los estudios que se faen a la hora de confeicionar un nuevu tipu de lletra nesti PDF
Facía 1 mes que taba buscando’l meyor ebook posible al menor preciu, y Amazon (fabricante del Kindle) pola competencia del Nook y iPad baxó 100$ esti aparatu que voi a analizavos nos puntos siguientes…
Dicir enantes que ya tuve un Papire de 5″ y polo tanto tengo una pequeña perspectiva pa opinar pros y contres 🙂
Preciu: 205,8 € TOO (Aparatu, unvíu, aduana) a fecha xunetu 2010.
Unvíu: Tarda unos 4 díes llaborales por UPS.
Accesorios: Sólo lleva’l Kindle, un cargador d’alimentación USB y un adaptador d’esi cargador USB a enchufe americanu. Ye dicir, puedes cargar l’aparatu coneutándolu al ordenador, o mercando un adaptador d’enchufe americanu a européu.
Funda: Nun lleva funda, y la meyor ye la propia que vende Amazón por 34$, pero sal cara cola aduana y los gastos d’unvíu (55€). Lo meyor ye mercala nel Amazón del Reinu Xuníu. Yo merque esta por 18£ (25€ al cambiu). Equí fallé de lleno 😛 Si merques el Kindle xunto a la funda los gastos d’unvíu y aduana son los mesmos, asina que lo meyor ye pillar la funda orixinal a la vez que’l Kindle.
Oxetivu: Lo qu’hai que tener mui claro ye qu’un ebook val sólo pa lleer llibros, nun esperes efeutos ablucantes al pasar páxina, ni otres coses.
Llectura: Lleer un ebook ye EXACTAMENTE como lleer un llibru, la esperiencia ye la mesma. La pantalla ye E-ink, y nun emite lluz, y la so resolución ye pergrande polo que ves los carauteres igual que si tuvieren imprentaos, colo que’l cansanciu visual ye’l mesmu que lleer un llibru de papel. A los 5 minutos escaeces que tas con un aparatu electrónicu y enfrasqueste na llectura 🙂 Además puedes axustar perfectamente la fonte al tamañu que más te preste, asi como poner el testu horizontal o vertical. Yo por fin toi dando usu a tolos PDFs que tenía per casa, y ye que lleelo nuna pantalla TFT o LED ye pa ḥoder los güeyos.
Batería: Dura 2 selmanes a unes 2 hores de llectura diaries, ya que la teunoloxía E-ink sólo gasta al camudar la páxina.
Remanar documentos: El Kindle lleva wifi cola que podrás mercar documentos direutamente dende Amazon.com y tenelos nel Kindle nun minutu. Si nun quies gastar un duru, al coneutar el Kindle al ordenador mediante’l cable USB aparez un discu nuevu, nel que podrás arrastrar los tos documentos (ePUB, DOC, PDF, TXT, MP3…).
Cómo se ven los documentos: Los ebooks son perfeutos pa cualesquier testu non complexu (tables de datos…). Les noveles nos ebooks vense perfectes, tamién val pa partítures por exemplo.
Optimizar un documentu: Al mercar el Kindle, asociasete una cuenta pepin@kindle.com. Si mandes un email con un axuntu (PDF, ePUB, DOC…) a esa direición dende’l to email, el Kindle lo recibirá optimizáu a formatu AWZ (privativu de Kindle) pola WIFI que lleva. ¡Esto tien un costu según los MB del llibru (aprosimao unos 0,10€/llibru)! Lo meyor ye que tamién tienes una cuenta pepin@free.kindle.com, mandes un email col documentu axuntu y el tema “convert” y totalmente de baldre mandente un email col documentu optimizáu pal Kindle con estensión AWZ. Respecto a la optimización, una novela ye too testu de siguío y por eso se verá perfecta, pero un PDF complexu tendrá qu’axustase a 6″ y tables de datos o demás estructures complexes tendrá saltos de llinia raros. Tamién dispones del programa multiplataforma Calibre, pero préstame más remanar los documentos a man, y Calibre recibe dalguna crítica respeuto a la calidá de la conversión de PDFs a MOBI (el meyor formatu pal Kindle dempués del AWZ). El mio conseyu ye usar l’email @free.kindle.com. Aclarar qu’una novela en PDF veráse perfeuta tras convertila a un formatu MOBI o AWZ.
WIFI: El Kindle lleva una wifi cola que restolar pela tienda de llibros d’Amazon de baldre. Tamién puedes restolar per Internet y consultar l’email, pero n’esti casu cobra na to cuenta d’Amazon. Yo pa evitar problemes, tengo la WIFI apagada 😉
Ventaxes del Kindle respeuto a otros ebooks: Conozo 3 ebooks distintos, y el Kindle tien estes ventaxes:
Perbon contraste (muncho más qu’otros ebooks).
Nun ye táctil ni con color: Que seya táctil ye meter otra pantalla por medio y perder contraste, y pa lleer noveles, prefiero un blanco y negro 😉
Restolar la web (pagando).
Preciu: Un ebook de 6″ n’España valte a lo poco 275€, el Kindle 205€.
Diccionariu d’Inglés: Con cualesquier testu n’inglés coloqueste nel entamu d’una pallabra y salte’l significáu automáticamente.
Notes escrites por tí amestaes al testu. Fácil y cenciello.
Subrayar testu. Fácil y cenciello.
Esportar notes y surayaos: Les notes y el surayáu xenera un ficheru My Clippings.txt que puedes sacar al to ordenador. Veolo per útil sacar fragmentos pa estudiar o resaltar frases pa estudios.
Llee’l testu n’inglés.
Contres del Kindle:
El so pesu (210 gr.) ye un poco más que’l restu d’ebooks.
Tien pa oyir MP3, pero’l reproductor ye bastante cutre, ensin pantalla de xestión, pudiendo sólo dir p’alantre y posar la reproducción.
DRM: Usa un formatu MOBI camudáu pa facelu privativu con estensión AWZ. Tamién los llibros mercaos a Amazon caltienen DRM colo que nun puedes usalos n’otros llaos (colos documentos que tú metas nun hai nenguna restricción).
Viola la GPL col sistema operativu Linux qu’usa. Imperdonable.
Sobro llibros electrónicos en xeneral
Importante al mercar un ebook: Yo aconseyo totalmente una pantalla de 6″ y non una de 5″, la diferencia de tamañu ye pequeña, pero la diferencia pa lleer grande 😉 Tamién hai dalgún ebook con pantalla LCD, lo desaconseyo totalmente, ya que lo meyor que tienen los ebooks ye la teunoloxía de tinta electrónico E-ink, una LCD nun ye ni por asomo lo mesmo, que nun vos engañen 😉
Baxar llibros de baldre: Remembrando ante too que compartir llibros ye llegal, equí tienes d’onde baxar llibros pa cualesquier ebook que tengas:
Libroos. Foru con llibros mui recientes. De lo meyor.
Feedbook. Convierte Feeds de webs a documentos pa ebooks.
Warez-BB. Si quies llibros n’inglés, guetalos equí.
Tirón d’oreyes a les editoriales (asturianes): Pa variar, en llugar de triunfar vendiendo nel mediu del futuru y posicionandose con idegues innovadores, tienen el miéu de que-yos pase cómo a la música y se pirateen los sos llibros, nun existiendo nengún ebook n’asturianu pa mercar. Voi dici-yos daqué bien claro: Préstame la música folk, comparto música y la baxo de baldre dende Internet, pero merco los CDs orixinales de los grupos bonos que me gusten (obviamente nun tola música me gusta o tengo 10.000 € pa gastar n’ella). Pero dende agora nun pienso lleer/mercar más llibros en papel, y si nun tengo llibros n’asturianu en formatu electrónico, pues nun los voi lleer. Si una editorial saca un llibru bono y más baratu (nun gasten lo mesmo n’imprentar un llibru qu’en mandatelo en PDF) venderán 😉 Dexovos dalguna perbona opinión al respeuto: Carta a los editores de libros de texto y No nos quieren vender ebooks.
Si te queda dalguna dulda más, intentaré resolvela nos comentarios 🙂
Ún de los güevos pintos más famosos de Firefox, ye’l que tien que ver colos robots. Pa los qu’entá nun lo sepáis, namás tenéis qu’escribir about:robots na barra de navegación del restolador:
Y el güevu pintu que vos saldrá ye’l siguiente:
Pa los que no lu conocíeis, seguro que vos sorprendió. Pero los que yá sabíeis d’él, seique nun sepáis tola hestoria. Toles frases del mesmu tienen el so xacíu, y d’esto va esti post. Pa empecipiar, llama l’atención la frase: Gort! Klaatu barada nikto! qu’apaez na barra de títulu de ventana y na llingüeta. Dirévos que Firefox 3, fizo publicidá nel so llanzamientu col tema base de los Robots. El mensax vinía a dicir: Los robots son los tos collacios…. 😀
Bien, yá sabemos que los robots son los nuesos collacios. O non….
La famosa frase, ye de la piníscula de 1951 “The day the earth stood still” (remake en 2008 “Ultimátum a la Tierra”, con Keanu Reeves). Nella, Gort ye un robot que ta específicamente programáu pa protexer al so dueñu, Klaatu, nel casu de que a Klaatu-y asocediere daqué. Klaatu, díxo-y a Mrs. Helen, que na programación de Gort, túvose la precaución de meté-y un passphrase, qu’encaboxaría l’ataque de Gort. Gort apagaríase, y nun fadría dañu a naide. Helen pronunció la famosa frase, nesta escena de la piníscula.
Na piníscula nun hai traducción esauta pa eses pallabres, pero ta nidio que ye una especie de: Gort! Klaatu ordénate que pares! … o daqué asemeyao. Ye por eso, que na páxina del güevu pintu, ye lo primero que se-y diz al robot, pa que nun nagüe por facenos trizes, y lo primero que nos retruca’l robot ye: ¡Bienllegaos, humanos! 😀
El restu de les frases tamién tienen munchos guiños a la hestoria de los robots. Vamos ver:
¡Venimos visitavos en son de paz y con bona voluntá!
Dicho tamién por Klaatu na piníscula The Day The Earth Stood Still
Un robot nun tien de facer dañu a un ser humanu, o pola so inaición, dexar qu’un ser humanu sofra dañu.
Los robots tenemos adicao coses que la xente nun creyería.
De la míticu FLIM de Blade Runner. Esta fras díxola Roy Batty: I’ve seen things you people wouldn’t believe. Attack ships on fire off the shoulder of Orión. I’ve watched c-beams glitter in the dark near the Tannhäuser Gate. All those … moments will be lost in time, like tears…in rain. Time to die.
Los robots son los sos collacios de plásticu colos que-y prestará tar.
Talo y como se ve na semeya, la traducción d’Ubuntu en llingua asturiana considérase completa . Canonical considera completaes toes aquelles llingües que superen el 80%. De les 218 esistentes, l’asturianu ocupa’l númberu 25, por encima de llingües tan importante en númberu de falantes como son l’euskera, el turcu o l’árabe. Sicasí, necesitamos más collaboradores. Nun ye una carrera al sprint, sinón de fondu. ¿Anímeste a echanos un gabitu?
Enllaz al sitiu web: calca equí (caberu anovamientu 28-04-2010)
La noticia del día ye que Nokia va usar Linux, concretamente MeeGo, na so gama de móviles N-series, coles esperances puestes en que seya una alternativa qu’ufra un meyor posicionamientu na batalla escontra rivales como Apple Inc col so iPhone y Google Inc col so sistema Android. La serie-N de Nokia, ye (foi) la xoya de la corona durante años, y dominó’l mercáu de los smartphones fasta qu’Apple introduxo’l so iPhone en 2007
El N8 de Nokia, ye’l caberu modelu que va emplegar el software Symbian. Symbian yera lider nel mercáu, pero foi perdiendo tarrén nos caberos años. “Nel futuru, la serie-N tará basada en MeeGo” dixo’l portavoz de Nokia Doug Dawson.
Esto va ser un fechu a partir de güei mesmo, 30 de xunu; asina lo confirmó Valteri Halla (direutor de MeeGo en Nokia), que dixo qu’esta fecha diba considérase como’l DÍA ÚN. (noticia n’inglés)
Hai más noticies (esperemos) tocante a esti tema. Pero too a so tiempu. 😀 Pel momentu vemos que l’apueste que faen les grandes compañíes como Intel y Nokia en favor del software llibre, va tomando forma. Y ye daqué a tener en cuenta. Sin dir más llonxe, Telefónica tamién anunció’l so compromisu d’usar MeeGo na so próxima llinia de productos, lo mesmo que Novell. Veremos en qué para too esto, y cuántes más sorpreses hai.
Etiquetes: meego, telefonía. Guardáu en: Noticies | Los comentarios tan zarraos en Nokia usará Linux (MeeGo) nos sos N-series
Esti ye un script que va aidate a instalar y/o personalizar dalgunes coses en Lucid Lynx. Una de les más solicitaes, ye’l cambéu de los botones de les ventanes a mandrecha (yo úsolos a manzorga…. pero tú mesmu).
Empecipiamos abriendo una terminal y allugámonos na carpeta Descargues:
Calca equí p'amosar conteníu dende Flickr. Consulta la política de privacidá de Flickr.
El primer pasu ye el de Personalización. Botones, habilitar/deshabilitar iconos, soníu del GDM etc… (Alcordáivos de da-y a la opción “Amestar repositorios adicionales“, esto va facevos falta nel pasu 2.)
Dempués de calcar n’Aceutar, el script executará los cambeos, y pasamos al Pasu 2: Instalar y desinstalar programes
