Nota: pa Ubuntu 10.04, 10.10. Tamién pa 11.04 pero les versiones “alpha” tovía dan problemes lóxicos: hai qu’esperar a les beta, o a la versión definitiva.

Libreoffice, ye la suite Ofimática que Canonical va incluyir por defeutu nes vinientes versiones d’Ubuntu. Si recordáis, hasta agora Ubuntu venía con OpenOffice preinstaláu, pero Oracle fízose col control d’OpenOffice, y los desendolcadores p’asegurar el calter llibre del mesmu, abandonaron el proyeutu y aniciaron un nuevu faciendo un fork d’Openoffice.

Pues bien, hasta esti momentu Libreoffice yera un poco “abegoso” d’instalar/probar, pero eso acabóse si usamos PPA. D’esta miente escaecémonos de descargar paquetes .deb, y tener que dir instalándolos ún a ún. Al amestar el repositoriu PPA, él mesmu s’encarga de tola xera d’instalación, y fai que la instalación seya cenciella pal usuariu d’Ubuntu.

Val yá de rollos… ¿Cómo se fai?

Pues más cenciello, imposible: Abrimos una terminal y primero desaniciamos (si lu tenemos) OpenOffice:

sudo apt-get purge openoffice*.*

y agora executamos ún por ún estos 4 comandos (copia y pega pa nun tener fallos)

sudo add-apt-repository ppa:libreoffice/ppa

sudo apt-get update

sudo apt-get install libreoffice

sudo apt-get install libreoffice-l10n-ast

Y pista. La versión que s’instala ye la Release Candidate 2, y magar que la siguiente va ser más estable, nun da problemes. Amás, pa mayor compatibilidá col escritoriu, si tas usando GNOME encamiéntase instalar tamién el paquete:

sudo apt-get install libreoffice-gnome

ó

sudo apt-get install libreoffice-kde

…nel casu qu’uses KDE. 😀

¡Yá s’abrió la votación al Meyor Blogue n’Asturianu pal añu 2010! 😀

Dende va ya 3 años cellebrense estos premios daos pola blogosfera a la blogosfera, col ánimu de fortalecer una comunidá tan prestosa como ye la qu’usa la llingua asturiana 🙂 Esti añu la novedá ye’l premiu de los llectores al meyor blogue.

Los 3 premios son:

• Meyor blogue según públicu (llectores).
• Meyor blogue según blogueros.
• Meyor diseñu según blogueros.

Pa votar, simplemente hai qu’entrar n’esta páxina web.

A toes y toos ¡Mui bon y llibre añu nuevu! 😛

Voi ponevos l’análisis del portátil ACER TM 5735 con Linux preinstaláu, más concretamente Linpux Moblin. El preciu ye de 417€ a payares del 2010, y teneis equí una llista d’ordenadores con Linux a la venta n’Asturies por si quereis regalar llibertá pa estos reis y non pagar la llicencia de Window$ 😉

L’ordenador vien bien empaquetáu, y consiste nel portátil, la so batería, la fonte d’alimentación y drivers pa Windows  ¿como non?

Sorprendíome non atopar un manual coles especificaciones exactes (por exemplu tenía les mios duldes de que la batería fuere de 6 celdes, pero sí, yelo).

Los llaterales amósanos toma de corriente, 3 entraes USB, Grabador DVD, llector de tarxetes, salida VGA y HDMI, d’auriculares y microfonu y entrada Ethernet. Pesa poco pa lo grande que ye, unos 2 kg.

Arrancamos, la instalación de Linus Moblin ye perrápida, en 5 minutos ta operativu tres escoyer la llingua y clave del usuariu “user” ¿non puedo escoyer el mio usuariu?

El sistema va mui rápidu, y como ye d’esperar too furrula. Faigo una copia del discu duru enteru con Clonezilla por si fallare dalgo y tengo que devolvelu, ya instalo Ubuntu 10.10 quitando Linpus (aunque ye guapu, rápidu y ta perbien, non me faigo muncho al sistema de ventanes de Moblin, que tamién ye un poco antigüu sustituyíu por Meego y nun soi a instalar aplicaciones ¿tará capáu?).

Ye un Core 2 Duo, asina que-y corresponde un Ubuntu 64 bits… Tres la instalación tira de los 2 procesadores a tou trapu y too furrula perfeuto menos la gráfica Intel GMA 4500M, que non almite camudar el brillu (en Linpus sí). Tres investigar un bon ratu equí ta la solución.

En definitiva, un perbon ordenador de 15″, rápìdu y bastante compatible con Ubuntu que por sólo 417€ satisfará a un usuariu esixente.

Dexo un videu de Linpus Moblin n’acción grabáu sobre la marcha:

PD: Ye una allegría que los fabricantes pasín a pasu vayan dexando d’incluyir Windows como sistema operativu por defeutu y de paso nos aforren el costu de la so llicencia a los que preferimos otres alternatives.

Ubuntu fácil

Amestar una imprentadora a un equipu ye mui cenciello: Ubuntu deteuta automáticamente la imprentadora y nun da problemes. Pero, ¿qué pasa cuando la imprentadora ta coneutada a un equipu (un sobremesa, por exemplu) y queremos imprentar dende’l nuesu portátil usando la nuesa rede llocal?

Esti ye l’esquema que vos propongo:

Si los dos PC’s son Ubuntu, ye too más fácil, pero vamos “complicalo” suponiendo que’l sobremesa ye un PC con Windows. Lo que queremos ye imprentar un documentu dende’l nuesu portátil con Ubuntu a la imprentadora, entós lo primero que hai que facer ye instalar SAMBA nel portátil, que va permitinos la compartición tanto de carpetes, como d’imprentadores. Nuna terminal escribimos:

sudo apt-get install samba

Fecho esto, asegurámonos de tener prendíu el PC con Windows y la Imprentadora. 😉

• Y agora, nel portátil con Ubuntu vamos a Sistema–>Alministración—>Imprentadores y facemos estos pasos:

1.- Click en Amestar

2.- Imprentadora de rede—> Imprentadora de Windows vía Samba—>Esplorar

3.- INICIOMS —> DESKTOP —> (Esbillamos la nuesa imprentadora, nel mio casu: HP Deskjet F300 Series) —> Aceutar

4.- Nesti pasu, abriráse un encontu/asistente pa instalar el controlador de la marca d’imprentadora. Nel mio casu, la marca ye HP, y calcamos Alantre

5.- Agora especificamos el modelu, que ye Deskjet F380, y aceutamos.

6.- L’asistente ufrirános la posibilidá d’imprentar una páxina de prueba. Y automáticamente, yá tendremos la imprentadora configurada. Dende esti momentu, podemos imprentar direutamente dende’l nuesu portátil, y ensin necesidá de tener que pasar los documentos d’un PC al otru.

NOTA: Cuando’l PC de sobremesa tien Ubuntu, hai qu’instalar samba tamién n’él, y el restu de los pasos son iguales. 😉

Ún de los problemes fundamentales colos que s’atopa un traductor a la hora de correxir un términu ye la Identificación de la plantía a la que correspuende la cadena o términu que quier correxir. Lo meyor ye poner un exemplu:

Imaxinamos qu’atopamos un fallu d’ortografía, por exemplu, Feramientes , y queremos correxilo por Ferramientes. A veces, si sabemos a qué aplicación pertenez (Totem, Rhythmbox, aMule, etc), vamos directamente a la plantía, y solucionámoslo. Pero otres veces, nun sabemos a qué plantía pertenez el términu incorreutu que tamos viendo. Pa eso, pa identificar esa plantía, podemos usar esti script

Simplemente, descargái el script nuna carpeta. Fecho eso, abrimos la terminal y escribimos:

sudo sh guetar.sh 'testu que queremos atopar'

pedirános la contraseña, y xusto dempués, el script diznos la plantía o plantíes que concasen col testu que queremos atopar.

Mui util pa toos aquellos que se pasen hores y hores revisando fallos d’ortografía p’ameyorar la calidá d’Ubuntu.

Gracies a Timo Jyrinki <timo.jyrinki@iki.fi>

NOTA: Esti script, sólo mira ente los ficheros .mo que tengamos nel nuesu equipu, poro, namás sirve p’atopar cadenes n’asturianu.

Estes son les estadístiques de les traducciones de Chromium en toles llingües del mundu. Collabora!

Chromium, ye’l restolador web de códigu abiertu de Google, y yá ye posible traducilu a llingua asturiana.

Esti trabayu ye posible gracies a Fabien Tassin que caltién una copia llocal de les rames del upstream de Chromiun, y diariamente actualiza les traducciones. Hasta agora, Chromium nun tenía denguna infraestructura de traducción que permitiere a la Comunidá llocalizar el software, y por ello dalgunes llingües taben incompletes.

Agora puédese:

a) completar les traducciones de Chromium

b) meyorales, y

c) amestar llingües nueves.

Si quies collaborar nes traducciones, ponte en contautu equí….  pa coordinate cola xente interesao y dividir el trabayu.

Por defeutu, cuando queremos copiar/apegar na nuesa Terminal, tenemos que facer usu del botón drechu del mur y escoyer ente copiar/pegar. Si queremos usar les tecles, tamién podemos facelo, pero’l mou predetermináu ye Ctrl+Shift+C pa copiar  y Ctrl+Shift+V p’apegar.

Pa una persona que tea avezada a Ctrl+C y Ctrl+V too esto ye un poco enfarragoso, asina que vamos poné-y igua.

• Calcamos Alt+F2 y abriráse una ventana
• Escribimos gconf-editor y calcamos en Executar
• Nel menú de la izquierda, vamos a apps–>gnome-terminal—>keybindings
• Na ventana de la drecha cambiamos (fai doble click pa editar el valor) los valores “copy” y “paste”, dexándolos como ta na imaxe.

• Zarramos too, y pista.

Nun ye que en Tapaponga nun queramos que los asturianos tengan Windows na so llingua. Cenciellamente, lo que pensamos ye que ye un mal sistema operativu, y amás, les práctiques de les empreses nun son étiques pa col usuariu.