• Meyor Conteníu: Fueya en Blanco.

• Meyor Diseñu: González y González.

• Votu del Públicu: Conceyu Nacional de Liriu.

¡¡Felicidaes!! 😀

Fonte: Meyor Blogue 2010.

Pues sí… en Tapaponga yá llevamos 3 añinos dando la tabarra del software llibre dende Ponga a Colunga y munchos más sitios 🙂

Nesti caberu añu por fin asoleyóse’l día d’Asturies Firefox n’asturianu, ensin dulda’l rei del software llibre. Incluso ya tenemos la so versión portable… y esfrutamos colos sos güevos pintos 🙂 Y vimos una de les batalles más importantes polos formatos llibres na web…

Tamién vimos nacer LibreOffice, tal ave fénix qu’escapa de les garres de la pérfida Oracle… que tovía caltién llibre a OpenOffice, que nesti añu, al igual que Firefox, ñació n’asturianu 🙂

L’asturianu algamó’l puestu 12 ente les llingües más tornaes d’Ubuntu na cabera versión 10.10. Multiplicándose por 7 el so usu n’asturianu 🙂

Flipamos col poder del software llibre nel campu de l’animación gracies al cortu Sintel y prestónos ver a Ubuntín nes series más prestoses como The IT Crowd y The Big Bang Theory.

Vimos al ablucante Meego n’aición…

L’Academia de la Llingua Asturiana migró a Ubuntu…

Nes xornaes de SUATEA enseñóse‘l potencial d’Edubuntu na educación…

Algamamos más de 555 artículos, de 666 y vamos camín de los 777… y tamos apuntu de llegar a los 1.000 comentarios 😛

Vimos proyeutos tan prestosos ya importantes como Eslema y TermAst.

Gracies a Softastur, vimos ñacer Ubuntu-ast, la comunidá pal espardimientu d’Ubuntu nel territoriu d’Asturies.

Esfrutamos y conocimos a munchos de vosotros nos talleres d’instalación de la Selmana Negra, Ribeseya y de la Universidá d’Uviéu colos collacios d’EII, AsturLINux y Ubuntu-ast…

Charramos na cervecería sobre software llibre y nel meyor blogue n’asturianu del 2009 supimos les posibilidaes d’escoyeta de plataforma pal nuestru blogue…

Pusímosvos decenes de tutoriales y trucos pa que saquéis el máximu rendimientu al nuestru sistema operativu favoritu…

Tuvimos 19.000 visites nesti añu,

el 63% de los visitantes ficiéronlo usando’l restolador llibre Firefox 😀

y la mayoría tovía usa Windows (47,4%) siguío mui de cerca por Linux (46,3%) 😉 pal próximu añu espero que ya seyamos mayoría 🙂

A ti, queríu/da llector/a: ¡01000111 01110010 01100001 01100011 01101001 01100101 01110011!

Hai coses que presten y munches veces son les más cencielles. Güei fízome sonrir la portada de la revista “Todo Linux”.

Ya ta la versión Firefox 4 final. + información equí.

La primer beta de Firefox 4 yá ta disponible en llingua asturiana. Descarga la to versión (Linux, Windows…) dende’l sitiu web de Firefox 4, y pruébala. ( Collabora reportando los fallos qu’alcuentres a Softastur, dende equí )

Por fin yá ta equí Libreoffice n’asturianu.

The Document Foundation acaba de llanzar la versión final d’esta suite ofimática que va sustituyir a Openoffice n’Ubuntu a partir d’abril. Nun pasa nada si nun uses Ubuntu, tamién ta disponible pal restu de les plataformes. 😀

Dende Tapaponga yá veníemos avisando de toos estos movimientos, y fai tiempu que se punxeron los enllaces a los paquetes beta pa testéu. Gracies al equipu de Softastur, (n’especial a Xuacu) por conseguir la inclusión de la nuesa llingua dende’l principiu. (Asegúrovos que nun foi nada cenciello)

La páxina de descargues ta disponible equí.

Los usuarios impacientes d’Ubuntu 10.10 pueden probar la versión final del siguiente mou:

sudo add-apt-repository ppa:libreoffice/ppa

sudo apt-get update && sudo apt-get install libreoffice

sudo apt-get install libreoffice-gnome (pa usuarios de gnome)
sudo apt-get install libreoffice-kde (pa usuarios de kde)

Como nun podía ser d’otra forma, Libreoffice yá cuenta con ventaxes sobre Openoffice.

Pa los que nun s’atrevan, namás hai qu’esperar 3 meses, hasta que salga Ubuntu 11.04 😉

Collabora con Softastur. Ponte en contautu

¡Queda mui mui poco pa la nueva revolución! Too entamará equí…
¿!? 😉

Imaxe

Casi na 😀 ¿Y tú? ¿Tovía nun yes llibre? 🙂

Vía: Ubuntu-ast (Calca pa velo en grande).

Menuda la que s’armó estos díes nes redes sociales col tema de la #Operación_Linux. Pa quien nun lo sepa, resulta que la policía trincó a dos presuntos collaboradores d’una organización armada, y a la operación llamáronla #Operación_Linux (supuestamente ye Linux y non Linus, como apunten otres fontes).

Bono, el casu ye qu’armóse la de coyer, porque a los usuarios de Linux nun-yos fizo plizca gracia, y que si “agora van identificar Linux con terrorismu“, que si “mio ma va pensar que soi un antisistema” que si “ye lo que nos faltaba pa desprestixar al software llibre“, y cantidá de chorraes más.

Ye cierto que Linux entá nun tien muncha aceutación ente la xente (Porque nun lu conocen: y la inorancia munches vegaes, lloñe de ser atrevida ye estúpida), y que cuesta muncho facer que la xente atalante’l conceutu del Software llibre, pero yo nun creo que seya pa tanto…

… y val que podríen escoyer otru nome meyor, pero ye que si a la operación la denomasen  #Operación_Windows , igual aínda taben tapando furacos pa echalo a andar…..

humor geek

Una de les coses que más me prestaron siempre de Firefox ye la so versión portable, esa versión portable úsase por exemplu na Mochila Dixital d’Educastur.

Les ventaxes de la versión portable son munches:

• USB: Puedes llevar Firefox nun llápiz USB calteniendo les tos preferencies (contraseñes, marcadores, botones…).
• Ensin privilexos: Puedes executalu nun ordenador onde nun tienes permisos pa instalar programes (por exemplu nel trabayu, nel colexu…).
• Nun camuda nada nel sistema: Si tas col ordenador de tos padres, trabayu, colexu… y nun quies/puedes instalar un programa por si s’estropea dalgo o inclusu que ya tea otru Firefox n’otra llingua, podrás usar la versión portable.
• Nun dexa claves o perfil: Nun guarda datos de navegación, contraseñes, cookies… nel ordenador, sólo na carpeta onde ta descomprimíu 😀

Esta versión pa Windows que t’ufrimos nun ye oficial, garramos la versión portable y usamos la torna de la versión oficial. Ficímosla porque pa dalgunes persones y/o en dalgunes situaciones, la versión portable ye perútil o inclusu necesaria 😀

Pa usala ye bien fácil: baxa esti ficheru ZIP, descomprímilu onde quieras (Nun USB, escritoriu, raíz…), accedes a la carpeta FirefoxPortable y executes en Windows el ficheru FirefoxPortable.exe cuando y onde quieras 😉

Resume de too esto:

• Formatu: Portable
• Versión: 3.6.13
• Llingua: Asturianu
• Sistema operativu: Windows

PD: Ye importante que nun anoves la versión de Firefox, en casu de facelo, perderás que tea n’asturianu.

PD2: Ye la primer versión portable qu’espublizamos, si dalgo va mal, por favor, avísanos nos comentarios. ¡Gracies! En casu de dir too como debería tamién nos prestaría que nos avises 🙂 Aunque qué coño… meyor unes botellines xD

Una de les coses que más me presta d’Ubuntu, ye l’accesibilidá dende los menús. Y ente estos, el menú indicador “Me” ye’l que más me presta.

Trátase del sobre verde de la imaxe. Ye un indicador de daqué que t’avisa que lu atiendas. Por exemplu, avisos nel Twitter, en Facebook, novedaes nel corréu-e, etc.

D’esta miente (y de mou discretu) tas puntualmente avisáu de les caberes noticies qu’asocedan, o de los mensaxes dirixíos a ti. Tien integración col veceru de chat que más te preste (na semeya pue vese que por exemplu va mui bien con Pidgin, o colos llectores RSS), y tienes accesu direutu a los contautos, al corréu, o la bandexa d’entrada.

Ye cenciellu d’usar, y práuticu. Arriendes, como dixi, ye discretu y nun ye “invasivu”.

Si nun lu tienes instaláu por defeutu (en dalgunes versiones hai qu’instalalu), namás tienes que calcar col botón drechu del mur nel panel superior del escritoriu, y escoyer “Amestar al panel” y dempués “Aplicación Indicador“. Pa finar, calques en “Zarrar“.

Esto, xunto colos “globos” d’avisos del Twitter, l’indicador de soníu, o l’indicador de mensaxes entrantes na bandexa del corréu, y demás notificaciones del sistema (como por exemplu la conexón wifi, o la duración de la batería), ye lo que ta faciendo qu’Ubuntu seya cada vegada más atractivu al usuariu. 😉