Nun hai muncho que dicir tocante a Youtube, tol mundu tien visitao el sitiu web de videos más afamáu de la rede.  La “pega” de Youtube, ye que’l sitiu tien más publicidá que la camiseta d’un pilotu de rallies. Si quies evitate toa esta publicidá, puedes facelo, usando Totem.

Nel panel allugáu a mandrecha, estenderexa la llista d’arriba, y esbilla “Youtube“. Agora, namás tienes qu’escribir na caxa de gueta, el términu que quies alcontrar. Bien cenciello, eh? 😉

Déxovos con una captura del trailer de Harry Potter con subt. n’asturianu.

Como cuenten nesti filu de los foros d’Ubuntu, va dellos díes qu’apaeció en Gnome Look un supuestu curiapantalles pal escritoriu Gnome. El programa apaecía como un paquete .deb, que ye’l que usa l’instalador en sistemes Debian y deriváos (como Ubuntu), pa instalar nel sistema con permisu de superusuariu… y darréu instalábense dellos scripts que nun teníen que ver con un curiapantalles.

Hai que lo dicir milenta vegáes: el software que vien nos repositorios oficiales d’Ubuntu da pa facer el 99% de les coses que-y pueden pruyir a cualquier usuariu. Enantes d’instalar un paquete .deb qu’atopes per ayuri hai que tar bien seguru de que:

• De verdá lo necesites
• Nun esiste nos repositorios oficiales
• El sitiu onde lu descargues ye de fiar
• El paquete mesmu ye de fiar (esto ye, cuánta xente lu tien instaláu; que problemes dió…)
• Si pide permisos de superusuariu, doblar los cuidaos
• Cuando lu tengas instaláu, comprueba si pasen “coses rares” nel funcionamientu normal del ordenador.

Nesti casu, sicasí, l’efeutu nun fué seriu: el paquete yá se quitó del sitiu y desaniciar los scripts ye cosa de siguir les instrucciones del filu de los foros. Pero ye un avisu de que tenemos de tar sollertes coles coses que metemos nel ordenador y siguir los conseyos de seguridá básicos.

La comunidá del software llibre tién el vezu antiguu de pone-y nomes recursivos al software desendolcáu. Asina, GNU quier dicir GNU not Unix; pero hai munchos más exemplos d’esta triba de nomes humorísticos, como PHP, LAME o Wine.

Nel casu del llibru The Art of Community, de Jono Bacon, la recursividá va un pasu más lloñe.

Jono Bacon

L’autor, que ye l’encargáu de la Comunidá d’Ubuntu, esbilla nel llibru les claves pa construyir una bona comunidá, el distintu tratamientu que se-yos tién que dar a les distintes tribes de comunidáes, les claves pa facer una comunidá fuerte, les ferramientes afayadices pa que la información circule… o les maneres d’enfrentase a los problemes cuando estos apaecen.

Otru puntu perinteresante ye la manera d’evitar el queme de les persones cabezaleres d’una comunidá: deteutar les primeres señales y cómo actuar cuando apaecen.

Sicasí, lo más interesante del llibru ye que quier ser recursivu: ta escritu por una persona encargada d’una comunidá y estudia les comunidáes… pero ta fechu col envís de que la comunidá siga realimentando el llibru que, como diz el mesmu Jono, nun ye una obra finada. Pa ello The Art of Community véndese como un llibru cualquiera (en Amazon, por exemplu, de verdá paga la pena tener una copia pa consulta), pero O’Reilly tuvo d’acuerdu en qu’el llibru tuviera una llicencia Creative Commons que permite descargalu de baldre y contribuyir a meyoralu, por exemplu na web de la comunidá del llibru.

Pola parte mala, de momentu ta namái que n’Inglés. Pero cualquiera sabe, tornar 300 y pico páxines ye un momentín si se fai en comunidá 😉 Y ye una erbía igual d’afayadiza pa construyir una comunidá de sofitu a un sistema operativu como pa lliberar de pilancos una comunidá de sofitu a una llingua.

Güei apaez Ubuntu 9.10 que tien el nome de Karmic Koala y con ella lleguen toles meyores nes que la comunidá tuvo trabayando nestos últimos meses y ente eses meyores tán les traducciones feches pol coleutivu Softastur.

Tornar aplicaciones informátiques nun ye fácil, per un llau encariamos un contestu al que la llingua asturiana nun tuvo accesu hasta va poco y hai que probar soluciones terminolóxiques qu’enanchen los significaos de les pallabres emplegaes y, per otru, les traducciones faensen na mayor parte de los casos ensin conocer bien el contestu nel que se van aplicar.

Si a estes dos dificultaes sumamos que nós equivocámonos como persones que somos (namás ruempen platos los que los frieguen) atopamos que delles veces hai errores nes tornes o ensin haber errores, hai meyores soluciones. Lo que güei vos propongo a los qu’usáis Ubuntu y los demás programes que tornamos pero nun tais en Softastur nos echéis un gabitu p’atopar esos errores y camudalos pa siguir meyorando la calidá de la traducción.

Pa eso abrimos un foru específicu al que pues acceder dende equí. Eso sí, pa que la información seya útil contestualízala lo másimo posible: la fras que ta mal, el llugar onde apaez (programa, menú, opción, llingüeta, etc.) y la to propuesta y nós interamos arreglala lo primero posible. En casu de que nun fueres a criar un cuenta pa unvianos la información, faelo pola páxina de contautu.

Por si los koalas y la llingua nun basten pa qu’Ubuntu 9.10 seya un Asturalia-Linux, la versión de sirvidor que ta a piques de salir va venir con Eucalyptus.

Eucalyptus

Ello ye un desarrollu abiertu de la computación na ñube, pero que al ser modular podrá nel futuru adautase a otres arquitectures (Google, Microsoft…)

Polo que cuenten nesta páxina, instalar una ñube propia ye más fácil de lo que podría pensase. Pa una organización o empresa que necesite “tar nes ñubes” ye una alternativa afayadiza a los servicios de pagu.

Y yá que tamos, qué prestoso diba ser si de la universidá d’Asturalia salieren proyeutos como esti, fechu na Universidá de California de Santa Bárbara

Pues eso

El xueves 24 ficimos una pequeña charra d’anización a Ubuntu y el mundu del Software Llibre, aclarando conceptos básicos.

Marcando territoriu…

Gracies a Xandru, dirixendo dende abaxu, conocimos la diferencia ente derechu y torcíu…

Cuando quedo claru’l conceutu de derecho… entamamos a trabayar…

La marcha y xorrecimientu de programes en llingua Asturiana ye imparable, y si yá toos conocíemos el conocidísimu Brasero de GNOME, agora facemos anuncia de K3B: la interface gráfica pa grabación de CD’s y DVD’s, más afamada del mundu llibre y perteneciente a KDE

La xente de Softastur, (sí… esa xente que fai que puedas tener el to ordenador en llingua asturiana) nun dexa de sosprendenos, y acaben d’asoleyar la interfaz na nuesa llingua. Ésti ye un apueste más pola variedá: Si fai tiempu Softastur facía anuncia del asoleyamientu d’Ubuntu con tola suite de programes oficial del escritoriu GNOME, nun fai munchu repitieron llanzado Edubuntu, la versión educativa, y agora tán en plenu procesu d’espansión y tienen les mires puestes en Xubuntu (col escritoriu de Xfce) y Kubuntu, (col escritoriu de KDE). K3B ye ún d’esos programes que faen importante a KDE, y ye por eso que yá lu tenemos disponible.

Yá tienes una montonera de programes pa escoyer … y tú con Window$ en castellanu…

Ésto ye lo que t’ufre K3B:

Dalgunes de les carauterístiques de K3B inclúin:
* Grabáu de CD/DVD de datos
* Grabáu d’Audio CDs
* Sofitu de CD Text
* Sofitu pa DVD-R/DVD+R/DVD-RW/DVD+RW
* Sofitu pa CD-R/CD-RW
* Mixed Mode CD (Audio y Data nún discu)
* Multisesión CD
* Video CD/Video DVD authoring
* eMovix CD/eMovix DVD
* Copia Discu a Discu y  DVD
* Borráu de CD-RW/DVD-RW/DVD+RW
* Sofitu de Imaxe’ISO
* Ripéu d’Audio CDs, Video CDs, Video DVDs
K3B tamién puede grabar CD de datos que soporten SO basaos en Linux/Unix, Windows, DOS, un gran númberu de ficheros (UDF), Linux/Unix + Windows, Rock Ridge, Joliet.

K3B foi galardonada como la meyor aplicación multimedia por LinuxQuestions.org nel añu 2006 pol 70% de los participantes

Entá necesites más razones? Pásate a Ubuntu

P.D. Gracies fonderes a Xandru M. poles traducciones 😉

Güei preséntovos pdftk, una ferramienta pa remanar documentos en formatu pdf. Como dicen na so web: ‘Si PDF ye’l papel electrónicu, entós pdftk ye’l quitagrapes electrónicu, la perforadora, la encuadernadora, el descodificador secretu y les gafes de rayos X’. Pues emplegalu pa (combinar documentos PDF, dixebrar les páxines d’un PDF nun documentu nuevu, descifrar un documentu, cifrar el documentu resultante como te pete, desfacer un documentu PDF en páxines sueltes, informar de les carauterístiques del PDF, descomprimir y volver a comprimir páxines, reparar un PDF corruptu.

Podéis instalalu dende Synaptic o na terminal con:

sudo apt-get install pdftk

El funcionamientu ye pentemedies de llinia de comandos, tenéis exemplos na so web o podéis ver les instrucciones tecleando na terminal:

man pdftk

(Pa salir de les instrucciones calca ‘q’)

Un exemplu útil, si tienes dos documentos que se llamen 1.pdf y 2.pdf, abre la terminal y vete a la carpeta onde tienes los ficheros, una vez ellí escribi na terminal.

pdftk 1.pdf 2.pdf cat output total.pdf

Esta orde va crear un documentu llamáu total.pdf nel mesmu directoriu que tán 1.pdf y 2.pdf y que contién dambos nesi orde.

Tien munches más opciones como poner marques d’agua a los documentos, etc. Namás tenéis qu’esploralu un poco.

Salú y software llibre.