Güei toca falar de Banshee.

Banshee, ye un reproductor de soníu y vídeu que vas poder instalar nel to Ubuntu ensin dengún problema. Tamién ta disponible pa Mac OS. Almite toa triba d’estensiones d’audio y puedes reproducir tamién videos *.avi. Pue reproducir ya importar CD’s d’audio, y ye quien a unviar les canciones que se reproducen pa compartir gustos musicales en Last.fm, ansí como la posibilidá d’escuchar la radio d’esti serviciu, y otres emisores, como les que s’ufren dende SHOUTCAST.

Lo primero ye instalalu 😀 , como siempre, dende Aplicaciones–>Centru de Software d’Ubuntu. Fecho eso, abrimos el programa, y calcamos en Multimedia–>Abrir conteníu multimedia. Dicímos-y au tenemos les nueses canciones y/o videos, et voilà, esti ye l’aspeutu qu’amuesa banshee:

El programa amuésanos los grupos de música nuna ventana coles carátules de los discos. D’esti mou, si queremos escuchar un discu en concretu, fáisenos abondo gráfico ya intuitivo la escoyeta. Na semeya, podéis ver que tengo activada la estensión o plugin pa last.fm que va suxiriéndome otros artistes, y los álbumes destacaos del grupu que tamos reproduciendo.

Tamién s’integra na bandexa del sistema:

Podemos ver los nuesos vídeos, y el plugin de Youtube, va faciéndonos otres suxerencies, que podemos reproducir en Banshee o nel Restolador Web qu’usemos

Tamién podemos usar el plugin de Wikipedia, el de les lletres de les canciones, y munchos más…

Tarás entrugándote: ¿Cómo amestar los plugins? Pues eso hai que facelo dende Synaptic. Abrís synaptic, ya instaláis esti complementu: banshee-community-extensions

…y dempués, nes preferencies de Banshee, na tercer llingüeta, alcontráisles:

…nun les probé toes, pero la estensión LiveRadio, inclúi toles emisores qu’ufre SHOUTCAST. O seya: Música ininterrumpío tol día!!!!! 😉

Recomiéndovos que lu probéis. Banshee ye llixeru y nun va dexavos indiferentes. Por dalgo Banshee ye’l reproductor qu’usa MeeGo 😉

Ah! escaecíaseme…..  ta tornáu al asturianu dende la versión 1.5. Ubuntu ufre dende los sos repositorios la versión 1.6.1, asina que nun hai problemes. Pero los complementos que fai la comunidá, tán toos n’inglés, asina que podéis echar un gabitu a ello cuando queráis.

Qu’Ubuntu entra pelos güeyos, ye un fechu cada vegada más palpable versión tres versión. Parte de la culpa, tienla la Comunidá. Munchos de los mock-up que véis perehí, son namás qu’eso: mock-up , “prototipos” o propuestes, en munchos de los casos non reales, que namás son frutu de la imaxinación de diseñadores, qu’amuesen una nueva versión o un nuevu puntu de vista de cómo tendría de ser ésto o aquello, y que busquen ver la reaición de la xente.

Pero esos mockups, son l’orixe de nueves tendencies. Ubuntu ye revolucionariu nesto. Ye dinámicu dafechu. Almite toa triba de propuestes de la Comunidá. Sométense a votación, y munches d’elles, pasen de propuestes a realidá.

Invítovos a que vos déis un voltiu pel Ubuntu Artwork. Ehí podréis ver coses como por exemplu cómo se refinó’l tema Ambiance

La “propuesta” pal Nuevu Ubuntu Software Center de Maverick..

…o nuevos temes GTK, ver equí.

Como vos dixi, pasáivos pel Ubuntu Artwork, pero nun vos creáis tolo que veáis 😉

Shotwell, ye’l xestor de semeyes que va sustituyir a F-Spot en Ubuntu 10.10. L’aplicación desendólcala Yorba y distribúise baxo llicencia LGPLv2.1, y yá ta disponible pa descarga. Por supuestu, tamién ta disponible n’asturianu.

Pa instalalu, abrimos una terminal y escribimos:

sudo add-apt-repository ppa:yorba/ppa

y dempués:

sudo apt-get update && sudo apt-get install shotwell

Carauterístiques:

• Podemos editar les semeyes ensin perder los cambeos na imaxe orixinal
• Axeitar les semeyes por tags (etiquetes) y eventos
• Meyora de les imáxenes…

• Posibilidá d’espublizar les semeyes direutamente en Flickr, Facebook, Picassa… etc. Esto ye mui útil, por exemplu, pa los editores d’esti blogue 😉

• Retoque de güeyos bermeyos…

…asina como usar un editor de semeyes esternu como GIMP, meyora de la lluminosidá de la imaxe dende’l propiu Shotwell, categorizar por eventos, información sobro la semeya (esposición, llonxitú focal, data, hora, ), presentación de diapositives, etc.

En Fedora 13, que como sabéis, tamién esiste en llingua asturiana, yá inclúin esti xestor de semeyes por defeutu. Pel momentu va teniendo pequeñes meyores cada selmana, pero los cambeos son mínimos. La integración con Gnome ye total, y el proyeutu ta xestionando los caberos retoques pal so llanzamientu en Ubuntu Maverick. Entá hai coses por meyorar, dalguna traducción, por exemplu (darréu que tán en continu cambéu), asina que si vos animáis, podéis ser de muncha aida 😀

Por supuestu, el reconocimientu de los preseos dixitales que coneutemos al nuesu PC ye dafechu automáticu, (eso ye gracies a Ubuntu), y con Shotwell nun diba ser menos.

…a esfrutar 😀

Va un tiempu qu’Ubuntu (y otres distribuciones de Linux) vienen faciendo un esfuerzu p’averar el sistema operativu a les persones con discapacidaes. El nuesu sistema operativu cuenta con delles aplicaciones d’asistencia como Orca (testu a voz; nun ta disponible n’asturianu), aides a la escritura (tecles lentes, configuración especial del mur o Dasher) o delles posibilidaes d’aumentu del escritoriu.

Sicasí, esto nun ye bastante. Esiste un equipu, l’Ubuntu Accesibility Team que ta dedicáu a diseñar la meyor manera en que los usuarios discapacitaos pueden usar Ubuntu. Y p’algamar el so oxetivu, piden la collaboración pa crear lo que llamen (nel mundu del diseñu) «Personas», esto ye delles persones imaxinaries col mayor grau de detalle y que representen a la mayor cantidá posible de persones reales.

Si yes una persona con discapacidá y quies collaborar, l’Ubuntu Accesibility Team ta faciendo una encuesta (anónima si se quier) na páxina http://access.libertus.co.uk/ tocante a les necesidaes especiales pal usu d’ordenadores.

La encuesta ta n’inglés; si tienes problemes cola llingua, en Softastur podemos encarganos de tornala a l’asturianu o al castellanu y llueu unviala al Equipu d’Accesibilidá.

Munches gracies por adelantáu 🙂

-¡Pero cómo!  ¿Diseñáis ensin usar Mac? Oh my God!  ¡Qué facéis!  Sacrilexu!

Pues sí. Esto mesmo ye lo que proponen facer (y tán faciendo) la xente de Durian Open Movie Project. Y fáenlo con bon xeitu, como podéis ver más abaxo, usando ferramientes como Blender y GIMP.

-“¡Vaaaalgame lo que hace el payo ranger!”

Yá taba yo fartucu d’escuchar la disculpa “namber guán” de tou Maqueru: “Ye que pa diseñar, nun hai res meyor qu’un Mac“. Pues será que namás tamos falando de diseñu camisetes, y el Mac debe tomate la talla, escoyer el color ya imprentales él solucu, porque yo con Gimp, “diseño” de puta madre. Dicho seya de pasu que tolos diseñadores que conozo qu’usen Mac, úsenlo pa eso: pa dibuxinos nes camisetes, carteles d’espicha y dalgún logotipu de páxina web. Hai dalgún que fai hasta montaxes de bodes.  Nun fai falta un Mac nin tantu circu. (Habrá dalgún que trabaye en ḥolibud, pero entá nun conozo dengún)

Más bien paezme que na escuela, deprendieron a usar unes ferramientes (non llibres, por ciertu. Menudos artistes.. yá escaecieron aquello de la llibertá), y agora pása-yos como al que deprendió a pescar con marabayu pero nun sabe con guxarapa. Va ser que, Mac queda cool, como les obres artístiques que naide entiende. Si nun les entiendes, nun yes “cool”. Y pa ser cool y artista al empar, hai que tener un Mac. Polo menos los windowseros, pasen d’estes coses. Nun tienen tiempu a elles, lo d’ellos ye pasar el santu día matando y matando virus.

Bono, pues too esto de l’animación nun ye nuevo. Yá fai tiempu que sabemos d’una retafila de pelis d’animación feches con ferramientes de Software llibre, como por exemplu Avatar, la más reciente. Agora, la xente de Durian amuésanos el so trabayu, y ye cosa que podemos ver cásique a la selmana, porque van anovando la so páxina web. Equí vos dexo un trailer de la peli, tenéisla disponible en calidá 1080p HD:

Equí unos minutos del procesu:

La páxina del proyeutu, equí:

http://durian.blender.org/

Más vídeos fechos con Blender, equí: http://www.blender.org/features-gallery/movies/

Esti ye un script que va aidate a instalar y/o personalizar dalgunes coses en Lucid Lynx. Una de les más solicitaes, ye’l cambéu de los botones de les ventanes a mandrecha (yo úsolos a manzorga…. pero tú mesmu).

Empecipiamos abriendo una terminal y allugámonos na carpeta Descargues:

cd Descargues

Agora descargamos el programa:

wget http://launchpad.net/ubuntustart/0.4.x/0.4.9/+download/ubuntu-10.04-start-0.4.9.8.tar.gz

Descomprimimos el ficheru:

tar -xvf ubuntu-10.04-start-0.4.9.8.tar.gz

Vamos a la carpeta onde lu descomprimimos:

cd ubuntu-10.04-start/

Y executamos el script:

sudo ./ubuntu-10.04-script

Abrirásenos la primer ventana que nos permite escoyer la llingua:

El primer pasu ye el de Personalización. Botones, habilitar/deshabilitar iconos, soníu del GDM etc… (Alcordáivos de da-y a la opción “Amestar repositorios adicionales“, esto va facevos falta nel pasu 2.)

Dempués de calcar n’Aceutar, el script executará los cambeos, y pasamos al Pasu 2: Instalar y desinstalar programes

Qu’esfrutéis, ubunteros. 😉

A los centros educativos asturianos tán llegando pizarres dixitales d’estremaes marques. Darréu qu’esti mercáu ye mui nuevu, los fabricantes tenten vender ya inclusive regalar el so software rápidamente pa convertilu nun estándar de facto y dempués zarrar al másimu les condiciones d’usu del so programa (a lo llargo de la curtia historia de la informática tenemos abondos exemplos d’esto).
Por exemplu, les condiciones d’usu del software de Promethean (ActivInspire) camudaron recientemente pa que los materiales ellaboraos por marques pa la so pizarra nun puedan ser esportaos y emplegaos n’otra, o lo que ye lo mesmo que les clases preparaes pa esta pizarra nun se pueden emplegar na Smart Board o Interwrite y pueden facelo yá que les condiciones d’una llicencia de software puen cambiar cuando’l so dueñu quiera.
Anque prefiriríamos emplegar software llibre esclusivamente (garantizaríamos l’accesu futuru a les clases que podemos preparar) nesti momentu nun atopé nengún proyeutu abondo desendolcáu, asina que vamos enseñavos cómo poner esti software nos ordenadores pa poder usar les pizarres n’Ubuntu y n’asturianu.

Promethean
Entamamos pola pizarra de la marca Promethean que ye una de les que tán de moda y la más fácil d’instalar yá que tienen un repositoriu propiu pa Ubuntu. De momentu namás tienen versiones preparaes pa Ubuntu 9.04 y 9.10, suponemos que nun tardando muncho tendrán pa Ubuntu 10.04 y podremos velo nel Promethean Planet (tenéis que rexistravos).

N’Ubuntu 9.10 Karmic Koala namás tenemos qu’arrancar el Xestor de paquetes de Synaptic nel menú Sistema – Alministración.

Calcáis n’Axustes – Repositorios y escoyéis la llingüeta Otru software. Escoyéis la opción Amestar na parte d’abaxo a la izquierda y escribís esto:

deb http://activsoftware.co.uk/linux/repos/ubuntu karmic oss non-oss

Agora namás vos queda zarrar esa ventana y calcar nel botón Recargar del Xestor de paquetes de Synaptic. Va apaecer una alvertencia de claves que tenemos qu’aceutar (esto pasa porque falten robles dixitales pero nun tien mayor importancia).

Yá tamos terminando. Agora seleicionamos pa instalar los paquetes activaid, activdriver, activinspire, activhwr-es, activinspire-help-es, activ-meta-es, activresources-core-es y activtools.

Si vos atrevéis cola terminal podéis usar esti comandu:

sudo apt-get install activaid activdriver activinspire activhwr-es activinspire-help-es activ-meta-es activresources-core-es activtools

Ubuntu Open Week

Durante toa esta selmana van tener llugar una serie de charres en llinia tocante a dellos aspeutos d’Ubuntu (desendolcu, Ubuntu One, trabayu colos upstream, bugs,…)

Les charres van tener llugar nes canales #ubuntu-classroom y #ubuntu-classroom-chat de irc.freenode.net; sicasí, pa los que tengan instaláu Ubuntu, encamiento usar el programa Lernid, que permite ver al conferenciante nun cuadru y la charra de la clase n’otru:
sudo apt-get install lernid

Pa saber más, na wiki d’Ubuntu

Per otru lláu, tamién va haber (con otru horariu y programa) una Ubuntu Open Week en castellanu pa quienes nun s’afayen col inglés. Equí ta la información d’ello.

N’Ubuntu yá disponíemos d’un programa pa escanear denomáu Xsane. A mí prestábame abondo (y sigui prestándome), porque tenía abondos axustes pa configurar, y daba munches opciones pa facer l’escanéu al to gustu. Pero la xente d’Ubuntu decidió que na distribución oficial de Lucid, van ufrir una ferramienta d’escanéu bien cenciella, ensin complicaciones. Y llográronlo: equí tenéis Simple-scan

Na mayor parte de los blogues dedicaos a Ubuntu, yá salió esta noticia, pero la semeya taba siempre n’inglés. El grupu de traducción d’Ubuntu n’asturianu, fizo la so traducción, pero les tornes nun s’implementaron fasta fai una selmana. Ye por eso, que yá podemos enseñávoslu 😀  (que nun se diga)

La instalación de Simple-scan ye percenciella, y yá podéis probala en Launchpad.( NOTA: esto ye pa karmic; en Lucid vendrá instaláu por defeutu 😉 )

Primero, amestamos el repositoriu. Pa ello, vamos a Sistema–>Alministración—>Oríxenes del Software, y vamos a la segunda llingüeta (Otru Software). Calcamos nel botón “Amestar”, y na pantalla que s’abre, ponemos lo siguiente:

deb http://ppa.launchpad.net/robert-ancell/simple-scan/ubuntu karmic main

Zarramos y llisto. Yá tenemos el repositoriu amestáu, y llistu pa descargar el programa. (Si vos pidi la clave pública, podési sacala de equí )

Agora, vamos a Synaptic, y alcontraremos el paquete simple-scan, preparáu pa instalar. (Tamién podéis abrir la terminal y escribir:  sudo apt-get install simple-scan )

NOTA: Esto ye namás pa instalar el programa que xestiona l’escaner. Faltaríavos instalar l’escaner. Como hai munchos modelos, cada instalación ye distinta. Pero podéis entrugar nos comentarios si ye que vos da guerra instalar l’escaner.)

Saludos.

Entós ¿dices que toques un instrumentu? ¿Quies facer la to propia música (¡pero con llicencia llibre, ho!)?

Nun dexes de facelo par falta d’acompañamientu. Güei quiero presentate Hydrogen, una gayaspera caxa de ritmos.

Caxa de ritmos Hydrogen

Equí puedes ver un pantallazu del programa, que ye percenciellu d’usar aunque (como yo) nun tengas muncha idega de lo que tas faciendo.

Pa instalalu, baxa de los repositorios hydrogen ya hydrogen-drumkits (los samples de soníu) y… ¡chumba, chumba, chumba…! 🙂