Güei apaez Ubuntu 9.10 que tien el nome de Karmic Koala y con ella lleguen toles meyores nes que la comunidá tuvo trabayando nestos últimos meses y ente eses meyores tán les traducciones feches pol coleutivu Softastur.

Tornar aplicaciones informátiques nun ye fácil, per un llau encariamos un contestu al que la llingua asturiana nun tuvo accesu hasta va poco y hai que probar soluciones terminolóxiques qu’enanchen los significaos de les pallabres emplegaes y, per otru, les traducciones faensen na mayor parte de los casos ensin conocer bien el contestu nel que se van aplicar.

Si a estes dos dificultaes sumamos que nós equivocámonos como persones que somos (namás ruempen platos los que los frieguen) atopamos que delles veces hai errores nes tornes o ensin haber errores, hai meyores soluciones. Lo que güei vos propongo a los qu’usáis Ubuntu y los demás programes que tornamos pero nun tais en Softastur nos echéis un gabitu p’atopar esos errores y camudalos pa siguir meyorando la calidá de la traducción.

Pa eso abrimos un foru específicu al que pues acceder dende equí. Eso sí, pa que la información seya útil contestualízala lo másimo posible: la fras que ta mal, el llugar onde apaez (programa, menú, opción, llingüeta, etc.) y la to propuesta y nós interamos arreglala lo primero posible. En casu de que nun fueres a criar un cuenta pa unvianos la información, faelo pola páxina de contautu.

Por si los koalas y la llingua nun basten pa qu’Ubuntu 9.10 seya un Asturalia-Linux, la versión de sirvidor que ta a piques de salir va venir con Eucalyptus.

Eucalyptus

Ello ye un desarrollu abiertu de la computación na ñube, pero que al ser modular podrá nel futuru adautase a otres arquitectures (Google, Microsoft…)

Polo que cuenten nesta páxina, instalar una ñube propia ye más fácil de lo que podría pensase. Pa una organización o empresa que necesite “tar nes ñubes” ye una alternativa afayadiza a los servicios de pagu.

Y yá que tamos, qué prestoso diba ser si de la universidá d’Asturalia salieren proyeutos como esti, fechu na Universidá de California de Santa Bárbara

La ufierta de programes n’asturianu va siendo cada vegada más grande. Si fai unos años yeren pocos los programes que podíen usase en Llingua Asturiana, anguaño hai una bayura d’ellos, y cada vegada más versátiles ya interesantes. De la mano de Softastur, aporta a nós el llector de conteníos AKREGATOR.

Akregator, ye un amestador/llector de conteníos. Básicamente, lo que fai ye avisate de los nuevos cambeos que xurdan nes páxines que-y indiques. Quier dicise que si yes una persona que te presta lleer blogs, por exemplu, podrás saber nel intre, los cambeos que se faigan nesos blogs, ensin tener que tar visitándolos de contino pa ver los cambeos. Tien una carauterística de gueta incremental, y los feeds o conteníos, pueden agrupase por categoríes. Ye compatible col formatu RSS y Atom

..y sobro tou, gracies a Xandru pol so trabayu de torna. Ensin ello, nun podríemos esfrutar d’esta aplicación n’asturianu. 😉

No, nun ye de verdá. Pero el día menos pensáu podemos alcontranos diciendo eso…

Pa estos casos, lléganos dende Chile el programa Prey, que funciona como un serviciu nel entamu, anubríu de los usuarios. Lo que fai ye restolar na rede la esistencia de una páxina que’l dueñu del portátil cria en casu que-y desapaeza l’ordenador. Si la páxina esiste unvía un corréu que contién los datos de la conexón que ta usándose, la llista de programes n’execución, una semeya del escritoriu y, si l’ordenador tién activada la webcam, una semeya de la persona que ta… hmmm… tentando devolver l’ordenador. Si el dueñu nun conseña una páxina web na instalación, Prey executaráse cada ciertu tiempu.

Hai versiones pa Linux, Windows y Mac y ta embaxo la llicencia GPLv3+cerveza (o sea, si alcuentres l’ordenador, invites a una cerveza. Nun se si valdríen unos culinos de sidra)

Perguapu el post anterior sobro animación. Equí vos pongo otru, ésti fechu en Venezuela por trés persones.

Los programes emplegaos pa ésti foron:

• La distribución Ubuntu Studio de Linux, basada en Ubuntu pero meyorada haza’l área multimedia.
• El software d’animación tridimensional Blender, una espectacular suite.
• Gimp, aplicación pa retoque fotográficu y de testures, equivalente a Photoshop
• Inkscape, aplicación de diseñu vectorial, equivalente a Corel Draw o Illustrator.
• Cinelerra, editor de videu non llinial.

La noticia sacóse de: http://www.radiomundial.com.ve/yvke/noticia.php?p=150142#150142

Güei preséntovos pdftk, una ferramienta pa remanar documentos en formatu pdf. Como dicen na so web: ‘Si PDF ye’l papel electrónicu, entós pdftk ye’l quitagrapes electrónicu, la perforadora, la encuadernadora, el descodificador secretu y les gafes de rayos X’. Pues emplegalu pa (combinar documentos PDF, dixebrar les páxines d’un PDF nun documentu nuevu, descifrar un documentu, cifrar el documentu resultante como te pete, desfacer un documentu PDF en páxines sueltes, informar de les carauterístiques del PDF, descomprimir y volver a comprimir páxines, reparar un PDF corruptu.

Podéis instalalu dende Synaptic o na terminal con:

sudo apt-get install pdftk

El funcionamientu ye pentemedies de llinia de comandos, tenéis exemplos na so web o podéis ver les instrucciones tecleando na terminal:

man pdftk

(Pa salir de les instrucciones calca ‘q’)

Un exemplu útil, si tienes dos documentos que se llamen 1.pdf y 2.pdf, abre la terminal y vete a la carpeta onde tienes los ficheros, una vez ellí escribi na terminal.

pdftk 1.pdf 2.pdf cat output total.pdf

Esta orde va crear un documentu llamáu total.pdf nel mesmu directoriu que tán 1.pdf y 2.pdf y que contién dambos nesi orde.

Tien munches más opciones como poner marques d’agua a los documentos, etc. Namás tenéis qu’esploralu un poco.

Salú y software llibre.

Hai quien diz que nun hai xuegos modernos pa Ubuntu… pero en realidá tu puedes xugar nun ordenador con Ubuntu a cualesquier xuegu d’ultima xeneración… y anque esti que vos pongo d’exemplu yá tien unos añinos (Rugby 2005), puede facese con cualesquier otru..

¿Qué como lo conseguí? fácil… una sintonizadora de tv… instalé tvtime y pola entrada de videu compuestu coneuté la mio ps2, y el audiu con una “Y” de RCA a minijack estéreu a la tarxeta de soníu (en realidá fice un seleutor mecánicu pa nun tener que soltar cables cuando quiero meter otros chismes)… ¿qué ye trampa? ¿por? ¿nun toi xugando n’Ubuntu…? ;P

En fin reconozo que ye una fricada… pero si quixera tener un ordenador pa xugar tendría de cambealu cada pocu… prefiero coneutar una consola y siguir con mi equipín vieyín pa trabayar…

Nos últimos meses dalgunos gobiernos europeos, ente ellos el d’España y especialmente Francia, tan xugando cola posibilidá de desconeutar d’internet a los usuarios de redes p2p.

Vamos que pretenden prohibite el usu d’una teunoloxía porque sí. Porque, pal que nun lo sepa, a parte de que nun tool mundu usa p2p pa baxar películes o música, ye completamente llegal siempres que nun saques probechu económicu.

Podíemos tar hores falando de porque se quexen cineastes que nun tienen pelicules na mula o el torrent pero bono, esi ye otru tema…

El casu ye que’l Software Llibre úfrenos otra vuelta más la lliberta teunolóxica tan necesaria anguaño, y yá disponemos del primer cliente pa Torrent que fai tresmisiones anónimes gracies a la encriptación de les conexones. Ye BitBlinder, inda ye una beta, pero yá disponen d’un deb pa Debian y Ubuntu (anque si prefieres compilar códigu ye cosa tuya…)

Güei, xueves 23 de marzu, asoléyase puntualmente Ubuntu 9.04 nomada Jaunty Jackalope 😀

Descárgala de baldre equí

Nueva versión que lleva un bon garrapiellu de novedaes como estes:

• Nuevu sistema de notificaciones.
• Sistema de ficheros ext4: Que meyora munchísimo la velocidá del sistema.
• Nueves aplicaciones como Computer Janitor (pa llimpiar la caché).
• Nuevos temes por defeutu.
• Nuevo Boot Spash y ventana d’entrada.
• Kernel 2.6.28: Meyorada la xestión de memoria y tiempos d’arranque, xunto al mencionáu sistema de ficheros ext4.
• Gnome 2.26: Sofitu del protocolu MAPI de Microsoft pa Evolution, nueva utilidá de configuración de pantalla con soporte multimonitor, asignar comandos a grupos de tecles que’l usuariu quiera.
• Munches más aplicaciones tornaes al asturianu 😀

Va unos díes comentóme Astur que al grabase col ordenador sentíase un ruíu de fondu mui molestu y que nun sabía como quitalu. Bono pos con Audacity ye mui fácil.

Audacity ye un cenciellu editor multipistes de soníu, por supuestu ye software llibre y tien la ventaxa de ser multiplataforma.

Lo primeru ye instalalu, usando Synaptic o el to métodu preferíu d’instalación… el mio…

$ sudo aptitude install audacity

Nun voi esplicavos como grabar o como cargar un ficheru d’audiu nel programa, cuido que todos sabemos que quier dicir el circulín bermeyu y el triangulín verde 😛

Fice un videu pa que seya más claru… (perdonai el inglés de Blimea…)