Esti pasáu vienres 8 de Xineru del 2010 (remembra-y la fecha pa cuando les cuntemos a los nietos), aprobó’l Gobiernu d’España, nel primer Conseyu de Ministros el SO paquete de medíes para pesllar webs de baxaes, medíes que se escapen completamente de toa lóxica. ¿Y en qué va a consistir? El procesu será tal qu’asina:

Los propietarios de drechos d’autor (particulares o entidaes) denunciarán ante una Comisión de Propiedá Intelectual a aquellos sitios que supuestamente violen drechos d’autor. Dicha Comisión decidirá si infrinxen o non drechos de propiedá intelectual pa, nos casos afirmativos, comunicá-ylo a los responsables de les webs. Nesti puntu abrese un plazu d’alegaciones pa dichos responsables tres del cual si la comisión alministrativa entiende que son insuficientes, ordenase la retirada del material protexíu. Finalmente si les presuntes infracciones persisten, solicitarán autorización ante la Sala de lo Contencioso-Alministrativo de l’Audiencia Nacional pa bloquiar o pesllar la web que toque, la Sala tendrá que resolver nun másimu de cuatro díes. Recibida l’autorización, la Comisión de Propiedad Intelectual faerá efectiva la medida del peslle de la web.

Too esto nun ye más qu’un galimatías alministrativu y xurídicu con un únicu oxetivu: blindar, más tovía, una industria cultural totalmente obsoleta que nun ye capaz a sustentar el so arcaicu modelu de negociu.

Pero tamos a tiempu d’intentar frenar esta babayada, la normativa aún tien que pasar pol Parlamentu y pol Senáu y además el Gobiernu tamién necesita camudar varies lleis más si quier ponela en funcionamientu. Ye necesario pues dar a entender al restu de fuerces polítiques y ciudadanía ante lo que realmente tamos y pa eso ta esta pequeña “Guía básica d’insurrección escontra la normativa del Gobiernu d’España pa pesllar webs”:

Guía básica d’insurrección escontra la normativa pa pesllar webs n’España:

• La nueva normativa carez de xacíu. La Xusticia española ya cunta a día de güei con ferramientes suficientes pa lluchar escontra los que salten drechos de propiedá intelectual. Que siempre resuelva escontra de la industria nun ye culpa de naide y menos de los ciudadanos.
• El poder executivo intenta trespasar competencies que son propies del xudicial y con ello dinamita un de los pilares fundamentales de cualisquier democracia que ye la separación de poderes.
• Se-y da rangu de drechu fundamental a la propiedá intelectual, dalgo que debería ser dilucidáu con mucha más calma y por varios estamentos y nun solamente pol executivu.
• Si la normativa s’aprueba, supondrá un agraviu comparativu con otros sectores industriales y los propios ciudadanos. ¿Por qué la industria cultural tien que tener “xuicios rápidos” y el restu non? Pongovos un gráficu bien claru:

• Va a cargar más trabayu a l’Audiencia Nacional, tribunal escepcional que s’ocupa de los casos más graves, como por exemplu los rellacionaos con terrorismu o corrupción.
• Los ciudadanos nun somos los culpables de qu’un sector té muriendose pol avance teunolóxicu. Pasó lo mesmo n’innumerables ocasiones a lo llargo de la hestoria y en nenguna s’impulsó la so supervivencia a base de lleis.
• Quien decidirá en primer instancia si hai o non infracción será una comisión alministrativa, non un xuez.
• Los xueces pasarán per enriba del asuntu, nun decidirán si determinada web vulneró drechos de propiedá intelectual.
• El procesu puede usase escontra cualisquier sitiu de la rede que los demandantes consideren te violando drechos de propiedá intelectual, aunque’l Gobiernu asegure que solamente s’usará escontra “non más de 100 webs”.
• L’intercambio de fichero o enllaces en sitios pa facilitar l’intercambiu de los mesmos nun ye delitu n’España. La llei ta dando por supuesto que lo anterior ye un delitu al afitar una comisión pa investigalo.
• La normativa choca o vulnera varios artículos de la Constitución (20, 24.2).
• Nun ye de recibu que pa llevar la nueva norma alantre, el Gobiernu tenga que camudar na más y na menos que cuatro lleis, una d’elles la Llei Orgánica del Poder Xudicial.

Acciones escontra la normativa y el procesu:

• Si tienes accesu a medios tradicionales distribuye n’ellos los argumentos citaos anteriormente.
• Dexa patente la to disconformidá cola normativa na to cuenta d’Identi.ca, Twitter, Facebook o cualquier otru sitiu social.
• Distribui los argumentos equí espuestos (u otros), nel to blogue o web.
• Pide-y al restu de fuerces polítiques del país que voten negativamente escontra toa medida rellacionada cola nueva normativa (vía Twitter por ejemplo: @unidá, @iunida, @eaj__pnv, @ciu, @ppopular, etc).
• Anicia cualisquier otra aición de llucha que se te ocurra y sofita les que conozas.
• Contribui a centralizar les quexes en determinaos canales (si ya esiste un grupu en Facebook de protesta, nun crees otru, xúnete a esi)
• Menea, retwittea y copia…

Y poco más qu’amestar. Ye’l momentu de que nós, los ciudadanos, actuemos. La rede nos otorga un poder de presión tremendu, como ya vimos con el #manifestu el cual demostró que la llínia ente la vida real ya Internet ta frayada.

Tocános.

Tornao y adaptao de Alt1040.

{Esto llicenciase güei más que nunca embaxo Creative Commons (CC)} (Y como’l restu del blogue ;))

Aprovechando les votaciones a meyor blogue n’asturianu ábrense les primer invitaciones pa prebar la primer rede social n’asturianu: Ximiélgame.

Inda ta en desendolcu polo que ta camudando a cada poco, l’aida de los usuarios ye fundamental pa la meyora del sistema.

¿Cómo puedes solicitar la cuenta? Si tienes un blogue n’asturianu y yá votaste pol meyor blogue 2009 namás que tienes de rellenar esti formulariu pa pedir la to cuenta en Ximiélgame. Comprobaráse si los datos que nos apurres concasen y recibirás un corréu cola confirmación. Namás que darase una cuenta por blogue y deberá tar llistáu como “Blogues que yá votaron” en http://www.votalmeyorblogue.webcindario.com/

Bono, anguaño facer una distro d’Ubuntu ye tán cenciello que puedes facelo en media tarde. Namás se necesita tener unos fondos de pantalla guapos, escoyer unos iconos, una presentación, y hala! yá tienes la to propia distribución pa pasar a los tos collacios. Tantu ye asina, que hai “distros” pa toos. Descubro con gran sospresa una “distro” pa musulmanes. ( www.ubuntume.com ) La pantalla de login ye mui chula, la verdá:

Esta “distro” contién aplicaciones que t’indiquen el tiempu d’oración, una ferramienta d’estudiu del Corán, y una ferramienta de peñera de conteníos web, (que supongo que serán de carauter ofensivu pa la relixón musulmana.)

Pongo “distro”, entecominao, por dicir dalgo…….. porque pa mí, la discusión vien a la hora de decidir qué ye una distribución. La verdá ye que camudar colores y fondos d’escritoriu nun ye dalgo que mereza l’apelativu de “distribución”… Pa eso hai que dar sofitu téunicu, crear les tos propies aplicaciones, innovar, crear, remanar los drivers con repositorios propios, y non sólo maquillar un Ubuntu. Pero bono, la llibertá qu’ufre Ubuntu ye tala, que permítilo too, y el gustu ta na variedá 😉

Equí tenemos la “distro” versión Cristiana: ( http://ubuntuce.com/ )

… Feísima a más nun poder. Nun sé, pero a mí paezme que ganaba más con un fondu de Pelayo allanciándo-yos pedraes a los soldaos de Munuza, o con Templarios pel Desiertu, o con un fondu de pantalla d’una de les batalles escontra Al-Nāsir Salāh ad-Dīn Yūsuf ibn Ayyūb (tamién conocíu como Saladín… ). Pero bono, ellos sabrán.

Ensin dubies, visto lo visto, la que más me presta ye la “distro” SATÁNICA.. ñec, ñec, ñec, .. “Andái de día, que la nueche ye mía“:

… como reza nel so slogan, ye “Linux pa los malditos”.

Cáenme bien éstos. Tuvieron problemes con Canonical un tiempu por culpa del usu y merchandising que facíen col nome Ubuntu dende la so web, pero Jono Bacon, dixo que res de res, que sin problemes, que tiraren p’alantre. Nun m’estraña, tienen meyor gustu que’l restu, y cúrrense los dibuxos de la so “distro”, más que los demás:

¿eh? qué vos paez? Esta xente de xuru que trabayó faciendo los escenarios de MORDOR en “El Señor de los Aniellos” 😀

Definitivamente, voi probala. Esta ye la so Páxina oficial

…y paezme que voi facer una distro pa los qu’entá resistimos al españolismu. Esos sí que tienen güevos. 😉

Pel momentu Séi bonos.

NOTES:

* Esiste tamién una versión pa budistes, que tien ciertu desendolcu / agospiada en Launchpad. Enllaz: https://launchpad.net/buduntu Podéis vela funcionando, equí (merez la pena)

* Paez ser que pela rede circula tamién la “noticia” de que hai una distro pa xudíos. Yo nun sé si ye verdá, porque nun la probé (nun tengo tiempu nin ganes pa descargala) y porque paez que hai otra páxina que desdiz a la primera. La qu’afirma qu’esiste la versión pa xudíos, ye ésta http://www.jewbuntu.com/

Pero hai otra páxina que diz que ye too una engañifa, y que ye un  “what if”, que traduciríemos como: ¿y qué si…? La páxina en custión ye esta . Hala! probáisla si queréis y escribíslo nos comentarios.

* Hai otra “distro” con carauter Cristianu. Ye Ichthux http://www.ichthux.com/ pero nun se la diferencia cola otra… Bono, sí: Usa KDE  😀

Si tienes un dominiu propiu puedes usar Gmail con esi dominiu, ye dicir, tienes un dominiu softastur.org, y siguiendo estos pasos, tendríes una cuenta de Gmail, pero en llugar de nomatu@gmail.com sería nomatu@softastur.org 😀

¿Lo bono? Tola potencia de Gmail. ¿Lo malo? Tienes Gmail, Gtalk, Calendariu, Documentos y Sites; pero nun tienes nin Google Reader, ni Google Analytics, ni tol restu d’aplicaciones d’una cuenta de Google, ni puedes coneutar por defeutu a clientes como Empathy o Pidgin. ¡Vamos pone-y igua! 😉

• Configurar Empathy pa usar Google Apps col to dominiu: Simplemente amestamos/editamos la cuenta como vemos na imaxe, y ya podremos disfrutar de la nuestra cuenta Gtalk col nuestru dominiu nesi cliente llibre 😀

• Amestar restu d’aplicaciones de Google: El trucu ye criar otra cuenta de Google poniendo nel primer campu’l nuestru email de nomatu@softastur.org. Con esto engañamosnos a nos mesmos y tendremos toles aplicaciones d’una cuenta normal de Google. ¿Por qué digo que nos engañamos? Porque pal corréu electrónicu, pa Gtalk, pal calendariu y pa los documentos usaremos la cuenta nomatu@softastur.org del nuestru dominiu, pero al calcar nun enllaz de Google Reader, de Google Wave, de Google Analytics, etc, al nun habelo na cuenta de nomatu@softastur.org, entrará automáticamente na nueva cuenta, engañando a la vista 😉

A munches empreses y dalgunos gobiernos como el chinu , l’australianu o l’iraní, nun-yos gusta que los sos subditos puedan comunicase llibremente “nun vaya ser que nos pongan a parir nel twitter”. Y la solución qu’encuentren ye poner un proxy pa torgar l’accesu a determinaes páxines “non prestoses”.

Si trabayes nuna empresa onde tienes internet pero les páxines goches nun tiren, o nun puedes entrar nel twitter pa ver si’l vecín del quintu yá tomó’l café , yá sabes que de que toi falando. Con esti artículu trato d’esplicar lo más rápidamente posible como saltanos esi proxy usando el ordenador nuestru de casa.

Qué necesites:

1. Accesu a internet dende casa
2. Un ordenador con un sistema operativu (de los que funcionen, yo uso Debian pero val igual pa Ubuntu)
3. Un llápiz usb (nun ye imprescindible)

Cuido que a estes altures yá sabes instalar Ubuntu o Debian nel to equipu, sinon dexa de lleer de secute porque mal vamos…

Lo primero ye instalar SSH:

$ sudo aptitude install ssh

Y pa configuralo editaremos el ficheru /etc/ssh/sshd_config

$ sudo gedit /etc/ssh/sshd_config

Dientru d’esti ficheru hai dellos parámetros y tamien documentos, podemos cambiar el puertu pol que va escuchar el sirvidor ssh, si queremos coneutar usando claves públiques o por login, etc…

Cuando tengamos too configuráu como queremos, reaniciamos el serviciu:

/etc/init.d/ssh restart

Depués d’esto tenemos que dar pasu dende’l router al equipu por el puertu que nos interese, pa esto necesitamos dar una ip fixa dientru la nuesa rede llocal y asigna-y el puertu que configuremos nel ssh… esto depende del router que tengas, sicasí de xuru que yá lo ficisti pal amule o el torrent…

Si el to proveedor d’internet úfrete ip fixa, yá tienes el equipu preparáu, pero si yé dinámica necesites usar dalgún serviciu de dns dinámicu como no-ip.com o dyndns.com. Faes una cuenta y instales el software que t’ufren p’anovar automáticamente la ip, dalgunos routers-modem ADSL incluin soporte pa estos servicios polo que nun tendrás más que configuralu y aforres d’instalar nada.

Yá tienes el to ordenador configuráu (y prendíu), y el router configuráu… vamos a la rede torgada…

Por supuestu, alguien que tien una solución tan xenial como un proxy, usa Winbugs como no podía ser d’otra forma… entos vamos baxar dos programes PuTTY y Firefox, lo ideal ye baxar les versiones “portables” pa instalales nun llápiz usb y nun tocar les configuraciones de los equipos (amás de nun dexar rastru). PuTTY portable y Firefox portable.

En acabando d’instalaos, arrancamos PuTTy y onde diz “Host Name” ponemos la nuesa ip pública o el subdominiu dinámicu, y onde diz “Port” el puertu que configuremos pal SSH. Depués vamos a “Tunnels” na estaya “SSH” qu’apaez a manzorga, amestamos el puertu onde diz “Source port” y lo marcamos como “Auto” y “Dynamic” calcamos “Add” y coneutamos.

Agora abrimos el Firefox y vamos a “Editar>Preferencies>Avanzáu” y dientru de la llingüeta “Rede” na estaya “Conexón” calcamos “Configuración”, abrirános otra ventana y marcamos “Configuración manual del proxy” nel caxellu “Sirvidor SOCKS” ponemos “localhost” y en puertu el del SSH (los demás caxellos queden ermos). Calcamos en “Aceutar” y “Zarrar” y fechu… yá tendrás accesu a les páxines torgaes.

Lo que tamos faciendo ye un “tunel” col equipu que tenemos en casa y usando la conexón a internet de casa pa restolar.

Entama una nuevu concursu pa decidir cual foi’l Meyor blogue n’asturianu del 2009 😀

El 2008 foi’l  primer añu del concursu, y ganólu González y González, siendo’l 2ᵁ El Xanu’l Caborniu y el 3ᵁ La verdá ye mentira.

Si yes un blogueru tienes durante’l mes de Xineru del 2010 pa votar equí al meyor blogue n’asturianu del 2009.

¡Muncha suerte a toos! 🙂

Un brindis pol nuevu añu 2010, y pola nuesa llingua.

Gracies por ser necios 😉