Esti manual distribuyese baxo llicencia Creative Commons Reconocimientu-Non comercial-Compartir baxo la mesma llicencia 3.0. Más información equí. Agradeceríate tamién la torna a otres llingües que quieras facer. (Pon un comentario col enllaz ¡Gracies!).

Introducción

Equí voi esplicar cómo programar pa Ubuntu.
Fae un tiempu entamé con un proyeutu por hobby, al poco entró nos repositorios oficiales d’Ubuntu, y por defeutu en distribuciones tan importantes como Linux Mint. Sigue siendo un hobby, col que disfruto y deprendo asgaya. El mio piquiñín (ya ye como un fíu), esti proyeutu del que vos falo, ye Gufw 🙂

Cuando entamé resultóme complicao saber en que llinguaxe programalu, y les regles que tenía que siguir, polo cual, voi intentar guiate nestos puntos.

La mio eleición foi la que considero agora la meyor pa facer un programa pa Ubuntu: Python + Glade. Si te fixes, Ubuntu lleva preinstalaos munchísimos programes qu’usen esta combinación.
Python ya lu tienes instaláu n’Ubuntu (recomiendote Geany como editor de desendolcu), y Glade ta nos repositorios, asina qu’instálalu con:
sudo apt-get install glade

Agora que ya tenemos tolo que necesitabemos, vamos facer un pequeñu programa d’exemplu, un Minimonitor como’l “Monitor del Sistema” que lleva Ubuntu, pero que sólo nos amose una información: La versión d’Ubuntu que tenemos.

Vamos facelo en programación orientada a oxetos, recomiendote usar MVC (Modelu Vista Controlador), un exemplu de cómo organizar les coses tieneslu en Gufw, aunque ye meyor nun meter MVC agora pa nun lliate más.

Resumiendo, en Glade fadrémos la interface, y con Python desendolcaremos los eventos d’esa interface. La clave del desendolcu de GUIs pa GNU/Linux ye que la terminal de GNU/Linux tien una potencia ablucante, y aprovechámoslo pa unviar comandos a la terminal.
Sí, como lo oyes, una GUI (Graphic User Interface) de xestor de baxada lo que faerá ye invocar al comandu wget na terminal y garrar el resultáu, el Xestor d’anovamientos d’Ubuntu unviará comandos a la terminal de la triba “sudo apt-get….”.
Cómo ves, programar una GUI ye aprobechar la potencia d’aplicaciones de la consola. (más…)

Post perprestosu alcontráu nesta direición, tocante a les coses que se pueden facer con GNU/Linux, y que ye imposible, o mui difícil, facer en Windows o Mac

1. Anovar a la versión más nueva del SO de mou llegal y ensin pagar un (duru) euru.
2. Que la cabera versión del sistema operativu cuerra más rápido que l’anterior sobro’l mesmu hardware.
3. Instalar y usar cenciellamente interfaces gráfiques distintes si nun me presta lo que hai por defeutu.
4. Instalar 20 programes col mesmu comandu.
5. Tener tol sistema y programes anovaos automáticamente.
6. Instalar copies del SO en múltiples ordenadores ensin tener qu’esmoleceme de restricciones de llicencies o claves d’activación.
7. Regalar copies del SO y d’otros programes ensin violar lleis gubernamentales nin étiques, porque precisamente’l SO concibióse con esa idega.
8. Tener el remane completu sobro’l hardware del mio ordenador y saber que nun hai puertes traseres nel mio software que s’instalaren por compañíes con software maliciosu o inclusu pol gobiernu.
9. Usar el PC ensin necesidá d’usar un antivirus, proteición adware/spyware y nun tener que reaniciar la máquina durante meses, inclusu teniendo al día el sistema colos caberos anovamientos en seguridá.
10. Usar el mio ordenador ensin tener que desfragmentar el discu duru enxamás.
11. Prebar software, decidir que nun me presta, desinstalalu y saber que nun queda res de puxarra nún rexistru que puede afeutar al rendimiento de la mio máquina.
12. Facer un error grave qu’implique una completa reinstalación del sistema y algamar esto en menos d’una hora, gracies a que punxe tolos mios datos y programes n’otra partición aparte.
13. Arrancar nún escritoriu con efeutos visuales impresionantes nuna máquina de fai trés años… en menos de 40 segundos, incluyíu el tiempu que me lleva introducir el mio usuariu y contraseña p’aniciar la sesión.
14. Personalizar cualesquier apartáu que me preste, de mou llegal, incluyendo los mios programes favoritos. Puedo inclusu contautar colos desendolcadores pa entruga-yos coses, contribuyir con idegues, ya involucrame nel diseñu y desendolcu de software si quiero.
15. Tener cuatro o más ventanes d’un procesador de testos, escuchar música, rabilar con efeutos visuales d’escritoriu, tener contautu con una comunidá d’usuarios fantástica y tener Firefox, mensaxería nel intre y veceros de correo, tou abierto al mesmu tiempu, ensin tener que pedi-y a naide que m’igüe un fallu pa facer que’l mio SO furrule ensin facer que vaya tan sele que nun valga un res.
16. Usar comandu ‘dpkg –get-selections > plg-list’ pa tener una llista ensembre y detallada del software que tengo instaláu, facer copies de seguridá de los mios direutorios /etc y /home nuna partición aparte y ser quien a recuperar el sistema en cuaeslquier intre de mou cenciellu.
17. Executar dellos escritorios al empar, o dexar que dellos usuarios anicien sesión y usen l’ordenador simultáneamente.
18. Redimensionar les particiones de discu ensin tener que desaniciales y ensin perda de datos nelles.
19. Usar el mesmu hardware que fai 5 años ensin que seya necesario sustituyilu. Tengo dalgunos componentes que tienen alredor de 10 años funcionando baxo Linux y entá sirven.
20. Restolar pela web mientres s’instala’l Sistema Operativu.
21. Usar práuticamente cualesquier hardware y tener un driver incluyíu nel SO pa esi periféricu, desaniciando la necesidá d’esplorar n’Internet p’alcontrar nel sitiu web del fabricante ún afayaízu.
22. Conseguir el códigu fonte de práuticamente cualesquier cosa, incluyendo’l kernel del sistema y la mayoría de les mios aplicaciones.

Pa quien quiera mercar un ordenador nuevu, y a ser posible con Ubuntu, la eleición ye cenciella. En Carrefour Online ufiertanos dende 300€ unes máquines impresionantes.

Podemos mercar (sólo online) estos sobremeses (ensín monitor):

• COOLBOX BlueDESK MMA-7750be por 300€
  
• COOLBOX BlueDESK MMI-5201 por 339€

PD: N’Alcampo tovía hai de saldu un AMD con certificación oficial d’Ubuntu por 149€, pero ya va siendo díficil conseguilu.

Fae xusto 5 años qu’un equipu dixebráu de Debian “ensin nome tovía” (no-yet-name.net), daba anuncies de la so idega de criar una distribución derivada de Debian, pero con dellos cambios que la ficieren más pa seres humanos 😛
Mark Shuttleworth presto-y la idega asgaya, y como agradecimientu al sistema operativu de baldre que-y permitió deprender abondo cuando estudiaba nos sos años mozos, donó 10 millones de dólares al proyeutu d’Ubuntu, colo que ñacía nes meyores condiciones un sistema operativu basáu na pergrande calidá de Debian.
Pa ello fundó Canonical col oxetivu de qu’acabe siendo rentable por si mesma. Canonical ye la empresa qu’ufierta Ubuntu de baldre, y da-y sofitu profesional pa les empreses que lo necesiten. Tamién Canonical nos ufierta ferramientes perbones como Launchpad (sofitu perimportante pa Softastur na torna d’Ubuntu).
Tamién fundó conxuntamente la Fundación Ubuntu, col envís de qu’Ubuntu siempre siga una llinia coherente na so mentalidá de llibertá, lloñe de especulaciones.

Ubuntu tien los oxetivos perclaros, y destaca por convertise nunos pocos años na distribución de GNU/Linux más usada y famosa.

¡Felicidaes Ubuntu! ¡Que cumplas munchos más! 😀

Pa dalgunes coses igual nos interesa tener la fonte d’Ubuntu, sí, la del nome, esa fonte redonda.

Pa ello simplemente instales esti paquete: ttf-ubuntu-title. Dende consola puedes facelo asina, o dende synaptic gráficamente.

sudo aptitude install ttf-ubuntu-title

Jono Bacon remémbranos nel so blogue que’l 16 de xunetu fina’l plazu pa participar na Amuesa de Cultura Llibre d’Ubuntu

La cosa consiste en facer una esbilla d’arte llibre nes categoríes de semeyes/imaxes, soníu y vidiu que va incluyise nel siguiente llanzamientu d’Ubuntu (9.10 o Karmic Koala). Almítense obres embaxo llicencies Creative Commons Attribution-ShareAlike, Attribution o, cuando’l remitente ye’l mesmu autor, obres con llicencia cero

La manera de participar ye xubir la obra a un agospiamientu d’Internet afayadizu y poner l’enllaz nel apartáu correspondiente de la wiki del concursu. Na mesma wiki pueden vese los ganadores d’anteriores llanzamientos. ¿Daquién s’anima a amosar l’arte asturianu del s. XXI?

Muncha xente tien miéu de tornar Ubuntu, camentando que ye díficil, complicao o que nun sabe inglés. ¡Tornar Ubuntu ye perfácil! 😉 Nun ye díficil, ni complicao ni fae falta saber inglés.

Tener un sistema operativu n’asturianu ye sólo cuestión de voluntá de los sos falantes. Y la comunidá asturiana cada vegada demanda y puxa más pol software llibre n’asturianu. ¿Quies echanos un gabitu?

Ubuntu ufrénos una web percenciella onde poder tornar dende cualisquier llingua al asturianu, y dende cualquier sistema operativu, tanto Ubuntu, Windows, Mac… ¡Sólo necesites un restolador web!

Ye perimportante aclarate que naide obliga a tornar X frases, ni tienes un tiempu pa facer X frases: Puedes tornar dende 1 frase fasta les que quieras, nel momentu que quieras 😉
Softastur existe pa coordinar estes tornes, pa saber cuales son prioritaries.

Dexámosvos un manual en PDF nel que desplicámoste lo percenciello que ye tornar, dixebráu en 2 partes: L’alta del usuariu y como faeríes pa tornar nel día a día. Pa baxalu calca nel iconu d’embaxo o equí.

¡Animate! ¡Necesitamos del to sofitu! Cuantos más seamos más calidá de tornes y enantes finaremos Ubuntu dafechu 😀

El núcleu Linux cumple güei 15 años que, xunto col sistema GNU (que cumplió 25 en setiembre del añu pasáu), conforma el primer sistema operativu, y únicu pel momentu, que fala asturianu. Pa los que se confunden Ubuntu ye GNU/Linux, Como Ford ye una marca de coches onde Linux ye la direición.

Fai más d’un añu comentábamos la intención de la xendarmería francesa de migrar los sos equipos a Ubuntu, depués de tar dende 2005 migrando a aplicaciones como OpenOffice, Firefox o Thunderbird.

Pos bien dende 2004 cuando entamaron estos planes, llograron aforrar 50 millones d’euros, de dineru públicu francés, y eso que namás hai 5.000 equipos con Ubuntu, que cuenten con que seyan 15.000 pa esti añu y 90.000 pa 2015.

L’aforru supón un 70% de los costes y “ensin perder productividá”.

Nun me cabe na cabeza, y bien grande que ye, como tovía hai empreses que nun intenten migrar a software llibre, nel mio trabayu polo menos tienen OpenOffice…

Ye mui raru que tanto n’Ubuntu y sobre manera en Debian que tengas que compilar software pola gran cantidá de binarios disponibles. Sicasí si t’apetez caciplar esti ye un métodu rápidu pa facelo.

Lo primero ye instalar el software necesariu (si nun lo tienes yá)

$ sudo aptitude install dh-make devscripts fakeroot build-essential g++ libglib2.0-dev libglade2-dev libgnomeprintui2.2-dev libgsf-1-dev libenchant-dev libfribidi-dev libwv-dev libpopt-dev

Depués pa ser ordenaos vamos facer un direutoriu nuevu onde guardamos el ficheru comprimíu del nuesu códigu fonte, y los descomprimimos. Agora tendremos algo asi

/carpeta/programa-x.x

/carpeta/programa-x.x.orig.tar.gz

Agora entramos dende una terminal na “carpeta” y executamos

$ dh-make -e el_to@correu.ye -s (pa más opciones ver manual)

Agora entraríemos en /carpeta/programa-x.x/debian/ y editamos el ficheru “control” pa poner una descripción el nome de l’aplicación o la estaya.

Depués modificais el changelog a manu o automáticamente col comandu

$ dhc -i

Namás que queda compilar y tener suerte

$ fakeroot debian/rules binary