Güei, 21 de febreru, ta declaráu pola UN (Naciones Xuníes) como’l día Internacional de les Llingües Maternes.

Ye por ello, que hai que dai les gracies al Software llibre, por facer posible que podamos celebrar esi día na nuesa llingua, nos nuesos sistemes operativos LLIBRES.

Dende equí, gracies a tolos que vivís la nuesa llingua.

P.D. Si esto dependiese d’otros (que nun saben de llibertaes), diben danos bien pol culo…

Eslema ye ún de los proyeutos más prestosos n’asturianu, puede tornar testu, webs, ficheros, col motor llibre Apertium 😀 Vamos xugar un poco con Eslema y Firefox, y amosate 2 perbonos trucos pal to restolar diariu 😉

Trucu 1 > Marcador de torna nel intre:

Criamos un marcador na barra de Ferramientes de Firefox.

• Nome: Tornar
• Direición:  Esta llinia (ensin el 1 que ta al entamu).

Agora en cada páxina en castellanu que temos, calcamos nel marcador “Tornar” y tendremos nel intre esa páxina tornada al asturianu.

Trucu 2 > Toles páxines nueves n’asturianu por defeutu:

• Instalamos esti complementu de Firefox.
• Abrimos el menú de Firefox: Ferramientes / Complementos. Seleicionamos URL Suffix y calcamos nel so botón Options. Esto amuesa una ventana na que configuramos Alt+Enter como esto:

Preffix: Esto (ensin el 1 del entamu).
Suffix: &output=es-ast

Agora, si en Firefox introducimos una direición web (ensin http://www.), por exemplu, google.es y calcamos Alt+Enter, direutamente aparez n’asturianu 😉

Usar OpenTrand pa los 2 trucos anteriores

OpenTrad tien 2 ventaxes sobre Eslema:

• Nun amuesa’l banner.
• Dalgunes webs vense mal con Eslema y bien con Opentrand.

Pa usar Opentrand usái esta direición pal trucu 1; y esti prefixu pal trucu 2 (ensin sufixu nel complementu URLSuffix).

De xuru qu’esti tema da muncho más xuegu 🙂 Si tienes más idegues ponles nos comentarios.

Edición 14 marzu 2010: Avisanos Kevin nos comentarios d’una web onde tan los scripts pa los marcadores de Firefox de toles llingües 🙂 Visitalo equí. ¡Gracies Kevin!

Úfrovos la pequeña charra que fice ayer sobre les posibilidaes de plataformes pa criar un blogue nel 2ᵁ Sidra&Blogues, en formatu OpenOffice y por supuestu, embaxo llicencia llibre Creative Commons 😉 Pa baxala, calca equí.

Si quies la desplicación, pasu a pasu coles ventaxes, vete equí 😉

El siguiente ficheru facilitarate tola instalación d’OpenOffice n’Ubuntu. Automáticamente descárgate los ficheros necesarios ya instálatelos nel to PC 😀

Pasos a siguir:

• Descarga l’autoinstalador calcando equí , y apégalu nel Escritoriu.
• Agora abre una terminal (menú Aplicaciones/Accesorios/Terminal)
• Escribi lo siguiente (respetando les mayúscules):

cd Escritoriu

• y agora escribes:

sudo bash ooo2ast.sh

• (pediráte la to contraseña, y empezará a executase’l programa)

Dempués d’un bon cachu (175 Mb de descarga + instalación) yá tendrás Openoffice instaláu. Espera a que t’avise’l programa. 😀

P’abrir OpenOffice, vete al menú Aplicaciones/Oficina y si t’aparez n’inglés, afita l’asturianu yendo al menú Tools/Options/Language Settings 😉

Si tienes tovía problemes o cualesquier dulda, escríbenos.

Encamentámoste a usar esti ficheru d’autoinstalación n’Ubuntu 9.10. Pa la siguiente versión d’Ubuntu yá vendrá preinstaláu n’asturianu 😉

PD: ¡Milenta gracies a Miguel Jañez pol script! 😉

Lo prometío ye deuda, y, como anunciábemos fai un mes, OpenOffice, acaba d’asoleyar la versión 3.2.0, que por primer vegada inclúi la Llingua Asturiana . Gracies al equipu de Softastur.

Dempués d’un trabayu de 2 años, yá ye oficial 😀

¡¡¡¡¡Descarga OpenOffice.org n’Asturianu pa Ubuntu, Windows, o Mac!!!!

La versión final d’OpenOffice 3.2.0 inclúi munches meyores:

• Arranque más rápidu (5 segundos).
• Meyor sofitu pal formatu ODF.
• Sofitu pa formatos propietarios como los documentos XML protexíos por contraseña de MS Office.
• Nuevos diagrames en Chart.
• Xestión avanzada del copia y pega.
• N’asturianu 😉
• Y abondes más…

Güei ye un día históricu pa la llingua asturiana, por fin dispón d’una suite ofimatica avanzada y llibre 😀 Incluyendo un procesador de testos, una fueya de cálculu, pa facer presentaciones, bases de datos, debuxos y esquemes y fórmules matemátiques.

Puedes baxala dende equí. ¡A esfrutala! 😀

Gracies a tol equipu de softastur, que trabayó llibre, gratuita, ya desinteresadamente durante 2 años, pa facer esti proyeutu realidá.

Namórate equí 😉

Esti mundu nuesu, l’asturianu, ta convirtiéndose nuna fonte d’esperanzadores, y bones noticies. Lleo nes noticies de prensa l’asoleyamientu d’un traductor online al asturianu.

Toi falando de eslema , una ferramienta que permite traducir testos y páxines web a la nuesa llingua. Baxo’l lema: “Eslema. El mundu, n’asturianu” esti proyeutu fai realidá otra necesidá más de la nuesa sociedá. Y tien les mires puestes muncho más llonxe: Dende la páxina, infórmennos de la posibilidá de traducción al asturianu dende llingües como’l portugués, italianu, inglés, francés, gallegu, catalán y euskera. Namás y namenos!!

Más bones noticies nesti tema, ye la llicencia baxo la que s’espubliza CC-BY-SA 😉 El proyeutu llevóse a cau cola participación de la Universidá d’Uviéu, y la Conseyería de Cultura y llevó más d’añu y mediu el terminalu. Gracies a toos y toes los que fexeron esto posible.

Vía GNOME Look tenemos un perútil cubu pa facer de papel colos comandos más usaos na terminal d’Ubuntu 😀

Baxalu:

• En formatu PDF.
• En formatu SVG.

Sólo te queda recortalu, doblalu, apegalu y disfrutalu 😉

Vía: Ubuntu Life.

Gracies al proyectu de desendolcu y traducción de Softastur:

¡¡Por fin tenemos un LiveCD d’Ubuntu n’asturianu!!

• Problema qu’había: Ya disponemos nos CD oficiales del instalador n’asturianu, pero si arranques dende’l CD pa ver cómo ye Ubuntu, aparez too n’inglés ¿Por qué? Pues porque sólo s’incluyen les llingües más usaes por motivu d’espaciu nel CD (Si metieran les 240 llingües d’Ubuntu nun-yos cabríen otres aplicaciones).
• Igua: Al tar l’instalador incluyíu dende la cabera versión, abondes utilidaes como UCK o reconstructor permiten criar la to imaxe de CD personalizada col arranque y entornu na llingua que quieras (de les disponibles nel instalador).
• Ventaxa de criar un LiveCD o LiveUSB: Puedes copialu nun CD/DVD, y puedes dir a cualesquier ordenador, arrancalu col CD/DVD metíu na unidá de CD y ya tienes Ubuntu n’asturianu, ensin instalar na, y ensín camudar na nel ordenador nel que lo prebes, ¡al sacar el CD/DVD l’ordenador siguirá esautamente igual que taba!. Valte pa enseñar Ubuntu y pa prebar si nun ordenador tiraría bien con él. Tamién puedes copialu nun llápiz USB o discu duru USB. La ventaxa d’esti métodu ye qué Ubuntu arrancará mui mui rápido (casi tanto como’l discu duru), abrirás y remanarás aplicaciones nel intre y los cambeos que faigas como personalizalu, instalar programes, criar documentos ¡caltendránse nel USB! Igual que nel casu anterior, nel ordenador nun se faerá nengún cambéu
• Cómo instalalu:
  • En CD/DVD: Baxa la imaxe .iso y grabala en formatu “imaxe” a un CD/DVD col Nero o un grabador llibre como Infrarecorder. Solo te queda arrancar un ordenador col CD/DVD metíu.
  • N‘USB: Baxa la imaxe .iso, ya instalala nun llápiz USB o discu duru USB: Dende Ubuntu ye perfácil, vete al menú Sistema/Alministración/Criar USB d’arranque. Dende Windows tamién puedes con uSbuntu. Solo te queda arrancar un ordenador col USB metíu.

• Usu: Aunque la imaxe permite la instalación nel discu duru, ¡¡¡ENCAMENTAMOSTE A QUE NUN INSTALES UBUNTU CON ESTA IMAXE!!! El so únicu destín ye prebar/usar Ubuntu n’asturianu en LiveCD. ¿Por qué dicimoste esto? Porque pa garantizar la estabilidá d’Ubuntu sólo un CD fechu por Ubuntu tien esa estabilidá. Nun deriváu non oficial nun ta garantizada esa estabilidá Si quies instalar Ubuntu nel discu duru baxa de baldre un CD fechu por Ubuntu.

• ¿Nun arranca? Tienes que camudar l’orde d’arranque de la BIOS pa qu’arranque dende CD o USB

Cualesquier dulda o problema que tengas, avisanos nos comentarios.