Softastur collaboró con SUATEA enseñando Edubuntu a los mayestros de primaria y secundaria. Nun cibercentru de Xixón fízose-yos una amuesa de qué ye Edubuntu, y los caberos proyeutos nos que trabaya Softastur en materia d’Educación y Llingua Asturiana.

¿Qué ye Edubuntu?

Edubuntu ye la versión educativa d’Ubuntu. Ye una “recopilación” de programes educativos en Llingua Asturiana dirixíos a escolinos y profesores de Primaria y Secundaria.

Dalgunos de los problemes colos que s’alcuentra’l profesoráu a la hora d’instalar Edubuntu nel centru, ye que los ordenadores tienen siempre Windows preinstaláu. Esto supón un problema, porque non siempre’l Centru da permisu pa instalar otru Sistema Operativu.

• Opción 1- Si’l to Centru te da permisu, pa instalar Edubuntu, ponte en contautu con nós unviándonos un mail, tienes el NUESU COMPROMISU de que vamos echate un gabitu nello.

• Opción 2- Si nun te da permisu, el mou de “saltase” esta restricción ye Virtualizar Edubuntu. Nesti casu, tendremos qu’instalar primero el programa VIRTUALBOX en Windows. Dempués, executaremos Edubuntu usando Virtualbox (tal y comu se vió nel Taller). Pa ello tienes tolos pasos y la imaxe pa baxar de Virtualbox pa virtualizar equí. (Nel casu que lo veas complicao, ponte tamién en contautu con nós equí).

La desventaxa de la segunda opción ye que tamos executando un Sistema Operativu (Edubuntu) dientro de otru (Windows), colo que too dirá más lento, naḿas taremos aprovechando un 40-50% del rendimientu, y puede ser que dalgunes funcionalidaes nun vayan bien. (Siempres ye meyor la opción 1 ). Esperamos que cola presión que vosotros podáis exercer como mayestros, nos centros educativos, vayamos camudando adulces ésti panorama.

¿Por qué debemos usar Software Llibre nes escueles?

Ún de los pilares básicos de la Educación ye l’accesu llibre al conocimientu. Ocultar el conocimientu nunca formó parte de los manuales nin de la ética profesional de los docentes. El software privativu, non sólo ye costosu, sinón que torga l’accesu a esti conocimientu.

El Software llibre permite:

• Adautar los programes a les nueses necesidaes.
• Ye totalmente auditable: l’alumnáu entiende porqué asoceden les coses.
• Usa formatos estándar, totalmente compatibles
• Ta llibre de virus: los virus nun tienen res que facer nos sistemes Linux
• Seguru y fiable. L’alumnu nun puede frañar el sistema nin voluntaria, nin accidentalmente. Los niveles de seguridá del sistema son talos que nun ye preciso reinstalar el software cásique de contino como sí ta asocediendo nes nueses actuales aules d’informática
• Ye de baldre, ensin costu dengún. Comunidaes como la Xunta d’Extremadura y Andalucía, lleven 10 años aplicando los sistemes Linux n’Alministración, y demostrando al restu l’Estáu la total viabilidá d’estos programes, y l’aforru económicu tan grande qu’esto supón.

” […] Ramos ha remarcado que desde hace 10 años en Extremadura se empezó a valorar la utilización de este software, que se completó con la instalación de ordenadores en los colegios en el año 2003, en la que se decidió la instalación del LINEX. Además, ha afirmado que la elección del software libre ha permitido ahorrar a la administración autonómica 30 millones de euros.” Fonte: LinEx.org

Ponémosvos equí los enllaces de los que falamos ayer:

• Pa saber cómo instalar Edubuntu nun ordenador na escuela calca equí.
• Nos próximos díes, (4-5 díes) vamos ellaborar un documentu .pdf con tolos temes y dubies que nos faigais. Agradeceríamos que nos dexéis les vueses entrugues nos comentarios d’esti artículu 😉 pa que les incluyamos toes nel documentu. En cuantes tengamos el documentu fechu, podréis descargávoslu: equí (enllaz desactiváu provisionalmente)

Los mayestros de primaria, col pocu tiempu que teníemos, nun pudieron ver ésti vídeu de Mathew Richard Stallman, presidente de la Free Software Fundation, que desplica (en castellano) la ética que debiera rexir nos Centros Educativos tocante al Software llibre.

Agradecemos abondo a Suatea cuntar con nós, foi una esperiencia mui gratificante 😀 ¡Gracies!

Vamos facelo de la manera más simple qu’hai 🙂 Y pa ello usaremos el códigu fonte del Guetador.

• Si nun los tenemos instalaos, instalamos los paquetes necesarios pa criar el .deb:
  sudo apt-get install dh-make devscripts fakeroot build-essential
• Baxar el códigu fonte del programa.
• Descomprimelu.
• Renoma la carpeta cómo nomePrograma-version (nesti casu guetador-0.3).
• Entra nesa carpeta:
  cd guetador-0.3
• Criamos los ficheros necesarios pa empaquetar:
  dh_make -f ../guetador.tar.gz --copyright gpl3
  A la entruga: “Type of package: single binary, indep binary, multiple binary, library, kernel module, kernel patch or cdbs?” Escoyemos “indep binary” y calcamos Enter 😉
• Entramos na nueva carpeta debian criada:
  cd debian
• Esborramos tolos ficheros menos: control, copyright, changelog, compat y rules.
• Editamos los 5 ficheros que queden poniendo’l nuestro nome/corréu…
  • Nel ficheru control especificamos les dependencies: Pa ello na llinia “Depends:” ponemos  esto si dependiera de python y ufw:

  Depends: ${misc:Depends}, python (>=2.6), ufw

  • Nel ficheru rules quitamos tolos $(MAKE)* de les seiciones buildstamp, install y clean.
  • Nel ficheru rules, al final de la seición install ponemos los comandos que copien cada ficheru que queremos de la carpeta descomprimida guetador a onde diríen nel sistema:
    mkdir -p $(CURDIR)/debian/guetador/usr/share/guetador
cp vista glade model bbdd guetador.py controller.py $(CURDIR)/debian/guetador/usr/share/guetador -a
chmod +x (CURDIR)/debian/guetador/usr/share/guetador/guetador.py

  Onde (CURDIR)/debian/guetador ye la carpeta raíz actual/debian/guetador (criala el comandu dh_make 😉 ). El mkdir y cp crien y copien los ficheros que se xenerarán nel .de, chmod usamoslu si necesitamos que seya dalgún ficheru executable.

• Xeneramos el ficheru .deb con esti comandu:
  debuild

Dos perbones noticies:

• El chollazu: L’otru día anunciavavos un emachines n’El Corte Inglés por 229€. Pues na web sigue tando a esi preciu, pero si vas a Hipercor de Xixón/Uviéu (creo que cualesquier otru) ¡¡¡tienenlu a 159€!!! Ye dicir: una máquina certificada pa Ubuntu, con monitor, torre, tecláu y mur por sólo 159€ 😀 Yo fuí a Xixón, teníen la etiqueta a 229€, pero entrugué y nel ordenador salió 159€ 😉
• El pepinu: En Carrefour Online venden 3 pepinos y 3 miniDesk (torres perpequeñes) cola cabera versión d’Ubuntu preinstalada 😀 Los ordenadores pebonos tieneslos equí: 1, 2 y 3. Les microtorres equí: 1, 2 y 3. Van dende los 229€ a los 339€.

Ya sabes 😉 ¡Aforrate la llicencia de Windows! 😀

Si sabes de más sitios onde vendan Ubuntu, ponlo nos comentarios por favor.

Atentos:

• Facer un Sistema Operativu: 1.000 persones, 8-10 años

• Traducir esi Sistema Operativu: 50 persones, 5 años

• Preparar, traducir ya implementar Openoffice: 10 persones, 2 años

• Facer la to distro personal: 1 persona , 1 tarde y 1 café 😀 !!!

Estes son dalgunes de les bondaes del software llibre. Como’l códigu ye llibre, yes llibre de facer col códigu lo que quieras. Y entre eses coses, tán, por exemplu, facer la to propia distribución.

• “¿Quier dicir eso que puedo facer el mio Sistema Operativu?”

Non, .. pa eso, necesitaríes 1.000 persones y 8 – 10 años.. 😀 Lo que quier dicir esto, ye que puedes personalizar el to Sistema Operativu, instalando los programes que quieras, poniéndo-y los colores que quieras, los temes, el nome que quieras.. etc y distribuyilu ente los tos collacios. Y nun te fai falta saber de programación. Un bon exemplu son les distros personalizaes qu’esisten, como la satánica o cristiana.

Ye divertío, ye cosa de una tarde. Y depréndense dalgunes coses.

En Softastur, va tiempu qu’usamos la nuesa propia distro. Llámase GNUberu y usámosla sobro tou pal desendolcu de los nuesos proyeutos, ye perútil, y afórranos munchu trabayu. GNUberu ñació allá pel añu 2007, y nun ta de más que sepáis cómo se fai, pa que faigáis la vuesa distro.

GNUberu... qué recuerdos! 😀

exemplu de pantalla de login de Softastur

El nome ye lo de menos, SidriX, UvieuX, AxturieX, Xporting, hai miles de distros, y toes distintes… lo importante ye que la faes nun plis-plás.

• ¿Qué necesitamos? Pues nada, un programín cenciellu, y ganes.

Esisten munchísimos programes que van aidate a facer la to distro: Remastersys, UCK, Reconstructor… Por simplicidá, recomiéndovos Reconstructor que ye una web que lo fai too automáticamente (incluso dende Windows xD):

https://build.reconstructor.org

Ye namás siguir los pasos:

Criamos y dámos-y un nome al nuesu proyeutu, por exemplu: GNUberu, y decímos-y en qué va a basase la nuesa distro (Ubuntu ó Debian, Si queremos un LiveCD, o una imaxe de discu, l’entornu d’escritoriu: Gnome, KDE, Xfce):

Por defeutu llevará los mesmos programes qu’Ubuntu, si queremos amestar o desaniciar programes (nomaos paquetes) especificamoslo en “Packages”, por exemplu amestamos el restolador web epiphany:

Agora ya tenemos la nuestra distro, sólo queda personalizala, pa ello usamos los “Modules”, con estos módulos podemos poner el fondu que queramos, la páxina d’aniciu de Firefox que queramos, l’animación del entamu que queramos… too ello perfácil:

Y a correr!! El programa xenerará una imaxe .iso calcando en “Build” nunos 15 minutos:

que namás tendremos que baxala y grabala nún CD. ¡¡Y yá ta fecho !!

¿Tiempu total? Una hora o dos  (y un café 😀 )

Ye así como se fai una distro. Básicamente, el trabayu más duru ye escoyer unos temes guapos. 😀 😀 ¿Qué pensábeis que yera? Acabáronse los tiempos de xente con barba programando hores y hores…. Linux fai munchos años que yá nun ye así. Según-y vayáis pillando’l tranquillo, podéis dir amestando ésti o aquel programa… ye custión de tiempu “optimizar” la distro

Eso sí… enxamás uséis una distro que nun seya oficial (Ubuntu, Debian, Fedora, OpenSuse ) nel vuesu PC direutamente. Meyor usái una máquina virtual o en mou Live. Les distros caseres nun tienen una comunidá de millones de persones que les testeen y revisen, ni una gran empresa como Red Hat, Mandriva o Canonical qu’invierta en desendolcu ya innovación. Tampoco sabremos si un autor con males intenciones introduz malware o spyware. Asi que cuidadín. 😉

Bono, esta noticia ye perinteresante, ya que’l mayor (pa dalgunos tamién el meyor en calidá) distribuidor d’España: El Corte Inglés, ta vendiendo un de los meyores ordenadores calidá/preciu: eMachines EL1200 con Ubuntu preinstaláu.

Si quies mercar un ordenador, esta ye una perbona opción ya qu’aforrarás problemes a un preciu perbonu (229€) 😉 Esti ordenador conozolu personalmente, ye pequeñu, más silenciosu qu’un portátil y ¡vuela!

¿Y tú? ¿Sabes más sitios onde vendan Ubuntu preinstaláu? (Cerca d’Asturies ḥeḥe 😉 )

Acaben de sorprender a tol mundu espublizando un tema completamente remocicáu pa la futura versión d’Ubuntu 10.04, que saldrá’l prósimu mes (Aclarar que tovía lu retocarán un poco más, pero basaránse nos colores berenxena (empresa) y naranxa (comunidá) nel tema d’Ubuntu).

Ya lu podemos esfrutar nel alpha 3 de Lucid 😀 Déxovos la captura (calca n’ella pa vela grande) 😉

Y equí dalgunos detalles:

Cuando entamamos esti blogue nun teníemos estadístiques. Pudimos meteles dende’l 25 de febreru del 2009, ye dicir, fae 1 añu 😛

Tamos orgullosos del resultáu, y vamos analizar los puntos más importantes:

Total visites: Namás y na menos que 23.743 visites nun añu, que vieron 38.896 páxines 😀 Incluyendo 2 picos del efeutu meneame.

Sistema Operativu: GNU/Linux usóse nel 43,72% de les visites, siendo’l más usáu Windows con un 51,44%.

Restolador web: Firefox (incluye la llingua asturiana) arrasa con un 69,15%.

Llingua del restolador: El 19,78% de les visites usó un restolador n’asturianu (Firefox, Epiphany, Arora), siendo lo dominante un restolador en castellanu.

Orixe de les visites: Google ye’l guetador que más s’usó pa llegar al blogue, y de sitios de referencia Asturies.com mui perdelantre d’otros cómo meneame.

Y a ti, que tas mirando esto agora mesmo, gracies por lleenos 😉

Güei martes, 23 de febreru del 2010, dende les 20:30 hores, la Tertulia Cultural Pachín de Melás charrará del Software Llibre na cervecería Astuera 🙂

Los ponentes serán:

• Xabel García Pañeda: Departamentu d’Informática de la Universidá d’Uviéu
• Xandru Armesto: Mayestru y miembru de  Softastur.
• Daniel Vicente y Arsenio Coto: Desendolcadores del traductor Eslema.

Más información equí.

Na charra del 2ᵁ Sidra&Blogues tratáronse les posibilidaes pa criar un blogue la xente asturiano. Como la presentación queda poco desplicada, detallo equí cada pasu 🙂 Si tienes dalguna dulda, a los comentarios.

• Facilidá:

• Blogger: Criar un blogue ye perfácil, poco más qu’escoyer el so nome.
• Nireblog: Igual que Blogger.
• WordPress.com: Igual que Blogger.
• WordPress.org: A parte de tener munches más opciones, ye necesario tener conocimientos mínimos pa instalalo nel nuestro sirvidor.

• Agospiamientu:

• Blogger: Ta incluyíu.
• Nireblog: Ta incluyíu.
• WordPress.com: Ta incluyíu.
• WordPress.org: Tienes que pagalu tú, xunto al dominiu. Debe incluyir sofitu pa PHP y base de datos. Esti tema ye importante, porque podríes tener que facer frente a efeutos Meneame, pero a cambio date’l control total del TO blogue.

• Migración:

• Blogger: Son mui poques les posibilidaes d’esportación y ensin esportación.
• Nireblog: Igual que Blogger.
• WordPress.com: Ensin importación/esportación.
• WordPress.org: Por tener que facete tú cargo del agospiamientu, les opciones son másimes: puedes importar y esportar tanto la base de datos, temes, conteníos, artículos…

• N’asturianu:

• Blogger: Nun hai posibilidá.
• Nireblog: Incluyíu y sofitu completu.
• WordPress.com: Incluyíu, pero ta ensin tornar. Si quies collaborar pa que WordPress.com te n’asturianu puedes facelo equí (necesites rexistrate en WordPress.com y el sistema ye fácil).
• WordPress.org: Incluyíu y sofitáu gracies a les tornes de la comunidá en Launchpad, queda una migaya por tornar, si t’animes a finalo ye perfácil nesti casu pa WordPress en llugar de pa Ubuntu.

• Temes:

• Blogger: Los que lleva por defeuto, y son personalizables.
• Nireblog: Lleva un poco menos que Blogger, nun son personalizables.
• WordPress.com: Lleva más que Blogger y son personalizables incluso la plantilla CSS.
• WordPress.org: Tienes la mayor ufierta de temes de baldre. El control ye total sobre ellos, y como los agospies nel to sirvidor, puedes camudalos y axustalos a les tos necesidaes cómo quieras.

• Control/Configuración:

• Blogger: Ye bastante configurable.
• Nireblog: Un poco menos que Blogger.
• WordPress.com: Ye mui configurable.
• WordPress.org: Ye totalmente configurable. Pol mesmu motivu de tener tú’l control del sirvidor, puedes camudar lo que quieras.

• Llicencia del software:

• Blogger: Privativu.
• Nireblog: Privativu.
• WordPress.com: Ye un fork de WordPress.org meyoráu, polo que tamién tien llicencia llibre, pero adaptáu a los sos sirvidores.
• WordPress.org: Ye totalmente llibre y preparáu pa una instalación perfácil en cualisquier sirvidor.

• Complementos:

• Blogger: Tien dellos complementos.
• Nireblog: Tien menos que Blogger.
• WordPress.com: Tien dellos complementos, más que Blogger.
• WordPress.org: Total llibertá pa baxar ún de los mienta qu’hai pela rede, o criar el tuyo propiu.

• Multiusuariu:

• Blogger: Sofitu básicu.
• Nireblog: Nun tien.
• WordPress.com: Tien sofitu pa varios usuarios.
• WordPress.org: Tien posibilidaes abondes de cientos d’usuarios.

• Publicidá:

• Blogger: Adsense.
• Nireblog: Nun puedes poner publicidá.
• WordPress.com: Nun puedes poner publicidá
• WordPress.org: Puedes poner lo que quieras, el blogue ye realmente tuyu.

Resumiendo esti pequeñu análisis, hai que facer incapié en qu’esto ye software y hai empreses mui importantes (Blogger pertenez a Google) detras nun mercáu qu’evoluciona mui rápido, polo que güei un puede sobresalir un y mañana sobresalir otru.

Realmente la opción clara pa la xente asturiano ye Nireblog y WordPress.org (queda-y poco, collabora pa finalo 🙂 ) por tar tornaos (WordPress.com necesita que se torne al asturianu equí), pero pa gustos colores, polo qu’habrá xente que prefiera la falicidá de Nireblog o prefiera la personalización de WordPress, o tar col renome d’una compañía como Google.

Tamién tien importancia que Blogger y Nireblog meten una pequeña publicidá en forma de marcu no cimero de la web.

Pa poner en marcha cada blogue puedes equí:

• Blogger
• Nireblog
• WordPress.com
• Altuxa ufre criar un blogue con WordPress.org, en casu de que nun quieras deberás baxar el códigu de wordpress.org ya instalalu nun sirvidor propiu.

Si quies saber más, equí tienes les referencies nes que me basé:

Referencies:
http://en.support.wordpress.com/com-vs-org
http://weblogs.about.com/od/choosingabloghost/p/WordpressOvrvw.htm
http://wwwhatsnew.com/2007/04/05/nireblog-plataforma-para-escribir-blogs-en-50-idiomas
http://betamagazine.com/diferencias-entre-wordpress-org-y-wordpress-com
http://www.tecnologiadiaria.com/2009/07/por-que-wordpress-mejor-que-blogger.html
http://www.tecnologiadiaria.com/2008/07/diferencias-wordpress-blogger-wordpress-org.html
http://ayudawordpress.com/diferencias-entre-bloggercom-y-wordpresscom