Esti mundu nuesu, l’asturianu, ta convirtiéndose nuna fonte d’esperanzadores, y bones noticies. Lleo nes noticies de prensa l’asoleyamientu d’un traductor online al asturianu.

Toi falando de eslema , una ferramienta que permite traducir testos y páxines web a la nuesa llingua. Baxo’l lema: “Eslema. El mundu, n’asturianu” esti proyeutu fai realidá otra necesidá más de la nuesa sociedá. Y tien les mires puestes muncho más llonxe: Dende la páxina, infórmennos de la posibilidá de traducción al asturianu dende llingües como’l portugués, italianu, inglés, francés, gallegu, catalán y euskera. Namás y namenos!!

Más bones noticies nesti tema, ye la llicencia baxo la que s’espubliza CC-BY-SA 😉 El proyeutu llevóse a cau cola participación de la Universidá d’Uviéu, y la Conseyería de Cultura y llevó más d’añu y mediu el terminalu. Gracies a toos y toes los que fexeron esto posible.

¡Ya finó’l cursu d’Iniciación a Ubuntu!

Acabamos de facer hestoria 😀 siendo’l primer cursu online n’asturianu, y demostrando’l potencial de Dokeos como plataforma de deprendimientu a distancia.

La verdá que foi un placer cuntar con tolos que vos apuntasteis, y esperemos que dientro poco volvamos a poder alcontranos n’otru cursu asemeyáu 😀

Tamién queremos animar a cualisquier organización que-y apetezca, a facer un cursu online n’asturianu de cualesquier xera, pa lo que por supuesto cuntará col nuestru sofitu  😉

Hebo una encuesta anónima pa quien quiso rellenala, onde cabe destacar estes rempuestes:

1. Al 88% de los alumnos/es presto-y muncho’l cursu.
2. Lo que más prestó foi:

3. Qué meyorar:

Inaguramos una nueva estaya en Softastur: Los cursos de deprendimientu online 😀

El primer cursu ye Iniciación a Ubuntu. Deprenderás con una plataforma online n’asturianu, na que tendrás un tutor que t’aidará nel duldes y seguimientu del cursu. Dispondrás de toles lleiciones dende l’entamu, foros, chat pa charrar col restu d’alumnos, wikis, compartir documentos ente los usuarios, apuntes personales…

El cursu ta enfocáu a persones con un conocimientu básicu de lo que ye un sistema operativu, ye dicir, saber qué ye un restolador web, saber cómo organizar los tos documentos… En xeneral, si tas acostumbráu a remanar Windows, nun deberíes tener problemes faciendo esti cursu 🙂

La so duración será dende’l sábadu 26  al martes 29 d’avientu 2009 (inclusive), (dao lo básico de los temes, ye posible qu’en 2 hores ya tu tengas deprendíu 😉 ), ye de baldre y damoste un diploma que reconoza que ficiste’l cursu si aprebes un esamen final (les feches pal esamen test de 15 entrugues será dende’l 28 d’avientu). Ente les feches de duración del cursu podrás entrar y estudiar nos díes y hores que quieras 🙂

P’apuntate rexistrate en http://cursos.softastur.org, y automatriculate nel cursu (si t’apuntes revisa el corréu puxarra, que Gmail insiste en meter los correos de la plataforma ehí xD).

Estudiaremos:

• Definiciones
• Recorríu per Ubuntu:

1. Aplicaciones
2. Llugares
3. Sistema
4. Área de notificaciones
5. Panel inferior

• Cambeos nel sistema

1. Controladores
2. Amestar/Quitar programes
3. Anovar Ubuntu

• Configuraciones del usuariu

1. Fecha, llugares
2. Efeutos visuales
3. Tema
4. Paneles

• Estras

1. Instalar codecs (música, películes, flash).
2. Xeres básiques.

Too esto ye gracies al software llibre, nesti casu Dokeos, qu’avera la llingua asturiana a la enseñanza más moderna. Y remembra que con instalar Dokeos nun sirvidor, ya puedes criar una plataforma de deprendimientu online n’asturianu propia :D.

Pa cualisquier dulda, entruga nos comentarios.

Si llees tarde esti artículu, y quies entamar col cursu ya entamáu apuntate ensin problemes 😉

Avisu esti artículu puede ser demasiáu geek… avisaos quedais…

Toi mui tentáu a montame un repetidor caseru de Radio Sele. Suelo sentir esta emisora cuando voi en coche pero en casa recíbola mui mal y namás que soi a sentila por internet pero, anque nun lo creais, nun toi pegáu al ordenador tol día.

Entós la idea ye esplotar (un pocu más) un PentiumII que tengo de sirvidor pa compartir ficheros impresores etc… esti sirvidor tien tarxeta de soníu polo que namás que tengo de coneutar la tarxeta a un d’esos emisores FM que venden pa sentir el reproductor mp3 na radio del coche y enchufalu con un adapatador de 12V.

El sirvidor nun tien entornu gráficu entos necesitaremos instalar mplayer

sudo aptitude install mplayer

Y pa entamar a sentir la música namás que escribimos el comando mplayer y la url de la radio que queramos sentir, nesti casu la de radio sele.

mplayer http://bach.serveisweb.com/RA163

Pa paralu, por exemplu si queremos cambiar d’emisora o simplemente porque nun vamos sentila n’esi momentu

Control + C

Yá namás que mos queda sintonizar el nuesu “repetidor” nel transistor mientres tamos na ducha o preparando la cena.