Oracle ta acabantes d’asoleyar la nueva versión 3.2.1 de la suite ofimática llibre OpenOffice n’asturianu, que puede baxase dende http://ast.openoffice.org.

Esta nueva versión tien les siguientes meyores:

• Revisaes y meyoraes toles traducciones del asturianu.
• Arranque más rápidu.
• Mayor sofitu de ficheros.
• Meyor importación de tables de Microsoft Excel 2007.
• Meyores n’OpenOffice Calc.

Remembrar qu’OpenOffice ta pa baxar de baldre, ye llibre y tien procesador de testos, fueya de cálculu, xestor de presentaciones, xestor de bases de datos y programa de dibuxu, too ello n’asturianu pol trabayu altruista de l’asociación Softastur.

Atentos:

• Facer un Sistema Operativu: 1.000 persones, 8-10 años

• Traducir esi Sistema Operativu: 50 persones, 5 años

• Preparar, traducir ya implementar Openoffice: 10 persones, 2 años

• Facer la to distro personal: 1 persona , 1 tarde y 1 café 😀 !!!

Estes son dalgunes de les bondaes del software llibre. Como’l códigu ye llibre, yes llibre de facer col códigu lo que quieras. Y entre eses coses, tán, por exemplu, facer la to propia distribución.

• “¿Quier dicir eso que puedo facer el mio Sistema Operativu?”

Non, .. pa eso, necesitaríes 1.000 persones y 8 – 10 años.. 😀 Lo que quier dicir esto, ye que puedes personalizar el to Sistema Operativu, instalando los programes que quieras, poniéndo-y los colores que quieras, los temes, el nome que quieras.. etc y distribuyilu ente los tos collacios. Y nun te fai falta saber de programación. Un bon exemplu son les distros personalizaes qu’esisten, como la satánica o cristiana.

Ye divertío, ye cosa de una tarde. Y depréndense dalgunes coses.

En Softastur, va tiempu qu’usamos la nuesa propia distro. Llámase GNUberu y usámosla sobro tou pal desendolcu de los nuesos proyeutos, ye perútil, y afórranos munchu trabayu. GNUberu ñació allá pel añu 2007, y nun ta de más que sepáis cómo se fai, pa que faigáis la vuesa distro.

GNUberu... qué recuerdos! 😀

exemplu de pantalla de login de Softastur

El nome ye lo de menos, SidriX, UvieuX, AxturieX, Xporting, hai miles de distros, y toes distintes… lo importante ye que la faes nun plis-plás.

• ¿Qué necesitamos? Pues nada, un programín cenciellu, y ganes.

Esisten munchísimos programes que van aidate a facer la to distro: Remastersys, UCK, Reconstructor… Por simplicidá, recomiéndovos Reconstructor que ye una web que lo fai too automáticamente (incluso dende Windows xD):

https://build.reconstructor.org

Ye namás siguir los pasos:

Criamos y dámos-y un nome al nuesu proyeutu, por exemplu: GNUberu, y decímos-y en qué va a basase la nuesa distro (Ubuntu ó Debian, Si queremos un LiveCD, o una imaxe de discu, l’entornu d’escritoriu: Gnome, KDE, Xfce):

Por defeutu llevará los mesmos programes qu’Ubuntu, si queremos amestar o desaniciar programes (nomaos paquetes) especificamoslo en “Packages”, por exemplu amestamos el restolador web epiphany:

Agora ya tenemos la nuestra distro, sólo queda personalizala, pa ello usamos los “Modules”, con estos módulos podemos poner el fondu que queramos, la páxina d’aniciu de Firefox que queramos, l’animación del entamu que queramos… too ello perfácil:

Y a correr!! El programa xenerará una imaxe .iso calcando en “Build” nunos 15 minutos:

que namás tendremos que baxala y grabala nún CD. ¡¡Y yá ta fecho !!

¿Tiempu total? Una hora o dos  (y un café 😀 )

Ye así como se fai una distro. Básicamente, el trabayu más duru ye escoyer unos temes guapos. 😀 😀 ¿Qué pensábeis que yera? Acabáronse los tiempos de xente con barba programando hores y hores…. Linux fai munchos años que yá nun ye así. Según-y vayáis pillando’l tranquillo, podéis dir amestando ésti o aquel programa… ye custión de tiempu “optimizar” la distro

Eso sí… enxamás uséis una distro que nun seya oficial (Ubuntu, Debian, Fedora, OpenSuse ) nel vuesu PC direutamente. Meyor usái una máquina virtual o en mou Live. Les distros caseres nun tienen una comunidá de millones de persones que les testeen y revisen, ni una gran empresa como Red Hat, Mandriva o Canonical qu’invierta en desendolcu ya innovación. Tampoco sabremos si un autor con males intenciones introduz malware o spyware. Asi que cuidadín. 😉

Eslema ye ún de los proyeutos más prestosos n’asturianu, puede tornar testu, webs, ficheros, col motor llibre Apertium 😀 Vamos xugar un poco con Eslema y Firefox, y amosate 2 perbonos trucos pal to restolar diariu 😉

Trucu 1 > Marcador de torna nel intre:

Criamos un marcador na barra de Ferramientes de Firefox.

• Nome: Tornar
• Direición:  Esta llinia (ensin el 1 que ta al entamu).

Agora en cada páxina en castellanu que temos, calcamos nel marcador “Tornar” y tendremos nel intre esa páxina tornada al asturianu.

Trucu 2 > Toles páxines nueves n’asturianu por defeutu:

• Instalamos esti complementu de Firefox.
• Abrimos el menú de Firefox: Ferramientes / Complementos. Seleicionamos URL Suffix y calcamos nel so botón Options. Esto amuesa una ventana na que configuramos Alt+Enter como esto:

Preffix: Esto (ensin el 1 del entamu).
Suffix: &output=es-ast

Agora, si en Firefox introducimos una direición web (ensin http://www.), por exemplu, google.es y calcamos Alt+Enter, direutamente aparez n’asturianu 😉

Usar OpenTrand pa los 2 trucos anteriores

OpenTrad tien 2 ventaxes sobre Eslema:

• Nun amuesa’l banner.
• Dalgunes webs vense mal con Eslema y bien con Opentrand.

Pa usar Opentrand usái esta direición pal trucu 1; y esti prefixu pal trucu 2 (ensin sufixu nel complementu URLSuffix).

De xuru qu’esti tema da muncho más xuegu 🙂 Si tienes más idegues ponles nos comentarios.

Edición 14 marzu 2010: Avisanos Kevin nos comentarios d’una web onde tan los scripts pa los marcadores de Firefox de toles llingües 🙂 Visitalo equí. ¡Gracies Kevin!

Lo prometío ye deuda, y, como anunciábemos fai un mes, OpenOffice, acaba d’asoleyar la versión 3.2.0, que por primer vegada inclúi la Llingua Asturiana . Gracies al equipu de Softastur.

Dempués d’un trabayu de 2 años, yá ye oficial 😀

¡¡¡¡¡Descarga OpenOffice.org n’Asturianu pa Ubuntu, Windows, o Mac!!!!

La versión final d’OpenOffice 3.2.0 inclúi munches meyores:

• Arranque más rápidu (5 segundos).
• Meyor sofitu pal formatu ODF.
• Sofitu pa formatos propietarios como los documentos XML protexíos por contraseña de MS Office.
• Nuevos diagrames en Chart.
• Xestión avanzada del copia y pega.
• N’asturianu 😉
• Y abondes más…

Güei ye un día históricu pa la llingua asturiana, por fin dispón d’una suite ofimatica avanzada y llibre 😀 Incluyendo un procesador de testos, una fueya de cálculu, pa facer presentaciones, bases de datos, debuxos y esquemes y fórmules matemátiques.

Puedes baxala dende equí. ¡A esfrutala! 😀

Gracies a tol equipu de softastur, que trabayó llibre, gratuita, ya desinteresadamente durante 2 años, pa facer esti proyeutu realidá.

Gracies al proyectu de desendolcu y traducción de Softastur:

¡¡Por fin tenemos un LiveCD d’Ubuntu n’asturianu!!

• Problema qu’había: Ya disponemos nos CD oficiales del instalador n’asturianu, pero si arranques dende’l CD pa ver cómo ye Ubuntu, aparez too n’inglés ¿Por qué? Pues porque sólo s’incluyen les llingües más usaes por motivu d’espaciu nel CD (Si metieran les 240 llingües d’Ubuntu nun-yos cabríen otres aplicaciones).
• Igua: Al tar l’instalador incluyíu dende la cabera versión, abondes utilidaes como UCK o reconstructor permiten criar la to imaxe de CD personalizada col arranque y entornu na llingua que quieras (de les disponibles nel instalador).
• Ventaxa de criar un LiveCD o LiveUSB: Puedes copialu nun CD/DVD, y puedes dir a cualesquier ordenador, arrancalu col CD/DVD metíu na unidá de CD y ya tienes Ubuntu n’asturianu, ensin instalar na, y ensín camudar na nel ordenador nel que lo prebes, ¡al sacar el CD/DVD l’ordenador siguirá esautamente igual que taba!. Valte pa enseñar Ubuntu y pa prebar si nun ordenador tiraría bien con él. Tamién puedes copialu nun llápiz USB o discu duru USB. La ventaxa d’esti métodu ye qué Ubuntu arrancará mui mui rápido (casi tanto como’l discu duru), abrirás y remanarás aplicaciones nel intre y los cambeos que faigas como personalizalu, instalar programes, criar documentos ¡caltendránse nel USB! Igual que nel casu anterior, nel ordenador nun se faerá nengún cambéu
• Cómo instalalu:
  • En CD/DVD: Baxa la imaxe .iso y grabala en formatu “imaxe” a un CD/DVD col Nero o un grabador llibre como Infrarecorder. Solo te queda arrancar un ordenador col CD/DVD metíu.
  • N‘USB: Baxa la imaxe .iso, ya instalala nun llápiz USB o discu duru USB: Dende Ubuntu ye perfácil, vete al menú Sistema/Alministración/Criar USB d’arranque. Dende Windows tamién puedes con uSbuntu. Solo te queda arrancar un ordenador col USB metíu.

• Usu: Aunque la imaxe permite la instalación nel discu duru, ¡¡¡ENCAMENTAMOSTE A QUE NUN INSTALES UBUNTU CON ESTA IMAXE!!! El so únicu destín ye prebar/usar Ubuntu n’asturianu en LiveCD. ¿Por qué dicimoste esto? Porque pa garantizar la estabilidá d’Ubuntu sólo un CD fechu por Ubuntu tien esa estabilidá. Nun deriváu non oficial nun ta garantizada esa estabilidá Si quies instalar Ubuntu nel discu duru baxa de baldre un CD fechu por Ubuntu.

• ¿Nun arranca? Tienes que camudar l’orde d’arranque de la BIOS pa qu’arranque dende CD o USB

Cualesquier dulda o problema que tengas, avisanos nos comentarios.

Güei presentóse en rueda de prensa TermAst, una web entamada pola Academia de la Llingua que recueye propuestes terminolóxiques especializaes.

Nesti proyeutu collaboren el Colexu Oficial d’Inxenieros d’Informática d’Asturies y Softastur, que trabaya al traviés del so propiu diccionariu onde van esbillando los términos que depués proponen pa integrase en TermAst.

La noticia en:

• Asturies.com
• Asturnews
• Les Noticies

Y darréu el videu de TPA:

Esti pasáu vienres 8 de Xineru del 2010 (remembra-y la fecha pa cuando les cuntemos a los nietos), aprobó’l Gobiernu d’España, nel primer Conseyu de Ministros el SO paquete de medíes para pesllar webs de baxaes, medíes que se escapen completamente de toa lóxica. ¿Y en qué va a consistir? El procesu será tal qu’asina:

Los propietarios de drechos d’autor (particulares o entidaes) denunciarán ante una Comisión de Propiedá Intelectual a aquellos sitios que supuestamente violen drechos d’autor. Dicha Comisión decidirá si infrinxen o non drechos de propiedá intelectual pa, nos casos afirmativos, comunicá-ylo a los responsables de les webs. Nesti puntu abrese un plazu d’alegaciones pa dichos responsables tres del cual si la comisión alministrativa entiende que son insuficientes, ordenase la retirada del material protexíu. Finalmente si les presuntes infracciones persisten, solicitarán autorización ante la Sala de lo Contencioso-Alministrativo de l’Audiencia Nacional pa bloquiar o pesllar la web que toque, la Sala tendrá que resolver nun másimu de cuatro díes. Recibida l’autorización, la Comisión de Propiedad Intelectual faerá efectiva la medida del peslle de la web.

Too esto nun ye más qu’un galimatías alministrativu y xurídicu con un únicu oxetivu: blindar, más tovía, una industria cultural totalmente obsoleta que nun ye capaz a sustentar el so arcaicu modelu de negociu.

Pero tamos a tiempu d’intentar frenar esta babayada, la normativa aún tien que pasar pol Parlamentu y pol Senáu y además el Gobiernu tamién necesita camudar varies lleis más si quier ponela en funcionamientu. Ye necesario pues dar a entender al restu de fuerces polítiques y ciudadanía ante lo que realmente tamos y pa eso ta esta pequeña “Guía básica d’insurrección escontra la normativa del Gobiernu d’España pa pesllar webs”:

Guía básica d’insurrección escontra la normativa pa pesllar webs n’España:

• La nueva normativa carez de xacíu. La Xusticia española ya cunta a día de güei con ferramientes suficientes pa lluchar escontra los que salten drechos de propiedá intelectual. Que siempre resuelva escontra de la industria nun ye culpa de naide y menos de los ciudadanos.
• El poder executivo intenta trespasar competencies que son propies del xudicial y con ello dinamita un de los pilares fundamentales de cualisquier democracia que ye la separación de poderes.
• Se-y da rangu de drechu fundamental a la propiedá intelectual, dalgo que debería ser dilucidáu con mucha más calma y por varios estamentos y nun solamente pol executivu.
• Si la normativa s’aprueba, supondrá un agraviu comparativu con otros sectores industriales y los propios ciudadanos. ¿Por qué la industria cultural tien que tener “xuicios rápidos” y el restu non? Pongovos un gráficu bien claru:

• Va a cargar más trabayu a l’Audiencia Nacional, tribunal escepcional que s’ocupa de los casos más graves, como por exemplu los rellacionaos con terrorismu o corrupción.
• Los ciudadanos nun somos los culpables de qu’un sector té muriendose pol avance teunolóxicu. Pasó lo mesmo n’innumerables ocasiones a lo llargo de la hestoria y en nenguna s’impulsó la so supervivencia a base de lleis.
• Quien decidirá en primer instancia si hai o non infracción será una comisión alministrativa, non un xuez.
• Los xueces pasarán per enriba del asuntu, nun decidirán si determinada web vulneró drechos de propiedá intelectual.
• El procesu puede usase escontra cualisquier sitiu de la rede que los demandantes consideren te violando drechos de propiedá intelectual, aunque’l Gobiernu asegure que solamente s’usará escontra “non más de 100 webs”.
• L’intercambio de fichero o enllaces en sitios pa facilitar l’intercambiu de los mesmos nun ye delitu n’España. La llei ta dando por supuesto que lo anterior ye un delitu al afitar una comisión pa investigalo.
• La normativa choca o vulnera varios artículos de la Constitución (20, 24.2).
• Nun ye de recibu que pa llevar la nueva norma alantre, el Gobiernu tenga que camudar na más y na menos que cuatro lleis, una d’elles la Llei Orgánica del Poder Xudicial.

Acciones escontra la normativa y el procesu:

• Si tienes accesu a medios tradicionales distribuye n’ellos los argumentos citaos anteriormente.
• Dexa patente la to disconformidá cola normativa na to cuenta d’Identi.ca, Twitter, Facebook o cualquier otru sitiu social.
• Distribui los argumentos equí espuestos (u otros), nel to blogue o web.
• Pide-y al restu de fuerces polítiques del país que voten negativamente escontra toa medida rellacionada cola nueva normativa (vía Twitter por ejemplo: @unidá, @iunida, @eaj__pnv, @ciu, @ppopular, etc).
• Anicia cualisquier otra aición de llucha que se te ocurra y sofita les que conozas.
• Contribui a centralizar les quexes en determinaos canales (si ya esiste un grupu en Facebook de protesta, nun crees otru, xúnete a esi)
• Menea, retwittea y copia…

Y poco más qu’amestar. Ye’l momentu de que nós, los ciudadanos, actuemos. La rede nos otorga un poder de presión tremendu, como ya vimos con el #manifestu el cual demostró que la llínia ente la vida real ya Internet ta frayada.

Tocános.

Tornao y adaptao de Alt1040.

{Esto llicenciase güei más que nunca embaxo Creative Commons (CC)} (Y como’l restu del blogue ;))

Edición 19 Febreru 2010: ¡Ya ta disponible pa baxar! Pa ello, vete equí.

Ye pa mí un preste davos anuncia de que por fín, esta vegada sí, la comunidá asturiana dispondrá de OpenOffice n’asturianu.

Dempués de más de 2 años de munchu trabayu, gracies al colectivu Softastur, que ye quien desendolca el proyectu, vamos poder esfrutar d’esta perpoderosa ferramienta, competidora direuta de Microsoft Office, a la que nun tien res qu’envidiar. La primer versión que verá la lluz con llingua asturiana incluyía ente les grandes llingües del mundu va ser la 3.2, y tará disponible nun curtiu espaciu de tiempu. 😀

Lo que puedo adelantavos pel momentu ye que arranca en tiempu récord. Malpenes segundu y mediu, y yá tienes la interface llista. Los menús son bien agradables y cenciellos.

Dende los menús, como siempres, accedemos a les aplicaciones que necesitemos, nesti casu, el Procesador de testos, tamién denomáu Writer

Y yá podemos ponenos a redautar testos, facer tables, inxertar gráficos, y too ello, dende la nuesa interfaz n’asturianu. Cenciellu, cómodu, intuitivu ya compatible colos formatos de testu más conocíos, .doc, .txt, .vor, .odt (formatu abiertu), .xml, y munchos más. Tamién permite esportar a .html

Pero como suite ofimática que ye, OpenOffice, tamién nos permite usar una fueya de cálculu. L’aplicación denómase Calc, y ye compatible con ficheros .xls Con Calc podréis facer operaciones contables, representar gráficos de cálculos, ya remanar tables de datos

Dientro de la suite ofimática, tamién tenemos un programa de Presentación de diapositives, denomáu Impress, un editor de gráficos vectoriales, y un programa de base de datos. Pero esos voi enseñávoslu n’otru post. Nun quiero dexar de dar les gracies a TOL EQUIPU de Softastur. Dende’l primeru al últimu. Dicir tamién, que la meta que se marcó Softastur aporta al so final; esto ye, ufrir a la comunidá asturfalante d’una ferramienta informática completa: Un Sistema Operativu, y una suite ofimática en llingua asturiana.

Nun quier dicir esto que’l trabayu de Softastur finare. Non. Esto nun fizo más qu’entamar…:D

Saludos a tolos asturfalantes. El futuru ye nuesu.

Edición 20 Xineru 2010: ¡Ya tenemos web oficial d’OpenOffice! Ehí puedes baxar l’instalador 😉 Remembra que pa Ubuntu vendrá de serie dende la versión 10.04.

El día 21, nel taller d’instalación n’Uviéu, espérate esto 😀

Nota: Softastur sigui trabayando na OpenOffice y esperamos que na siguiente versión te n’asturianu. Mientres puedes disfrutar cola GNOME Office n’asturianu 😉

Música por Xera.

Una perbona noticia, gracies al duru trabayu altruista de Softastur:

L’asturianu ta nel puestu 25 de les 244 llingües incluyíes n’Ubuntu 9.10, tando completáu al 79% (falamos de la instalación básica d’Ubuntu y Kubuntu).

Teniendo a sólo un 3% a llingües tan importantes como’l catalán o’l portugués.

¡Felicidaes a toos pol trabayu fechu! 😀 L’asturianu más vivu que nunca ¡Gracies!