Navegar por páxines con munchos flash incrustaos puede ser un dolor, porque pa que nos vamos engañar… flash player ye una gochada que acaba reventando’l ordenador…

Esto acabóse con un plugin marviosu pa Firefox y derivaos, Flashblock, lo que fai ye bloquiar toles pelicules de flash incrustaes nuna web y amuesa un botonín co logo de Flash. Si queremos ver esa pelicula (por exemplu en videu de youtube) calcamos nel botonín y a correr… un presto vamos…

Pa instalar n’Ubuntu yo ficelu por aptitude, pero puedes facelo siguiendo esti enllaz https://addons.mozilla.org/es-ES/firefox/addon/433

Fai unos 10 díes Xuacu facía un llamáu pa participar nel Ubuntu Free Culture Showcase, onde s’escueyen les obres artísitiques que van distribuise nes copies d’Ubuntu de la so prosima versión (karmic koala). Que amás va ser la primera qu’incluya l’instalador n’asturianu… y más novedaes que por prudencia voi guardame…

El casu ye que Xera apurre un remix del so tema Valdescabres, esbilláu del so primer discu Lliendes, pa participar… a ver si hai suerte por que yera lo que nos faltaba a los asturianos p’acabar d’invadir Ubuntu… (esto si que ye un LoCo team activu) 😉

Personalmente quiero agradece-yos el esfuerzu de conseguir una remezcla que nun pasare del mega que piden nel concursu, y pola paciencia d’aguantame, más teniendo en cuenta que taben tocando per Italia…

Esta versión usa una llicencia Creative Commons by-sa 3.0 es

BAXAR VALDESCABRES (Ubuntu remix)

Recordaivos que podeis baxar tola música de Xera (Creative Commons) dende la so páxina web. Y tar atentos que tan a puntu d’asoleyar el so segundu discu Tierra…

Taba cantao, aunque munchos puxamos pola integración del software libre  y dalgunos camentábamos que podía llograse nel plan Escuela 2.0 anunciáu por Zapatero. La propia presidenta de Microsoft Ibérica adelantó güei a la axencia Efe que’l proyeutu ta siendo tuteláu direutamente pola empresa que representa, con participación personal de Bill Gates:

María Garaña confirmó’l anunciu de Bill Gates de que va a collaborar col Gobiernu n’esti proyeutu y dixo que’l preciu que va a ufiertar Microsoft pol so sistema operativu y l’Office que llevarán los ordenadores “va a ser espectacular, menor qu’una xinta nun autoserviciu”.

Pie Semeya: "Amiguinos for ever"

Conmovedor. Sobre too si tenemos en cuenta que, por mui barato que seya, supon lucro pa una compañía privada en detrimentu del restu y que l’apuesta pol sotware llibre sí qu’acercaría’l costu a cero.

Eso sí, la compañía amuesa ciertu gráu de condescendencia:

Ye muy importante que los neños puedan usar l’ordenador nel colexu pero tamién na so casa, polo que la empresa nun pondría nengún problema a que lleven dos sistemes operativos, un de Microsoft y otru de códigu abiertu…

Lo cual agradecemos profundamente, aunque un cada vez entiende menos eso del exerciciu de l’aición pública en pos del interés xeneral frente al particular. ¿Que Microsoft nun tien incoveniente en que los ordenadores lleven también software llibre? ¿Y quién ye Microsoft para tener inconvenientes nun plan públicu nacional? El mundiu, al revés, otra vegada.

Cierto ye que’l plan tendrá distinta concreción por comunidaes autónomes, pero parez claro que si’l Gobiernu con esti pasu, munches de les alministraciones autonómiques seguirán direutamente l’exemplu ensin plantegase otra alternativa, especialmente si tenemos en cuenta’l gráu de desconocimientu xeneral sobro nueves teunoloxías qu’existe ente los políticos, coles escepciones ya conocíes de comunidaes como Extremadura, Andalucía, Valencia, Castilla-La Mancha o Catalunya.

Too esto calquelo de Mangas Verdes, prestóme como taba redactao.

Hai quien diz que nun hai xuegos modernos pa Ubuntu… pero en realidá tu puedes xugar nun ordenador con Ubuntu a cualesquier xuegu d’ultima xeneración… y anque esti que vos pongo d’exemplu yá tien unos añinos (Rugby 2005), puede facese con cualesquier otru..

¿Qué como lo conseguí? fácil… una sintonizadora de tv… instalé tvtime y pola entrada de videu compuestu coneuté la mio ps2, y el audiu con una “Y” de RCA a minijack estéreu a la tarxeta de soníu (en realidá fice un seleutor mecánicu pa nun tener que soltar cables cuando quiero meter otros chismes)… ¿qué ye trampa? ¿por? ¿nun toi xugando n’Ubuntu…? ;P

En fin reconozo que ye una fricada… pero si quixera tener un ordenador pa xugar tendría de cambealu cada pocu… prefiero coneutar una consola y siguir con mi equipín vieyín pa trabayar…

Nun me presta tener más aplicaciones de la cuenta executandose al mesmu tiempu, y cuando va unes selmanes entamé a caciplar con identi.ca y twitter quería una forma d’anovar la mio cuenta n’estos servicios ensin tener que depender de la web, pero tamién ensin tener más preseos de los que yá taba usando nel escritoriu.

La solución foi amestar un plugin a pidgin col que puedo coneutame a estos servicios pa poder siguir y anovar dende esti cliente de mensaxería.

Vamos a “Sistema/Alministración/Oríxenes del software” y na pestaña “Software de terceros” calcamos en “amestar” y ponemos esta llinia:

deb http://ppa.launchpad.net/sugree/ppa/ubuntu jaunty main

Calcamos amestar otra vuelta y ponemos:

deb-src http://ppa.launchpad.net/sugree/ppa/ubuntu jaunty main

Agora vamos a “Aplicaciones/Accesorios/Terminal” y pegamos esta llinia:

sudo apt-key adv –recv-keys –keyserver keyserver.ubuntu.com 0CF459B8DF37ED8B

Calcamos enter y cuando acabe namás que queda instalar pidgin-microblog, buscandolu dende “Sistema/Alministración/Xestor de paquetes Synaptic” o dende la mesma terminal col comandu:

sudo aptitude install pidgin-microblog

Agora vamos a pidgin y dende “Cuentes/Xestionar cuente” calcamos en “Amestar” y en “Protocolu” escoyemos identi.ca twitter o el serviciu que mos preste y configuramos los nuesos datos como si fuera una cuenta de mensaxería instantanea.

Cuando acabemos, tendremos otru contautu na llista de collacios de pidgin pal serviciu que temos acabantes d’amestar.

Si te presta tener una imprentadora PDF nel sistema pues amestala en Jaunty instalando’l paquete cups-pdf dende’l Xestor de Paquetes de Synaptic o dende la terminal con

sudo apt-get install cups-pdf

Si la emplegáis los documentos van apaecer nuna carpeta llamada PDF dientro de la carpeta personal.

A pedefear 😉

N’Asturies, cuando daquién gana una carrera, dicimos que foi el primeru. Y nun dicimos que foi “el primero“. Esa “o” rincha nes oreyes, y distingue ente’l que bebe la sidre a sorbiatinos, y el que sabe escanciala y tomala d’un güelpe.

Ye por eso, que el primeru, tien de ser el 1ᵁ….   y non el 1º.

Conseguir el carauter ᵁ, ye bien cenciello. Tai sollertes:

Calcamos al mesmu tiempu, les tecles Ctrl + Mayúscules + u (nesi intre, saldrános una “u” con una llinia embaxo)

Siguimos calcando (agora d’una nuna) lo siguiente: 1d41 (y tecla Enter)

Y yá lo tendremos.

Esti ye el mou cenciellu…  L’abegosu, (non por dificultosu, sinón por llargu) ye atopar el símbolu ente les distintes fontes de lletres, ya inxertalu. En dalgunos programes, nun puede facese más qu’enxertándolu dende los menús, pero na mayoría puédese. Déxovos una captura de pantalla d’Abiword, que ye ún de los que hai que inxertalo dende’l menú, pa que veáis la fonte (Dejavu Sans). Esto alcuéntrase nel menú  “Enxertar“–>”Símbolu…” (facéi clik na imaxe p’agrandala)

Si enredamos muncho y desaniciamos un panel d’Ubuntu (son les barres d’enrriba y embaxo), y nun sabemos recuperales, executamos esti comandu calcando Alt+F2 😉

gconftool-2 --recursive-unset /apps/panel

Vía: Kaeltas.

Pa dalgunes coses igual nos interesa tener la fonte d’Ubuntu, sí, la del nome, esa fonte redonda.

Pa ello simplemente instales esti paquete: ttf-ubuntu-title. Dende consola puedes facelo asina, o dende synaptic gráficamente.

sudo aptitude install ttf-ubuntu-title

Vamos desplicavos equí como poner Edubuntu nun ordenador de clas d’escuela, virtualizáu baxo Windows. Esto ye lo que ficimos nos ordenadores pa la presentación d’Edubuntu, que obviamente nun podíemos particionar.
¿Esto qué significa? Que nun necesites particionar, que simplemente instales un programa, cargues una imaxe, pones a pantalla completa y… ¡voalá! Parez que tes ante Edubuntu 😀 Cuando quieras desanicialo, esborres la imaxe, desinstales el programa, y ¡too como taba enantes! 😀
Los pasos son percenciellos, y puedes facer esto baxo Windows, Mac, cualisquier GNU/Linux…

Condiciones previes:

• Tener al menos 500 MB de RAM nel ordenador con Windows.
• Tener permisos d’alministrador en Windows, simplemente pa poder instalar Virtualbox.

Pasos (a facer una sola vegada):

• Baxa d‘equí Virtualbox (La que pon Windows host si ye que va ser baxo Windows).
• Instala Virtualbox en Windows.
• Baxa la imaxe fecha por nós d’Edubuntu calcando equí.
• Descompríme fasta obtener el ficheru .vdi. Puedes usar pa ello 7-zip o WinRAR.
• Guarda esi ficheru nel direutoriu que quieras de Windows, tampoco lo dexes mui a la vista, ya que si lu esborra dalguien tendríes que volver a baxalu.
• Abres Virtualbox y seleiciones “New/Nuevo”.
• Na ventana que sal escueyes “Next/Siguiente”.
• Name pones lo que quieras, y escueyes Sistema Operativu “Linux” y abaxo d’ello “Ubuntu”.
• Na siguiente ventana: Memoria RAM, si tienes 500MB física nel ordenador pones equí 180 MB, si tienes 1GB de memoria física pones equí 384MB, si tienes 2GB de memoria física o más, pones 700MB equí. Calcamos “Next/Siguiente”.
• Na siguiente ventana: Marcamos “Using existing hard disk/Usar disco duro existente”, y calcamos na carpetina con una flecha p’arriba.
• Na ventana qu’aparez calcamos en “Add/Añadir”.
• Seleicionamos el ficheru .vdi que descomprimimos nel pasu 4ᵁ.
• Calcamos nel botón “Select/Seleccionar”.
• Calcamos en “Next/Siguiente” y finalmente en “Finish/Finalizar”.

Estos pasos fué pa instalalo.

Pasos que faeremos pa executar Edubuntu:

• Abrimos Virtualbox.
• Calcamos en “Start/Iniciar”.
• La primer vegada nos dirá poniendo popups pa deprender a manexalo 😉
• Llegamos al login d’Edubuntu. Cuando lo manexen los neños, l’usuariu y la contraseña será “escolin”. Cuando queramos nós como mayestros/es xestionar Edubuntu, usaremos l’usuariu y contraseña “mayestru”.
• Agora’l trucu: Calcamos Ctrl Drechu + F, esto pondrá Edubuntu a pantalla completa 😀 Y parecerá que temos ante Edubuntu 😀 Calcamos Ctrl Drechu + F pa salir de la pantalla completa.

Con estos cenciellos pasos ya podeís dar clas n’asturianu de matemátiques, xeografía, deprendimientu del mediu, física, ofimatica, inglés…

Hai dalgunos programes que tienen la base de datos n’inglés, nós sólo tornamos los programes, pero tamos criando un llugar en Softastur pa que los mayestros/es puedan compartir les bases de datos que faigan 😀 por exemplu, el programa Kanagran ye pa ordenar les lletres d’una pallabra n’inglés, ye perbonu pa deprender inglés, pero tú como mayestru/a puedes facer una base de datos pa que les lletres a ordenar seyan d’una pallabra n’asturianu 😀

Si tienes cualisquier dulda sobre cómo facer la instalación de Virtualbox, d’Edubuntu virtualizáu, de como facer una base de datos, contáctanos o pon un comentariu nesti post 🙂 Tamién creo que nun se m’escaeció nengún pasu, si ves que nun te cuadra dalgo, pon un comentariu 🙂

Gracies por averar a los neños y a ti mesmu al software llibre 😀