Si bien nun hai virus y el sistema ye’l mas seguru, tamién hai que tener un poco de xacíu y llevar a cabu dellos pasos pa tener un sistema y una proteición de datos a prueba de bombes 😉

Activa’l tornafuegos: Pa ello en consola
sudo ufw enable
sudo ufw default deny
Tamién si prefieres una interface gráfica, instala Gufw
sudo apt-get install gufw
Importancia: 10/10

Configura bien el to router
Activa WPA o WPA2 pal to router. Les contraseñes WEP son perfáciles de hackear.
Tamién activa una máscara MAC colo que sólo los tos ordenadores señalaos puedan entrar.
Importancia: 10/10

Usa contraseñes segures
Sí, por favor, camuda esi “1234” por otra cosa, por exemplu “4321” 😉
Importancia: 10/10

Encripta los tos datos
Dende la versión 8.10 encriptar los datos ye perfácil nuna carpeta pa tal xera.
Nes prósimes versiones, ta previsto que la encriptación seya a tol home del usuariu 🙂
Importancia: 10/10

Manten el to sistema actualizáu
Por muncha seguridá que se tenga, ye perimportante tener un sistema actualizáu colo que evitar vulnerabilidaes conocíes.
Importancia: 8/10

Usa grupos y permisos
Cada usuariu puede ser miembru d’ún o varios grupos, y los tos archivos debieren tener claro los permisos pa ti, el to grupu y pal restu.
Importancia: 7/10

Nun uses root pa too
Nun debes considerar una molestia que’l sistema pida la clave d’alministrador pa procesos críticos. Ye perimportante dixebrar los “poderes” de cada usuariu, polo tanto, nun uses sesiones root pal trabayu cotidianu, les probabilidaes de frayar el sistema son grandes si nun sabes perfeutamente lo que faes.
Importancia: 7/10

Fae backups
Ḥode bastante perder tolos datos. Discos duros espurríos, hackers, cayíes del portátil… pueden ḥodete tola información.
Importancia: 6/10

Comprueba cuentes non usaes
Munches vegaes criamos usuarios que nun volvemos a usar. Desanicialos dafechu cuando nun vayan usase ye lo meyor.
Importancia: 4/10

Fonte: Techradar.com

Cola entrada automática en GNOME, dalgunes aplicaciones requieren les claves que’l sistema tien almacenaes. Polo que según la nuestra configuración, por seguridá puede qu’aplicaciones como Evolution, Xestor de Rede… nos pida la contraseña del Aniellu de contraseñes predeterminaes en cada sesión. Esto ye porque Ubuntu almacena les distintes claves nun depósitu d’un programa, y por seguridá necesita que demostremos que somos los alministradores p’acceder a elles. Cuando entramos cola nuestra cuenta desbloqueamos el depósitu login, que ye onde tan les contraseñes.
Si te molesta que t’entruge la contraseña, crearemos otru depósitu que sustituye el del login, pero ensín que necesite la nuestra autorización.

N’Intrepid Ibex:
Dir a Aplicaciones > Accesorios > Contraseñes y claves de cifráu > Editar > Preferencies
Una vez abierto, calca en login y Desaniciar depósitu, confirmamos el desanicíu.

Agora amestamos-y una nueva, calcando en Amestar un depósitu: Nell ventanu pidiendo un nome pal nuevu depósitu escribimos login, al calcar en Amestar pídenos les contraseñes y calcamos en Aceutar, dexándoles vacíes, y confirmando que les dexaremos ensín encriptar.

Ya non entrugará más peles contraseñes del Aniellu 😀

Pa Hardy, echa un vistazu equí.