Paez absurdo, pero si uses un portatil vieyu como reproductor de videu conectáu a una tele pola salida vga, igual t’interesa tener el portatil zarráu y que’l monitor siga activu.

Esto ye pa Debian Stable que sigui usando Gnome 2, nel alministrador d’enerxia nun tienes opción de facelu porque da les opciones más “normales” pa un portatil (apagar, suspender, ivernar o apagar pantalla). Entos pa facer esto vamos a “Aplicaciones>Ferramientes del Sistema>Editor de configuración” desplegamos la carpeta “apps” y dientru d’esta “gnome-power-manager” y finalmente esbillamos la carperta “buttons” veremos una entrada que diz “lid_ac” esta ye la que nos interesa, ya que namás que mantendremos la pantalla encesa si el portatil ta enchufáu a la toma de corriente,  calcacamos entos encima de “lid_ac” col botón derechu y nel menú que nos sal esbillamos “Editar clave” y cambiamos el valor (yo lo tenía en “blank”) a “nothing” aceutamos y guardamos y yá podemos zarrar la pantalla si que apague la tele.

Nel casu de que queramos que mantenga la pantalla encesa anque te tirando de la batería. facemos lo mesmu pa “lid_battery”.

Yá s’espublizó la versión 19 de Firefox. Ente les nueves meyores qu’incorpora, como la velocidá d’arranque, funciones pa desendolcadores de CSS en HTML5 y dellos bugs iguaos, la principal ye’l nuevu llector integráu de PDF’s.

Namás necesitamos facer clic nel enllaz d’un pdf, y Firefox va abrínoslu dientro la nuestra ventana. Tenemos por supuestu les opciones de zoom, axuste de páxina, descarga del documentu pdf, y posibilidá de amosalu nuna barra llateral en forma de “miniatures” o “d’esquema“. Tamién pue visualizase a pantalla completa y inclúi la posibilidá de guardalu nos nuestros marcadores.

Fai unos díes qu’acaba d’espublizase LibreOffice 4, con grandes meyores d’usabilidá. Ente les más importantes, la posibilidá d’introducir comentarios nos ficheros de testu, compatibilidá con formatos rtf y docx , cambeos visuales como l’usu de “Personas” de Firefox, pero la más prestosa de toes, ye la que voi tratar nesti post: la posibilidá de remanar una presentación de diapositives fecha en Impress, usando’l nuestru smartphone por control remotu. Sicasí, tengo que dicivos que magar que taba incluyida en LibreOffice 4, un cambéu de última hora fizo que namái dispongan d’ella los que usen la version DEV (desendolcadores). El restu, vais tener qu’esperar a la 4.0.1 😉

Equí vos va’l videu:

Güei, 4 de febreru, Thunderbird cumple 1 añu dende que s’asoleyó en llingua asturiana.

Felicidaes!!

Por coses de la vida, esta selmana véome obligáu a dar “cursillos” de deprendizaxe d’Ubuntu a una colla xente qu’enxamás oyeron lo que ye un repositoriu o una terminal, y claro, como la cosa va d’Ubuntu pues de too faen comparanza col Windows.

Resulta que pidiéronme el “Paint”, y n’Ubuntu nun usamos “paint”. Lo normal ye usar GIMP. Y equí-yos vieno el problema, que ye que nun sabíen facer llinies rectes. Como nun ye la primer vegada que m’entruguen esto, (por que nun ye una opción que tea a la vista) a ver si sirve pa otros:

• Abrimos GIMP y seleicionamos la ferramienta de pintura que queramos (llápiz o pincel). Col botón esquierdu del mur, facemos clic nel primer puntu de la nuestra llinia.

• Agora movemos el punteru, y calcamos na tecla MAYÚSCULES (o Shift). Eso dibuxará una llinia hacia’l nuestru punteru.

• Volvemos a facer clic col punteru. Tendremos la llinia que queríemos. Y yá podemos soltar la tecla MAYÚSC

Fecho.

Reconozo que la opción ye difícil de dar con ella, y que muncho meyor si esistiese un iconu. Pero nun hai más que fixaxe nel menú dinámicu que sal na ventana de dibuxu, y que va diciéndonos les opciones disponibles pa cada triba de ferramienta. 😉

Pa nun tener fallos ortográficos nos nuestros mails, podemos instalar el Correutor ortográficu nel Thunderbird. Vais ver, con semeyes, lo fácil que ye. Empezamos escribiendo un corréu, por exemplu, el d’abaxo.

Imaxina que tienes el Firefox configuráu colos tos marcadores favoritos, les contraseñes guardaes, les preferencies de vista de llingüetes, privacidá, les canales RSS….

Y el Thunderbird configuráu colos tos filtros anti SPAM, les cuentes de corréu, los contautos, los rexistros de chat, les plantíes, los borradores, les regles d’entrada y distribución por carpetes…. los EMAILS!! (tanto unviaos como recibíos), les etiquetes, .. etc.

Y agora imaxina, que tienes que trabayar n’otru equipu, y entamar dende cero a configurar tolos filtros, correos, marcadores… un coñazu vaya! y amás casi nunca queda como nel equipu orixinal.

Nesti post vas deprender cómo tener la mesma configuración en Firefox y Thunderbird en cualquier equipu:

Simplemente vete a la  carpeta personal del to equipu. Calca Ctrl+h pa ver los ficheros y carpetes ocultes (son les que lleven un puntu delantre)

Pues copia eses carpetes (.mozilla y .thunderbird) y apégales na carpeta personal del nuevu equipu . Y pista. Tendrás Firefox y Thunderbird cola mesma configuración. 😀

NOTA: Date cuenta que tas apegando carpetes ocultes: Pa ver si les apegasti bien o non, tendrás que calcar Ctrl+h, sinón, nun vas veles 😉

Güei vamos ver cómo instalar LINE n’Ubuntu. Lo primero ye desplicar qué ye LINE: ye una app de mensaxería nel intre pa móviles (smartphones), competidora direuta de Whatsapp, que tamién permite facer llamaes de vozIP y tien munches más funciones que la so rival. Lo meyor de too: ta disponible p’Android, iOS, y tamién pue usase dende’l ordenador de sobremesa: PC y Mac

Lleer más »

Qué habrás armao… 😀 😀

Pa los que sois culu inquietu y teáis tol día caciplando coles coses, y probando versiones nueves, betes, etc, etc… ye posible que con tol baruyu de versiones despistéis a los programes de lo que tienen que facer. Y una d’estes coses ye que vos pase (como a mín) que’l Thunderbird nun vos abra los enllaces nel navegador cuando pincháis nellos.

SOLUCIÓN 1:

Lo más normal, ye que nun tengas bien configurao l’aplicación predeterminanda pa cada tipu d’aición. Dende’l dash, escribi “Preferencies del sistema” o “Axustes del sistema” (dependiendo de la versión d’Ubuntu qu’uses, va ser una o otra). Na ventana que s’abre, vete a abaxo y seleiciona “Detalles”.

….o cenciellamente, nel ‘Dash’ o Tableru, escribes Detalles 😉

Vas a la Seición: “Aplicaciones predeterminaes”, y defines que p’abrir webs, seya Firefox. Tien que quedar como esto:

SOLUCIÓN 2:

En Thunderbird, vais a Ayuda–>Reaniciar colos complementos desactivaos. Na ventana que vos apaez, nun marcáis dengún caxellu y pista. Si funciona, ye que teníeis un complementu (que vete tu a saber porqué) taba dándovos fallu. Namás vos queda nesi casu, dir probando ún a ún (activando y desactivando) hasta dar con él. Ye lo qu’hai.

SOLUCIÓN 3:

Cuál ye la ruta al “executable” del Firefox que uses? Ye lo primero qu’hai que saber. Abri un terminal, y escribi:

whereis firefox

Lo normal ye que te diga:

firefox: /usr/bin/firefox /etc/firefox /usr/lib/firefox

Eso quier dicir que tienes el Firefox onde tien que tar, en /usr/bin/firefox  (que ye la ruta que nos importa). Pero yo por exemplu, nun lu tengo ehí, porque soi un cacipleru, y la versión que uso ye siempre la Nightly, y téngolu en /home/el_mio_usuariu/firefox/firefox  Seya una ruta o la otra, tendremos que facer esto:

1. Vete a la to carpeta personal. Calca Ctrl+h pa ver les carpetes ocultes. Verás una que tien un puntu delantre y que se llama .thunderbird Entra nella
2. Entra na carpeta que se llama XXXXX.default y abri’l ficheru denomáu prefs.js con un editor de testu.
3. Abaxo del too del ficheru, amiesta estes dos llinies:

user_pref("network.protocol-handler.app.http", "/usr/bin/firefox");
user_pref("network.protocol-handler.app.https", "/usr/bin/firefox");

NOTA: Si la ruta onde tienes el firefox nun ye /usr/bin/firefox , pues sustitúyesla pola tuya, lóxicamente. Nel mio casu, yo punxe: /home/el_mio_usuariu/firefox/firefox.

Guarda los cambeos y pista.

[vía alt1040.com]

Steam pa Linux ta finalmente disponible. Esti pue ser l’entamu definitivu pa que’l sistema operativu llibre s’empiece a convertir finalmente, en daqué curioso pa gamers. Hasta agora, l’únicu mou d’executar la plataforma de videoxuegos de Valve yera per duana d’una máquina virtual (por exemplu Wine)

Pel momentu, Steam pa Linux va tener 39 xuegos, ente los que s’atopen los conocidísimos Left 4 Dead 2, Team Fortress 2, Serious Sam 3 o World of Goo. Va Funcionar namái n’Ubuntu, Arch Linux y OpenSuse.

Pue descargase yá’l paquete pa Arch Linux, los ficheros pa Open Suse o l’executable pa Ubuntu. En Gizmología pues lleer les instrucciones detallaes pa instalar Steam en Linux. Pero curiáu, una vegada que lu tienes, asegurámoste que ye enforma adictivu, especialmente nes dómines del Black Friday nel que siempre hai ufiertes bien bones.

Left 4 Dead 2

Team Fortress 2

World of Goo

Serious Sam 3