Pa dalgunes coses igual nos interesa tener la fonte d’Ubuntu, sí, la del nome, esa fonte redonda.

Pa ello simplemente instales esti paquete: ttf-ubuntu-title. Dende consola puedes facelo asina, o dende synaptic gráficamente.

sudo aptitude install ttf-ubuntu-title

Vamos desplicavos equí como poner Edubuntu nun ordenador de clas d’escuela, virtualizáu baxo Windows. Esto ye lo que ficimos nos ordenadores pa la presentación d’Edubuntu, que obviamente nun podíemos particionar.
¿Esto qué significa? Que nun necesites particionar, que simplemente instales un programa, cargues una imaxe, pones a pantalla completa y… ¡voalá! Parez que tes ante Edubuntu 😀 Cuando quieras desanicialo, esborres la imaxe, desinstales el programa, y ¡too como taba enantes! 😀
Los pasos son percenciellos, y puedes facer esto baxo Windows, Mac, cualisquier GNU/Linux…

Condiciones previes:

• Tener al menos 500 MB de RAM nel ordenador con Windows.
• Tener permisos d’alministrador en Windows, simplemente pa poder instalar Virtualbox.

Pasos (a facer una sola vegada):

• Baxa d‘equí Virtualbox (La que pon Windows host si ye que va ser baxo Windows).
• Instala Virtualbox en Windows.
• Baxa la imaxe fecha por nós d’Edubuntu calcando equí.
• Descompríme fasta obtener el ficheru .vdi. Puedes usar pa ello 7-zip o WinRAR.
• Guarda esi ficheru nel direutoriu que quieras de Windows, tampoco lo dexes mui a la vista, ya que si lu esborra dalguien tendríes que volver a baxalu.
• Abres Virtualbox y seleiciones “New/Nuevo”.
• Na ventana que sal escueyes “Next/Siguiente”.
• Name pones lo que quieras, y escueyes Sistema Operativu “Linux” y abaxo d’ello “Ubuntu”.
• Na siguiente ventana: Memoria RAM, si tienes 500MB física nel ordenador pones equí 180 MB, si tienes 1GB de memoria física pones equí 384MB, si tienes 2GB de memoria física o más, pones 700MB equí. Calcamos “Next/Siguiente”.
• Na siguiente ventana: Marcamos “Using existing hard disk/Usar disco duro existente”, y calcamos na carpetina con una flecha p’arriba.
• Na ventana qu’aparez calcamos en “Add/Añadir”.
• Seleicionamos el ficheru .vdi que descomprimimos nel pasu 4ᵁ.
• Calcamos nel botón “Select/Seleccionar”.
• Calcamos en “Next/Siguiente” y finalmente en “Finish/Finalizar”.

Estos pasos fué pa instalalo.

Pasos que faeremos pa executar Edubuntu:

• Abrimos Virtualbox.
• Calcamos en “Start/Iniciar”.
• La primer vegada nos dirá poniendo popups pa deprender a manexalo 😉
• Llegamos al login d’Edubuntu. Cuando lo manexen los neños, l’usuariu y la contraseña será “escolin”. Cuando queramos nós como mayestros/es xestionar Edubuntu, usaremos l’usuariu y contraseña “mayestru”.
• Agora’l trucu: Calcamos Ctrl Drechu + F, esto pondrá Edubuntu a pantalla completa 😀 Y parecerá que temos ante Edubuntu 😀 Calcamos Ctrl Drechu + F pa salir de la pantalla completa.

Con estos cenciellos pasos ya podeís dar clas n’asturianu de matemátiques, xeografía, deprendimientu del mediu, física, ofimatica, inglés…

Hai dalgunos programes que tienen la base de datos n’inglés, nós sólo tornamos los programes, pero tamos criando un llugar en Softastur pa que los mayestros/es puedan compartir les bases de datos que faigan 😀 por exemplu, el programa Kanagran ye pa ordenar les lletres d’una pallabra n’inglés, ye perbonu pa deprender inglés, pero tú como mayestru/a puedes facer una base de datos pa que les lletres a ordenar seyan d’una pallabra n’asturianu 😀

Si tienes cualisquier dulda sobre cómo facer la instalación de Virtualbox, d’Edubuntu virtualizáu, de como facer una base de datos, contáctanos o pon un comentariu nesti post 🙂 Tamién creo que nun se m’escaeció nengún pasu, si ves que nun te cuadra dalgo, pon un comentariu 🙂

Gracies por averar a los neños y a ti mesmu al software llibre 😀

Tuve intentando criar un Xiki.to pa deprender col sirvidor baxo Ubuntu Server 9.04, y fallaba al usar la http://direición/cadena, debiendo ser http://direición?codigo=cadena.
Pa ello fae falta criar un ficheru .htaccess nel directoriu onde ta’l ficheru index.php, que redireicione la URL como vemos enrriba, pa ello criamos el ficheru .htaccess:
RewriteEngine On
RewriteRule ^([a-zA-Z0-9\-]+)/?$ index.php?codigo=$1 [L,NC]
Pero non furrulaba… *-) Yo camentaba que taba mal el códigu del .htaccess…
Pero al final ye qu’Ubuntu Server lleva desactivada esa opción por seguridá 😛

P’activala:
Edita’l ficheru: sudo nano /etc/apache2/sites-enabled/000-default
Na llinia 11 (recien instaláu Ubuntu) del códigu del Directory /var/www/:
Options Indexes FollowSymLinks MultiViews
AllowOverride None
Order allow,deny
allow from all

Camuda AllowOverride None por AllowOverride All.
Quedando asina:

Options Indexes FollowSymLinks MultiViews
AllowOverride All
Order allow,deny
allow from all

Reanicia Apache: sudo /etc/init.d/apache2 force-reload

Ya ta 😉 agora sí te debiera furrular 😀
Gracies a Mikel por aguantame entrugando durante 3 díes 😛

Fonte: Foros d’Ubuntu de Venezuela.

Softastur, imparable, ya tien una nueva meta pa tornar: ¡Xubuntu!
Con esta variante llixera d’Ubuntu, los ordenadores vieyos dirán como un tiru.

El to vieyu ordenador será un nuevu gran depredador, un pequeñu mur, rápidu como’l vientu capaz d’ablucate cola so velocidá.
Ponémonos yá a la xera, nun tiempu curtiu esperamos tenelu tornáu 😀

Atari metíose nun bon llíu, tien un xuegu distribuyíu nes tiendes que fae usu de códigu llicenciáu baxo GPL, por ello ta obligada a distribuyir esi códigu lliberándolu baxo GPL de nueves, pero Nintendo prohíbe códigu llibre  pola llicencia del SDK nos sos xuegos.

La interesante hestoria perbien cuntada equí.

Yo prefiero abondo la música llibre que puedes alcontrar en páxines como Jamendo.
Pero si quies guetar/oyir/baxar música privativa agora tienes un guetador que te permite oyir online y baxar munchísimos cancios: http://n-mp3.com

Gueta pela rede los cancios, y amuesatelos nuna llista, y too ello perrápido.
Y tenemoslu n’asturianu 😉

Fasta’l prósimu 1 de xunetu, puedes apuntate nel Primer Concursu IRC sobro Software Llibre.

El concursu son partides ente dos xugadores nun canal d’IRC nes que los xugadores deberán responder a entrugues (principalmente en castellanu), rellacionaes cola cultura del software libre y la cultura hacker, ganando un puntu quien retruque primero.

Xugaráse un mínimu de tres partidos na primer fase. Los primeros clasificaos tendrán premios como un netbook Acer, MP3… Aunque lo principal ye pasar un bon ratu y ver qué tal andes en cuanto a software llibre 🙂

Si tovía tienes duldes, puedes echar un vistazu a como sería ¿Fácil non? 😉

Más información y p’apuntate equí.

Ayer foi otru día de satisfacción pola esperiencia con Edubuntu.

La instalación ficimosla nel telecentru de Sama (gracies Eloy pol sofitu! otra vegada 😉 ) sobro equipos con Windows XP y 480 MB, onde instalamos Virtualbox, copiamos una imaxe d’Edubuntu asignando-y sólo 180 MB de memoria (portándose perbien Edubuntu pa esa cantidá de memoria), y afitamos pantalla completa ¡voalá! L’ordenador engaña y parez que temos ante un Edubuntu real (non virtualizáu baxo Windows). Quisimos que fuere asina, porque nun yera plan particionar ordenadores que nun son de nós, y nes escueles lo más normal será que tengan Windows y tampoco dexen particionar pa instalar Edubuntu. Con esti métodu qu’esplicaremos nun post más alantre, podrás instalar ensin particionar 😉

Lluéu llegaron los neños/es, y la verdá que ye ablucante lo bien que se-yos da les nueves tecnoloxíes a los rapacinos/es 😛
Quiero recalcar que si a un neñu/a das-y un entornu dafechu n’asturianu, cola xente alrodiu falando-y n’asturianu y l’ordenador n’asturianu, el neñu/a fálate dafechu n’asturianu, de manera natural. Ye un esponxa que s’adapta al mediu perrápido 😀

Tamién vinó Próspero Morán a grabanos, y podreís ver la esperiencia nun programa de “Nós” de la RTPA 🙂

Sólo queda da-y milenta gracies a los neños/es y a sus pas/mas por venir, y permitinos demostrar que l’asturianu ye perfectamente válidu pa dar clas de cualisquier materia n’asturianu. ¡Queremos la educación n’asturianu dafechu!

Equí dalgunes semeyes:

¡Esti vienres 19 de xunu asoleyaráse Edubuntu n’asturianu!
Aprovechando la ocasión, dende Softastur fadremos una preba de clas sólo n’asturianu de varies asignatures.
Tamién somos conscientes que nes escueles tienen windows, polo que prepararemos una imaxe virtualizada d’Edubuntu, que será percienciella de poner nun ordenador con Windows, pareciendo que tien Edubuntu, y pudiendo baxala dende equí, dende’l sábadu.

Sobro les clases serán nel cibercentru de Sama (Llangréu) de les Escueles Dorao, segunda planta, esti vienres 19 de xunu:

• De 18.00 a 18.40 daremos clas real a neños pequeños (ente 3 a 6 años) de conocimientu del mediu, nel sentíu de manexar un mur, un tecláu, xuntar formes, facer cuentes básiques…

• De 18.45 a 20.00 daremos clas real a neños ente 7 a 11 años, dando matemátiques, inglés, informática y xeografía n’asturianu con Edubuntu.

Los profesores serán docentes que falarán n’asturianu y usarán Edubuntu n’asturianu como aida na so impartición de la materia 🙂

Tas invitáu/ada a venir, tamién convidamos a quien quiera trayer neños/es ente 3 a 11 años, quien quiera venir a dar clas, facer un estudiu sobre los resultaos de l’actividá, o venir a conocer Edubuntu 🙂

¡Un saludu y vemonos!

Google acaba asoleyar la versión alpha de Google Chrome 3, el restolador propiu (non l’alternativu de la comunidá pa GNU/Linux), y cola comodidá de ser un .deb. (remembra qu’esta versión ta enfocada a desendolcadores, nun siendo recomendable pa equipos en productivu)

Pros: Les impresiones pa ser un alpha nun pueden ser meyores, arranca na mitá del tiempu que Firefox, y va perrápidu.

Contras: La so nula integración de la interface col sistema y el tema seleicionáu. Además de nun reconocer cuando una web tien flash y entrugar por instalalo, como fae Firefox.

Respecto a la memoria RAM consumida n’execución depende del númberu de llingüetes abiertes, aunque diría que anden a la par Firefox y Chrome. Tamién tengo que dicir que lo probé en Hardy, con Firefox 3 beta 5. Sería interesante prebalu na cabera versión estable de Firefox, pa una comparación más xusta.

Resumiendo, diría que bona impresión de Chrome pa ser un alpha, y que Firefox tendrá que dir poniendose les piles p’algamar un arranque muncho más rápidu si nun quier tremar nel futuru. Tamién si Google quier ganar cuota de GNU/Linux tendrá que meyorar muncho la so integración col sistema.

Vía: OcioLinux