¡Dende güei podemos esfrutar d’Acurti.es! 😀 Un acurtiador n’asturianu.

Con esta web podemos acurtiar un enllaz, a una URL muncho más curtia.

Les ventaxes d’usar un acurtiador son estes:

• Meyor difusión de los tos enllaces reduciendo la so llonxitú.

• Nun romper los enllaces nos tos emails.

• Nun desencaxar un blog.

• Aforrar dalgunos bytes.

¡Por una educación informatizada n’asturianu de baldre con Edubuntu!

Tamos dando les caberes igües a esto:

Los escolinos y mayestros podrán dar clas n’asturianu de cualisquier materia 😉

Nunos díes, asoleyámoslo 😀 ¡Dir preparándovos, será la revolución! 😉

Nun mes más o menos finaremos Edubuntu.

Tenemos la idega de facer una preba de dar clases con Edubuntu n’asturianu de varies materies n’asturianu.
Con ello, a parte de cellebrar l’asoleyamientu d’Edubuntu n’asturianu, demostrar que la llingua ye perfectamente válida pa deprender cualisquier materia n’asturianu, dende informática, matemátiques, física…

Pa ello necesitamos que nos eches tú, un gabitu. Cuntamoste lo que pretendemos.

Nuna aula dar clas durante 1 hora (pa que los neños/es nun cansen) de varies asignatures, por exemplu 20 minutos cada una, seríen 3 asignatures, con escolinos de 6 a 11 años.

Pa ello necesitamos:

• Atopar un aula con ordenadores. Pa evitar camudar la configuración del ordenador, instalamos VirtualBox y copiamos una imaxe d’Edubuntu, cuando finemos esborramos la imaxe, desinstalamos VirtualBox y l’ordenador quedará como taba 🙂

• Atopar 3 ó 4 mayestros/es pa dar clas n’asturianu de diverses materies (sólo dará clas unos 20 minutos cada mayestru).

• Atopar escolinos d’ente 6 a 11 años, que quieran venir, y los sos pas que quieran trayelos (la clas durará sólo 1 hora).

Avisaremos a tolos medios de comunicación, y grabaremoslo enteru nós con una camara de videu pa espublizalo na rede.

¿Animeste a collaborar? Unvíanos un corréu eletrónicu  dende esti formulariu cola to propuesta, en cuantes la recibamos, pondrémonos en contautu contigo. ¡Milenta gracies!! 😀

Semeya orixinal esbillada de “La verdá ye mentira“

El Partíu Pirata Suecu algama col 7.1% de los votos 1 escañu nes Europees 😀

Dicir que ye un de los pocos partíos que firmaron el pactu pol software llibre n’Europa.

¡Perbona noticia pa la defensa de les llibertaes básiques na Rede! ¡Puxa’l Partíu Pirata!

Equí toos tan baillandooooooo… y yo cola mio pata de maeraaaaa, soi’l pirata baillón de la cerveza y roooon!! (Canciu de Boides)

En cuantes Ubuntu actualice’l paquete de tornes, dispondremos de la suite ofimática Gnome Office 😀
Con ella dispondremos de:

• Abiword: Procesador de testos.
• Gnumeric: Fueya de cálculo.
• Planner: Xestor de proyeutos.

Remembravos que la primer office tornada ye OpenOffice, pero tamos en procesu de xubilo al upstream (cosa necesaria pa que te n’asturianu) 😉 Agora tamién podemos esfrutar de Gnome Office 😀 P’amestala, di-y al menú Aplicaciones/Amestar/Quitar y guetar “Gnome Office“.

UBUNTU FÁCIL

Yá toos sabemos que hai un veceru de mensaxería instantaneo n’asturianu, denomáu Pidgin. Pidgin foi el primeru de la factoría de Softastur n’aportar a los nuesos ordenadores, pero agora podemos esfrutar d’otru veceru de mensaxería pa toos aquellos qu’entá tienen señaldá del afamáu MSN de Micro$oft. ¿Y cómo se llama? … pues emesene

Emesene, ye multiplataforma y ta desarrolláu en Python y GTK+2. Y el so nome, un tantu coñón, nun ye una casualidá 😉 Emesene ye un “clon” de MSN Messenger qu’intenta tener una interface más cenciella y llimpia que’l veceru oficial. Nin que dicir tien, que pa instalalu, n’Ubuntu namás tendremos que dir a Aplicaciones–>Amestar/Quitar… pondremos na caxa de gueta “emesene” y hala, a instalar! 😀

…y sí… tamién ye válidu pa webcam 😀

Más información na Uiquipedia: http://ast.wikipedia.org/wiki/Emesene

Una vegada más, l’equipu de Softastur, sospréndenos con esti nuevu retu qu’ensama parte del proyeutu Edubuntu: GCompris

Y ye que con GCompris, los neños tienen una bona ferramienta más pal so deprendimientu, y cómo non, en Llingua Asturiana. GCompris ye un programa de cómputu educacional con diferentes actividaes para guaḥes ente 2 y 10 años d’edá. Dalgunes actividaes son como xuegos, pero siempres educatives. Ente otros, permite deprender y practicar calculos y testu asina como aniciase nel manexu d’un ordenador.

En total, GCompris comprende más de 50 actividaes, ente les que podemos alcontrar:

• Descubriendo la computadora: tecláu, mur, diferentes movimientos del mur, …
• Álxebra: tabla de memoria, enumberación, tabla de duble entrada (balance), imaxe espeyu, …
• Ciencia: La canal, El ciclu del agua, El somarín, …
• Xeografía: Alluga los países nel mapa.
• Xuegos: axedrez, memoria, …
• Llectura: práutica de llectura
• Animación: Enseña a los neños los principios básicos de l’animación y permíte-yos criar pequeños dibuxos animaos.
• Otros: Deprende a dicir la hora, “Frañetiestes” de pintures famoses, dibuxos por vectores, …

¿Quién dixo non? El rexurdir de la llingua ye imparable…

Gracies a tolos que faen posible esti proyeutu. 😀

World of Goo ye un de los meyores xuegos del 2008.
Los sos criadores espliquen:

Les estadístiques del nuestro blog dicennos que cerca del 5% de los nuestros visitantes usen Linux, asina que nun tabemos seguros si habría muncho interés de la comunidá Linux o non. ¿Los usuaros de Linux xuegen? Puede ser. ¿Ye sólo un problema del güevu y la gallina onde los usuarios de Linux xugaríen más si más xente fae versiones de los sos xuegos pa Linux?

La nuestra decisión de facer que World of Goo tuviera disponible pa Linux nun tenía mayor discusión ¡Porque los xuegos DEBEN tar disponibles pa Linux!

La noticia ye que portaron el xuegu a GNU/Linux 😀 Si les empreses se van animando a facer esto, posiblemente’l puntu más floxu de GNU/Linux dexará de selo 😉
El xuegu ye de pagu, y podemos baxar la demo con un de los mundios equí (Si uses Ubuntu escueye’l ficheru .deb y simplemente abrelu pa instalalu).

Los criadores tamien nos falen d’una anécdota de les tornes 🙂

Sabíemos dende l’entamu que queríemos que’l nuestro xuegu tuviera disponible pa cualquiera, independiente de la plataforma. Amás teníemos el deseyu secretu de ver xurdir les idegues d’apertura que tan detrás de Linux. Conocimos a la persona que fizo’l nuestro port de Linux porque él yera un fan que crió un wiki pa tornar el nuestro xuegu n’una gran cantidá de llingües. Quedamos ablucaos, les tornes de la nuestra comunidá yeren de una calidá superior a les que recibimos de servicios de torna pagaos. Los aportes fueron tan bonos y rápidos, que decidimos usar la torna de la comunidá pal nuestro release europeu de la versión de Wii. Incluso nos echaron un gabitu a facer el beta test de ca llingua.

Vía: FayerWaye

Una de les potencies del software llibre ye que podemos camudar too, pero a vegaes podemos meter la pata.

Si xugaste col editor de la configuración de GNOME y tracamundiaste dalgo, usa estos comandos pa volver too a por defeutu 🙂

Dende la terminal (Menú Aplicaciones/Accesorios/Terminal):
gconftool-2 --recursive-unset /

Si sólo quies recuperar los paneles:
gconftool-2 --recursive-unset /apps/panel

Si solo quies reaniciar la configuracion de compiz executa:
gconftool-2 –-recursive-unset /apps/compiz

Vía: Ubuntu Life