Asturianizando Ubuntu
N’esti artículu trataremos esplicar pasín a pasín como configurar Ubuntu n’asturianu, nun vos asustar que ye mui fácil.
Al final del artículu podéis ver un video esplicativu con tol procesu (nun se ven mui bien los menus pol tamañu de youtube).
Suponiendo que tenemos Ubuntu instalao en castellanu (el procesu ye igual n’otros idiomes namás que cambien los nomes de los menus).
Diremos a Sistema>>Administración>>Soporte de idioma
Tendremos que dar al sistema la clave d’usuariu pa poder siguir, entos veremos un llistáu con tolos idiomes disponibles pa Ubuntu. Buscamos l’asturianu (apaez n’inglés como “Asturian”), lo activamos y calcamos “Aplicar”.
Entos el sistema instalará tolos paquetes necesarios y fairá les configuraciones necesaries pa dar soporte al asturianu (tenéi paciencia), encuantes acabe tenemos que desplegar el menú “Idioma predefinido” y calcar “Asturian”.
Calcamos “Aplicar” y “Aceptar”. En cuantes reiniciemos l’equipu podremos ver los mensaxes n’asturianu.
Atención: Entá hai mui poques aplicaciones n’asturianu polo que cuasi tolos mensaxes del sistema saldrán n’inglés, tamién tenéi en cuenta que ye la primer versión asoleyada polo que tendrá munchos errores. Podeis facer andecha con correiciones o traducciones nueves en Launchpad (ye preferible rexistrase y dase d’alta nel grupu de trabayu n’asturianu).
