Paez que Nokia entamó yá a dar los primeros pasos dende que MeeGo anunciare al mundu la so entrada dende’ famosu día 1:

Y paez que Nokia tampocu nun s’anda con piḥaes. En referencies clares a los teléfonos móviles con restricciones, como l’iPhone, llega Nokia y cálca-yos esto:

Phones should be open to anything: “Los teléfonos deberíen ser/tar abiertos a cualesquier cosa”

The best devices have no limits: “Los meyores preseos nun tienen llímites”

Esto va tar bien caliente d’equí a Ochobre 😀

Como yá diximos, l’oxetivu de Meego ye poder instalase en netbooks, handsets (PDA’s, teléfonos móviles) y esto inclúi tamién les famoses tablets. Equí vos dexo un par d’exemplos d’amuesa de Meego nunes tablets. ¿Imaxínestelo n’asturianu?

NOTA: Ye una versión pre-Alpha, entá non axustada, y mirái lo bien que va yá…

-¡Pero cómo!  ¿Diseñáis ensin usar Mac? Oh my God!  ¡Qué facéis!  Sacrilexu!

Pues sí. Esto mesmo ye lo que proponen facer (y tán faciendo) la xente de Durian Open Movie Project. Y fáenlo con bon xeitu, como podéis ver más abaxo, usando ferramientes como Blender y GIMP.

-“¡Vaaaalgame lo que hace el payo ranger!”

Yá taba yo fartucu d’escuchar la disculpa “namber guán” de tou Maqueru: “Ye que pa diseñar, nun hai res meyor qu’un Mac“. Pues será que namás tamos falando de diseñu camisetes, y el Mac debe tomate la talla, escoyer el color ya imprentales él solucu, porque yo con Gimp, “diseño” de puta madre. Dicho seya de pasu que tolos diseñadores que conozo qu’usen Mac, úsenlo pa eso: pa dibuxinos nes camisetes, carteles d’espicha y dalgún logotipu de páxina web. Hai dalgún que fai hasta montaxes de bodes.  Nun fai falta un Mac nin tantu circu. (Habrá dalgún que trabaye en ḥolibud, pero entá nun conozo dengún)

Más bien paezme que na escuela, deprendieron a usar unes ferramientes (non llibres, por ciertu. Menudos artistes.. yá escaecieron aquello de la llibertá), y agora pása-yos como al que deprendió a pescar con marabayu pero nun sabe con guxarapa. Va ser que, Mac queda cool, como les obres artístiques que naide entiende. Si nun les entiendes, nun yes “cool”. Y pa ser cool y artista al empar, hai que tener un Mac. Polo menos los windowseros, pasen d’estes coses. Nun tienen tiempu a elles, lo d’ellos ye pasar el santu día matando y matando virus.

Bono, pues too esto de l’animación nun ye nuevo. Yá fai tiempu que sabemos d’una retafila de pelis d’animación feches con ferramientes de Software llibre, como por exemplu Avatar, la más reciente. Agora, la xente de Durian amuésanos el so trabayu, y ye cosa que podemos ver cásique a la selmana, porque van anovando la so páxina web. Equí vos dexo un trailer de la peli, tenéisla disponible en calidá 1080p HD:

Equí unos minutos del procesu:

La páxina del proyeutu, equí:

http://durian.blender.org/

Más vídeos fechos con Blender, equí: http://www.blender.org/features-gallery/movies/

Norabona!!

El proyeutu OpenOffice ta preparando eventos… si quies xunite a ellos, tienes más información equí: http://wiki.services.openoffice.org/wiki/ES/10aniversario

…. hai alternatives al esclavismu 😀

Taba mirando si había manera d’instalar JDownloader n’Ubuntu, y resulta que sí, qu’esistía nos repositorios:

https://edge.launchpad.net/~jd-team/+archive/jdownloader 😀

Poro, yera tan cenciello como abrir una terminal, y escribir estes 2 llinies:

sudo add-apt-repository ppa:jd-team/jdownloader

sudo apt-get update && sudo apt-get install jdownloader

Pero resulta que la xente de Canonical faite les coses cencielles, asina que si nun yes de los que te presta andar cola terminal, vete a Aplicaciones–>Centru de Software d’Ubuntu, y llisto, a esfrutar d’esti xestor de descargues. 😉

Esta ye la previsualización de la versión (pa Desendolcadores) de Meego 1.1 en teléfonos móviles. Meyor qu’Android, y meyor qu’iPhone, que falen en cazurro…. ¿Será ésti el primer teléfonu en llingua asturiana? Nun escaezamos que cuenta col sofitu de Nokia, Intel y la Linux Foundation… 😉

Dalgunes semeyes, pa que veas l’aspeutu de MeeGo en móviles…

Nun va muncho que llanzóse Android 2.2 (la versión pa móviles de Google). Una de les meyores destacables d’Android yeren les tocantes al restolador, sobro’l so primer competidor, el iPhone. Los resultaos de los tests d’Android, yeren bien claros, y Android demostró que yera MUI superior al iOS4 nel iPhone.

Pues bien, agora llega MeeGo, del que yá falamos equí dalguna vegada. MeeGo yá sacó la so versión pa Netbooks, y dende’l día 1 de xunetu ta disponible pal so usu en móviles.

Les pruebes nun se ficieron esperar, y fai unos díes sometieron a MeeGo a los mesmos tests. Evaluóse tanto’l rendimientu de los restoladores como la execución JavaScript y los resultaos del test SunSpider son ablucantes:

MeeGo: 4,215 segundos

Android: 5,795 segundos

iPhone 4: 10,902 segundos

Equí vos dexo la imaxe de MeeGo corriendo nun N900, colos resultaos

Y los otros resultaos: Android versus iPhone

El N900 de Nokia, tien un preciu muncho más asequible que’l iPhone, asina que yá sabéis el regalu pa les Navidaes. Por ciertu, que’l proyeutu MeeGo pertenez a la Linux Foundation, y como proyeutu llibre que ye, podría tar disponible en llingua asturiana non tardando muncho…..  😉

… o tamién podéis tirar les perres nel móvil de la “mazana”, con sistema operativu en llingua cazurra.

El pasáu miércoles, los miembros d’Ubuntu recibieron un corréu de Jorge O. Castro diciéndo-yos que yá taba disponible la nueva fonte d’Ubuntu. La fonte, ta en fase beta, y namás pueden disponer d’ella los miembros d’Ubuntu, que cuenten con permisos pa la descarga nos repositorios privaos. Esti pequeñu privilexu, ye’l que me permite amosávosla (que non pasávosla). Ye guapa y bien cuidada. Pel momentu namás hai versión regular (nin negrina o cursiva), y tendréis qu’esperar hasta agostu pa qu’Ubuntu abra’l repositoriu.

Si vos presta, tamién podéis ver los estudios que se faen a la hora de confeicionar un nuevu tipu de lletra nesti PDF

Nuevu taller d’instalación de Softastur na Selmana Negra col sofitu del Conceyu la Mocedá de Xixón.

Amosámoste ya instalámoste Ubuntu 😉

Si vas venir a instalar intenta mirar esta web enantes: http://wiki.softastur.org/Install

Sobro’l Kindle 2 en particular

Fae 2 selmanes que tengo esti ebook.

Facía 1 mes que taba buscando’l meyor ebook posible al menor preciu, y Amazon (fabricante del Kindle) pola competencia del Nook y iPad baxó 100$ esti aparatu que voi a analizavos nos puntos siguientes…
Dicir enantes que ya tuve un Papire de 5″ y polo tanto tengo una pequeña perspectiva pa opinar pros y contres 🙂

• Preciu: 205,8 € TOO (Aparatu, unvíu, aduana) a fecha xunetu 2010.
• Unvíu: Tarda unos 4 díes llaborales por UPS.
• Accesorios: Sólo lleva’l Kindle, un cargador d’alimentación USB y un adaptador d’esi cargador USB a enchufe americanu. Ye dicir, puedes cargar l’aparatu coneutándolu al ordenador, o mercando un adaptador d’enchufe americanu a européu.

• Funda: Nun lleva funda, y la meyor ye la propia que vende Amazón por 34$, pero sal cara cola aduana y los gastos d’unvíu (55€). Lo meyor ye mercala nel Amazón del Reinu Xuníu. Yo merque esta por  18£ (25€ al cambiu). Equí fallé de lleno 😛 Si merques el Kindle xunto a la funda los gastos d’unvíu y aduana son los mesmos, asina que lo meyor ye pillar la funda orixinal a la vez que’l Kindle.
  
• Oxetivu: Lo qu’hai que tener mui claro ye qu’un ebook val sólo pa lleer llibros, nun esperes efeutos ablucantes al pasar páxina, ni otres coses.
• Llectura: Lleer un ebook ye EXACTAMENTE como lleer un llibru, la esperiencia ye la mesma. La pantalla ye E-ink, y nun emite lluz, y la so resolución ye pergrande polo que ves los carauteres igual que si tuvieren imprentaos, colo que’l cansanciu visual ye’l mesmu que lleer un llibru de papel. A los 5 minutos escaeces que tas con un aparatu electrónicu y enfrasqueste na llectura 🙂 Además puedes axustar perfectamente la fonte al tamañu que más te preste, asi como poner el testu horizontal o vertical. Yo por fin toi dando usu a tolos PDFs que tenía per casa, y ye que lleelo nuna pantalla TFT o LED ye pa ḥoder los güeyos.
• Batería: Dura 2 selmanes a unes 2 hores de llectura diaries, ya que la teunoloxía E-ink sólo gasta al camudar la páxina.
• Remanar documentos: El Kindle lleva wifi cola que podrás mercar documentos direutamente dende Amazon.com y tenelos nel Kindle nun minutu. Si nun quies gastar un duru, al coneutar el Kindle al ordenador mediante’l cable USB aparez un discu nuevu, nel que podrás arrastrar los tos documentos (ePUB, DOC, PDF, TXT, MP3…).
• Cómo se ven los documentos: Los ebooks son perfeutos pa cualesquier testu non complexu (tables de datos…). Les noveles nos ebooks vense perfectes, tamién val pa partítures por exemplo.

• Optimizar un documentu: Al mercar el Kindle, asociasete una cuenta pepin@kindle.com. Si mandes un email con un axuntu (PDF, ePUB, DOC…) a esa direición dende’l to email, el Kindle lo recibirá optimizáu a formatu AWZ (privativu de Kindle) pola WIFI que lleva. ¡Esto tien un costu según los MB del llibru (aprosimao unos 0,10€/llibru)! Lo meyor ye que tamién tienes una cuenta pepin@free.kindle.com, mandes un email col documentu axuntu y el tema “convert” y totalmente de baldre mandente un email col documentu optimizáu pal Kindle con estensión AWZ. Respecto a la optimización, una novela ye too testu de siguío y por eso se verá perfecta, pero un PDF complexu tendrá qu’axustase a 6″ y tables de datos o demás estructures complexes tendrá saltos de llinia raros. Tamién dispones del programa multiplataforma Calibre, pero préstame más remanar los documentos a man, y Calibre recibe dalguna crítica respeuto a la calidá de la conversión de PDFs a MOBI (el meyor formatu pal Kindle dempués del AWZ). El mio conseyu ye usar l’email @free.kindle.com. Aclarar qu’una novela en PDF veráse perfeuta tras convertila a un formatu MOBI o AWZ.
• WIFI: El Kindle lleva una wifi cola que restolar pela tienda de llibros d’Amazon de baldre. Tamién puedes restolar per Internet y consultar l’email, pero n’esti casu cobra na to cuenta d’Amazon. Yo pa evitar problemes, tengo la WIFI apagada 😉

• Ventaxes del Kindle respeuto a otros ebooks: Conozo 3 ebooks distintos, y el Kindle tien estes ventaxes:

1. Perbon contraste (muncho más qu’otros ebooks).
2. Nun ye táctil ni con color: Que seya táctil ye meter otra pantalla por medio y perder contraste, y pa lleer noveles, prefiero un blanco y negro 😉
3. Restolar la web (pagando).
4. Preciu: Un ebook de 6″ n’España valte a lo poco 275€, el Kindle 205€.
5. Diccionariu d’Inglés: Con cualesquier testu n’inglés coloqueste nel entamu d’una pallabra y salte’l significáu automáticamente.
6. Notes escrites por tí amestaes al testu. Fácil y cenciello.
7. Subrayar testu. Fácil y cenciello.
8. Esportar notes y surayaos: Les notes y el surayáu xenera un ficheru My Clippings.txt que puedes sacar al to ordenador. Veolo per útil sacar fragmentos pa estudiar o resaltar frases pa estudios.
9. Llee’l testu n’inglés.

• Contres del Kindle:

1. El so pesu (210 gr.) ye un poco más que’l restu d’ebooks.
2. Tien pa oyir MP3, pero’l reproductor ye bastante cutre, ensin pantalla de xestión, pudiendo sólo dir p’alantre y posar la reproducción.
3. DRM: Usa un formatu MOBI camudáu pa facelu privativu con estensión AWZ. Tamién los llibros mercaos a Amazon caltienen DRM colo que nun puedes usalos n’otros llaos (colos documentos que tú metas nun hai nenguna restricción).
4. Viola la GPL col sistema operativu Linux qu’usa. Imperdonable.

   

Sobro llibros electrónicos en xeneral

• Importante al mercar un ebook: Yo aconseyo totalmente una pantalla de 6″ y non una de 5″, la diferencia de tamañu ye pequeña, pero la diferencia pa lleer grande 😉 Tamién hai dalgún ebook con pantalla LCD, lo desaconseyo totalmente, ya que lo meyor que tienen los ebooks ye la teunoloxía de tinta electrónico E-ink, una LCD nun ye ni por asomo lo mesmo, que nun vos engañen 😉

• Baxar llibros de baldre: Remembrando ante too que compartir llibros ye llegal, equí tienes d’onde baxar llibros pa cualesquier ebook que tengas:

1. Libroos. Foru con llibros mui recientes. De lo meyor.
2. Feedbook. Convierte Feeds de webs a documentos pa ebooks.
3. Todoebooks. Por lotes.
4. Vagos.
5. ExVagos.
6. La Biblioteca Oculta de Mr. Williams. Bestsellers.
7. Librosintinta.
8. Warez-BB. Si quies llibros n’inglés, guetalos equí.

• Tirón d’oreyes a les editoriales (asturianes): Pa variar, en llugar de  triunfar vendiendo nel mediu del futuru y posicionandose con idegues innovadores, tienen el miéu de que-yos pase cómo a la música y se pirateen los sos llibros, nun existiendo nengún ebook n’asturianu pa mercar. Voi dici-yos daqué bien claro: Préstame la música folk, comparto música y la baxo de baldre dende Internet, pero merco los CDs orixinales de los grupos bonos que me gusten (obviamente nun tola música me gusta o tengo 10.000 € pa gastar n’ella). Pero dende agora nun pienso lleer/mercar más llibros en papel, y si nun tengo llibros n’asturianu en formatu electrónico, pues nun los voi lleer. Si una editorial saca un llibru bono y más baratu (nun gasten lo mesmo n’imprentar un llibru qu’en mandatelo en PDF) venderán 😉 Dexovos dalguna perbona opinión al respeuto:  Carta a los editores de libros de texto y No nos quieren vender ebooks.

Si te queda dalguna dulda más, intentaré resolvela nos comentarios 🙂