Fondos d’escritoriu rodantes

UBUNTU FÁCIL

Magar qu’Ubuntu yá trai en Karmic un fondu de pantalla rodante (con imáxenes del espaciu), güei vamos falavos de DRAPES.

DRAPES, ye un xestor d’imáxenes pal fondu d’escritoriu que fai que les nueses imáxenes vayan camudando cada ciertu tiempu. Namás hai qu’indicar la carpeta na que tenemos les imáxenes y el tiempu de duración de cada una y llisto! Ta integráu perfeutamente en GNOME, y la so instalación ye percenciella. Abrimos la terminal en Aplicaciones–>Accesorios–>Terminal y na ventana que se abre escribimos:

sudo apt-get install drapes

Y dempués del procesu d’instalación, alcontraremos l’aplicación en: Sistema–>Preferencies—>Desktop Drapes

Decatáivos qu’abriráse un iconu arriba a mandrecha, que vos indica que’l programa yá ta funcionando:

Calcando col botón esquierdu del mur enriba del iconu y escoyendo les preferencies, podemos axustar les opciones comu nos preste. 😀

Pel momentu, Canonical entá nun unvía les traducciones n’asturianu, y saldrános n’inglés. Si tais naguando por tenelu n’asturianu, descargái ésti ficheru: drapes.mo y tenéis que metelu dientro de la carpeta

/usr/share/locale-langpack/ast/LC_MESSAGES

…alcordáivos de facelo con permisos d’alministrador o root. A estes altures yá tendríeis que saber cómu se fai, pero por si acasu, y pa los que sois nuevinos voi desplicalo otra vegada:

CÓMO COPIAR UN FICHERU DIENTRO D’UNA CARPETA CON PERMISOS DE ROOT:

Abrimos una terminal en: Aplicaciones–>Accesorios–>Terminal

na ventana de la terminal que s’abre escribimos:     gksudo nautilus

y na nueva ventana que s’abre, vamos a la carpeta au queremos copiar el ficheru. Una vegada na carpeta que queremos, ye namás arrastrar el nuesu ficheru, a esa carpeta. Zarramos y llisto.

Qu’esfrutéis 😀

NOTA: pa desinstalar el programa DRAPES, facéis lo mesmo que pa instalalu, pero escribiendo:

sudo apt-get remove drapes

😉

2 comentarios al rodiu de “Fondos d’escritoriu rodantes”

  1. Raposu Blancu diz:

    ¡Muches gracies! Seguru que la mi novia vos lu agradecerá muchu, nu prestále el que vien predefiníu jaja.

  2. astur diz:

    Nun escaezas descargar el ficheru de traducciones n’asturianu (drapes.mo). Nel artículu tienes puestu l’enllaz pa descargalu. 😀 Y tampocu escaezas facelo con permisos de root, sinón, el sistema nun va a dexate copiar el ficheru na carpeta 😀