Ayer foi otru día de satisfacción pola esperiencia con Edubuntu.

La instalación ficimosla nel telecentru de Sama (gracies Eloy pol sofitu! otra vegada 😉 ) sobro equipos con Windows XP y 480 MB, onde instalamos Virtualbox, copiamos una imaxe d’Edubuntu asignando-y sólo 180 MB de memoria (portándose perbien Edubuntu pa esa cantidá de memoria), y afitamos pantalla completa ¡voalá! L’ordenador engaña y parez que temos ante un Edubuntu real (non virtualizáu baxo Windows). Quisimos que fuere asina, porque nun yera plan particionar ordenadores que nun son de nós, y nes escueles lo más normal será que tengan Windows y tampoco dexen particionar pa instalar Edubuntu. Con esti métodu qu’esplicaremos nun post más alantre, podrás instalar ensin particionar 😉

Lluéu llegaron los neños/es, y la verdá que ye ablucante lo bien que se-yos da les nueves tecnoloxíes a los rapacinos/es 😛
Quiero recalcar que si a un neñu/a das-y un entornu dafechu n’asturianu, cola xente alrodiu falando-y n’asturianu y l’ordenador n’asturianu, el neñu/a fálate dafechu n’asturianu, de manera natural. Ye un esponxa que s’adapta al mediu perrápido 😀

Tamién vinó Próspero Morán a grabanos, y podreís ver la esperiencia nun programa de “Nós” de la RTPA 🙂

Sólo queda da-y milenta gracies a los neños/es y a sus pas/mas por venir, y permitinos demostrar que l’asturianu ye perfectamente válidu pa dar clas de cualisquier materia n’asturianu. ¡Queremos la educación n’asturianu dafechu!

Equí dalgunes semeyes:

¡Esti vienres 19 de xunu asoleyaráse Edubuntu n’asturianu!
Aprovechando la ocasión, dende Softastur fadremos una preba de clas sólo n’asturianu de varies asignatures.
Tamién somos conscientes que nes escueles tienen windows, polo que prepararemos una imaxe virtualizada d’Edubuntu, que será percienciella de poner nun ordenador con Windows, pareciendo que tien Edubuntu, y pudiendo baxala dende equí, dende’l sábadu.

Sobro les clases serán nel cibercentru de Sama (Llangréu) de les Escueles Dorao, segunda planta, esti vienres 19 de xunu:

• De 18.00 a 18.40 daremos clas real a neños pequeños (ente 3 a 6 años) de conocimientu del mediu, nel sentíu de manexar un mur, un tecláu, xuntar formes, facer cuentes básiques…

• De 18.45 a 20.00 daremos clas real a neños ente 7 a 11 años, dando matemátiques, inglés, informática y xeografía n’asturianu con Edubuntu.

Los profesores serán docentes que falarán n’asturianu y usarán Edubuntu n’asturianu como aida na so impartición de la materia 🙂

Tas invitáu/ada a venir, tamién convidamos a quien quiera trayer neños/es ente 3 a 11 años, quien quiera venir a dar clas, facer un estudiu sobre los resultaos de l’actividá, o venir a conocer Edubuntu 🙂

¡Un saludu y vemonos!

Nos últimos meses dalgunos gobiernos europeos, ente ellos el d’España y especialmente Francia, tan xugando cola posibilidá de desconeutar d’internet a los usuarios de redes p2p.

Vamos que pretenden prohibite el usu d’una teunoloxía porque sí. Porque, pal que nun lo sepa, a parte de que nun tool mundu usa p2p pa baxar películes o música, ye completamente llegal siempres que nun saques probechu económicu.

Podíemos tar hores falando de porque se quexen cineastes que nun tienen pelicules na mula o el torrent pero bono, esi ye otru tema…

El casu ye que’l Software Llibre úfrenos otra vuelta más la lliberta teunolóxica tan necesaria anguaño, y yá disponemos del primer cliente pa Torrent que fai tresmisiones anónimes gracies a la encriptación de les conexones. Ye BitBlinder, inda ye una beta, pero yá disponen d’un deb pa Debian y Ubuntu (anque si prefieres compilar códigu ye cosa tuya…)

Google acaba asoleyar la versión alpha de Google Chrome 3, el restolador propiu (non l’alternativu de la comunidá pa GNU/Linux), y cola comodidá de ser un .deb. (remembra qu’esta versión ta enfocada a desendolcadores, nun siendo recomendable pa equipos en productivu)

Pros: Les impresiones pa ser un alpha nun pueden ser meyores, arranca na mitá del tiempu que Firefox, y va perrápidu.

Contras: La so nula integración de la interface col sistema y el tema seleicionáu. Además de nun reconocer cuando una web tien flash y entrugar por instalalo, como fae Firefox.

Respecto a la memoria RAM consumida n’execución depende del númberu de llingüetes abiertes, aunque diría que anden a la par Firefox y Chrome. Tamién tengo que dicir que lo probé en Hardy, con Firefox 3 beta 5. Sería interesante prebalu na cabera versión estable de Firefox, pa una comparación más xusta.

Resumiendo, diría que bona impresión de Chrome pa ser un alpha, y que Firefox tendrá que dir poniendose les piles p’algamar un arranque muncho más rápidu si nun quier tremar nel futuru. Tamién si Google quier ganar cuota de GNU/Linux tendrá que meyorar muncho la so integración col sistema.

Vía: OcioLinux

¡Dende güei podemos esfrutar d’Acurti.es! 😀 Un acurtiador n’asturianu.

Con esta web podemos acurtiar un enllaz, a una URL muncho más curtia.

Les ventaxes d’usar un acurtiador son estes:

• Meyor difusión de los tos enllaces reduciendo la so llonxitú.

• Nun romper los enllaces nos tos emails.

• Nun desencaxar un blog.

• Aforrar dalgunos bytes.

¡Por una educación informatizada n’asturianu de baldre con Edubuntu!

Tamos dando les caberes igües a esto:

Los escolinos y mayestros podrán dar clas n’asturianu de cualisquier materia 😉

Nunos díes, asoleyámoslo 😀 ¡Dir preparándovos, será la revolución! 😉

Facía falta un editor de gráficos vectoriales como esti na nuesa Llingua. De la mano de Softastur, vengo a davos anuncia del asoleyamientu de: INKSCAPE.

Inkscape ye un editor de gráficos vectoriales de códigu abiertu, con capacidaes asemeyaes a Illustrator, Freehand, CorelDraw o Xara X, usando l’estándar de la W3C: el formatu de ficheru Scalable Vector Graphics (SVG). Les carauterístiques sofitaes inclúin: formes, trazos, testu, marcadores, clones, entemezos de canales alfa, tresformaciones, dilíos, patrones y agrupamientos.  Puede importar formatos como Postscript, EPS, JPEG, PNG, y TIFF y esporta PNG asina como munchos formatos basaos en vectores.

…y tú con esos pelos, y un Window$ en castellanu..   😀

Más información d’Inkscape na Uiquipedia

Pásate a Ubuntu.

Ye, cenciellamente, el Toupoderosu reproductor multimedia llibre. Amarok, qu’en llingua Inuktitut (de los esquimales o inuit), significa llobu, llega a nós por fin en Llingua Asturiana. Ye multiplataforma, polo que podrás disponer d’él en cualesquier sistema operativu. Sicasí, la traducción ta namás disponible pa Ubuntu (eso que yo sepa, y la verdá, en Tapaponga tampoco nun vamos esmolecenos muncho si uses un S.O. que nun reconoz la Llingua Asturiana. Asina d’atrasaos táis…. 😀 )

Amarok ye más qu’un cenciellu reproductor d’audio, darréu que soporta de mou direutu dellos servicios d’Internet y opciones especializaes pa los melómanos que tienen grandes coleiciones de música, permite coneutase a Last.fm, puede apurrir información de los grupos y artistes dende Wikipedia, cunta con sofitu pa Podcast, en fin… la lleche!

Tienes más información d’esti super-reproductor equí, na Uiquipedia. Déxovos una captura de pantalla au se ve cómo ye l’aspeutu en llingua asturiana. Saludos. auuuUUUWW!! 😀

Nun mes más o menos finaremos Edubuntu.

Tenemos la idega de facer una preba de dar clases con Edubuntu n’asturianu de varies materies n’asturianu.
Con ello, a parte de cellebrar l’asoleyamientu d’Edubuntu n’asturianu, demostrar que la llingua ye perfectamente válida pa deprender cualisquier materia n’asturianu, dende informática, matemátiques, física…

Pa ello necesitamos que nos eches tú, un gabitu. Cuntamoste lo que pretendemos.

Nuna aula dar clas durante 1 hora (pa que los neños/es nun cansen) de varies asignatures, por exemplu 20 minutos cada una, seríen 3 asignatures, con escolinos de 6 a 11 años.

Pa ello necesitamos:

• Atopar un aula con ordenadores. Pa evitar camudar la configuración del ordenador, instalamos VirtualBox y copiamos una imaxe d’Edubuntu, cuando finemos esborramos la imaxe, desinstalamos VirtualBox y l’ordenador quedará como taba 🙂

• Atopar 3 ó 4 mayestros/es pa dar clas n’asturianu de diverses materies (sólo dará clas unos 20 minutos cada mayestru).

• Atopar escolinos d’ente 6 a 11 años, que quieran venir, y los sos pas que quieran trayelos (la clas durará sólo 1 hora).

Avisaremos a tolos medios de comunicación, y grabaremoslo enteru nós con una camara de videu pa espublizalo na rede.

¿Animeste a collaborar? Unvíanos un corréu eletrónicu  dende esti formulariu cola to propuesta, en cuantes la recibamos, pondrémonos en contautu contigo. ¡Milenta gracies!! 😀

Semeya orixinal esbillada de “La verdá ye mentira“

El Partíu Pirata Suecu algama col 7.1% de los votos 1 escañu nes Europees 😀

Dicir que ye un de los pocos partíos que firmaron el pactu pol software llibre n’Europa.

¡Perbona noticia pa la defensa de les llibertaes básiques na Rede! ¡Puxa’l Partíu Pirata!

Equí toos tan baillandooooooo… y yo cola mio pata de maeraaaaa, soi’l pirata baillón de la cerveza y roooon!! (Canciu de Boides)