Güei, mientes conducía escuchando Radiu Sele, el mio maxín entamó a ferver camientos amestaos del asturianu y la teunoloxía. Fizóme camentar na hestoria milenaria de la nuestra llingua, y como la amoldaron nel recorríu de los sieglos a la innovación na sociedá.

Nun creo equivocame si digo qu’una de les causes cimeres (¿Seique la primera?) de la situación precaria actual del asturianu ye la innovación na sociedá. Na hestoria, importantes medios aparecieron, dexando de llau a les llingües minorizaes.

Los periódicos rexonales d’Asturies (ye lo que son y a quien atienden), aculturizaron a la nuestra sociedá fasta niveles inalmisibles. Tovía remembro a mio ma retrucar que ye Argüeru‘l nome tradicional del pueblu maliayu, pero escribíase Argüero porque asina pónenlo nos períodicos. Nun la culpo, foi engañada, tracamundiando-y la realidá. El poder del tríu de periódicos por toos conocíu foi, ye y será ablucante.

La televisión, esi otru gran inventu, sirvió p’afitar lo que los periódicos entamaron. Mintiéronnos a varies xeneraciones (güelos, padres, fiyos) queriéndonos facer ver la España una y grande dende la so emisión estatal. Agora la emisión rexonal (reitero que ye lo que son), sigue los mesmos pasos, roblando la vergoña de siempre: que la llingua sólo val pa risión (encima de nós mesmos).

Ente toos estos, criaron la sociedá d’anguañu, diglósica, el pueblu del “qué más da” como diz un collaciu miu, que ta dispuesta a ver morrer la so mayor ayalga cultural heredada durante milenios porque nun son a camentar por ellos mesmos, abandonar a medios manipuladores, aculturizantes que son capaces de poner nel tronu políticu a quien quieren.

Lluchando nesti tarren, asoleyóse Radiu Sele y Les Noticies, que ficieron un papel mui importante na normalización na cai.

Lluéu popularizarónse dellos preseos electrónicos, como móviles, reloxes, GPS… que siguen confirmando too: Les llingües son inglés y les demás cuatro llingües (en númberu de falantes).

El pasáu reciente (¿1 sieglu?) ye permalu pal asturianu, arrequexáu na hestoria/sociedá de la teunoloxía. La innovación teunolóxica ye ablucante y presta pola vida, pero l’asturianu nun tien güecu ehí. Y el futuru nun parecía sinon afitar la muerte cercana. Tovía remembro la primer vegada que manexé Windows 98 y camenté que bono sería que tuviere n’asturianu… yo y los mios suaños imposibles… Too parecía apuntar a que la muerte inminente del asturianu llegaba perrápido, a falta d’adaptación a una sociedá teunoloxíca.

Nesta situación permala aparez Internet, la rede de redes, el meyor inventu de la hestoria na mio humilde opinión. La posibilidá inmensa de que cada persona espublice los sos camientos y que cualisquier persona del mundiu pueda lleela. Un periódicu por ciudadanu, como lleí una vegada.
La blogosfera n’asturianu entama tímidamente, pero espoxiga rápido, con xente qu’algama fasta güei una calidá inusitada, periódicos online, blogues, comunidaes… escriben, camienten y espublicen n’asturianu, de mena orixinal y perbién. Dan-y por primer vegada una voz al asturianu na teunoloxía.

Pero seguía habiendo un problema, teníemos un tesoru, los blogues n’asturianu, pero l’entornu yera en castellanu/inglés. Tou un problema d’integración real, debería ser una sociedá onde la teunoloxía seya dafechu n’asturianu.

¡Pero hai manín! La sociedá sigue evolucionando asgaya, nos entamos de los sistemes operativos xente perintelixente como Stallman afitó unes regles que cada vegada espoxiguen más, la llibertá y drechos del individuu sobre la so teunoloxía, esto nómose software llibre.

Un movimientu inusitáu ñació, la xente collaboró y collabora altruistamente en dalgo de baldre, desendolcadores, betatesters, tornadores, usuarios, empreses…  dando vida a lo que conocemos como GNU/Linux, alloñáu de crisis, con rexeneración automática de persones, qu’espoxiga a pasos de xigante, y apartáu de controles capitalistes/políticos. Implantando una sociedá con conocimientu y cultura llibre.

Un de los efeutos collaterales foi precisamente la posibilidá de personalización del software, pa esto ye necesario que seya llibre, ensin trabes incomprensibles de los criadores. Esto derivó a posibilitar la torna del software, que nun ye ni más ni menos que l’alma del hardware, quien diz al aparatu como furrular. N’Asturies, fae 5 años ñació Softastur, los primeros pasos tímidos dieron pasu a una pequeña comunidá con un perinmensu trabayu altruista de fondu, tornando software llibre, y enfocándose en qu’al remanar un ordenador seya posible facelo n’asturianu. Eso dió lluz a la distribución más usada nel mundiu: Ubuntu, n’asturianu. Un sistema operativu dafechu n’asturianu, de baldre y llibre.

Esto anima abondo, pero entrúgome cómo nun s’anima más xente a tornar (sólo sómos unos 20 en Softastur), a normalizar l’asturianu nes nueves teunoloxíes. ¡Necesitámoste! Ye perfácil. Anímate a poner el to granín, da-y una cyberbofetada en tola cara a los medios, a los etnocides que ríense de la nuestra cultura, que dicen que sólo val pal pueblu y ye una llingua de poco valir.

Camentando n’Ubuntu, con tol trabayu fechu detrás (y nel que queda por facer), veo lluz al final del tunel, veo al asturianu saltar un sieglu na so vida 😀 veo a la nuestra querida llingua reñacer de les cenices como un ave Fénix, y afitase como una solución válida pal sieglu XXI.

Güei, y dende fae 5 años, sé que l’asturianu vivirá, ¡porque nun vamos dexar que muerra! 😀

Esti artículu espublizóse'l 18 de Setiembre de 2009 a les 18 de Setiembre de 2009 y ta guardáu en Noticies. Etiquetes: innovación, llingua.
Puede tar al corriente de los comentarios d'esti artículu gracies al feed RSS 2.0. Los comentarios y los trackbacks tan zarraos.