Grande Richard, grande.

Entamemos pela base. ¿Cómo se define’l free software o software llibre?

Dígalo meyor n’asturianu, que nun dexa llugar a enquívocos: «Free» puede atalantase como “de baldre”, cuando de lo tratamos ye d’un asuntu de “llibertá”. Software llibre ye aquel nel que los usuarios son llibres pa executar, copiar, distribuir, estudiar, camudar y meyorar el software. Esto concrétase en cuatru llibertaes esenciales: pueden usalu pa cualesquier envís; pueden acceder al so códigu fonte pa estudiar el so funcionamientu y adautalu a les sos necesidaes; pueden distribuyir llibremente copies, y pueden meyoralu y facer públiques les meyores pa que toos se beneficien d’elles. Ye una pena que vusté use un Apple… Contién software privativu que ye tan dañible como’l de Microsoft.

¿Por qué tendría d’esmoleceme?

Porque eso failu dependiente d’Apple, que tien un poder ensembre sobro vusté y puede camudar los sos programes en cualesquier momentu que tea coneutáu a la rede. Arriendes, inclúi funciones que llenden la so llibertá, y eso ye inxusto. Tenemos de garrar el control de los nuesos ordenadores, y l’únicu mou d’algamalo ye per aciu del software llibre, que respeta la llibertá.

Atalántolo.

Un programa privativu caltién a los sos usuarios nun estáu de división ya impotencia. División porque nun pueden compartilu colos demás. Ya impotencia porque nun tienen el códigu fonte y nun pueden camudar el programa, namái aceutalu como-yos vien, como’l so desenvolvedor quixo. Nin siquier pueden pescudar qué-yos ta faciendo y eso ye enforma peligroso, porque munchos d’ellos contienen funciones dañibles p’achisbar, restrinxir ya inclusu arrebexar al usuariu.

¿Dixo arrebexar?

Sí. El so sistema operativu dexa una puerta darrera abierta a Apple pa que faiga nél lo que-y pete ensin que vusté pueda defendese. Y Apple yá tien amosao el so enclín a arrebexar a los sos usuarios cuando faen coses que nun-y presten. Enfotase nellos ye una fatada, tanto como facelo en Microsoft.

¿Nun-y paez que munchos escoyemos software privativu porque ye una opción más rápida pa entamar a trabayar?

Sí. ¡Y son fatos! ¡Nun acoriquen la so llibertá! L’usuariu que refuga de la so llibertá pagará a llargu plazu un preciu descomanáu por ello, porque Apple podrá dicí-y lo que puede y nun puede facer. Vusté enuncia un «la vida ye d’esta miente» y paez-y natural que temos somorguiaos al remanéu d’una empresa ensin valorar el costu que-y supón. Y, si se decata d’estes restricciones, nun les reconoz como resultáu de la so mala eleición d’usar software privativu, pero sonlo. ¡Y agora’l ministru de Cultura español echa un gabitu a la industria pa somorguiar a los ciudadanos!

¿Cómo?

Prohibiendo y desaniciando l’intercambéu llibre na rede y sofitando’l canon, que tendría de ser desaniciáu porque ye inxustu.

¿Propón vusté dalguna alternativa?

Trocalu por un impuestu estatal. Les perres recoyíes tendríen de distribuyise direutamente ente los músicos en función del so éxitu, magar que non nuna proporción llinial a él, sinón siguiendo una función como la de la raíz cúbica. Nun tien de ser xusto esta función, trátase de que , si un artista tien milenta vegaes más éxitu qu’otru, los sos ingresos nun seyan milenta vegaes mayores sinón diez vegaes mayores.

¿Qué ganaríemos con esta fórmula?

El dineru llegaría a munchos músicos; promoveríemos más eficientemente l’arte, que ye la única meta válida del drechu d’autor, y desaniciaríamos la SGAE y cesaríamos de sofitar a les empreses qu’arrebexen de contino escontra la nuesa llibertá. Tolos que tán n’escontra de los intercambeos con programes P2P arrebexen a la sociedá na so base, que ye l’espíritu d’aidar al to próximu, de compartir. Fexéronse enemigos de la sociedá porque sirven a les empreses: elles son el so emperador.

Entós, ¿los llibros y la música tendríen de ser tamién llibres?

Tendríen de selo les obres que tienen un usu práuticu pa la vida, como’l software, les recetes de cocina, les obres d’educación o de referencia y les fontes de carauteres pal testu. Les obras d’arte nun tán feches con esi sen práuticu, sinón p’almirales, polo que nun camiento que tengan de ser llibres. Sicasí, toos tendríemos de gociar del drechu de compartir non comercialmente copies esautes de cualesquier obra espublizada.

Tornemos al software llibre. Pongamos que quiero desfaceme de tolos programes privativos qu’hai nel mio ordenador.

¡Ye dable! Desanícielu ya instale un sistema operativu GNU/Linux.

Pero yo soi un usuariu normal, y non ún avezáu.

Eso nun tien un res que ver. Vusté ta poniéndome una torga, namás pa siguir dando vueltes al busilis.

Non, yo namái…

¡Nun ye una custión real! Un principiante nun tien porqué instalar el sistema por sí mesmu. ¿Por qué siguir el camín revexosu? Meyor siguir el cenciellu, que ye acudir a la fiesta d’instalación (install party) d’un grupu d’usuarios, au alcontrará espertos con ganes d’aidalu. Nin siquier yo m’instalo GNU/Linux por mi mesmu, porque nun ye l’aspeutu que más m’interesa. Cuando lo necesito, pido a daquién que m’eche un gabitu. Como ve, vusté namái tendría que deprender a usalu, que ye muncho más cenciello. Y nin siquier-y fai falta instalalu pa entamar a dar los primeros pasos.

¿Non?

Entame aniciando la computadora dende un CD-ROM que contenga’l sistema operativu llibre. Si más sero quier tornar al so sistema privativu de siempres, saque’l discu ya anicie l’ordenador como de costume. Puede facer esto tantes vegaes como-y pete. Y nel intre que tea familiarizáu col sistema y nun-y suponga munchu tiempu nin muncha molestia, acuda a una fiesta d’instalación.

Imaxine qu’un grupu de programadores tien una idea maraviyosa. ¿Por qué tendríen…?

Aguarde. ¿En qué sen ye maraviyosa? Implementala nun programa éticu sedría bono. Pero facelo baxo un sistema social inxustu ye malo, por bien de maraviyosa que seya esa idega. Tendrán que facer una eleición moral. Si escueyen el camín del mal y lu faen privativu, les funciones útiles del programa sirvirán de cebu p’atrayer a los usuarios a la engañifa de perder la so llibertá. Si escueyen el camín del bien, implementaránlu como software llibre respetando la llibertá de los demás y ufriendo daqué ético y bono a la sociedá. Pue ser que-yos lleve más tiempu desendolcalo, pero ye meyor facer un rispiu de daqué bono que muncho de daqué malo. Y si nun ye dable desendolcar un software como llibre, meyor non facelo.

Vusté entamó a trabayar en GNU en 1983. Dos años dempués Microsoft llanzaba Windows. ¿Por qué güei prevalez el sistema operativu de Bill Gates, si pa encima hai de pagar por él?

Dos razones. La primera ye que, como-y dicía enantes, munchos nun aprecien la so llibertá y cédenla ensin decatase de lo que tán perdiendo. La otra razón ye la inercia social: munches instituciones siguen empobinándose al usu de software privativu. Esto ta camudando en dalgunes rexones d’España, au les escueles migraren a software llibre.

Paecerá-y una bona noticia.

Espero qu’otres rexones sigan el so exemplu agora que se sabe que nun ye tan abegoso, que namái fai falta voluntá. Los colexos nun tienen d’enseñar a los sos escolinos a ser dependientes d’una empresa. ¡Ye como inyecta-yos drogues adictives! Por eso falamos de departamentu de «ser-viciu» educativu d’Apple y Microsoft, qu’ufren copies casi de baldre a les escueles pa xenerar la dependencia. O seya, dante la primer dosis de baldre, porque saben qu’entamarás a pagar cuando seyas adictu.

¿Ye optimista tocante al futuru del software llibre?

Nun soi optimista por natura, pero sé que dexar de lluchar asegúrate la derrota. ¿El futuru? Yo nun soi a albidralu. Depende de vós.

Fonte: Universitat Oberta de Catalunya