¡Yá disponible Ubuntu 11.04! Col nuevu entornu Unity, preséntasenos la nueva versión coles novedaes siguientes como más importantes:

• Un instalador más simple tovía. ¿Yera posible? Parez que sí 😛
• Unity: Una nueva manera d’entender l’escritoriu. Nun uses aplicaciones pa facer la to xera, simplemente xestiona la to xera. Unity destaca por algamar un escritoriu usable ensin permitir interrupciones.
• Centru de Software d’Ubuntu: Faise social, con puntuaciones, recomendaciones y redes sociales.
• Firefox 4, ¿qué dicir que nun sepas? 🙂
• Banshee ye’l nuevu reproductor de música, con nueves tiendes de música.
• LibreOffice.
• Nuevu xestor de preferencies y del sistema, accesible dende un sólo menú.
• ¡100% N’asturianu!

Puedes descargalu direutamente dende equí, equí por torrent,  entender qué ye Unity equí y los sos atayos equí.
Y remembrate que si nun te atreves a instalar, anovar o simplemente tienes duldes, taremos p’ayudate tol sábadu día 30 d’abril en FNAC (Parque Principáu).

La llingua asturiana acaba d’allugase ente les 6 llingües del mundu que tienen completada al 100% la traducción d’Ubuntu, per delantre de llingües y equipos tan importantes como’l Francés, Italianu, o Alemán.

A toos, gracies.

Enllaz a la fonte: equí

A finales d’abril del 2011 apaecerá la nueva versión d’Ubuntu, 11.04, Natty Narwhal

El sábadu 30 d’abril, AsturLiNUX, MouseTrap (Alumnos EII), Ubuntu-ast y Softastur van facer una presentación na FNAC sobre Ubuntu.

Dende les 11:00 de la mañana, y a cada hora, van amosase les novedaes más importantes de la distribución y solventarán les tos duldes. Simultáneamente van facer un taller d’instalación d’Ubuntu 11.04, que consiste n’instalar Ubuntu nel to ordenador y enseñate a remanalu, too ello de baldre. Si yá tienes Ubuntu pues anovalu nel momentu.

El programa previstu ye esti:

• Presentación: Cada hora enseñaráse qué ye Ubuntu y les novedaes más importantes de la nueva versión 11.04.

• Instalación (De 11:00 a 14:00 y 16:00 a 20:30): Instalación d’Ubuntu nel to ordenador y deprendimientu básicu, too ello totalmente de baldre. Si quies llevar el to ordenador pa instalar Ubuntu ye mui importante que sigas estos pasos.
• Party (De 14:00 a 16:00): Si ta un día soleyeru diremos a dalgún parque cercanu a xintar. Nós ponemos la bebida y tú traes dalgo pa picar y compartimos la comida ente toos.

Si quies saber los motivos de por qué usar Ubuntu, calca equí.

Si quies algamar un restolador más compactu y qu’ocupe menos, puedes activar el prestosu menú compactu, pa ello calca col botón drechu nun sitiu vacíu de la barra de Firefox, y desactiva la opción de Barra de menús.

Agora yá verás daqué como esto 🙂

Agora más que nunca, relleendo la profecía 😛

Mammon durmióse. Y la bestia resurdió enantándose sobre la Tierra, y los sos siguidores fexeron lexones. Y proclamaron nuevos tiempos y sacrificaron colleches nel fueu cola astucia de les rapiegues. Y construyeron un mundu nuevu a la so propia imaxe como prometíen les pallabres sagraes, y falaron de la bestia colos sos fíos. Mammon esconsoñó, y de sópitu, namái yera un rezagáu.

d’El Llibru de Mozilla, 11:9
(10ª edición)

Y agora, viendo la causa… ¡tu! 😀

Flash… formatu llibre con codec privativu H.264…
Si Adobe nun s’esmolez en facer un reproductor en condiciones pal to sistema operativu, el rendimientu será malísimu al ver por exemplu vídeos de Youtube a pantalla completa (En Linux sufrímoslo).
WebM afitará una web abierta gracies al potencial de HTML5. ¿Quies comprobalo? Pa ello instala Firefox 4 y activa Youtube equí pa que los vídeos nun se reproduzan en Flash sinón en HTML5 😉 ¡Vas ablucar!

Dalgo que nun ye intuitivo, pero sí fácil 🙂

Abri una Terminal dende’l menú Aplicaciones/Accesorios, y copia y pega:

sudo add-apt-repository ppa:mozillateam/firefox-stable ; sudo apt-get update ; sudo apt-get upgrade

Entamamos una batería de trucos con Firefox 4 😉 Y entamamos con una de les meyores novedaes: les llingüetes aplicación.

Son llingüetes que siempre se caltendrán abiertes, ufriendo accesu mui rápidu a les nuestres web más usaes.

Pa convertir una llingueta n’aplicación, simplemente calques col botón drechu sobre ella y seleiciones Fixar llingueta.

Y yá nos saldrá na barra de llingüetes a manzorga en Firefox:

Podemos amestar cuantes queramos: