Dalgo ta camudando en Sietes… sietesunpuebludespertos.com

Vengo d’atopame nel Planet col enllaz a un artículu de Computerworld UK nel que nos cuenten que la Bolsa de Londres (LSE), xunto cola so filial Borsa Italiana y la noruega Oslo Børs van camudar el sistema d’esplotación que veníen usando o que taben a piques d’usar.

Anguaño veníen usando’l software TradElect, basáu en Microsoft .Net, pol software MilleniumIT que funciona con GNU/Linux y Solaris. Millenium IT ta desendolcáu por una empresa desllocalizada en llocal de Sri Lanka a la que va mercar LSE por 30 millones de dólares, mientres que’l sistema d’anguaño costaba 65 millones de dólares.

Darréu d’esto, LSE va aforrase añalmente 10 millones de libres esterlines entamando dende l’exerciciu 2011/2012. Rescampla que la Bolsa de Londres nun ta n’Asturies…

(Iguao colo que nos cuenta ayalgueru)

Debemos mirar siempre a la nuestra web como visitantes. Yo odio que tando nuna web salte ensín yo provocalo una canción o ventanu emerxente, esto mesmo odíalo muncha xente, y considerase como un pésimu desendolcu/diseñu web 😉 Al igual qu’esto hai munches más cosines, que nun cuesta muncho meyorales, y que permitirán tener tamién una web/blogue de calidá en conteníu y tamién en calidá en diseñu/desendolcu:

• Nun camudes enxamás el tamañu de la ventana del restolador. Ye mui molesto. Tampoco cargues una páxina que llance otra a traviés d’un ventanu emerxente.
• Lo principal ye’l conteníu,procura que la to web té llena de conteníu de calidá y qu’esti conteníu nun té dientro d’ imáxenes.
• Nun uses testos animaos o imáxenes gif repetitives.
• Si cites otru blogue o web, enllaza a la noticia orixinal.
• Asegurate que ves  correutamente colos principales restoladores: Firefox, Chrome, IE, Opera, Safari, etc… (Nun cuntes a Internet Explorer 6 como restolador, ye la mayor morralla enxamás criada, que-y den).
• Si la web caltien música o videos, nun deben aniciase automáticamente, nin que requieran que l’usuariu tenga na especial instalao, escaez Windows Media Player, Quick Time, etc…
• Si’l rei d’una web ye’l conteníu, la restolación ye la princesina del llar. Pon precuru pa que los menús ten en testu (y non n’imaxe) y que se pueda llegar a cualisquier parte de la web a traviés d’estos menús.
• Controla’l tiempu que tarda la web en cargase, a los usuarios nun-yos gusta esperar, polo tanto fae webs llixeres.
• El flash ye un formatu zarráu, camienta muncho enantes d’embeber un videu de Youtube, el decodificador de flash d’Adobe provoca que restoladores en GNU/Linux pueden colingase cuando tienes varios videos nuna mesma web. Si la to web ta desendolcada en flash, seleiciona la carpeta onde té aloxada, calca’l botón Supr y entama una nueva. (El flash ye un cancer pa la web). Además Google indexaráte peor.
• La web tien de ser pequeña, naide va lleete 50 post siguíos. Pon na portada X post, y que l’usuariu restole p’alantre y p’atrás.
• Compreba que cada web valide colos estándares web en XHTML y CSS. Ganarás 2 coses: Lleeráse bien en tolos restoladores y Google indexaráte meyor.
• Cuida los colores del testu/fondu, nun deben mancar la vista 😉
• Si tienes un mal gustu en diseñu (como yo), usa plantilles llibres.
• Cria conteníu orixinal, fusilar otros blogues nun aporta na al de to.
• Debuxando a carboncillo deprendí que’l blancu ye más blancu si tien más negro alrodiu. Moralexa: Usa les imáxenes xustes y ten amenorgaes en tamañu, pa ocupar menos y cargar más rápido.

Dalgunes idegues dende: Josiah Cole, otres de la nuestra esperiencia.

Milenta gracies a UNA pol gabitu echáu, sofitando l’usu de software llibre nos telecentros. ¡Da gustu cuando los políticos escuchen a los ciudadanos! 😀
http://acurti.es/Sfa
http://acurti.es/Tfa
http://acurti.es/Ufa

¡Un gallifante pa UNA! ¿Dalgún más quier ún? 😉

Esti manual distribuyese baxo llicencia Creative Commons Reconocimientu-Non comercial-Compartir baxo la mesma llicencia 3.0. Más información equí. Agradeceríate tamién la torna a otres llingües que quieras facer. (Pon un comentario col enllaz ¡Gracies!).

Introducción

Equí voi esplicar cómo programar pa Ubuntu.
Fae un tiempu entamé con un proyeutu por hobby, al poco entró nos repositorios oficiales d’Ubuntu, y por defeutu en distribuciones tan importantes como Linux Mint. Sigue siendo un hobby, col que disfruto y deprendo asgaya. El mio piquiñín (ya ye como un fíu), esti proyeutu del que vos falo, ye Gufw 🙂

Cuando entamé resultóme complicao saber en que llinguaxe programalu, y les regles que tenía que siguir, polo cual, voi intentar guiate nestos puntos.

La mio eleición foi la que considero agora la meyor pa facer un programa pa Ubuntu: Python + Glade. Si te fixes, Ubuntu lleva preinstalaos munchísimos programes qu’usen esta combinación.
Python ya lu tienes instaláu n’Ubuntu (recomiendote Geany como editor de desendolcu), y Glade ta nos repositorios, asina qu’instálalu con:
sudo apt-get install glade

Agora que ya tenemos tolo que necesitabemos, vamos facer un pequeñu programa d’exemplu, un Minimonitor como’l “Monitor del Sistema” que lleva Ubuntu, pero que sólo nos amose una información: La versión d’Ubuntu que tenemos.

Vamos facelo en programación orientada a oxetos, recomiendote usar MVC (Modelu Vista Controlador), un exemplu de cómo organizar les coses tieneslu en Gufw, aunque ye meyor nun meter MVC agora pa nun lliate más.

Resumiendo, en Glade fadrémos la interface, y con Python desendolcaremos los eventos d’esa interface. La clave del desendolcu de GUIs pa GNU/Linux ye que la terminal de GNU/Linux tien una potencia ablucante, y aprovechámoslo pa unviar comandos a la terminal.
Sí, como lo oyes, una GUI (Graphic User Interface) de xestor de baxada lo que faerá ye invocar al comandu wget na terminal y garrar el resultáu, el Xestor d’anovamientos d’Ubuntu unviará comandos a la terminal de la triba “sudo apt-get….”.
Cómo ves, programar una GUI ye aprobechar la potencia d’aplicaciones de la consola. (más…)

Post perprestosu alcontráu nesta direición, tocante a les coses que se pueden facer con GNU/Linux, y que ye imposible, o mui difícil, facer en Windows o Mac

1. Anovar a la versión más nueva del SO de mou llegal y ensin pagar un (duru) euru.
2. Que la cabera versión del sistema operativu cuerra más rápido que l’anterior sobro’l mesmu hardware.
3. Instalar y usar cenciellamente interfaces gráfiques distintes si nun me presta lo que hai por defeutu.
4. Instalar 20 programes col mesmu comandu.
5. Tener tol sistema y programes anovaos automáticamente.
6. Instalar copies del SO en múltiples ordenadores ensin tener qu’esmoleceme de restricciones de llicencies o claves d’activación.
7. Regalar copies del SO y d’otros programes ensin violar lleis gubernamentales nin étiques, porque precisamente’l SO concibióse con esa idega.
8. Tener el remane completu sobro’l hardware del mio ordenador y saber que nun hai puertes traseres nel mio software que s’instalaren por compañíes con software maliciosu o inclusu pol gobiernu.
9. Usar el PC ensin necesidá d’usar un antivirus, proteición adware/spyware y nun tener que reaniciar la máquina durante meses, inclusu teniendo al día el sistema colos caberos anovamientos en seguridá.
10. Usar el mio ordenador ensin tener que desfragmentar el discu duru enxamás.
11. Prebar software, decidir que nun me presta, desinstalalu y saber que nun queda res de puxarra nún rexistru que puede afeutar al rendimiento de la mio máquina.
12. Facer un error grave qu’implique una completa reinstalación del sistema y algamar esto en menos d’una hora, gracies a que punxe tolos mios datos y programes n’otra partición aparte.
13. Arrancar nún escritoriu con efeutos visuales impresionantes nuna máquina de fai trés años… en menos de 40 segundos, incluyíu el tiempu que me lleva introducir el mio usuariu y contraseña p’aniciar la sesión.
14. Personalizar cualesquier apartáu que me preste, de mou llegal, incluyendo los mios programes favoritos. Puedo inclusu contautar colos desendolcadores pa entruga-yos coses, contribuyir con idegues, ya involucrame nel diseñu y desendolcu de software si quiero.
15. Tener cuatro o más ventanes d’un procesador de testos, escuchar música, rabilar con efeutos visuales d’escritoriu, tener contautu con una comunidá d’usuarios fantástica y tener Firefox, mensaxería nel intre y veceros de correo, tou abierto al mesmu tiempu, ensin tener que pedi-y a naide que m’igüe un fallu pa facer que’l mio SO furrule ensin facer que vaya tan sele que nun valga un res.
16. Usar comandu ‘dpkg –get-selections > plg-list’ pa tener una llista ensembre y detallada del software que tengo instaláu, facer copies de seguridá de los mios direutorios /etc y /home nuna partición aparte y ser quien a recuperar el sistema en cuaeslquier intre de mou cenciellu.
17. Executar dellos escritorios al empar, o dexar que dellos usuarios anicien sesión y usen l’ordenador simultáneamente.
18. Redimensionar les particiones de discu ensin tener que desaniciales y ensin perda de datos nelles.
19. Usar el mesmu hardware que fai 5 años ensin que seya necesario sustituyilu. Tengo dalgunos componentes que tienen alredor de 10 años funcionando baxo Linux y entá sirven.
20. Restolar pela web mientres s’instala’l Sistema Operativu.
21. Usar práuticamente cualesquier hardware y tener un driver incluyíu nel SO pa esi periféricu, desaniciando la necesidá d’esplorar n’Internet p’alcontrar nel sitiu web del fabricante ún afayaízu.
22. Conseguir el códigu fonte de práuticamente cualesquier cosa, incluyendo’l kernel del sistema y la mayoría de les mios aplicaciones.

Entamamos otru taller d’instalación de la nueva versión d’Ubuntu col sofitu de la Xunta pola Defensa de la Llingua Asturiana, n’Uviéu [ver mapa] 🙂

Tanto si quies instalar, como anovar el to Ubuntu, trai l’ordenador, y facemóstelo de baldre.

Remembra qu’Ubuntu cumple esto y muncho más:

• N’asturianu (Integraes ḷḷ y ḥ).
• Ye “Linux”.
• Ensin virus.
• Robustu, seguru, estable, rápidu y mui cenciellu.
• Los efeutos d’escritoriu más ablucantes.
• Con Office, editor de semeyes, xuegos, multimedia…
• Programes llibres, de baldre y cenciellos.
• Puedes caltener el to sistema operativu.

Puedes saber más sobre Linux equí. Y remembra mirar esto si vas venir.

Y si nun puedes venir, n’otros países en tol mundiu tienen munchísimos talleres pa festexar l’asoleyamientu de la versión 9.10 [Ver llista].

:'( Con Ubuntu echólos  de menos… :'(

Voi instalar ún:
marquinos@marquinos-desktop:~$ sudo apt-get install virus
[sudo] password for marquinos:
Reading package lists... Done
Building dependency tree
Reading state information... Done
E: Nun pudo alcontrase'l paquete virus


jope :'( ¡Qué señaldá de los vieyos tiempos con Window$! xD

Fonte: Comentariu menéame.

Voi cuntavos una hestoria de les que te dexen murniu 🙁

Tengo un conocíu nun telecentru d’Asturies. Polo visto, fae 3 años equipáronlos con ordenadores d’ estes característiques:

• CPU Pentium IV a 3Ghz.
• 80 Gb Discu duru.
• Monitor TFT 17″
• 512 Mb RAM, ampliables a 4 Gb.
• Arranque dual con Windows XP y Ubuntu.

Cualisquier linuxeru sabe qu’esi equipu con un GNU/Linux ¡vuela! Encima pa la xera principal d’esos ordenadores: Restolar na rede.

Agora, en tiempu de crisis, el CAST (Consorciu Asturianu de Servicios Teunolóxicos, dependiente del Gobiernu del Principáu d’Asturies) tuvo la brillante idega de camudar tolos ordenadores de tolos telecentros d’Asturies,  428 ordenadores [Nota de Prensa, ¡toma .doc gubernamental!], por 400.000€ [BOE] de los contribuyentes (¿Nun valía aumentar la RAM a 1Gb por 15€ cada ordenador si ye que quieren Windows Server?).
Bono, deciden facer el cambéu, y ¡tachán! ¿Adivinais? Sí: Un sirvidor y los X ordenadores de cada telecentru con Windows, Office 2007 y antivirus (ensin arranque dual). Podeis velo nel Pliegu de Cláusules Alministratives del perfil del contratante del Principáu d’Asturies.

Si lleemos la Llei R.D11/2007 Principios Xenerales diz:
“i) Principio de neutralidad tecnológica y de adaptabilidad al progreso de las técnicas y sistemas de comunicaciones electrónicas garantizando la independencia en la elección de las alternativas tecnológicas por los ciudadanos y por las Administraciones Públicas, así como la libertad de desarrollar e implantar los avances tecnológicos en un ámbito de libre mercado. A estos efectos las Administraciones Públicas utilizarán estándares abiertos así como, en su caso y de forma complementaria, estándares que sean de uso generalizado por los ciudadanos.”
¿¿Cómo ye entós que nun Pliegu de Prescripciones Téuniques apaez el nome de varies empreses??
A todo esto, añadir tamién esto: la nota de prensa anuncia que ya ta adjudicado el contrato que, según el BOE no se adjudicaría hasta 28 días después ¿!? (Editáu a 3 d’ochobre 2009 – 11:45h. Parez que provisionalmente axudicóse’l 26 de Xunu, siendo llegal qu’apareza como axudicáu na nota de prensa, aunque ciertamente ta permal redautada).

400.000€ Tiraos a la basura. Los ordenadores qu’hai valen de sobra pa restolar per Internet 🙁

Entá ye peor, hai telecentros que yá tienen montada la rede con Ubuntu, yendo too a les mil maravíes, y ¿agora qué? Esauto, desanicialo too, y ¡toma software privativu! Nun tando permitío instalar otru sistema operativu.

Esti casu ye cafiante por estos motivos:

• Tirar un ordenador perfeutamente válidu pa la xera que tien que facer.
• ¿Qué ye eso que tanto nos venden de reciclar y reusar??? ¡Que s’apliquen el cuentu!
• Gastar perres del contribuyente n’ordenadores nuevos teniendo unos “vieyos” (3 años!!) que valen perfeutamente pa lo mesmo, y da-y perres públiques a Microsoft poles llicencies de Windows, Office y a Mcafee pol antivirus.
• La dependencia teunolóxica que creen con software privativu, muncho más agravante siendo l’alministración pública, que debería dar exemplu.
• El precuru y profesionalidá invertida en configurar una rede n’Ubuntu, pa tirar a la basura nel intre.
• Realmente’l presupuestu asignáu pal CAST ye una burrada (3,4 millones), y los telecentros parte cimera na presencia d’Internet nos pueblos, reciben cuatro perres (400.000€).
• ¿Por qué aparez nel Pliegu de Prescripciones Téuniques nomes d’empreses?
• De xuru qu’hai más motivos, ponlos tú mesmu nos comentarios.

Otru blogue que trata del tema ta equí:
http://acurti.es/ufa
http://acurti.es/vfa
http://acurti.es/wfa

Pa tremar colo que faerán colos portátiles pa primaria :S

Edición, 5 d’ochobre ’09: Amesto dende otru blogue, adelantándose perbien a la rempuesta que puedan danos: http://acurti.es/Dfa
Edición 13 d’ochobre ’09: ¡Bien por UNA! http://ff.im/9IUOp http://ff.im/9Gygo http://ff.im/9Gygs 😀

En mayu, cuando entamemos a saber que’l Gobiernu diba entregar portátiles a los neños de primaria, unvié en nome de Softastur un corréu electrónicu a la Xunta de Principáu d’Asturies, pa propone-yos charrar colos nuestros representantes políticos, y asina asesoralos de les alternatives y posibilidaes en cuantes al sistema operativu d’esos portátiles. Teníen qu’escoyer, y al menos intentar qu’escoyeren informaos.

A los 2 meses, ante la falta de rempuesta, volví a entrar na web, y nesta vegada unvié la petición pol formulariu que tienen en contautu.

Nun retrucaron a nengún de los dos.

Igual soi un gilipollas integral, camentando que diben a dignase a reúnise con nós, pero soi neciu, y al menos puxo por algamar les coses.
Si hubieren retrucao un “Acusamos recibo de su escrito…“, o siquiera un “Gracies, pero non“, daríame por conforme.

Yo, a títulu individual, intento retrucar cuanto enantes los correos electrónicos. Si fuera un políticu ya nun sería un afogín personal, sería una obligación cola mio sociedá y les persones a quien gobierno.