Una de les novedaes n’Ubuntu 10.04 ye Ubuntu One Music Store 😀 ¿Qué ye eso? Pues ye como un iTunes pa Ubuntu:

Ta perprestoso, y facilita que si te presta unes canciones, puedas mercales de manera rápida y fácil, a perbona calidá (256 kbps) y ensin DRM 😀

… pero…. 😉 ¡¡¡¡nun hai música asturiano!!!! 🙁 Asina que vamos investigar cómo pueden los nuestros perbonos grupos musicales xubir la so música pa vendela a esta tienda y ganar perres con ello 🙂

Pa ello, lleemos equí, que tienen que contautar con una compañía de distribución dixital:

• ioda
• The Orchard
• FUGA
• CI
• D23

Al incluyir esta compañía’l discu nel so catálogu, amosarase n’Ubuntu One Music Store 😉 Asina que si conoceis a dalgún músicu, avisa-ylos, ganaremos toos 😀 ¡Puxa Ubuntu y puxa la musica asturiano! 😀

¿Y tovía quies más? La mitá de les ganancies d’esta tienda online será donao a la conservación del llince ibéricu 😀 ¿Por qué’l llince? Porque ye Ubuntu Lucid Lynx 🙂 La prósima a ver si ye Mystic Mur xD

El LoCo Team d’Asturies pasa a tener nueva web y un nome más claru: Comunidá Asturiana d’Ubuntu 😀

Na nueva web dispondrás de los recursos pa coordinanos ente toos y esparder l’usu d’Ubuntu n’Asturies 😀 ¡Afayate!

Ayeri freshclam, l’anovador de les definiciones de virus de ClamAV descargó un ficheru nomáu daily.cvd 10938 que daba fallu de segmentación en toles versiones de ClamAV anteriores a la 0.96 nos sistemes de 32 bits.

En 15 minutos apaeció una nueva definición, daily.cvd 10939, qu’iguaba esti problema. Sicasí, hai una posibilidá de que nes versiones de 32 bits d’Ubuntu 9.10 y anteriores el serviciu clamd yá nun tea executándose.

Pa sabelo, nun Terminal executa el comandu darréu:
ps aux | grep clam
Y tienen d’apaecer unes llinies asemeyaes a estes:
xuacu@nuberu:~$ ps aux | grep clam
clamav 2662 0.0 0.1 11960 1028 ? Ss 01:31 0:00 /usr/bin/freshclam -d --quiet
clamav 4314 0.1 13.1 149688 134552 ? Ssl 01:50 0:05 /usr/sbin/clamd
xuacu 7757 0.0 0.0 4416 880 pts/0 S+ 03:13 0:00 grep --color=auto clam

Esto ye, una d’elles (la segunda, nesti casu) tien d’amosar que ta executándose /usr/sbin/clamd. Si nun ye asina, habrá que reaniciar el daemon cola orde darréu:
sudo /etc/init.d/clamav-daemon restart

Y más nada qu’el enllaz al avisu en versión orixinal:
http://lurker.clamav.net/message/20100507.110656.573e90d7.en.html

Ubuntu Women

El Grupu de Muyeres d’Ubuntu, coincidiendo col día mundial de los xuegos, convoca un concursu de semeyes de neñes xugando con [K/L/X…]Ubuntu.

Participar ye percenciello:

• Sacar una semeya d’una neña (fasta 12 años) xugando con cualesquier versión d’Ubuntu.
• Descargar y roblar esti permisu y llicencia pa poder usar la semeya.
• Unviar la semeya y el permisu como axuntos nun corréu a estes señes enantes del 14 de mayu a les 23:59 UTC

Los premios nun tan mal… sicasí, lo importante ye xugar.

Y, yá que tamos, nel Wiki d’Ubuntu Women necesiten que-yos echen un gabitu pa tornalu ¿Dalguna s’anima a collaborar? Nun digan que nun hai sal enes moces d’esti pueblu 🙂

Fasta agora nun había nenguna manera bona d’unviar emails usando la web de Gmail.

Na nueva versión d’Ubuntu 10.04 Lucid, si instales el programa Desktop Webmail dende’l Centru de software d’Ubuntu (Menú Aplicaciones), aparezte una nueva opción como llector de corréu na ventana de Programes Preferíos: Desktop Webmail.

Si la seleiciones, a partir d’agora al unviar una páxina, calcar en Firefox sobre un email… vas unvialu usando la web de Gmail, Hotmail, Yahoo! o Zoho 😀

Ubuntu Open Week

Durante toa esta selmana van tener llugar una serie de charres en llinia tocante a dellos aspeutos d’Ubuntu (desendolcu, Ubuntu One, trabayu colos upstream, bugs,…)

Les charres van tener llugar nes canales #ubuntu-classroom y #ubuntu-classroom-chat de irc.freenode.net; sicasí, pa los que tengan instaláu Ubuntu, encamiento usar el programa Lernid, que permite ver al conferenciante nun cuadru y la charra de la clase n’otru:
sudo apt-get install lernid

Pa saber más, na wiki d’Ubuntu

Per otru lláu, tamién va haber (con otru horariu y programa) una Ubuntu Open Week en castellanu pa quienes nun s’afayen col inglés. Equí ta la información d’ello.

¡Por fin! 😀 ¡Asoleyáu Ubuntu 10.04! Y ye que la nuestra alegría nun ye pa menos: primer versión d’Ubuntu que tien TOLOS programes preinstalaos n’asturianu 😀 (resistíase la OpenOffice).

Novedaes

• Ye una LTS 😉 “Long Term Support”, con un períodu de sofitu más llargu que les versiones normales (5 años).
• Remocique de la web d’entamu de Google en Firefox n’asturianu.

• Nuevu tema gráficu ya iconos, que sustituyen al amarronáu Human, colos colores principales naranxa y berenxena, algamando un de los temes más guapos fasta agora.

• Arranque y apagáu tovía más rápidu.
• Nautilus almite doble panel.

• Ubuntu One Music Store, un serviciu de venta de música online de Canonical. Les pistes serán en MP3, ensin DRM y con un bitrate de 320kbps.

• Memenu: un nuevu menú d’estáu del usuariu que tien como oxetivu integrar nel escritoriu Ubuntu les redes sociales qu’usemos (Twitter, Facebook, Identi.ca, etc.).

• Amestáu Gwibber, una aplicación d’escritoriu de microblogging.

• Amestáu Gbrainy, un perbon xuegu pa da-y al cocu.

• Amestáu Pitivi, pa edición cenciella de videos.

• Amestáu SimpleScan, por XSane ¡escanear agora ye perfácil!

• Desaniciáu de la instalación por defeutu GIMP (Puedes instalalu perfácil dende’l Centru de Software d’Ubuntu).
• Manual d’Ubuntu pa usuarios nuevos en abondes llingües (tamos trabayando na versión n’asturianu 😉 ).
• y les caberes versiones de los meyores programes…

Les novedaes respeuto a la nuestra llingua son:

• Meyoraes les tornes y completaos más dalgunos programes.
• Inclúi OpenOffice preinstalada n’asturianu.

Conozlu

Esti sábadu día 30 d’abril y 1 de mayu en Ribeseya, mostrámoste, instalámoste y/o anovámoste esta nueva versión d’Ubuntu 😀 ¡Ven a conocelu! Yes bienveníu/a 😉

Instálalu

Pa baxar el ficheru .iso y quemalu nun CD, puedes facelo dende equí.

Si quies pedir un CD orixinal de baldre, puedes facelo dende equí.

Si ya uses Ubuntu, puedes anovar la to versión de baldre Aunque si nun t’atreves, puedes venir al taller d’instalación en Ribeseya 😉

¡¿Qué faes que nun lu tas baxando ya??!!! ¡Esfruta d’ún de los meyores sistemes operativos, de baldre, ensin virus y además n’asturianu!

Y como siempre, cualesquier dulda o problema que tengas, apurrela nos comentarios o nos foros.

Tamién tienes les carauterístiques más relevantes, na web d’Ubuntu.

Nota: Calca en cualesquier semeya pa vela más grande.