Ta pa Ponga » 2009

Archivu 2 d'Avientu de 2009

Manifiestu “En defensa de los drechos fundamentales n’Internet”

2 d'Avientu de 2009

Última hora: Concentración escontra esta llei. Uviéu 4 Avientu a les 20.00h. Enfrente la Xunta de Principáu. Más información equí.

Cuntabalo mui bien El País por si quereis lleer la hestoria en formatu periodísticu políticamente correutu. Pa los políticamente incorreutos, les fontes son munches más. Milenta blogues, conocíos y desconocíos, protesten por un atentáu terrorista a la nuestra llibertá d’espresión n’Internet, que agora podría vese torgada cola escusa de la “salvaguarda de los drechos d’autor”.

La Llei d’Economía Sostenible sirve pa sofitar una industria obsoleta: La del CD.
Porque una llei que nun tenía nada que ver cola industria musical y audiovisual sirvió como tapadera d’una amenaza más propia d’estaos dictatoriales: zarrar servicios y sitios web ensin qu’heba un xulgáu pel mediu. Basta con que lo diga la SS (Seición Segunda) de la Comisión de la Propiedá Intelectual (designaos por un gobiernu qu’atenta escontra los drechos de los sos ciudadanos).

Si nun facemos na, tamos xugándonos la llibertá d’espresión…

Rellacionaos perinteresantes de lleer:

Alt140.
Enrique Dans (1).
Pillate un linux.
Incognitosis.
Escolar.net.
Merodeando.
Gizmodo.
BoingBoing.
Microsiervos.
Estrella Digital.
Periodistas21.
Tapaponga (Llegalidá de baxar llibros, pelis y música).
Grupu en Facebook.

Una bayura de medios dixitales y blogues n’España, ente los que s’alcuentra Tapaponga y Softastur, vienen acabantes d’asoleyar un manifiestu na defensa de los drechos fundamentales n’Internet y escontra la llei d’economía sostenible del Gobiernu qu’ufre al Ministeriu de Cultura la posibilidá torgar una páxina web ensin intervención xudicial.

Manifiestu “Na defensa de los drechos fundamentales n’internet”

Por mor de la inclusión nel Anteproyeutu de Llei d’Economía sostenible de modificaciones llexislatives que cinquen al llibre exerciciu de les llibertaes d’expresión, información y el drecho d’accesu a la cultura al traviés d’Internet, los periodistes, bloggers, usuarios, profesionales y criadores d’Internet manifestamos la firme oposición de nós al proyeutu, y declaramos que…

1.- Los drechos d’autor nun puen allugase penrriba de los drechos fundamentales de los ciudadanos, como’l drechu a la privacidá, a la seguridá, a la presunción d’inocencia, a la tutela xudicial efeutiva y a la llibertá d’espresión.

2.- La suspensión de drechos fundamentales ye y tien que siguir siendo competencia dafechu del poder xudicial. Nin un pieslle ensin sentencia. Esti anteproyeutu, a la escontra de lo afitao nel artículu 20.5 de la Constitución, dexa nes manes d’un muérganu non xudicial -un organismu dependiente del Ministeriu de Cultura-, la potestá de torgar a los ciudadanos españoles l’accesu a cualaquier páxina web.

3.- La nueva llexislación fadrá xurdir inseguridá xurídica en tol sector tecnolóxicu español, perxudicando ún de los pocos campos de desendolcu y futuru de la nuesa economía, atapeciendo la criación d’empreses, inxertando torgues a la llibre competencia y ralentizando la so proyeición internacional.

4.- La nueva llexislación propuesta amenaza a los nuevos criadores y atapez la criación cultural. Con Internet y los sucesivos avances tecnolóxicos democratizose dafechu la criación y emisión de conteníos de toa mena, que ya nun provienen prevalentemente de les industries culturales tradicionales, sinon de bayura de fontes distintes.

5.- Los autores, como tolos trabayadores, tienen drechu a vivir del so trabayu con nueves idegues creatives, modelos de negociu y actividaes asociaes a les sos criaciones. Intentar caltener con cambeos llexislativos a una industria obsoleta que nun ye a adaptase a esta nueva arrodiada nun ye nin xusto nin realista. Si’l so modelu de negociu se basaba nel control de les copies de les obres y n’Internet nun ye posible ensin vulnerar drechos fundamentales, deberíen guetar otru modelu.

6.- Consideramos que les industries culturales necesiten pa sobrevivir alternatives modernes, eficaces, creyíbles y asequibles y ayafadices pa los nuevos usos sociales, en llugar de limitaciones tan desproporcionaes como ineficaces pa la fin que dicen perseguir.

7.- Internet tien que furrular de forma llibre y ensin interferencies polítiques alitaes por seutores que van a la gueta de perpetuar obsoletos modelos de negociu ya imposibilitar que’l saber humanu siga siendo llibre.

8.- Desiximos que’l Gobiernu garantice por Llei la neutralidá de la Rede n’España, ante cualaquier presión que puea producise, como marcu pal desendolcu d’una economía sostenible y realista de cara al futuru.

9.- Proponemos una verdadera reforma del drechu de propiedá intelectual empobinada al so fin: tornar a la sociedá’l conocimientu, promover el dominiu públicu y llimitar los abusos de les entidaes xestores.

10.- Na democracia les lleis y les sos modificaciones han aprobase tres del oportunu alderique públicu y consultando enantes a toles partes implicaes. Ye inaceptable que se faigan cambios llexislativos que cinquen a drechos fundamentales nuna llei non orgánica y que trata d’otra estaya.

Esti manifiestu, fechu n´andecha por dellos autores, ye de tóos y de nengún. Si quies xunite a elli, espardelu per Internet.