Concentración en defensa de los drechos fundamentales n’Internet, escontra la Llei d’Economía Sostenible:
Uviéu Vienres 4 Avientu – 20:00 hores. Frente a la Xunta Xeneral del Principáu. [Ver mapa]
Consiguieron que cada vegada que merques un CD, un MP3, un móvil…, pagues un CANON. ¿Por qué? “Porque yes un pirata”… ensin más. Ensin xuicios previos.
- Yes un pirata y puntu. Ye gracioso que, nos xuicios que se celebren tolos díes nos nuesos xulgaos, úsense CD’s pa grabar esos mesmos xuicios. Y esos CD’s paguen el CANON. ¿Son Pirates el xuez, el fiscal, o l’abogáu?
- Les semeyes de la to neña, o del caberu viaxe que fexesti al estranxeru, feches con una cámara que mercaste (y que pagaste’l so IVA), quies atroxales nún CD, y esi CD tamién vas pagar canon.
- Los programes de Software llibre, tamién paguen canon, cuando los grabes nún CD… YES UN PIRATA. Y ensin xuicios.
Y consiguiéronlo ensin xuicios. Agora quieren qu’un “comité” (formáu polos mesmos del canon) tenga potestá pa zarrar páxines web. Tamién ensin xuiciu. ¿Quien ye naide d’esi comité pa decidir si ésta páxina o ésta otra ta cometiendo delitu? ¿Son xueces? Los sitios P2P yo úsolos pa descargar documentación, apuntes, software llibre,… non too ye música. Que tamién la hai, … y llibre.
Esi comité, ¿a quién defiende? ¿al autor, d’una obra? Tengo entendío que los autores ceden los drechos a les discográfiques. L’autor nun gana más o menos perres pel númberu de CD’s que venda, porque véndelos la discográfica, non él. O seya, que trátase de defender a les discográfiques, que paez ser que col CANON nun-yos valió. Claro, porque los grandes tienen la so propia discográfica. Los artistes “piquiñinos”, que faigan “bolos” pa ganase’l pan. Los grandes, tienen la so propia discográfica y quieren dar un únicu conciertu, y lo demás vivir de les RENTES.
Un arquiteutu, tamién ye un artista. Y nun te cobra cada vegada que mires les torres KIO, o la ponte de Sevilla de la Expo, o’l Pirulí. Pero volvamos al fechu principal: un “comité” va a decidir si les páxines han zarrase o non!! ¿Decidiránlo mentantu tomen un café? ¿Al ritmu de la música con drechos d’autor? ¿A lo xole? (Mamina, pa que me meteré yo nestos xardines… seique mañana, si nun-yos presta lo que digo nesti blogue, tamién quieran zarralu. Bono, nun me paez que puedan, porque escribo n’asturianu, que “nun ye una llingua, y nun val pa comunicase“, y entós ye como nun dicir res ¿verdá Arestegui?)
Conclusión: ¿Pa qué queremos xueces? Si van a entamar a xorrecer los comités “xusticia-moral-ciudadana” al estilu Frente de Salvación pero con Super-poderes de la xudicatura, mamina, que nos pillen confesaos.
Por too eso, mañana hai concentra en munches ciudaes del Estáu:
Concentración en defensa de los drechos fundamentales n’Internet:
Uviéu Vienres 4 Avientu – 20:00 hores. Frente a la Xunta Xeneral del Principáu.
Madrid (frente al ministerio de cultura)
Barcelona (plaça sant jaume – grupo en facebook)
…. mira’l restu equí
YO VOI.
Por favor, esparde la noticia nel to blogue, web, twitter, Facebook… ¡Gracies!
Más información equí.
