Microsoft demanda por patentes a un fabricante de productos basaos en Linux
El pexe grande arrebexa escontra’l pequeñu…. ¿Fame? ¿Miéu?
Microsoft presentó una demanda escontra TomTom, fabricante de ñavegadores GPS p’automóviles, argumentando que la empresa viola 8 patentes propiedá de Microsoft. Los preseos TomTom executen una versión del sistema operativu Linux. Microsoft asegura que Linux viola polo menos 3 d’estes patentes.
“Microsoft namái tien presentao trés demandes por patentes na so hestoria, y ésta ye la primer na que participa Linux”, dixo Horacio Gutiérrez, Vicepresidente y Conseyeru a cargu de la estaya de Propiedá inteleutual de Microsoft. Suxirió que’l códigu Open Source “nun ye’l busilis d’esta aición”.
Pela escontra, la demanda sobro patentes de Microsoft diz que TomTom ta usando software propietariu. TomTom, según Gutiérrez, desendolca productos basaos na combinación de códigu propietariu y Open Source. La Linux Foundation, pela so parte, amosó na so total disposición sobro cualesquier reclamación n’escontra de Linux. “La Linux Foundation ta trabayando n’estrecha andecha colos nuesos socios de la Open Invention Network y los nuesos miembros, y ta tresnándose pa cualesquier reclamación escontra Linux”, dixo’l direutor executivu de la fundación, Jim Zemlin nún comunicáu. “Tenemos un gran enfotu sobro les bases nes que nos sofitamos. Desafortunadamente estes reivindicaciones son un so-productu del nuesu sistema empresarial y llegal actual. Per agora tamos adicando bien de cerca la situación y tamos dispuestos a montar una defensa pa Linux, en casu de ser necesaria”.
