Estos son los 7 xinetes 😀

FIREFOX

El más afamáu de toos, y el que más usuarios tien de tolos navegadores en llingua asturiana. Competidor direutu d’Explorer, y con milenta aplicaciones. 450 millones d’usuarios en tol mundu. Pertenez a la Mozilla Foundation y los sos productos tán esperimentando un xorrecimientu vertixinosu. Multiplataforma. Navegación por llingüetes, correutor ortográficu, gueta progresiva, marcadores dinámicos, alministrador de descargues, navegación privao, navegación con xeorreferenciación, aceleración por GPU… y cómo non: n’asturianu.

CHROMIUM

Chromium ye un navegador de códigu abiertu, basáu nel códigu de Google Chrome. Estremadamente rápidu, y multiplataforma. Llicencia BSD, y sofitu pa Vorbis, Theora y códecs WebM, asina como HTML5. Disponible n’asturianu dende entamos del añu 2011.

KONQUEROR

Konqueror ye otru navegador web en llingua asturiana, y tamién un xestor de ficheros. Pertenez al proyeutu KDE, colo que podrás probalu si uses un escritoriu como por exemplu Kubuntu. Konqueror tien la carauterística que tamién alministra la navegación ente ficheros, colo que na mesma ventana, pueden visualizase conteníos en llocal y na web, gracies al sistema de llingüetes. Konqueror ye software llibre y de códigu abiertu, nació nel añu 1996, y ta disponible en llingua asturiana dende’l añu 2009

ARORA

Arora ye otru navegador en llingua asturiana, basáu en Qt y WebKit, que ye’l corazón de los navegadores Google Chrome y Safari. Tamién ye multiplataforma, colo que pues instalalu en Linux, Windows y Mac. Ye bastante llixeru, cosa que se nota al arrancar. Y tamién vio la lluz en llingua asturiana nel añu 2009. El proyeutu ta agospiáu en Google Code, y el mou de traducción ye a traviés de QtLinguist

ICEWEASEL

Iceweasel, lleva trampa. 😀 Realmente ye un fork (un deriváu) de Firefox fechu por Debian, por problemes coles llicencies d’usu de los logos de Mozilla Foundation. Pero magar que seya’l mesmu navegador con pequeños cambeos, cuenta como ún más porque incorpora munches meyores de seguridá adicionales siguiendo la política d’anovamientos de Debian, que yá sabemos cómo se les gasten esta xente…. 😀  Na versión estable pa Debian (Squeeze) tenémoslu na so versión 3.5.16 y pa tenelu en llingua asturiana, hai que facer usu de la estensión .xpi qu’espubliza Softastur

EPIPHANY

Epiphany ye un navegador qu’usa’l motor de renderizáu WebKit, pal entornu GNOME. Dempués de Mozilla 1.0 (güei renomáu a SeaMonkey) y de Firebird 1.5 (güei renomáu a Firefox) nos años 2002 al 2004, foi el siguiente navegador en tar disponible en llingua asturiana hasta la salida d’Arora (añu 2009), darréu que Firefox tuvo ensin caltenimientu hasta la versión 3.6 (añu 2010). Ye descendiente del navegador Galeón. La última versión estable d’Epiphany, asoleyóse fai 4 meses

MIDORI

Midori, ye un navegador mui, mui, mui llixeru, y multiplataforma, colo que pue instalase tanto en Mac, como Windows como Linux. Ye’l más pequeñu de toos, pero lo mesmo que’l restu, tien xestión de llingüetes, ya inclusu tien sofitu pa HTML5 y Adobe Flash. Asoleyóse en llingua asturiana tamién nel añu 2010 pa entornos XFCE, y el proyeutu alcuéntrase agospiáu en Transifex

 

…quién diba a dicítelo, eh? 😉

Puxa la llingua. Puxa pola llingua.

Esti artículu espublizóse'l 15 de Payares de 2011 a les 15 de Payares de 2011 y ta guardáu en Noticies.
Puede tar al corriente de los comentarios d'esti artículu gracies al feed RSS 2.0. Los comentarios y los trackbacks tan zarraos.