Asoleyáu Ubuntu 9.10 (Karmic Koala)
¡¡Acaba d’espublizase Ubuntu 9.10, nomatu Karmic Koala!!
Lo Nuevo
Esta nueva versión da un saltu mui grande n’usabilidá y vistosidá.
Les principales meyores respeuto la versión anterior son:
- Nuevu tema d’escritoriu (el naranxa da pasu al marrón) ya iconos, con bootscreen nuevu. Mui sobrio y elegante. Resaltar la posibilidá d’usar fondos d’escritoriu que van camudando automáticamente.
- L’asturianu como llingua pa la instalación. Tamién revisáu abondo tol asturianu del sistema, siempre siguiendo la norma de l’Academia 🙂
- Ubuntu One instaláu por defeuto, con 2 GB de baldre pa sincronizar los tos ficheros na ñube.
- Nueva aplicación p’alministrar discos.
- Centru de Software d’Ubuntu , la estrella d’esta versión, cola qu’instalar/desinstalar programes más fácil tovía.
- Nueva interface pa remanar el soníu, muncho más cenciella y seleutor pa cada aplicación abierta.
- Cambéu de Pidgin por Empathy, como cliente de mensaxería nel intre. Y les caberes versiones pa programes cómo Gnome 2.28.1, Firefox 3.5.3, Rhythmbox 12.5, y munchos más.
- Sofitu pa USB 3.0.
- Grub 2, col que poder tener un arranque gráficu.
- Anicia y apaga muncho más rápido.
- Instalación en 15/20 minutos.
- Posibilidá d’encriptación de los direutorios d’usuariu al completu.
- Páxina d’entamu de Firefox n’asturianu.
Instálalu
Pa baxar el ficheru .iso y quemalu nun CD, puedes facelo dende equí.
Si quies pedir un CD orixinal de baldre, puedes facelo dende equí.
Si ya uses Ubuntu, puedes anovar la to versión de baldre, tema que ya tratamos 🙂 Aunque si nun t’atreves, puedes venir el día 21 de payares al taller d’instalación n’Uviéu y anovamóstelu de baldre 🙂
¡¿Qué faes que nun lu tas baxando ya??!!! 😉 ¡Esfruta d’ún de los meyores sistemes operativos, de baldre, ensin virus y además n’asturianu! 😀
Agradecimientos
Tener un sistema operativu n’asturianu ye gracies al trabayu altruista de too esti equipu de Softastur, si quies formar parte ¡anímate!
albacoru, alea, AluminiuM, bertuku, Dangerous Piper, Dani, Daviz, Dinamiteru, Esbardu, Heinrich, Iñigo Varela, Jesusito, Marcos, nelo, rieḷḷu, traveseu, Vity, xa, Xandru Martino, Xandru, Xuacu y Yagüe.
¡Milenta gracies! 😀
Otros análisis equí, equí, equí y equí. Tamién tienes una perbona guía visual de les novedaes na páxina web oficial.
Incidencies
Yo mesmu m’atopé qu’anovando nun s’anovó’l Grub al nuevu kernel d’Ubuntu 9.10, apuntando al anterior kernel d’Ubuntu 9.04. L’aida de la comunidá ye la que fae a esti sistema operativu el meyor 😀
Si vos pasa que tras anovar Ubuntu 9.10 nun anicia, o va perllentu o inestable, casi de xuro que t’apuntando a un kernel que nun-y correspuende. Pa igüalo sigui-y estos pasos:
Comprobar que ye esti’l fallu:
Pa sabelo, nel arranque aparez el menú de Grub, calca “e” y entrarás na edición del Grub (esta edición perdérase nel siguiente arranque). Ehí tienes qu’apuntar al nuevu kernel, camudando’l númberu de 4 cifres dixebraes por “.” por esti númberu: “2.6.31-14”. Resumiendo ye onde veas esto:
/boot/vmlinuz-2.6.31-14
/boot/initrd.img-2.6.31-14-generic
Onde tendrás otru númberu que nun seya 2.6.31-14, y será’l que tengas que camudar por 2.6.31-14 😉
Agora arranque calcando Ctrl+B p’aniciar Ubuntu 9.10, pero apuntando al nuevu Grub.
Si too te furrula, ya sabemos onde ta’l fallu 😀 Y agora hai que facelo persistente, ye dicir, configuralu pa los siguientes arranques.
Configurar l’arranque pa siempre:
Una vegada aniciemos Ubuntu, calcamos Alt+F2, salnos una ventana y escribimos el comandu:
gksu nautilus
Nos pedirá la clave del nuestru usuariu.
Lluéu vamos al direutoriu /boot/grub y calcamos col botón drechu del mur nel ficheru “grub.cnf”, vamos a la llingüeta Permisos y dicimos que’l propietariu y el grupu puede lleer y escribir n’esti ficheru. Tamién taría bien copialu, pa tener una copia de seguridá d’esti ficheru que ye mui importante.
Agora calcamos 2 vegaes nesi ficheru p’abrilu (nos lo abrirá col Gedit), y camudamos el kernel vieyu (remembra apuntar el númberu pa sabelu agora) pol nuevu (el 2.6.31-14) en toles entraes que veamos. Grabamos y reaniciamos. Ya too debería tar perfeuto 🙂
29 de Ochobre, 2009 - 18:11
NORABONA TAPAPONGA….
Dedicao pa vos: http://www.korama.es/blog/?p=94
29 de Ochobre, 2009 - 18:16
Anovando’l sistema!! faltenme entá al rodiu de 6 hores diz esto… voi alloriar aqui delantre…
a ver si nun tengo tantos problemes como pa instalar la 9.04… si veo que tengo dalgún problema yá vos consulto pel chat, ¿d’alcuerdu?
1 saludo dende l’estremo occidente
29 de Ochobre, 2009 - 18:20
Gracies Tolbier 😉
Copiote la imaxe del Koala 😛
Xuanín, pa cualisquier problema, equí tamos.
Si necesites falar por teléfonu pa dalguna dulda/problema, avisa con un corréu priváu en http://softastur.org/contautu.php
30 de Ochobre, 2009 - 00:55
Que prestosu l’instalador y la presentación que vien darréu n’asturianu!!
Una entrugina, na semeya del alministrador de discos sal un avisu: ‘disk has many bad sectors’. A mi tamién me sal y nun sé porqué nin que tengo que facer…
Un saludín y gracies a toos pol trabayu y les hores qu’echasteis p’algamar esto!!
30 de Ochobre, 2009 - 07:59
Pues eso Rieḷḷu 😉 Que tienes el discu duru con sectores frayaos y va siendo hora que camientes en facer una copia de seguridá cuanto menos, ya que puede cascate en cualisquier momentu 😉
Realmente ye una ventaxa enorme respeuto a Windows (que nun avisa de na), y acabes con TOO frayao porque’l discu duru morrió y nun t’avisó de na.
Un saludu.
Xuanín ¿qué tal l’anovamientu? 🙂
30 de Ochobre, 2009 - 22:55
Salú xente:
Yá fice l’anovación y anque costome al principiu, dábame dellos erros que nun me dexaben continuar, yá teo Ubuntu 9.10 y toi percontentu.
Más guapu, más rápidu al apagar (préndeme más llentu), etc. Y sobre too percenciello de facer, l’anovación digo.
Ubuntu nun da más qu’allegries.
31 de Ochobre, 2009 - 03:37
3,20 de la mañana. Ubuntu 9.10 instaláu. Fue un partu un pelín dificil y pensé que acababa en cesárea (pantallazu gris y portátil que nun arrancaba, l’anovamientu pusome cardiacu!!!!). Baxé ISO, grabela, pusela nel portátil y arranqué ofreciendo unes veles a la santina. Marcho pa la cama encantáu y con dalgunes coses más clares. Que con 4 díes de experiencia linuxera ya fice la mio primera instalación (la primera primera ficieronmela unos chavales nun party en Xixón,jeje). Que la instalación desde el DVD fue demasiao rápida y senciella, hasta mosquéa (coses del subconsciente windows). Y que gracies, munches gracies pol trabayu que facéis. Saludos y bones nueches.
31 de Ochobre, 2009 - 10:25
Bones.
Daviz: Nun son fallos, ta entrugandote que quies facer coles tos configuraciones actuales 😉 Ye dicir, si quies anovar el Grub, anovar les regles d’ufw…
Chus: Pantallazu gris? Atopé una cosina, si dices que nun anove’l Grub, queda col vieyu y nun arranca. Igüase calcando “e” nel menu del Grub, y camudar los númberos de kernel a 2.6.31.14, ya arranca 😉 Lluéu editar el ficheru /boot/grub/grub.cfg colo mesmo, pa ello gksu gedit /boot/grub/grub.cfg.
En too casu, si teneis cualisquier problema o dulda, avisa-y equí ya igüavosmolo de la manera que seya (quedando en persona, per teléfonu, per email, per chat…)
Un saludu y gracies ¡valientes! 😀
31 de Ochobre, 2009 - 15:52
Primer problema cola nueva versión 9.10
Fuéseme’l soníu. Güei prendi l’ordenador y nun s’oi un res
31 de Ochobre, 2009 - 16:28
@Daviz: Botón drechu sobre l’iconu del altavoz y seleiciona “Preferencies de soníu” nel área de notificación y mira que nun heba na desactivao o mudo 😉
Tamién preba a anovar de nueves. Salieron güei unos pocos anovamientos.
Dinos que pasó colo que te digo
31 de Ochobre, 2009 - 19:37
Tuve falando con Daviz y parez que ye un problema de que desinstaló llibreríes, y quedó ensín tarxeta de soníu configurada. Yo nun se como forzar la deteción y configuración de la tarxeta actual (si dalguien lo sabe que lo diga 😉
En too casu, lo más rápido será facer una copia de seguridá de los documentos y formatear, porque siguir investigando sería como’l dichu: “Val más el collar que’l perru” 😛
2 de Payares, 2009 - 21:40
holaaa, yá vos mandé un corréu a ver si m’ayudais que tengo dalgún problema… bueno, más bien unos cuantos, resumen:
– GRUB del 9.04 -> intenté facer lo que dicís de calcar “e” en GRUB y editar el numeru de Kernel, pero nun se como se fai, asique prefiero nun rabilar nun vaya ser el demo…
– nun me funciona la pantalluca esa que tienen los portátiles pa mover el ratón…
– nun tien soníu, igual ye lo mesmo que-y pasa al compañeru Daviz y desconfiguré la tarxeta soníu…
bueno, un saludu
2 de Payares, 2009 - 22:54
Xuanín bones 😉
Toles tos incidencies (ensín soníu, llento, inestable…) apunten a que tas arrancando una versión de Kernel que nun ye la cabera, al anovar, entrugote si anovar el ficheru del grub, y caltuviste la opción por defeutu que ye dexar la que ta (yo toi escontra de que por defeutu seya esa, y non “anovar”).
Cuando arranque’l grub (ves la pantalla onde escoyer el sistema), calca “e”, y llueu camuda onde aparez el kernel (son 4 númberos dixebraos por “.”) a esti númberu: 2.6.31.14
Y lluéu creo que calques Ctrl+B p’arrancar el sistema (creo que ye Ctrl+B, ponte “boot” p’arrancalo).
Asina si te furrula, avisa, y digote como camudar pa siempre l’arranque 😉
Si nun yes a facelo, nun t’esmolezcas y avisanos otra vegada 😉
3 de Payares, 2009 - 02:44
Conseguíu!!!
agora ties de decime como fago pa ponelo que m’arranque bien… x corréu por favor que güei nun voi tar disponible en tol día…
gracies por todo, y n’horabona pol trabayu!
3 de Payares, 2009 - 14:53
todo llisto… ya consigo que m’arranque guai col 9.10 y nun hai fallu nengún: soníu activáu y todo bien.
munches gracies pol esmolecimientu. talluéu!